Markus 4

Un aandéan tumoro am watuna tatanemen méikeroz

(Mat. 13:1-9; Luk. 8:4-8)

1 # Luk. 5:1-3 Makasamé, si Yesus é mahtuzu' kasii witi tembir u louz Galilea. A méyé sé tou totoz lakez nimaréwoké wia ni Sia. Niitumo ni Sia simakéma witu u londéi u simuwa' witu un tembir u louz a rumumezla witu wo sé tou lakez itii ém witi katanaan, witu un tembir u louz. 2Lakez an tutuzu' méipahtuzu'-Na wia ni séra karia un aandéan. Wana an tutuzu'-Na, ni Sia é mahkua in téntii, 3“Talingana lé'os! Wéwéhan si mengengeroz makimeroz am watuna tatanemen. 4Karegas sia i mahkeroz, wéwéhan am watuna tatanemen méikagogoma witu un tembir u lalan. A méyé sé tumétéwél mékimulat am watuna tatanemen itii makaz nimaapu. 5Wéwéhan kasii a méikagogoma witu un tana' watu-watun, un tana'na én toyo' uman. Am watuna tatanemen itii é rengan in timoumé, pahpaan un tana'na én toyo' uman. 6Taan i simeritomé si endo, an tinanem itii é nimawelesa wo nimaperama pahpaan zéi'kan tahlous nimahmut. 7Wo am watuna tatanemen walina é méikagogoma witu un tana' tinouan an zukut menulah. I mahtoumomé am watuna tatanemen itii, an zukut menulah kangkasii éng kaselahna, a sumé'sé'la an tinanem itii makaz i nimaté, zéi'kan nimua'mé. 8Taan am watuna tatanemen walina é méikagogoma witu un tana' rembuz, timoumé totoz wangun a mua'mé. Am wua'na niupu'mé wana an tinanem itii ém wéwéhan a makateluna pulu'mé, wéwéhan a makaenemna pulu'mé wo wéwéhan kasii a makasana atusé.” 9A si Yesus kumua kasiila, “Séi si wéwéhan lunteng i mahtalinga é mahtalingama lé'os.”

10I si Yesus mengesa-ngesamokan, a sé mapulu' wo zua pahtuzu'en-Na wo sé woopira tou sé nimengiité ni Sia meligau tumoro ung kalakoan un aandéan itii. 11A mingkotla si Yesus, “Ni kamu éng kinuaanoma u méikawunipé' tumoro ung kakolanoan ni Opo Empung. Taan im wia sé tou walina, ém pahtuzu'an karia un aandéan, 12#Yes. 6:9-10 wo mamuali u méipantik witu um Pinantik Lenas in téntii:

‘Zozo' séra i mahilek, taan ni séra zéi'kan makana'u,

zozo' séra i mahtalinga, taan ni séra zéi'kan makatulap,

wo séra zéi'kan tumula'u a singkéla' wo ampungan.’ ”

Si Yesus nimapata'u ung kalakoan un aandéan

(Mat. 13:18-23; Luk. 8:11-15)

13Ang kumuala si Yesus wia sé pahtuzu'en-Na wo wia sé tou kimiité ni Sia, “Zéi'kan katulapan niou wé un aandéan itii? Sa téntu, kura kamu i makatulap an aandéan walina? 14Ung kalakoana én téntii: si mengengeroz am watuna tatanemen itii é si tou mahwoka' u Nuwu' ni Opo Empung. 15Am watuna tatanemen méikagogo witi lalan é masuat wo sé tou timalingama u Nuwu' ni Opo Empung, a méyé si tonaas né sétang a rengan méndoma u Nuwu' un taré talinga nérama. 16Am watuna tatanemen méikagogo witu un tana' watu-watun é sé tou sé timalinga u Nuwu' ni Opo Empung a rengan i sumungkul niitu karia i mahpaa-paaz. 17Taan u Nuwu' itii én zéi'kan totoz nimahmut witu un até néra wo zéi'kan nimauréma. Sa méyé u susa wo un zéha pahpaan u Nuwu' itii, ni séra é rengan in timamburila im wia si Opo Empung. 18Wo am watuna tatanemen walina a méikagogo witu un unez an zukut menulah é sé tou sé timalinga u Nuwu' ni Opo Empung, 19a méyé um paharétan tumoro ung katou-touan néra wo an eenou towo ung kawa'ilanan wo ang kapaaz walina. Niitu u nimangun u Nuwu' ni Opo Empung zéi'kan siapa torona im wia ni séra, makaz u Nuwu' itii zéi'kan nimua' witu un até néra. 20Wo am watuna tatanemen méikagogo witu un tana' rembuz é masuat wo sé tou mahtalinga u Nuwu' ni Opo Empung a sumungkul u Nuwu' itii wo ma'éman. Ni séra mahwua'mé lakez. Wéwéhan a nimua' makateluna pulu'mé, wéwéhan a makaenemna pulu'mé, wo wéwéhan kasii a nimakasana atusé.”

Un aandéan tumoro u solo

(Luk. 8:16-18)

21 # Mat. 5:15; Luk. 12:2 Ang kuan ni Yesus kasii wia ni séra, “Wéwéhan wé si tou tumutungla u solo wo keleuannala karia un tampayang kaapa izeta'nala witu u lalem un tetekelan? Zéi'kankuaa niitu én izeta'na witu um penono'tolan u solo? 22#Mat. 10:26; Luk. 12:2 Pahpaan zéi'kan siapa a méikawuni an zéi'kan maipapailek wo zéi'kan siapa a méiwuni an zéi'kan makata'uan. 23Séi si wéwéhan lunteng i mahtalinga é mahtalingama lé'os!”

24 # Mat. 7:2; Luk. 6:38 A si Yesus kumuama sumaup, “Wéhanla genang am pahtalingan niou kenu! Kuramo kamu i mahtutulap an tinalinga niou, téntumo si Opo Empung i mangun ni kamu makatulap niitu, wo ni Sia mawes wia ni kamu u lumousé niitu makaz ni kamu uli-ulit makatulap niitu. 25#Mat. 13:12, 25:29; Luk. 19:26 Pahpaan séi si mahtata'u um paaz ni Opo Empung ni sia én awesampé', taan séi si soo mahtata'u um paaz ni Opo Empung, apa uman ang kata'uanamo én éndon.”

Aandéan tumoro um watuna tatanemen un timoumé

26Ang kuan ni Yesus kasii, “Ung Kakolanoan ni Opo Empung én téntii: wéwéhan si kimeroz um watuna tatanemen witi uma. 27Im wengi ni sia én timekel wo in endo ni sia ém wongké. Um watuna tatanemen itii é simuzumé an tumoumé makaz nimarakék. Taan zéi'kan kata'uanna kura um watuna tatanemen itii i nimamualima téntu. 28Un tana' itiikan u mahwangun an tinanem mahwua'mé. Ung kataré-taré é lolona, tumondong niitu ém wakélna taré un itingna u mawuta-wuta am wua'na. 29#Yl. 3:13 Sa am wua'na orasnamo in upu'en, si mememendu itii éng kumii-kiit i sumoyou pahpaan orasnamo i mupu'.”

Aandéan tumoro um watuna totoz rintek

(Mat. 13:31-35; Luk. 13:18-19)

30Si Yesus kumua kasiila wia ni séra, “Pasuatenta karia un apa ung Kakolanoan ni Opo Empung, kaapa karia un aandéan apa kita i mapata'u niitu? 31Ung Kakolanoan ni Opo Empung é masuat wo um watuna tanemen totoz rintek#4:31 Un tatanemen tanu ang kenu, sa witu u nunuwu'en Yunani é ‘inapeos’. Um watuna én totoz rintek wo sa tumoumé ung karakékna én toro makaz teluna meter. u méikeroz witu un tana'. Um watuna itii én totoz rintek im wana am watuna wia ung kaayahan. 32Taan sa am watuna itii mémoikerozla witu un tana', niitu én tumoumé wo tumua'namé wana am péléng an tinanem wana an uma tinaneman a séndé'en. Am pangana kangkasii én tua'na taka-takazan sé tumétéwél én toro sumuut wo sumalah witu.”

33Lakez an aandéan tanu niitu, am pahpakén ni Yesus i mahtuzu' u Nuwu' ni Opo Empung wia ni séra mengiit un toro makatulapan néra, 34wo sa zéi'kan karia un aandéan, ni Sia zéi'kan mahtuzu' wia ni séra. Taan wia sé pahtuzu'en-Na, pahpakaulit-Na i mahtuzu'.

U reges repet méiento' ni Yesus

(Mat. 8:23-27; Luk. 8:22-25)

35Im wengindomo, kuan ni Yesus wia sé pahtuzu'en-Na, “Méyémo kita lumeweto.” 36An itula'u néramé sé tou lakez itii a sumakéma witu londéi u sinakéan ni Yesus, a séra mangé. Wo a londéi walina kangkasii é nimengiita ni Sia. 37Zéi'kan uré a méyé u reges repet wo a sempa' selah mahtoromé u londéi makaz un zano é mahuntepomé witu u londéi taka-takazan u londéi én tawimo mawuta un zano. 38In toro niitu, si Yesus éng kinatekelan witi muri u londéi, un ulu-Na ém witu un tetendéan. A Sia wongkéla né pahtuzu'en-Na, kuan néra, “Méster, zéi'kan pandungen-Nu wé sa kita ikaléwo'ma?” 39A si Yesus rumendaié a rekaken-Nama u reges itii, wo kumuama witu u louz, “Menesla! Mento'mola!” A mento'la u reges wo u louz én totoz nimapenesa. 40A si Yesus kumuala wia sé pahtuzu'en-Na, “Kaa kamu maindé'? Kaa kamu zéi'kan ma'éman?”

41Ni séra én totoz maindé' a mahkua si esa im wia sé walina, “Séi Sia wé, taka-takazan u reges wo u sempa' é mahtali-talinga wia ni Sia?”

Currently Selected:

Markus 4: LAITOM

Highlight

Copy