Markus 5

Si Yesus nimoho sé sétang simelaz wia si tou witi Gerasa

(Mat. 8:28-34; Luk. 8:26-39)

1A si Yesus wo sé pahtuzu'en-Na ikaayoma witi lewet u louz Galilea, witi tana' né tou Gerasa. 2Kaitumpamé ni Yesus witu u londéi, a méyé si tou sinelazan né sétang si witi pahlewengan, mémahilekan karia-Na. 3Si tou itii é mahwiti-witi pahlewengan wo zéi'kan siapa tou makawawa i mapus ni sia zozo' karia u ranté, 4pahpaan u lengen wo un a'éna é makalakezo rinanté, taan a ranté itii ém pahrepesen umana. Niitumo zéi'mo siapa tou si makawawa i mapus ni sia. 5Endo wengi ni sia ém wayaan ung kalaésan im wana a lelewengan wo wana ang kimeleng karia i mengéré-ngérét wo mahpéla' un touna in esa karia um watu.

6In zou'pé'ma an ilekennama si Yesus, a sia rengan ing kimara'ma ang kumuruzla witu u saru-sarun ni Yesus. 7A si tou itii kumérété, “É Yesus, Oki' ni Opo Empung si Totoz Rakék! Apa um pemandungen-Nu wia ni aku? Karia u ngaran ni Opo Empung, pahaléiengku, tia' pahzézéhan aku!” 8Si tou itii kimuama in téntu, pahpaan puunala niitu si Yesus éng kimuama wia ni sia, “É, sétang! Mondolé im wia si tou kenu!” 9Tumondong niitu si Yesus meligau wia ni sia, “Apa u ngarannu?”

A sia mingkotla, “U ngaranku é Legion, pahpaan ni kai é lakez.” 10Ni sia mahaléi wia si Yesus wo séra tia'mo ipahwowoho mondolé im witi tana' itii.

11Witi rété witu é lakez sé wawi karegas i mengan witi siri'na ung kimeleng. 12A sé sétang itii mahaléia wia si Yesus, “Iatumomé kai i muntepa wia sé wawi kenuma.” 13An énéala ni Yesus um pahaléien néra. Sé sétang itii é rengan i nimondolé im wia si tou itii, a muntepa wia sé wawi. A sé wawi itii rengan ing kimara'ma witu u ri'ping a mapanawu'ma witi louz, a malemesla witu. Ung kalakez né wawi ém woo zuana riwu.

14A sé mahtéiz sé wawi itii kumara'ma a makumua a nimamuali itii witi wanua tua'na wo am wanua makaliklik witu. A sé tou rengan niméyé i mémilek u nimamuali witu. 15Ni séra niméyé wia si Yesus, ileken nérama si tou sinelazan né sétang makangaran Legion itii é makarumezo, kimaraio wo ung genangna ém wanguno. Kaiilekla niitu ni séra é maindé'. 16Sé tou nimilek u nimamuali itii é simirita wia sé tou un taré mamualima wia si tou sinelazan né sétang itii wo tumoro u nimamuali wia sé wawi itii. 17A sé tou mahwiti-witi wanua itii mahlusu si Yesus i mondolé im witi tana' néra.

18I si Yesus simakéma sumaup witu u londéi, si tou sinelazan woan né sétang itii mahaléi, wo sia toro énéané ing kumiit si Yesus.

19Si Yesus én zéi'kan niménéla, taan kuan-Na wia si tou itii, “Mawurimoma witi walému, wia sé kawanuamu, wo ikuala wia ni séra péléng am winangun ni Opo Empung wia ni ko wo kura u raraatéan-Na wia ni ko.” 20A si tou itii mangé, a masumirita witi tana' pahkuan Dekapolis, péléng am winangun ni Yesus wia ni sia wo péléng ni séra é mengusi-ngusingsing.

Si kooki' ni Yairus wo si wéwéné saki

(Mat. 9:18-26; Luk. 8:40-56)

21Kumawusa niitu, si Yesus limeweta sumaup u louz karia u londéi, sé tou lakez mahtotondongané i mahéyé, a rumimbungla wia ni Sia. Karegas ni Sia im witi tembir u louz itii, 22a méyé si tonaas um walé peraragésan né tou Yahudi makangaran Yairus. Kaiileknama si Yesus, ni sia é rengan ing kimuruza witu u saru-sarun-Na, 23a sia mengimbali wia si Yesus, kuana, “Si kooki'ku ndo'tuu é saki tawimo maté. Sa tanu an toro, mangépé'mé witi waléku, wo izeta'mé u lengen-Mu wia ni sia wo sia toro malé'os, zéi'kan maté.” 24A si Yesus mangé karia ni Yairus. Totoz lakez sé tou mahkiité ni Sia wo mahsésé'sé'an witu u rété-Na.

25Im witu kangkasii ém wéwéhan si wéwéné si mapulu' wo zuana ta'uno zézéha im pahondolan. 26Ni sia é nimemuri-murimola wia sé dokter, makaz péléng a sangkumna é nimaapumoma. Ni sia én zéi'kan malé'os, taan u sakina éng kalousna uman taré. 27Si wéwéné itii én timalingamola an tumoro si Yesus. Niitumo, im witu un unez né tou lakez, ni sia é rimétéla witu u muri ni Yesus a sumahiza u rawisna ung karai tonton ni Yesus, 28pahpaan ni sia é mahgenangla, “Maan ni aku sumahiz umana ung karai tonton-Na, ni aku é malé'os.”

29Kaitiona ni wéwéné itii ung karai tonton ni Yesus, in toro niitukan a mento'la un zaha' mahondol wia ni sia wo un touna ém pahpendanenna i lé'oso.

30In toro niitukan kata'uala ni Yesus im wéwéhan ung kawasa u nimondola im wia ni Sia. Niitumo si Yesus liméngéma muri wia sé tou lakez itii a meligau, “Séi si simahizé witu ung karai tonton-Ku?”

31A mingkoté sé pahtuzu'en-Na, “Méster ilekela in esa, totoz lakez sé tou mahsésé'sé'an witu u rété-Mu, kaa si Méster é meligau, ‘Séi si simahizé witu ung karai tonton-Ku?’ ”

32A si Yesus mileka wia sé tou witu u liklik-Na, i menéro si simahizé wia ni Sia ing kataré. 33Si wéwéné itii én totoz maindé' wo mahgerger i nimata'ula u nimamuali wia ni sia. Ni sia méyé, ang kumuruzla witu u sinaru ni Yesus, an ipakakuanala péléng a nimamuali.

34Ang kuan-Na wia si wéwéné itii, “É oki'-Ku, um pa'émanennu u limé'os ni ko. Mangémo karia ung kaluasan witu un até, ni ko én uli-ulit lé'oso!”

35Karegaspé' si Yesus i mahnuwu', a méyé si tou witi walé ni Yairus ang kumuama, “Si kooki'mu é nimatémo. Apapé' un torona ni ko i merau-raung si Méster?” 36Taan zéi'kan pinandungla ni Yesus a méikua nérala. Ang kuan-Na wia si Yairus, “Tia'mo maindé', ma'émanola.”

37Zéi'kan iwéhé ni Yesus sé tou zozo' in esa ing kumiit ni Sia. Akaz uman si Petrus, si Yakobus wo si Yohanes si katuari ni Yakobus sé toro kumiit. 38A séra ikaayola witi walé ni Yairus, ilekena ni Yesus sé tou é riomokan, mahamé wo mahamé' karia i mahkérét. 39I nimuntepola a Sia meligau wia sé tou itii, “Kaa kamu riomokan wo mahamé'? Si kooki' itii én zéi'kan nimaté, ni sia én timekel uman!” 40Taan si Yesus é méiké'ké' néra umanla.

A séra péléng ipekiondola ni Yesus im witu. Tumondongla niitu an iwali-Nama si ina' wo si ama' ni kooki' itii, wo sé pahtuzu'en-Na sé nimahwalimé karia-Na, nimuntepa witu ung kinolo'an ni kooki' itii. 41An tionala ni Yesus u lengen ni kooki' itii, a Sia numuwu'ma, “Talita kum”#5:41 U nunuwu'en kenu é nunuwu'en né Aram. ung kalakoana, “É kooki', ikua-Kuma wia ni ko, tumoozomé!” 42In toro niitukan, si kooki' itii é rengan i rimendaié a lumampanga pahpaan si kooki' itii é mapulu' wo zuana ta'uno. Péléng sé tou nimilek u nimamualima itii é mengusi-ngusingsing. 43Ni séra én totoz sinéro'la ni Yesus, in zéi'kan toro ipengua-ngua wia si séi uman u nimamualima itii. A séra iatu-Nama i méhéla tikohon wia si kooki' itii.

Currently Selected:

Markus 5: LAITOM

Highlight

Copy