Markus 6

Si Yesus zéi'kan pa'émanen né tou Nazaret

(Mat. 13:53-58; Luk. 4:16-30)

1A si Yesus karia né pahtuzu'en-Na tumula'umé un tampa itii an ikaayola witi wanua-Na. 2Im witu un endo Sabat, ni Sia rengan i mahtuzu' witi walé peraragésan né tou Yahudi. Lakez sé tou mengusi-ngusingsing in timalingama un ipahkua-Na. Ni séra é mahliligauan, “Wisa ang kata'uan-Namé an tutuzu' kenu? Katulapan apamokala am wia ni Sia kenu? Kura kahuman Sia toro mahwangun a makakompo'en téntu? 3Zéi'kankuaa ni Sia ém bas kai uman, oki' ni Maria, wo totoz katuari ni Yakobus, Yoses, Yudas wo ni Simon? Zéi'kankuaa mahwali-wali kariata wia'i sé katuari-Na wéwéné?” Niitumo ni Sia én zéi'kan pa'émanen néra.

4 # Yoh. 4:44 Ang kuan ni Yesus wia ni séra, “Si nabi ém pahsigi'en né tou wisa uman un angéannamé, taan witi wanuana, sé katuarina wo sé witi waléna én zéi'kan mahsigi' ni sia.”

5Niitumo im witu si Yesus én zéi'kan nimanguné a makakompo'en, akaz uman limé'osé sé woopira tou saki karia in zimeta'la u lengen-Na wia ni séra. 6Ni Sia é mengusi-ngusingsing, kaa ni séra zéi'kan ma'éman.

Si Yesus nimatu sé mapulu' wo zua pahtuzu'en-Na

(Mat. 10:5-15; Luk. 9:1-6)

A si Yesus mangé mahliklik wana am wanua i mahtuzu'. 7Tawahen-Namé sé mapulu' wo zua pahtuzu'en-Na, a séra iatu-Nama tumahzuzua. Ni séra ém winéhan-Nala ung kawasa i mahwoho sé sétang. 8#Luk. 10:4-11 Ni séra ém pinerénta-Nala in tia'mo mahali apa i mahlampang, akaz uman un teken. Tia'mo mahali roti, tatahu'an am walun kaapa zoit. 9Toro i sumelopa, taan tia'mo mahali zua karai sasawelen. 10Ang kuan kasii ni Yesus, “Sa kamu tumulila witu um walé wo si makawalé é sumungkula ni kamu, mento'mola witu makaz ni kamu mondolé im witu. 11#Kis. 13:51 Taan sa wéwéhan sé soo sumungkul ni kamu wo soo tumalinga ni kamu, mondolé im witi tampa néra, itangkaré an awu witu un a'é niou, i mapagenang wia ni séra i si Opo Empung é mukum ni séra.”

12A séra mangé i mahwoka' wia péléng sé tou i ni séra é léwo'zéi' in tumula'ula a singkéla' néra. 13#Yak. 5:14 Lakez sé sétang méipahwoho néramé, wo kasii lakez sé tou saki pinahisu' néramé karia u lana wo liné'os néramé.

Si Yohanes Menanarani im winunu'

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Si kolano Herodes kasii én timalingamola an tumoro si Yesus, pahpaan u ngaran ni Yesus én ipahkua-kuamo wo wéwéhan sé mahkua, “Si Yohanes Menanarani é méitoumomé sumaup im wia sé nimaté, niitumo ni Sia ém wéwéhan kawasa i mahwangun a makakompo'en.”

15Sé walina é mahkua, “Ni Siamo si Elia!”

Wo wéwéhan kasii sé walina é mahkua, “Ni Sia é nabi, katoro né nabi im puuna.”

16Si Herodes in timalingamé niitu, ang kuana, “Zéi'kan, ni siamo si Yohanes Menanarani si pinokolangkumo un ulu, si nimatoumomé sumaup.”

17 # Luk. 3:19-20 Si Herodes é mahkua in téntu, pahpaan ni sia si nimatuma si touna i matumion si Yohanes a mapusla ni sia an iuntepa witi bui. Si Herodes nimangun un téntu, pahpaan u nimamuali karia ni Herodias, si mahayo ni Filipus, tuarina in esa, ing kinawéngnala. 18Pahpaan in toro niitu, si Herodes ém pinenéro-néro'mola ni Yohanes, in téntii, “Ni ko én zéi'kan mata'u kumawéng si mahayo ni tuarimu in esa!”

19Niitumo si Herodias éng gimenang léwo' wia si Yohanes wo mahwuwunu' ni sia. Taan ung ginenangna én zéi'kampé' kawangunanna, 20pahpaan si Yohanes ém pahsigi'en ni Herodes wo kata'uanna i si Yohanes én tou ulit wo linenas ni Opo Empung, niitumo si Herodes nimatuma sé touna i matuméiz si Yohanes. Pahpaan zozo' un aténa é nimalinganga i mahtalingamé un ipahkuamé ni Yohanes, taan ni sia é mahpaa-paaz i mahtalinga un ipahkuanamé.

21An ikaayola witu un endo wangun ni Herodias i mangun ung ginenangna. Un endo itii, i si Herodes mésta i lumé'os un endo kinatouanna. Sé kinuana é sé tou pahpuu-puuna, sé tonaas né suraro wo sé tou pahsigi-sigi'en im witi Galilea. 22In toro niitu, si raraha oki' ni Herodias nimuntepé a méhé i mahmanari. Si Herodes wo sé sakéina ém winangunnala i mahpaa-paaz. A si Herodes kumuala wia si raraha itii, “Ikuamomé apa uman ung kapaazmu, niitu én iwéhéku wia ni ko!” 23An tumiwa'la si Herodes wia ni sia, “Apa uman um pahaléiennu én iwéhéku, maanpé' ko i mahaléi u sana pahzua ung kakolanoangku, niitu én iwéhéku!”

24A si raraha itii malumigau wia si ina'na, “Apa u léwo'zéi' im pahaléiengku?”

A mingkotla si ina'na, “Mahaléiola un ulu ni Yohanes Menanarani!”

25A sia merewe-reweka i nimawurima wia si Herodes ang kumua, “Ung kapaazku, in tarékan ém pahaliné wia ni aku un ulu ni Yohanes Menanarani méizeta' witu um baki!”

26Kaitalingamé niitu, un até ni Herodes é rumara. Taan, pahpaan ni sia én timiwa'mola wo sé sakéina kangkasii én timalingala un tiwa'na itii, niitumo ni sia én zéi'kan mata'u kumélong um pahaléyen itii. 27A rengan iatunama si touna i mamokol un ulu ni Yohanes. A si tou itii rengan i mamokolé un ulu ni Yohanes si witi untep um bui. 28Si tou itii mahalimé un ulu ni Yohanes witu um baki an iwéhénala wia si raraha itii. Tumondongla niitu, a si raraha itii mahalima un ulu itii wia si ina'na. 29I sé pahtuzu'en ni Yohanes timalingama niitu, an éyé nérama un awakna a maileweng néramé.

Si Yesus i niméhé ung kanen wia sé limana riwu tou

(Mat. 14:13-21; Luk. 9:10-17; Yoh. 6:1-14)

30A sé pahtuzu'en méiatu ni Yesus maréwoké sumaup karia-Na wo mahkua wia ni Sia péléng am winangun wo a méipahtuzu' néramé. 31In toro niitu én totoz lakez sé tou sé mahsasawelané i mahéyé, taka-takazan ni séra én zéi'mo siapa orasna ing kuman, niitumo si Yesus kimuala wia ni séra, “Méyémo, kita tumampasa witi tampa zou'ma im wana am wanua wo kita toro kumana'la oki'!” 32A séra sumakéma u londéi in tumampas witi tampa zou'ma im wana am wanua. 33Taan ni séra i nimangé, lakez sé tou nimileka wo kinata'uan nérala wisa un angéan néra. A sé tou wana péléng am wanua tua'na witu, merewe-reweka ing kimiita ung katanaan, taka-takazan ni séra sé puuna méikaayola witi tampa itii taan si Yesus wo sé pahtuzu'en-Na.

34 # Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36 I simuwa'mola u londéi sinakéan néra, ilekena ni Yesus totoz lakez sé tou nimaréwok ma'ento' ni Sia. A mawiamé u raraatéan-Na wia ni séra pahpaan ni séra én tanumokan sé domba zéi'kan siapa si memimiara. A si Yesus rengan i mahtuzu' an tutuzu' lakez wia ni séra.

35I mawengimo, sé pahtuzu'en ni Yesus niméyé wia ni Sia ang kumua, “Un tampa kenu én zou'momé im wana am wanua wo zéi'mo uré é mawengimo. 36Iatumoma séra i mangé wana am wanua wo wana am wanua oki' rété wia'i, wo séra matumelesla kakanen ing kanen néra.”

37Taan si Yesus nimingkotla, “Ni kamu sé léwo'zéi' i méhé ung kanen néra!”

A séra kumuala wia ni Sia, “Apa kai léwo'zéi' i matumeles roti karia un zoit zuana atus dinar i méhé ung kanen néra?”

38Ang kuan ni Yesus wia ni séra, “Amoké ileken nioula. Pirapé' a roti wia ni kamu?”

I niilek néramola, ang kuan néra, “A roti é lima wo sé seza' én zua.”

39A sé tou lakez itii pekirumez-Nala tahsasana réwok wana an zukut. 40Séra rumumezla tahsasana réwok, wéwéhan sé sana atus wo wéwéhan sé limana pulu' tou. 41Kumawusa niitu si Yesus méndomé a roti lima wo sé seza' zua, a Sia lumoho'ma witi langit ang kumuama u makasé wia si Opo Empung, am pemété-météngen-Nama a roti itii an iwéhé-Nama wia sé pahtuzu'en-Na in iwéténg néra wia sé tou. Téntu kangkasii sé seza' zua itii é méipeméténg-Nama wia ni séra péléng. 42A séra péléng kuman makaz nimawesuh. 43Réwokené né pahtuzu'en ni Yesus péléng a roti wo sé seza' nimateza, ung kalakezna é mapulu' wo zuana lo'lo' kumuwu-kuwu. 44Sé kiman é limana riwu tou sé tuama.

Si Yesus i limampang witu um wawo un zano

(Mat. 14:22-33; Yoh. 6:16-21)

45Tumondong niitu, si Yesus rengan nimatuma sé pahtuzu'en-Na i sumakéma witu u londéi i mapuunama lumewet witi Betsaida, karegas niitu sé tou lakez ém pahatu-Nama i mawuri. 46Kumawusa niitu, ni séra matampasan karia né tou lakez, a Sia mangé witu ung kimeleng i mamengaléi. 47Im wengimo, u londéi sinakéan né pahtuzu'en-Na ém witimo unez u louz, taan si Yesus é mengesa-ngesa im witi katanaan. 48Im pahilekena ni Yesus sé pahtuzu'en-Na én zéi'mo makawawa i mahpanggayu u londéi pahpaan mahsungkul u reges, niitumo im woo jam katelu i maayah, si Yesus méyé wia ni séra mahlampangé witu um wawo un zano wo mahlalangkoi uman im wia ni séra. 49I ni séra nimileka ni Sia i mahlampang witu um wawo un zano, kuan néra ni Sia é mengingindé', a séra mengéré-ngérét, 50pahpaan péléng ni séra én totozo maindé' i nimileka ni Sia. Taan ni Sia é rengan ing kimuama wia ni séra, “Menesola! Kenu é ni Aku, tia'mo maindé'!” 51A Sia sumakéla witu u londéi karia néra, a mento'la u reges. Péléng ni séra é mengusi-ngusingsing, 52pahpaan zozo' ni séra é nimilekola u makakompo'en winangun ni Yesus tumoro u roti, taan ni séra én zéi'kampé' makatulap pahpaan ung kaketéhan un até néra.

Sé tou saki witi Genesaret liné'os ni Yesus

(Mat. 14:34-36)

53I méikaayomola witi lewet u louz, si Yesus wo sé pahtuzu'en-Na é simuwa'la witi Genesaret. 54Kaitumpa néramé witu u londéi, si Yesus é rengan i nina'ula né tou. 55A sé tou itii kumara'ma wana péléng am wanua witi tana' itii a memuléngé sé tou saki karia a sasanih néra. Wisa uman si Yesus ing katalingaan néramé, sé tou saki én ipahwali nérama witu. 56Wisa uman un angéané ni Yesus, wana am wanua, wana am wanua tua'na kaapa wana am wanua oki', sé tou saki én ipahzeta' néramé wana am pasar a mahaléi wia si Yesus, wo sé tou saki itii toro kiitané zozo' i sumahiz umana u rawisna ung karai tonton-Na. Péléng sé tou simahiza ung karai tonton ni Yesus é nimalé'os.

Currently Selected:

Markus 6: LAITOM

Highlight

Copy