Markus 7

Um perénta ni Opo Empung wo ang kinanaram né tou Yahudi

(Mat. 15:1-9)

1Sé sana réwok tou Farisi karia né woopira tou tulap un Torat, witi Yerusalem a méyé i mahilekan karia ni Yesus. 2Ileken nérama sé woopira im wia sé pahtuzu'en ni Yesus é mahlengen i mahkan taan zéi'kan zimano. Mengiit ung kinanaram né nimaopota un téntu é makati'tiren. 3Pahpaan sé tou im wia sé sana réwok tou Farisi karia né tou Yahudi walina én zéi'kan kuman sa zéi'kampé' zimano mengiit ang kinanaram, pahpaan ni séra én totoz mahkiit ang kinanaram né nimaopo néra. 4Téntu kangkasii sa séra mawurimé im witi pasar, ni séra én zéi'kampé' kuman sa zéi'kampé' limelé' mengiit ung kinanaram néra. Lakezpé' kasii ang kinanaram walina a méituzu' né nimaopo néra am pahkiiten néra, tanu a mahwo'as am pengengelepan, an tampayang wo am pakakas tambaga am wangunen.

5Niitumo, sé sana réwok tou Farisi wo sé tou tulap un Torat é meligau wia si Yesus, “Kaa sé pahtuzu'en-Nu zéi'kan mahkiit ang kinanaram né nimaopota, zéi'kan zimano i mahkan?”

6 # Yes. 29:13 A séra wingkotela ni Yesus, “Ulito u méikua ni Opo Empung mengiité si Yesaya tumoro ni kamu, é tou mahgau-gau lé'os! Wéwéhan u méipantik in téntii,

‘Sé tahsasana wanua kenu é mahlooz ni Aku karia a sumah néra,

taan an até néra én zou' im wia ni Aku.

7Zéi'kan siapa torona séra i mahongkot wo mahsigi' wia ni Aku,

pahpaan an tutuzu' ipahtuzu' néra é mengiit uman ang kinanaram né tou.’

8Am perénta ni Opo Empung én zéi'kan pandungen niou, taan ang kinanaram né tou én totoz pahkiiten niou.”

9A si Yesus kumua kasiila wia ni séra, “Ni kamu én totoz siga' in zéi'kan mahkiit am perénta ni Opo Empung, wo kamu toro rumetuk ang kinanaram niou. 10#Kel. 20:12, 21:17; Im. 20:9; Ul. 5:16 Pahpaan im puuna si Musa éng kimuamo um perénta ni Opo Empung kenu, ‘Pahsigi'ela si ama'mu wo si ina'mu’, wo ‘Séi si mahtiwa' si ama'na kaapa si ina'na ni sia é léwo'zéi' i maté.’ 11Taan ni kamu é mahtuzu' in téntii: Sa wéwéhan si tou mahkua wia si ama'na kaapa wia si ina'na in téntii, ‘Péléng am wia ni aku a léwo'zéi' in isawangku wia si ama' wo si ina' é méiragéskumola wia si Opo Empung.’ 12Karia in téntu, ni kamu én timuzu'mola sé tou in toro zéi'mo sumawang si ama'na kaapa si ina'na. 13Karia ni kamu i mahtuzu' ang kinanaram itii wia sé tou walina, ni kamu ziméi'mola am perénta ni Opo Empung. Lakezpé' kasii ang kinanaram tanu niitu am pemangu-mangunen niou.”

A mahwangun si tou i makati'tiren

(Mat. 15:10-20)

14A si Yesus tumawahmé sumaup sé tou lakez ang kumua wia ni séra, “Ni kamu péléng, tumalingama lé'os wo katulapan nioua un ikua-Ku. 15Zéi'kan a mahuntepa wia si tou a mahwangun si tou i makati'tiren, taan a mahondolé wia si tou, niitumo a mahwangun si tou i makati'tiren.” [16Séi si wéwéhan lunteng é mahtalingama lé'os!]

17I si Yesus wo sé pahtuzu'en-Na timula'umé sé tou lakez a muntepa witu um walé, sé pahtuzu'en-Na é meligau wia ni Sia tumoro ung kalakoan un aandéan méikua-Namé itii. 18A Sia mingkotla, “Maan ni kamu én zéi'kan makatulap niitu? Zéi'kan kata'uan niou wé, sa apa uman a mahuntepa witu u sumah ni tou én zéi'kan mahwangun si tou i makati'tiren, 19pahpaan a mahuntepa itii én zéi'kan nimuntepa witu un até, taan mahuntep umana witu um poot a maitia'mé witi muri?” Karia ing kimuama un téntu, si Yesus éng kimua im péléng ang kakanen én toro kanen.

20A si Yesus kumua kasiila, “A mahondolé wia si tou, niitu a mahwangun si tou i makati'tiren, 21pahpaan im witu un até né tou mahondolé péléng ang genang léwo', a sinéro' im pahmualin né zéi'kampé' kimawéng, a mahremu', a mahwunu' tou, 22a samek, an angkum, a léwo', a siga menowo, a lelo léwo' un awak, téutéu, a mahtawuruk, am wera' wo ang kimawal. 23Péléng a léwo'an itii é mahondolé witu un até ni tou wo mahwangun si tou i makati'tiren.”

Um pa'émanen ni wéwéné Siro-Fenisia

(Mat. 15:21-28)

24A si Yesus tumula'umé un tampa itii a mangé witi Tirus. I méikaayomola witu a Sia muntepa witu um walé esa, wo kasoo-Na ing kata'uanna né tou walina i ni Sia ém witu, taan ni Sia én zéi'kan mata'u i mahwuni-wuni. 25Wéwéhan taré si ina' makakooki' sinelazan ni sétang. In tinalinganamé si Yesus im wana, a sia rengan i niméyé ang kumuruzla witu u sinaru ni Yesus. 26Ni sia é mekitulung wia si Yesus i moho si sétang simelaz wia si kooki'na. Si ina' itii én tou Yunani nimatou witi tana' Siro-Fenisia.

27A si Yesus kumuala wia ni sia, “Iwayapé'la sé koki' ing kumanla makaz im wesuh, pahpaan zéi'kan wangun i méndomé u roti wo ilombo'ma wia sé asu.”

28Taan si ina' itii é nimingkoté, “Ulit, Tuang. Taan si asu si witu u lalem u méja kangkasii é mahkan an teza an ipahgogomé né koki'.”

29Ang kuan ni Yesus wia si ina' itii, “Pahpaan u méikuamumé itii, niitumo mawurimoma, si sétang itii é nimondoloma im wia si oki'mu.”

30A si ina' itii mawurima witi waléna. Mailekenna si oki'na én timekel witu un tetekelan wo si sétang é nimondoloma.

Si tou lunteng wo wowo' i liné'os ni Yesus

31Tumondong niitu, si Yesus tumula'umé un tana' Tirus. Ni séra nimangé witi louz Galilea, kimiité Sidon wo limangkoié un tana' Dekapolis. 32Im witu sé tou nimahwalima wia ni Sia si tou lunteng wo wowo'. Ni séra mahaléi wia si Yesus wo Sia zumeta' u lengen wia si tou itii. 33A si tou itii itampasé ni Yesus im wia sé tou lakez makaz ni séra zuamokan. An iuntepa ni Yesus un tutundu'-Na witu um wosona u lunteng zua masaru ni tou itii. Kumawusa niitu si Yesus rumura'ma a rumingkapa u lila' ni tou itii. 34Kumawusa niitu, karia i limoho'ma witi langit, si Yesus masenga selah ang kumua wia si tou itii, “Efata!”, ung kalakoana: “Mawukamoma!” 35In toro niitukan u lunteng ni tou itii é makatalingamo wo u lila'na én toromo ipahogé, wo um pakahnuwu'na ém wanguno. 36Si Yesus é siméro'la sé tou witu, in tia'mo mahsisirita wia si séi uman u nimamualima itii. Taan kalousna séra im pahséro'en-Na, kazou'na uman taré ni séra i mahwoka' a nimamuali itii. 37Ni séra én totoz mengusi-ngusingsing wo mahkua, “Ni Sia nimangun péléng am péléng nimawangun, si lunteng ém winangun-Na toro mahtalinga, wo si wowo' ém winangun-Na toro mahnuwu'.”

Currently Selected:

Markus 7: LAITOM

Highlight

Copy