Markus 8

Si Yesus niméhé ung kanen wia sé epatna riwu tou

(Mat. 15:32-39)

1In toro niitu, totoz lakez kasii sé tou nimaréwok witu. Pahpaan ni séra én zéi'kan siapa kanen, niitumo si Yesus timawahmé sé pahtuzu'en-Na ang kumuama, 2“Iraraaté-Kumo sé tou lakez kenu. Pahpaan teluna endomo séra i mengii-ngiit ni Aku wo ni séra én zéi'mo siapa kanen. 3Sa séra maharem an ipapawuri-Kuma, ni séra én ikawesah witi lalan, pahpaan wéwéhan sé witi zou'ma a méyé.”

4A mingkotla sé pahtuzu'en-Na, “Méster, im wia un tampa zou'momé im wana am wanua kenu, kura kita toro méhé ung kanen wia ni séra wo séra mawesuh?”

5A si Yesus lumigaula wia ni séra, “Pira ung kalakez u roti niou?”

A séra mingkotla, “Pitu.”

6An ipekirumez-Nala sé tou lakez itii witu un tana'. Tumondong niitu an éndon-Namé u roti pitu itii, ang kumuama u makasé wia si Opo Empung. Pemété-météngen-Nama a roti itii, an iwéhé-Nama wia sé pahtuzu'en-Na wo niitu maipeméténg nérama. A niitu ipeméténg nérama wia sé tou lakez. 7Ni séra kangkasii ém wéwéhan sé seza' kori' woopira. Endo-Namé sé seza' itii a Sia kumuama u makasé wia si Opo Empung, an iatu-Nama sé pahtuzu'en-Na i maméténg sé seza' itii wia sé tou lakez. 8A séra kuman makaz i nimawesuh. Tumondong niitu a réwokené né pahtuzu'en ni Yesus a roti nimateza, ung kalakezna ém pituna lo'lo'. 9Ung kalakez né tou kiman in toro niitu ém woo epatna riwu tou. A séra péléng ipekiwurima ni Yesus. 10Si Yesus rengan simakéma witu u londéi karia né pahtuzu'en-Na, a mangé witi tana' Dalmanuta.

Um pahaléien né sana réwok tou Farisi wia si Yesus

(Mat. 16:1-4)

11 # Mat. 12:38; Luk. 11:16 Tumondong niitu, a méyé sé woopira tou im wia sé sana réwok tou Farisi a mahzéi'-zéi'an karia ni Yesus. Ni séra é niméyé i mélumigau wia si Yesus i mapahsasala' ni Sia. Ni séra é mahaléi wia ni Sia i mangun u makakompo'en um witi kasendukan a méyé, i mema'wa' ni Sia.

12 # Mat. 12:39; Luk. 11:29 Tumalingamé niitu si Yesus é nimasenga selah ang kumuama, “Kaa sé tou in tarékan én totozokan i mahaléi u makakompo'en? Uli-ulit ikua-Kuma wia ni kamu, ni Aku én zéi'kan mangun u makakompo'en wia sé tou kenu in tarékan.”

13A séra itula'u-Namé, a sumakéla witu u londéi karia né pahtuzu'en-Na a lumeweta witi kasaru u louz.

Tuméga-tégam im wia sé sana réwok tou Farisi wo wia si kolano Herodes

(Mat. 16:5-12)

14Sé pahtuzu'en ni Yesus é nimaliuz umané i nimahalimé roti. Ni séra wéwéhan uman u roti esa im witi londéi. 15#Luk. 12:1 A si Yesus mapagenangla wia ni séra, “Ni kamu én totoz in tuméga-tégam wo mile-ilek im wana a ragi né sana réwok tou Farisi wo ni kolano Herodes.” 16A sé pahtuzu'en-Na mahsirita i si Méster mahkua in téntu pahpaan ni séra én zéi'kan siapa roti.

17Kata'uan ni Yesus am pahsiritan néra itii, a Sia kumuala wia ni séra, “Kaa kamu é maza'i uman in zéi'kan siapa roti? Zéi'kampé' kata'uan wo katulapan niou wé niitu? Kaa un até niou én tahlous ketéh? 18#Yer. 5:21; Yeh. 12:2; Mrk. 4:12 Ni kamu ém wéwéhan weren, kaa kamu zéi'kan makailek wo ni kamu ém wéwéhan lunteng, kaa kamu zéi'kan makatalinga? Kinaliuzan niouo wé, 19i ni Aku nimeni'a-ni'aula u roti lima an iwéhéla wia sé limana riwu tou, pirana lo'lo' u roti teza u rinéwok nioula?”

A séra mingkotla, “Mapulu' wo zuana lo'lo'.”

20Si Yesus lumigaula sumaup, “I ni Aku nimeni'a-ni'aula u roti pitu an iwéhéla wia sé epatna riwu tou, pirana lo'lo' mawuta-wuta a roti teza rinéwok nioula?”

Séra mingkotla, “Pituna lo'lo'.”

21Ang kuan-Na wia ni séra, “Zéi'kampé' kasii makatulapla kamu?”

Si tou letok witi Betsaida liné'os ni Yesus

22Tumondong niitu, si Yesus karia né pahtuzu'en-Na méikaayola witi Betsaida. A sé tou mahwalima si tou letok wia si Yesus. Ni séra mahaléi wia si Yesus in tumiona wia si tou itii wo sia malé'os. 23Tionané ni Yesus u lengen ni tou itii, an iwali-Nama si tou itii nimondolé im witu um wanua itii. Ruraala ni Yesus um weren ni tou itii an zumeta'ma u lengen-Na witu um weren ni tou itii, a lumigaula wia si tou itii, “Kura, toromo mahilek ko?”

24Si tou itii mileka witu sinaruna, ang kuana, “Ni aku é mahileka sé tou tanu uman ang kai, taan ni séra é melampa-lampang.”

25A si Yesus zumeta'ma sumaup u lengen-Na witu um weren ni tou itii, a si tou itii uli-ulit mahileko wo lé'oso wo péléng am péléng ém pahilekennamo karia im wangun. 26A si tou itii ipekiwurima ni Yesus karia ing kimuala, “Tia'mo mawuri witi wanua itii!”

Si Petrus i nimakaulit tumoro si Yesus

(Mat. 16:13-20; Luk. 9:18-21)

27A si Yesus karia né pahtuzu'en-Na mangé wana am wanua witi rété un tana' Kaisarea-Filipi. Im witi lalan, ni Sia meligau wia sé pahtuzu'en-Na, “Pahkuan né tou, ni Aku é séi?”

28 # Mrk. 6:14-15; Luk. 9:7-8 A séra mingkotla, “Wéwéhan sé mahkua: Si Yohanes Menanarani, sé walina é mahkua: Si Elia, wo sé walina kasii é mahkua: Si esaané im wia sé nabi.”

29A Sia meligau wia ni séra, “Taan sa ikiit ni kamu, ni Aku é séi?”

A mingkotla si Petrus, “Ni Komo si Mesias!”

30A séra séro'ela ni Yesus, wo séra zéi'kan kumua wia si séi uman tumoro ni Sia.

Ung kataré si Yesus nimapata'u ni Sia i maté

(Mat. 16:21-28; Luk. 9:22-27)

31A si Yesus rengan i mahtuzu' wia sé pahtuzu'en-Na i si Oki' ni Tou é léwo'zéi' i mazéha wo kasoo né pahtutu'an né tou Yahudi, né tonaas né walian wo né tou tulap un Torat, wo sé tou é munu' ni Sia, taan ni Sia é matou sumaup witu un endo katelu. 32Péléng niitu én ipahkua ni Yesus wo zéi'kan susa ing katulapan. Taan ni Sia éng kinéhongé ni Petrus rimuruhla, a Sia séro'ennala.

33A si Yesus luméngéma a mileka wia sé pahtuzu'en-Na a si Petrus séro'en-Nala, “Mangémo ko tonaas né sétang! Ni ko é mahgenang uman ung ginenang ni tou, zéi'kan ung ginenang ni Opo Empung.”

34 # Mat. 10:38; Luk. 9:23, 14:27 A si Yesus tumawahmé sé tou lakez wo sé pahtuzu'en-Na, ang kumua wia ni séra, “Séi si paaz kumiit ni Aku, ni sia én zéi'mo mahgenang ung katou-touanna in esa, masaan u salipna wo kumiit ni Aku. 35#Mat. 10:39; Luk. 17:33; Yoh. 12:25 Séi si paaz mahkelung ung katou-touanna, ni sia éng kaliongan ung katou-touan. Taan séi si kinaliongan ung katou-touanna pahpaan ni Aku wo pahpaan i mahwoka' u Nuwu' Lé'os-Ku, ni sia é makailek ung katou-touan makaz ing kauré-uré. 36Apa un torona si tou nimakailek péléng am wia ung kaayahan, taan ni sia éng kinaliongan ung katou-touanna? 37Pahpaan, apa un toro iwéhéna i sumawel ung katou-touanna?

38Pahpaan im wia sé tou zéi'kan ma'éman wo mahsingkéla' kenu, séi uman si maizang makaulit i mahkii-kiit ni Aku wo pahpaan an ipahkua-Ku, si Oki' ni Tou kangkasii é maizang pahpaan si tou itii, i ni Sia méyé sumaup karia ung kawangko'an ni Ama'-Na kinariamé né malaekat lenas.”

Currently Selected:

Markus 8: LAITOM

Highlight

Copy