Ts'etta 23
23
İbrıhımee cuna xhunaşşe Sarra k'eyxha
1Sarree vəşşe g'aye yighılle (127) sen ha'a. Məng'ee manimeena ı'mı'r hav'u. 2Sarra Kana'anne cigabışeene Qiryat-Arbee (həşde mançin do Xevron vod) qeek'a. İbrıhımee Sarrays yas avqu, geşşena.
3İbrıhım qiyk'uyne xhunaşşeysse Q'etbışisqa ark'ın, eyhen:
4– Zı vuşde yı'q'nee menne cigeençe sık'ınne gahısva qarına vorna. Zas xhunaşşe k'eyxhasın ciga massa hele, zı mana k'eyxhes.
5Q'etbışe İbrıhımıs alidghıniy qele:
6– Yişda xərna, şal k'ırı alixhxhe: ğu yişde yı'q'nee Allahee gixhxhına xərna vor, yiğna xhunaşşer yişde nyaq'vbışde inekke yugunçee k'eyxhe. Yişde neng'uscad ğu xhunaşşe k'eyxhasın ciga qiykkanas deş.
7İbrıhım oza qıxha, mane cigayne milletne, Q'etbışde ögiyl, k'yoyzarna. 8Qiyğa manbışik'le eyhen:
– Şu, zı yizda xhunaşşe k'eyxhes hiyesarxhee, zal k'ırı alixhxhe: yizdemee Tsoxarne dixes Efronus miz k'ee'e. 9Mang'vee cun ciga ç'əvexhene cigeena Maxpelayna mağara zas massa hevlecen. Hasre mang'vee vuşde ulene ögiyl man ciga zı nyaq'v haa'asva bıkırne hək'is zas massa helecen.
10Efron Q'etbışde yı'q'nee gyu'ur eyxhe. Q'etğançene Efronee şaharne akkabışisqa sabıyne gırgıne Q'etbışde ögiyl İbrıhımıs inəxdın alidghıniy qele:
11– De'eş, yizda xərna, zal k'ırı alixhxhe: zı man cigayiy maana mağara vas hoole. Yizde milletne insanaaşine ögiyl zı hele. Hoora, yiğna xhunaşşe k'eyxhe.
12İbrıhım mane cigabışde milletıs meer k'yoyzarna. 13Qiyğa mang'vee, mane cigayne milletne ögiyl Efronuk'le inəxüd eyhe:
– Hucoona ixhes, zal k'ırı alixhxhe: mane cigayna hək' zake alept'e, xhunaşşe maqa k'eyxhas.
14Efronee İbrıhımıs alidghıniy qele:
15– Yizda xərna, zal k'ırı alixhxhe: mane cigayna q'iymat yoq'ud vəş (400) nuk'rayn şekel#23:15 yoq'ud vəş (400) nuk'rayn şekel: 4,5 kilolqa ələən nuk'ra eyxhe. vobna. Man yizdeyiy yiğne yı'q'nee hucoo eyxhen karne? Qiyeele, xhunaşşe k'eyxhe.
16İbrıhımee Efronne cuvabıl k'ırı alixhxhı, Q'etbışde ögiyl Efronee uvhuyn xhinnee kar alişşu massa helenbışde g'apanıl yoq'ud vəş nuk'rayn şekel gyoodakke.
17Məxüd Mamreyne k'anedın Efronun Maxpeleedın ciga, maana mağara, maadın gırgın yivar 18şaharne akkabışisqa sabıyne Q'etbışde ögiyl İbrıhımınbı eyxhe. 19Mançile qiyğa İbrıhımee cuna xhunaşşe Sarra Maxpela eyhene cigeene mağaree k'eyxha. Mana mağara Kana'anne cigabışeene Mamree vob. Həşde mançin do Xevron vod. 20Məxüd Q'etbışe man cigayiy maana mağara İbrıhımıs nyaq'v ha'asın ciga xhinnee massa hele.
Currently Selected:
Ts'etta 23: YIQSUM
Highlight
Share
Copy
Want to have your highlights saved across all your devices? Sign up or sign in
