Ioane 11

1Na’u dubu nou paina Lasaro nou uba oroututi, Betania oopo mereri, Maria wia nou mabira Mata, neiti himia oopori. 2Maria nouri, nou namu Lasaro uba orou, ina nouri Maria’i nou Pai‐dubu diomoito adiri wia nou kono nou himia hooboito ipiritiwa. 3Mabu nouri Lasaro nirabo neewao Iesuido wade naibaha otiodoudo, naiba iaowaudo: Pai‐dubu e, taauri nouri dubu ro auwo niroi nou uba rorou. 4Ina nouri wade Iesu naibaha orowai nou naiba iaowa: Nouri temeteme koihiai temeteme biahai, nou Iehova moarito ko’uri, nouri Iehova Mere nou pai aiwaiti noudo. 5Wia Iesu auwo niro Mata wia nou nirabo wia Lasaro. 6Ina Lasaro uba korou nouro idarowai, nou hiwio neewa ataito emidio na’u batii nouowa. 7Ina nou ta’uwa dooudo, nou kitomudio mereido nouro naiba iaowa: Imo ina o’umoi Iudaiaito. 8Kitomudio mere nouido naiba iaowaumo: Rabbi e, Iudaia oubi, hiwio ata’i nouowa, akabuito ro atorutimo niroi wia ro ina araiwai nirora? 9Iesu naibaha imowameai: 12 komo ta’u na’u hiwio emidio tatora, ina dubu ata hiwio orohowa nou omodoria biahai, mabu nouri batibati pidari nouro naibaha iauri. 10Ina dubu duo orohowa nou komodoriari, mabu nouri pida noumu oa biahai. 11Nouri wade nouro naibaha iaowa wia dooudo nouro neido naiba iaowa: Imo mabu‐dubu Lasaro nou uwo rorou wia mo aino’u nou uwo batiudo itorai. 12Ina nou kitomudio mere nouido naiba iaowaumo: Pai‐dubu e, ina nou uwo rorou doo nou meaha aiwaiti. 13Ata Iesuro aiaro nou tau roihiai ina neiio aiararomomo nou karoi, nou kemidio daari uwo rorou. 14Ina nou ta’uwa Iesuro neido pakeha iaowa: Lasaro tau roihiai. 15Ina mo geii nemahebidio mo nouowa emidio biahai mabu riori, nouri rioo iraromodiomoi, ata doihabuo imo o’umoi nouido. 16Ina Toma, nou paina ata idodo Didimusi, nouro ata kitomudio mereido naiba iaowa; Imoo o’umowa nouri imo noumu naiba koroihiaimori.

17Ina nou ta’uwa Iesu da’u, nou umori Lasaro gabidi batiwa orou neewa wia neewa hiwiori. 18Wia Betania Ierusalemaudo auwowa aibori, tariwai neewatoi mile aibo. 19Wia Iudaia oubi godogodo Matara Maria‐raido naibaha o’uwaumo giopu koko iwai wade neitido iaoi mabu neiti himia namu. 20Ina nou ta’uwa Mata umodaiti Iesu ko’uwa, nou naibaha o’uro nou omotoi wia Maria motowa emidio. 21Ina Mata Iesuido naiba iaowa: Pai‐dubu e, ina ro nouowa emidiowa mo namu oihiai raihe. 22Ina doihabuo mo umori nouri nana roro Iehovaido atodoiwa, Nouro roido aiwauro‐emaai. 23Iesu nouido naiba iaowa: Ro namu ina airoroitoraidai. 24Mata nouido naiba iaowa: Mo umori nou ina aiwaroitorai, koritorai ta’ui nouowa, dooudo hiwio’i. 25Iesu nouido naiba iaowa: Movia koritorai ta’ui wia kiirori; dubu nou mo araromodiowa noupa nou oihiaiwa ina nou aiwaroitorai. 26Wia dubu nou iirowa wia mo araromodiowa, hiwio ata nou oihiai raihe. Roro araromo ine nouri? 27Nou nouido naiba iaowa: Io pai‐dubu. Moro ainararomo rovia Kerisori wia Iehova Mereri, nou batibatito aiwau‐ro’ui. 28Ina nouri wade nou daro, nou himia naveito nou naibaha o’u wia Maria nou himia nirabo, nouro sisiboito naibaha otua; nou naiba iaowa: Auwo‐dubu tau ro’uro ina ro romororo. 29Ina nouri wade nouro naibaha orovidio nou hagohagoha naibaha otoa wia nouido nou naibaha o’u. 30Ina Iesu oopoito eredea biahai; batii nouri Mataro nawai omotoi, nou nouowa emidio. 31Wia noumu kemidio Iudaia oubii, nouido giopu koko iwai wade kiao oubii, ina neiio nou hagohagoha kotoawa wia kohuowa daauriumo, nei nou dooudo naibaha orobodowaumo; neiio naiba aroumo nou gabidi batito ro’u, idebi orotoi. 32Ina nou ta’uwa Maria Iesu kemidio batito da’u nou kono mabuwa nouro naibaha omoa wia nouido naiba iaowa: Pai‐dubu e, ina ro nouowa emidiowa mo namu nou oihiai raihe. 33Nouri nou ta’uwa Iesuro idaauri nou idebi irotutiwa wia noumu ko’u Iudaia oubii idebi naibaha irotutiwaumo, nou urio miboiha emahebidio wia nou imini godogodoha iraromodiowa. 34Wia nou naiba iaowa: Tou batiwa edeaumo? Nei nouido naiba iaowaumo: Pai‐dubu e, ta’uro eauri. 35Ina Iesu idebi naibaha orotowa. 36Nouri Iudaia oubio naibaha iaowaumo: Ta’aurimo taiba nou auwo niro nou. 37Wia nei amidao naibaha iaowaumo: Ina nouvia umori idomai tato dubu mea owai, nouvia umo tatora dubu nouri oihiai tore kadohiomaii? 38Nouri Iesu nou heraha omovioruriowa nou gabidi batito naibaha o’uro; nou akabu uuwari wia uu puruo akabuito omopaumo. 39Iesu naiba iaowa: Tatateaimo akabui. Mata, koihiai dubu mabira, nouido naiba iaowa: Pai‐dubu e, doihabuo nou nibo ubari mabu nouri nou koihiai hiwio neewa neewari. 40Iesu nouido naiba iaowa: Moro roido aro tato noua, Ina ro iraromodio rovia Iehova moari airemeauridai? 41Ina nou ta’uwa akabu neiio naibaha otateaumo, koihiai dubu korou batiudo. Wia Iesu nou himia idomai naibaha iarovia naiba iaowa: Aba, mo roido ainemabiti nouri ro mo tau orovidio. 42Wia mo umori hiwio auwoha ro mo irovidiodio ata mo nou naiba naro mabu nouri mo kowahiruti oubi horohorori; mo niro neiio iraromodioumo roro mo tau notiodoiro. 43Ina nou naiba aro nouro auwo viroito naibaha otua: Lasaro, tahuoro. 44Wia koihiai dubu nou naibaha ohuoro, tura konora gabidi hipuraito kotohiti ramu wia nou hoho muku komuito otohiaumo. Iesu neido naiba iaowa: Nou tamopiwutimo wia nou tameheaimo.

45Ina nouri Iudaia oubi godogodo, Mariaido ko’u oubii, nouri nana Iesuro kidodiaii neiio naibaha eauriwaumo wia nouido naibaha araromodiowaumo. 46Wia nei amidao nei himia naveito naibaha o’umo wia Parisea oubido naibaha o’umo wia nei do naibaha orowaduutiwaumo nouri nana Iesuro nou idodiai.

47Nouri pai‐kohena oubi wia Parisea oubi, wade koromododiaiwa oubi naibaha idabuaiwaumo naiba iaowaumo: Touna nidodiaidaidumo imo, mabu dubu nouri nou tiaha nana godogodo rimododiaiwa nouro. 48Ina imoo nou emeheaiwa, oubi auwoha nei nouido aiwaimo‐araromodioi wia Romana oubi aiwaumo’ui wia imo mabuwa wia imo batibati neiio aiwaimo itateai. 49Wia na’u dubu neimu emidio, paina kaiapo, nouvia auwo‐kohena duburi konobo’i nouowa. Nouro neido naiba iaowa: Ata nana rio umo biahai. 50Ina rio umo biahai nou meaha imoido dubu na’u oubido nou aiwaihiai, nouri imo batibati oubi auwoha nei oroihimo raihe. 51Nouri wade nou himia iminiudo nou karo biahai; na’u nou auwo kohena‐duburi konobo’i nouowa wia nou peroveta wade naibaha iaowa, Iesu nou aiwaihiai batibati oubido auwoha. 52Oubi nouri nei himia gauwoha biahai, ina ata Iehova karatuuti mere auwoha nouro aiwaidabuai na’u aibo. 53Wia ta’ui nouowa, hiwio auwoha, neiio wade naibaha oromododiaiwatutiumo nou epiamoi.

54Nouri hiwio ata Iesu Iudaia oubi mabuwa pakeha oroho biahai wia nouri batiudo bati ataito, buru bati tariwai, nou naibaha o’u; oopo na’u paina Eperaima, nou noito naibaha eredea wia nou himia kitomudio meremu nouowa emidioumo. 55Wia Iudaia oubi kiohodio‐horiomoo nou tariwai ina nouri oubi godogodo batibatiudo opuito orohowaumo Ierusalemaito nei himia tana iwaimoi kiohodio horiomooido. 56Ina neiio Iesu naibaha omohowaumo wia nou ta’uwa Tana‐motowa nei ototutiwaumo nei himia himia naibaha aratorowaumo: Touna rararomodumo rio, nou horiomooido o’u tato? 57Ina auwo‐kohena oubira Parisea oubira wade modoboito tau aroumo, ina dubu ata nou umowa tou batiwa remidio nou, nou kowoiha owoumoi nouri neiio nou oihiaimoi.

Currently Selected:

Ioane 11: KXW1941

Highlight

Copy