Ioane 12

1 Six hiwio opuitori, kiohodio horiomoo dooudori, Iesuro Betaniaito naibaha o’u; Lasaro nouowa emidio, nouri dubu Iesuro koihiaudo nou itorai. 2Wia batii nouowa neibio nouido horiomoo naibaha ododiaibumo wia Mataro iworohowaro wia Lasaro nou neimu emidiowa, nouri oubi Iesumu ihomoi. 3Ina Maria na’u keke mibo modobo diomo, paina Sipaikena, naibaha emidairo; nouri diomo nou moni godogodori, wia Iesu konowa naibaha adiri wia nou kono nou himia hooboito naibaha ipiti wia moto diomo niboro aiaraouti. 4Wia Iuda Isakariota, nou himia kitomudio mere na’uri, doo nouro Iesu piroha tau imaai, nou naibaha iaowa: 5Tounai nouri diomo wiha owamemo tato 300 shillingito ina nouri moni nana tato oubido imaatimo tatora? 6Ina nou naiba iaowa nouro nana tato oubido niainiai biahai, na’u nou piro duburi wia nei himia hao noumu iaa wia nou kibi nana’i nou himiaro naibaha ioutiwa. 7Ina nou ta’uwa Iesu naiba iaowa: Nou tameheaimo; mo gabidi korou ta’ui nouowa nouro naibaha wadodiai. 8Mabu nouri, hiwio auwoha nana tato oubi riomuri, ata hiwio auwoha mo riomu biahai.

9Ina Iudaia oubi gema nei umori nou nouowa emidio wia Iesu himiaido gauwoha nei o’u biahai; ata nei niro Lasaro eaurimoi, nouri dubu nouro koihiaiwa nou itorai. 10Wia auwo‐kohena oubio naibaha omododiaiwaumo Lasaro epiamoi nou aibo; 11mabu nouri Iudaia oubi godogodo nei naibaha o’umo wia Iesu aiararomodiowaumo mabu Lasarori.

12Wia dooudo hiwio’i nouri horiomoo ko’u, oubi gema’i ina neiio aiorowaumo Iesu Ierusalemaito ko’ui; 13neiio goata paha aibo na’i naibaha imidaumo wia nei naibaha orowohuoumo nou omotoimoi, ina nei viro naibaha iauwoidiowaumo: Hosana, niainiai dubui nouri, Pai‐dubu painawa nou airo’uro; nouri Isaraela Pai‐duburi. 14Ina Iesuro orio asina naibaha owea, nou gimini ohuwa naibaha emi, mabu nouri tauo kiatii titi naiba iati: 15Tore moa Siona behe, taauri ro Pai‐dubu nou airo’uro, asina mere gimini ohuwa remidio. 16Nouri nana nou kitomudio mere imini umo biahai opuitori, ata ina Iesu nou pai aiwaiti neiio aiararomomo nouri nana nouido titi tau iatiumo wia taiba nouri nana nouido nei tau ododiaumo. 17Nouri noumu kemidio oubii ina nouro Lasaro gabidi batiudo ohuodidioi naibaha otua wia koihiaiudo naibaha itorai, neiio nou naibaha apoiwa‐waumo. 18Mabu nouri oubi godogodo naibaha o’umo wia nou naibaha omotoiwaumo, nouri neiio aiorovidioumo nouri tiaha kidodiai na’i nouro nou idodiai. 19Nouri Parisea oubi nei himia himia naibaha iaowaumo: Taaurimo, ata nana rioo ododiaimo raihe; batibati oubi auwoha nouido tau o’umo.

20Wia Heleni oubi amida, horiomooido koroho oubii, neimu naibaha emidioumo Iehovaido oroboriamoi. 21Nouri oubi nei Pilipoido naibaha o’umo, nou Betesaida duburi, Galilaiawa, ina neiio nou naibaha atodoumo: Auwo‐dubu, imo niro Iesu eaurimoi. 22Pilipo naibaha o’u Anedereaido naiba orowahuo ina Anedereara Pilipora Iesuido naibaha orowahuowaudo. 23Wia Iesu neitido naibaha imowameaimama naiba iaowa: Hiwio’i tau o’uro ina Oubiha‐mere nou pai aiwaiti. 24Naiheha, naiheha mo rioido ainaro, ina koni mate nou hopu gorowa omoa biahai naiba oihiai biahai nou gauwoha o’awa; ina nou oihiaiwa, nou iopu godogodo aiwaimo‐haudioi. 25Dubu nou himia kiiro nou auwo niroi doo nou aiwatoai wia dubu batibatinu nouowa nou himia kiiro oriha eauriwa nouro kiiro karaeito aiwahidioi. 26Ina dubu nou mo omotoiwa, nou mo dooudo mo’uro wia mo emidio batii mo hiwaa mere nouowa wamidioi, ina dubu nou mo omotoiwa dubu nouri mo Abearo nou pai aiwawai. 27Doihabuo mo urio nana godogodo niraromodio wia tounai narodai mo? Aba, ta’ui noudo mo tanitorai? Oo, ta’ui noito nouri nana idodiai mo nou no’uro. 28Aba e, Ro paina pai tawai. Ina wade toboroudo naibaha o’u, Moro nou pai tau nowai wia moro ina nou pai ata ainawai. 29Nouri nou mabuwa kotoi oubi naibaha iaowaumo; Nou gurururi, wia amida naiba iaowaumo; Gururu merero raroro nouido. 30Iesuro naibaha imowameai naiba iaowa; Nouri wade nou moido owabai ko’u biahai, nou rio iwabai ro’uro. 31Doihabuo nouri batibati kiwotoi ta’ui tau o’uro; doihabuo nouro nouri batibati pai‐dubu aiwaive. 32Wia mo, ina mo hopudo ainaroviai, oubi auwoha mo himiaido ainauro iwoi. 33Nouri wade nou naiba aro, nouri koroihi nou aiwaihiai owaeviai. 34Oubi gema nouido naibaha omowameaiwaumo; Imo bubu‐bukawa tau niauriumo, Keriso nou kemidio kemidio tuturi; teiri ro naibaha raro Oubiha‐mere korovidiha oroviai? Boti nouri Oubiha‐mere? 35Ina Iesu neido naiba iaowa; Keke ta’ui nouowa pida riomu emidiowa, tarohomo naibawa pida riomu emidiowa noupa durii nou rioido naibaha aiwauro’ui; mabu nouri, dubu nou duriiwa orohowa, tou batito wa’ui nou umo biahai. 36Hiwio’i nouowa rio pida airiworohodumo nouri pida rioo tararomodioumo, ina nou aibo rioo pida‐mere aiwaimo‐oituti.

Nouri nana Iesuro naibaha iaowa wia nou naibaha o’uwa wia nei mabudo nou piroha naibaha opiraa. 37Ina nouro nei hohowa tiaha nana godogodo idodiai wia neiio nouido araromodioumo biahai. 38Mabu nouri wade Isaia, peroveta dubu, tau iati nou naiheha iwai. Nou naiba iaowa;

Pai‐dubu e, boti duburo imo kiao wadei iraromodio

Wia Iehova tui boti dubuido nou owaevia?

39Nouri nei iraromodioumo raihe mabu nouri Isaia wade ina iaowa;

40Nei idomai nouro duriiha iwai wia nei imini nouro kokoiha iwai;

Ina nei idomaito imeauridioumo tore wia nei iminito umoitimo tore,

Noupa nei imini aiwaimo‐imowai

Wia moro nei meaha ainaiwai.

41Nouri kiao wade Isaia naibaha iaowa nou ta’uwa nou himia moari nou naibaha iauri, wia nouro nou naibaha owaduuti. 42Wia pai‐oubi amida nei himiao Iesuido naibaha araromodiowaumo ina ata neiio nouido obodoimo biahai mabu nouri nei Parisea oubi toreri, sunagoudo neiio ihere toreri. 43Nouri nei auwo niro oubi wadeito kimabitii, wia Iehova kemabitii nei nou niro biahai.

44Iesu viro naibaha iauwoidio naiba iaowa; Dubu nou mo araromodiowa nouro moido araromodio biahai, ata mo nouro notiodoiro, nouro nouido airararomodio. 45Wia dubu nou mo eauriwa, mo nouro notiodoiro nouro nou keauriri. 46Mo tau no’uro pida na’u aibo batibati auwohawa, ina dubu nou mo araromodiowa nou duriiwa emidio raihe. 47Ina dubu ataro mo wade irovidiowa wia nouro idodiai biahai, moro nou owotoi raihe mabu nouri mo batibati iwotoi ko’u biahai, mo batibati itouti no’uro. 48Dubu nou mo ahouiutiwa wia mo wade nou emidai biahai, na’u nouro nou aiwawotoi, nouri wade mo tau naro nouro nou aiwawotoi dooudo hiwio’i nouowa. 49Ata nouri wade mo himiaro iao biahai, Abea mo nouro notiodoiro nou moido wade modoboito aro, nouri kiao wade moro kiwaduutiha nou niwaduuti wia moro nou niao. 50Wia mo umori nou wade modobo nou kiiro karae karae, mabu nouri nou ta’uwa mo wade ainiao, nouri nana Abea moido nou aro moro ina naibaha niao.

Currently Selected:

Ioane 12: KXW1941

Highlight

Copy