Ioane 17
17
1Nouri kiao wade Iesu naibaha iaowa wia nou idomai toboro naibaha emarovia wia nou naiba iaowa. Aba e, hiwio tau o’uro ro Mere pai tawairo ina nouri ro Mereo roido pai aiwawai. 2Roro nou pai tau owai oubi auwohaido ina nouri, ro nouido kimaati oubii auwoha, nouro neido kiiro karae karae batimaati. 3Wia nouri nou kiiro karae karae nari ina neiio ro umo batoitiumo, Urio‐abea na’u naihehari, ina neiio nou umo batoitiumo ro kotiodoi mere Iesu Kerisori. 4Movia ro pai tau nowai batibati auwoha. Nouri kowaati roro moido nou nemaairo moro tau nidodiaiwa oboiri. 5Wia doihabuo, Aba e, roro mo moari romu tanawairo, nouri moari mo romu ainiworoho nou ta’uwa batibati auwoha ia biahai. 6Nouri oubi roro moido batibati auwohaudo tau nemaairo. Ro paina neido moro umo tau niwai. Neivia opuito ro mereri wia roro nei moido naibaha nemaairo wia ro wade neiio airidodiaiwadumo. 7Doihabuo nei naibaha umori, nouri nana auwoha roro moido tau nemaairo nei ro aueudo rorohoumo. 8Nouri wade ro moido nou nemaatiro moro ina neido ainimaatidio wia nouri wade neiio aioobuaumo wia nei naiheha umooitiumo mo ro aueudo nohuoro wia neiio naibaha iraromodioumo mo roro notiodoiro. 9Moro neido pupuito niatodoi, moro batibati oubi auwohaido iatoro biahai, ata nouri oubi ro moido tau nemaairo moro neido pupuito niatodoi, mabu nouri nei auwoha ro mereri. 10Wia mo nananu auwoha nei nanari wia ro nana’i nei mo nanari wia mo moari nou tau noiti neimu. 11Wia doihabuo batibatinu nouowa mo emidio biahai, ata nouri oubi nei batibatiwa airemidiodumo wia mo roido aina’i. Tana‐abea e, nei taiohidio, nouri ro moido kemaai oubii nei taiohidio ro pupuo paina nou ramu, ina nouri nei na’u aibo batoitiumo naiba imeiti na’u aibori. 12Ta’ui nouowa mo neimu nemidio moro nei ainiohidio, ro pupuo paina nou ramu, nouri paina ro moido taunemaairo. Ro moido kemaai oubii moro nei meaha niauri, wia nei na’u aratoai biahai, noupa na’u, nouri tiaha ubauba mereri, ina nou aibo titi kiati wade nouro naiheha batoiti. 13Wia doihabuo mo roido aina’i wia nouri nana batibatiwa mo nou niao ina neiio mo geii nana’i nei himiao bativiaumo. 14Ro himia wade moro neido tau nimaati wia batibati oubio nei oriha rimeauridumo, mabu nouri nei batibati oubi aibo biahai naiba mo batibati mere aibo biahai. 15Moro iatodoi biahai roro nei batibatiudo iheei; moro ainiatodoi roro nei ubauba urioudo iohidioi. 16Neivia batibati oubi aibo biahai naiba mo batibati mere aibo biahai. 17Roro nei tana taiwairo naiheha nana nou ramu. Ro wade nou naiheha nanari. 18Moro nei batibatito nou nitiodoi, naiba roro mo batibatito nou notiodoiro. 19Moro mo himia tana ainarowai nei himiaido nouri nou aibo nei tana batoitiumo, naiheha na’i nou ramu. 20Wia moro neido gauwoha iatodoi biahai; nouri oubi nei moido iraromodioumo nei wadeudo, moro neido naibaha niatodoi. 21Nouri nei auwoha na’u aibo batoitiumo naiba ro mo muri wia mo ro muri nei auwoha imeitimu na’u aibo batoitiumo, ina nouri batibati oubi auwoha nei batiraromodioumo roro mo nou notiodoiro. 22Wia nouri moari na ro moido nou nemaairo moro neido ina naibaha nimaai, nouri nei na’u aibo batoitiumo naiba imeiti na’u aibori. 23Mo neimuri wia ro momuri, nouri nei meameaha batoitiumo na’u aibori, wia batibati oubi auwoha nei umo batoitiumo, roro mo nou notiodoiro wia roro nei niro imahebidio naiba roro mo niro emahebidio. 24Aba e, nouri ro moido kemaai oubii, mo tobatiwa nemidio mo auwo niro nei momu emidiomoi, ina nouri mo moari neiio eaurimoi, nouri moari ro moido tau nemaairo; mabu nouri roro mo niro nemahebidio ta’ui nouowa batibati gorowa na’i ia biahai. 25Abea meaha e, batibati oubio nei ro umo biahai, ata moro ro umo tau nowai wia nouri oubio nei umo tau oitiumo roro mo neiri notiodoiro. 26Wia ro paina moro neido tau nowaduuti ina moro ainirowaduuti, ina nou aibo nouri niro kemahebidio na’i ro mo niro nou rimahebidio nou neimu batiaa, wia mo neimuri.
Currently Selected:
Ioane 17: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
