Ioane 18

1Ina nouri wade Iesuro nou aro, nou nou himia kitomudio meremu naibaha orowohuoumo, omowapu paina Kidarona neiio naibaha orowabumo. Na’u batimabu nouowari, nou wia nou himia kitomudio mere nei naibaha owaduoumo. 2Wia Iuda nou piroha kowahuo dubu, nou umori batii nouri, mabu nouri Iesu godogodo ta’u noito korohodiori nou himia kitomudio meremu. 3Nouri Iuda, ina korowoto‐oubi amida wia hiwaa‐oubi nouro naibaha ivia auwo‐kohena oubi aueudo wia Parisea oubi aueudo, nouri bati mabuito nei naibaha o’umo, lamepa ramu wia ga’o ramu wia korowoto nana’i nou ramu. 4Nouri Iesu nou umori doihabuo nana auwoha nei nouido airiwoumo, nou naibaha o’uro naiba iatodoi: Boti romohodumo rio? 5Nei nouido naibaha omowameaiwaumo: Iesu Nasareta dubu; Iesu neido naiba iaowa: Mo nouri. Wia Iuda, nou piroha‐kowahuo dubu, nou nouowa naiba emidio neimu. 6Ina nou ta’uwa nou neido naiba iaowa, Mo nouri, nei auwoha ipito naibaha oiiodoiwaumo wia nei himia himia naibaha oromooutiwaumo hopuwa. 7Nouri Iesuro neido ina iatodoi: Boti romohodumo rio? Wia nei naiba iaowaumo: Iesu Nasareta dubu. 8Iesuro naibaha imowameai: Mo rioido nau naro, Mo nouri; ina rioo mo omohowa, nouri oubi nei mihuomo nei himia naveito. 9Nouri nou himia kiao wade naiheha owaimoi; Nouri oubi ro moido tau nimaatiro, na’u moro atoai biahai. 10Ina Simona, paina ata Pita, nou korowoto garaara ramu oroho wia nou naibaha ahiodidio wia auwo‐kohena hiwaa‐mere naibaha atetai, nou himia tiuha hapuo hepato naibaha ahiai wia nouri hiwaa‐mere nou paina Malako. 11Ina Iesuro naiba iaowa; Taibia ro korowoto garaara’i nou himia daimowa; koimu nouri mo Abea moido nou nemaairo moro idio tatora?

12Ina nouri korowoto oubi wia nei himia pai dubu wia Iudaia hiwaa‐oubi, Iesu neiio naibaha ohiaumo wia neiio nou naibaha otohitiwaumo. 13Wia opuito neiio nou Anaido naibaha owaboiiaumo, mabu nouri nou Kaiapa emapuari wia Kaiapa nou auwo‐kohena duburi konobo’i nouowa. 14Wia Kaiapa nou nouri wade kiao duburi, nou ta’uwa Iudaia oubiido nouro naiba iaowa; Nou meaha dubu na’ui oubido auwoha batoiihiai.

15Wia Simona Pita Iesu dooudo naibaha orobodowa wia kitomudio mere ata nou naibari. Nouri kitomudio mere auwo‐kohena dubu nou umori wia nou Iesumu auwo‐kohena motoito naibaha idoudo. 16Wia Pita biri mabuwa naibaha otoa wegewa. Ina nouri kitomudio mere ata auwo‐kohena dubu nou umori, nou naibaha ohuo wia biri keauri beheido naibaha aro wia Pita naibaha owodoidio. 17Ina biri keauri behe Pitaido naibaha iatodoi; Rora nouri dubu kitomudio mere na’uri. Nouro naibaha iaowa; Mo biahai. 18Wia hiwaa‐oubira, pai‐oubira nouowa kotoi oubii kupoito neiio naibaha imatowutiwaumo huopi ramu, mabu nouri uuto ta’uri. Wia nei uuto imaamutiumo, wia Pita neimu naibaha otoa, nou uutori naibaha emaamuti.

19Ina auwo‐kohena duburo Iesu naibaha atorowa nou himia kitomudio merei wia nou kiatomuai wadei. 20Iesu nouido naibaha omowameai: Moro batibatiwa pakeha tau niao, auwoha ta’u moro sunagowa wia Tana‐motowa naibaha niatomuaiwatuti, nouri batiwa Iudaia oubi hiwio auwoha naibaha orohotutiumo nou nouowa niatomuaiwatuti wia ata na sisiboito moro owaduo biahai. 21Mo teiri natodoi ro? Mo korovidio oubii nei taiatodoi touna naro mo neido; Taauri, nouri nana mo nou naro, nei umori. 22Ina nou ta’uwa nou naiba aro, na’u kotoi tariwai pai‐dubu Iesu nouro tuito naibaha atoutai, nou naiba iaowa; Auwo‐kohena dubuido ro naiba omowameaira? 23Iesuro nouido naiba omowameai; Ina mo uba wade anaro taroro ina nouri wadei, ina mo mea wade naro teiri natotai mo? 24Wia Anaro nou kotohiai ramu naibaha otiodoi Kaiapo auwo‐kohena dubu nouido.

25Wia Simona paina ata Pita naibaha otoa nou himia uuto naibaha emaamuti. Nouri nei nouido naibaha iaowaumo: Ro nou kitomudio mere na’ura. Nou aiaratiowa wia naiba iaowa: Mo biahai. 26Auwo‐kohena hiwaa mere na’u, Pitaro hepato kahiai merei nou gu mere na uri, nouro naiba iaowa: Moro ro eauri tatora noumu bati mabui nouowa? 27Ina Pita ina aiaratiowa wia nou ta’uwa kokoro wade naibaha otua.

28Ina neiio Iesu naibaha owaboiiaumo Kaiapa mabudo kiwotoi daimoito, wia hiwioro naibaha iheheai wia neiio kiwotoi daimoito idoutimo tore, nei himia tana gooa owaimo tore mabu nouri nei himia kiohodio‐horiomoo nei ihomo niroi. 29Ina Pilato neido naibaha ohuodidio naiba iaowa; Dubunu rioo touna waderi rowoumo. 30Neiio naibaha omowameaiwaumo, nouido naiba iaowaumo; Ina nouri dubunu uba tatoonu imoo roido emaaimo raihe. 31Ina Pilatoro neido naiba iaowa, Nou tamidaumo wia rio himia bubui noito owotoimoi. Iudaia oubio nouido naiba iaowa; Imo oubi kiwotoi bubu ia biahai. 32Ina nou aibo nouri kiao wadei Iesuro nou iaotuti nou taiba waihiai, nou naiba wauro’ui.

33Ina Pilatoro kiwotoi daimoito ina odorowa wia Iesu nouido o’ui naibaha otua wia nouido naiba iaowa; Rovia Iudaia oubi Pai‐dubura? 34Iesuro nouido naibaha omowameai; Nouri wadei ro himia iminito araro e mo ata oubio a nou wahuodumo roido. 35Pilatoro naibaha omowameai; Mo Iudaia dubura? Ro himia oubi wia auwo‐kohena oubi neiio ro moido nemaaumo. Touna ododiai ro? 36Iesuro naibaha omowameai: Mo bububati batibatinu nouowa biahai, ina mo bububati batibatinu nouowa nou ta’uwa mo himia oubio nei batiwotoumo, mo Iudaia oubido emaai tore, ata mo bububati noudo o’u biahai. 37Nouri Pilatoro nouido naiba iaowa: Ina ro Pai‐dubura? Iesuro naibaha omowameai: Rovia airaro. Mo Pai‐duburi. Mo tau noroto nouri kidiaito wia mo tau no’u batibatito naiheha nana’i imapoiwai; dubu auwoha nou naiheha mereri, mo kiao wade neiio irovidiotutiumo. 38Pilato nouido naibaha aro; Tounai naiheha na?

Ina nou naibaha aro, Iudaia oubido nou ina odorowa wia nouro neido naiba iaowa: Uba kidia noumu moro owea biahai. 39Ata rio na’u kidia airoa, dubu na’u kiohodio‐horiomoo nouowa, moro rioido banimaai. Ina Iudaia oubi Pai‐dubu mo rioido imaai rioo nou nirora? 40Ina nei auwoha naibaha imakakaiwawaumo naiba iaowaumo, Imo dubunu nou niro biahai, imo Baraba niroi. Ina Baraba nou piro‐duburi.

Currently Selected:

Ioane 18: KXW1941

Highlight

Copy