Ioane 3

1Na’u Parisea dubu, paina Nikodemo, nou Iudea oubi pai duburi. 2Nouri dubu Iesuido duo naibaha o’uro wia nouido naiba aro: Rabbi, imo umori rovia kitomudio duburi, Iehova mabudo o’uro, mabu nouri tiaha kidodiai nana’i roro naibaha idodiai, dubu ataro idodiai raihe ina Iehova noumu emidio biahai. 3Iesu naibaha omowameai, nouido naiba iaowa: Naiheha, naiheha mo roido niao: Ina dubu ata ta’uwa oroto tatowa, Iehova bububati nouro eauri raihe. 4Nikodemo nouido naiba iaowa: Dubu nou taiba korotoi ina nou amake aibori; Nou mamu mere daimoito ata araiwaira ina ata orotoira? 5Iesu naibaha omowameai: Naiheha, naiheha, mo roido ainaro, ina dubu nou oboito wia Urioito oroto tatowa Iehova bububati nouro odoro raihe. 6Nouri nana tamaito naibaha oroto nou tamari, nouri nana Urioito naibaha oroto nou uriori. 7Roro emaea aue nouri wade mo roido nou naro, Rovia korotoiha taroto. 8Huramaro naibaha rihudeuti bati auwoha nou niroi, roro nou diamo korovidiori wia nou ko’u batiudo wia nou ko’u batito ro wade karo umo biahai. Oubi auwoha Urioito nou rirotutidumo nei aibori. 9Nikodemo naibaha omowameai naiba iaowa; Nana nou aibo teriria? 10Iesu naibaha omowameai, nouido naiba iaowa; Rora Isaraela kitomudio dubui, ina nana nouri ro umo tatora? 11Naiheha, naiheha mo roido ainaro: Nouri nana imo umori, imoo naibaha nirowaduutidiodumo wia nouri nana imoo nou neauriumo imoo naibaha nimapoiwadiodumo, ina imoo korowahuodio wade’i rioo irovidioumo biahai. 12Ina hopuwa nana mo roido orowaduutiwa wia ro irovidio tatowa roro taiba wairovidioi ina mo toboro nana’i roido iwaduutiwa. 13Dubu ata, toboro ohuito ioro biahai, na’u nouri dubunu toboroudo oruoro, nouri Oubiha‐mere toborowa nemidio. 14Ina Mosero ede buibatiwa naibaha oviai, nou aibori Oubiha‐mere naibaha waviai. 15Ina oubio nouido orovidiomowa, neiio oroihimo raihe wia kiiro kara’e kara’e neiio aiwaimo‐oweai.

16Nouri Iehova batibati auwoha auwo niro imahebidio, nouri nou himia morio kahomai Mere nouro naibaha imaairo ina oubio nouido orovidiomowa, neiio oroihimo raihe wia kiiro kara’e kara’e neiio aiwaimo oweai. 17Ina Iehovaro nou himia Mere batibatito otiodoi nou batibati oubi iwotoi kotiodoi biahai, batibati oubi koroihiudo itouti, nou pupuito nouri neiri otiodoiro. 18Nouri dubu nouido orovidiowa nou owotoi raihe wia nouri dubu nouro orovidio tatowa nouro aiowotoi, mabu nouri Iehova morio kahomai Mere nouro orovidio biahai. 19Wia nouri kiwotoi waderi, Pida batibatito tau o’u wia oubi nei durii nana auwo niroi wia Pida nei niro biahai mabu nouri nei kidodiai na’i auwo ubari. 20Auwoha ubauba na kidodiaiwa dubui nou pida oriha reauri wia nou pidaito o’u biahai, nouri nou himia ubauba na pakeha ia tore. 21Wia auwoha naiheha kidodiaiwa dubui, nou pidaito ko’uri nouri nou kidodiaiwa na’i nou aiwaiwaeviai nei Iehova katomuai kidodiai nari.

22Ina nou ta’uwa dooudo Iesu nou kitomudio meremu Iudea batito naibaha o’umo wia nou nouowa neimu emidiotutiumo wia nouro oubi babatiso naibaha imowaidiotuti. 23Ioanero babatiso naibaha iwaidiotuti Enonawa Salima tariwai, mabu nouri obo auwori nouowa, wia oubio naibaha orohotutiumo wia babatiso naibaha oitititutiumo. 24Ina nou ta’uwa neiio Ioane durii motowa ibiamo biahai. 25Wia Ioane kitomudio mere neiio Iudea oubimu naibaha oromowamewaumo sovio kidodiai na’i. 26Wia nei Ioaneido naibaha o’umo nouido naiba iaowaumo: Rabbi, nouri dubui romu nou emidioudo Ioridana ata hapuowa, nouri dubu roro nou nimapoiwa: Taauri! dubu nouri nou babatiso rimowaidio wia oubi auwoha nouido rorohodumo. 27Ioanero naibaha imowameai naiba iaowa: Na ata duburo emidai raihe, na’u nouido toboroudo nimaatiro. 28Rio himia umori moro nou naro rioido, mo Keriso biahai wia mo nouro opuito notiodoiro. 29Nouri mere orio o’boamu, nouvia orio mereri, wia orio mere mabu dubu nou mabuwa rotoi naibaha rorovidio, nou tiaha geiri, mabu nouri orio mere wade nou airorovidio; mabu nouri mo geii na’i nou tau ro’u. 30Nou auwo aiwaiti, mo kekeha ainaiti.

31Nouri dubu ohudo naibaha oruoro, nou nana auwoha ohuwari; nouri dubu nou hopuwa remidio nou hopuwari wia hopu nanaido nou wade riaodio. Nouri dubu toboroudo naibaha oruoro nou nana auwoha ohuwari. 32Nana nouri nou tau iauri wia tau irovidio, nouro naibaha imapoiwadio wia oubio nou wade irovidioumo biahai. 33Dubu nouri nou kemapoi wade tau irovidio, nouro pupuito naibaha arowa, Iehova nou naihehari. 34Iehovaro kotiodoi dubu nou Iehova kiao wade naibaha iaotuti, mabu nouri Iehovaro urio kekebuo nouido emaai biahai, nouro auwo emaairo. 35Abea nou Mere auwo niro emahebidio wia nana auwoha nou tuito nouro naibaha emaairo. 36Dubu nou Mere araromodiowa nou kiiro kara’e kara’e airiworoho, wia dubu nou Mere araromodio tatowa, nou kiiro eauri raihe wia Iehova heauwo nana noumu riadumo.

Currently Selected:

Ioane 3: KXW1941

Highlight

Copy