Ioane 5

1Ina nana’i idaropoiioumo, Iudaia oubi horiomoo hiwio’i aioa wia Iesu Ierusalemaito naibaha iorowa.

2Wia na’u bodomo Ierusalemawa emidio nou mamoe biri mabuwai, nou painari Betesaido, Iudaia wadeito. 5 kuriha nou barawa otoumo. 3Godogodo uba kiroouti oubi nou barawa emidiotutiumo, idomai tato oubira, daiie oubira, tura konora karawo oubira, nei auwoha obo iri apoiiai naibaha omotoitutiumo. 4Mabu nouri hiwio amida, gururu mere na’u nou oboito oruodiotutiro, obo iri apooi nouro ovioruriotuti, wia nou ta’uwa obo iri idauapoiia, opuito duburo dau abere nouvia temeteme oboiri, auwoha temeteme nana nei aibori. 5Wia dubu na’u nouowa emidiotuti, nou temeteme ramu emidiotuti 38 konobori. 6Ina Iesuro nou orouwa eauri wia nou temeteme hiwio godogodo oroututi nou umori, nou nouido naiba atodoi; Ro mea oiti nirora? 7Temeteme duburo nouido naibaha omowameai: Auwo‐dubu e, ina obo iri apoiiawa, mo mabu oubi orohomo biahai mo bodomowa odobiamoi, ina nou ta’uwa mo oiiwa dubu ata nou opuito kabereri. 8Iesu nouido naiba iaowa: Tatoa. Hobo tamidai. Ta’u. 9Wia hagohagoha dubu nou meaha naibaha oiti, wia hobo nou naibaha emidai naibaha o’u,

Wia hiwio nouri nou Sabati hiwiori. 10Iudaia oubio mea koiti dubui nouido naibaha iaowaumo: Nouri Sabati hiwiori, nou mea biahai ro hobo ramu o’ui. 11Wia nou neido naiba imowameai: Dubunu mo mea nouro nowai, nouro raro, Hobo tamidai, ta’u. 12Ina nei nouido naiba atodoumo: Boti duburo raro roido, Hobo emidai nou ramu o’ui? 13Wia mea koiti dubui nou umo biahai boti duburi, mabu nouri Iesu piroha o’uro, nouri oubi gema batii nouowa aiemidiowaumo. 14Dooudo Iesuro dubu nouri Tana motowa naibaha owea wia nouido naiba iaowa: Taauri, ro mea tauroiti; ubauba kidia ata roro idodiai au’e ina tiaha uba na ata roido aiwauro o’ui. 15Nouri dubu nou naibaha o’uwa wia Iudaia oubido nou naibaha iaotuti; Nouvia Iesuri mo meaha nouro nowai. 16Nouri Iudaia oubi nei Iesu gooa owaiwaumo wia neiio nou epiamo niroi mabu nouri nana’i Sabati hiwiowa idodiai. 17Wia Iesu neido imowameaiwa: Movia Abea, nou naibaha rimowaatidio hiwio auwoha wia doihabuo wia movia nou aibo niwaati. 18Nouri Iudaia oubi nei auwo niro nou epiamoi mabu nouri nou Sabati hiwio aiahiai wia nouro Iehova Abeaito ahoo, ina nouri nouro nou himia Iehova aibo orowai.

19Ina Iesu naibaha imowameaiwa neido naiba iaowa:

Naiheha, naiheha, mo rioido ainaro, na ata Merero idodiai raihe na’u nouri na Abero idodiaiwa nou kiauriri: mabu nouri nana auwoha Abearo idodiaiwatuti nouri Merero nou aibo rimododiaiwa. 20Mabu nouri Abea nou auwo niro nou Mere wia nana auwoha nouro idodiaiwa nouro nou Mereido naibaha iwaevia wia nana amida auwo auwori nouro nouido aiwaiwaeviai mabu nouri rioo aiwaimo‐emaeai. 21Abea koroihi oubi naibaha ritoutidio wia nou neido kiiro riwaidio, nou aibo Merero auwoha oubi nou niroi nouro nei kiiro riwaidio. 22Abearo dubu amida iwotoi biahai, auwoha kiwoto na’i kiiroito wia koihiaito nouro Mereido tau imapoiwa. 23Ina nouri oubi auwoha nei Mere pai umiwaimo nou aibo nei Abea pai omowaimoi. Dubu nou Mere pai owai tatowa nouri Mere kotiodoi Abea nouro pai owai raihe. 24Naiheha, naiheha, mo rioido ainaro; Dubu nou mo wade rirovidio wia mo nouro notiodoiro nou rararomodio, nou kiiro karae karae airiworoho, wia kiwotoi wade nouro owea raihe wia koihiaudo kiiroito nou tau ohuoro. 25Naiheha, naiheha, mo rioido ainaro; Hiwio aiwauro’ui wia doihabuo nou ro’u ina koroihi oubio Iehova Mere wade dera aiwaimo‐irovidioi, ina oubii nei aiwaimo‐irovidioi neiio aiwaimo‐iiroi. 26Abea kiiro’i nou himiaro airiworoho, nou aibo nou Mereido tau emaai kiiro’i nou himiaro riworoho. 27Wia nouro nou pai tau oiti kiwotoi nana idodiaiwai, mabu nouri nou Oubiha‐mereri. 28Nouri nana rioo imaeamo aue mabu nouri hiwio aiwau‐ro’ui ina gabidi batiwa kemidio oubii auwoha neiio nou wade dera aiwaimo‐irovidioi. 29Wia neiio aiwaimo‐iro’ibuioi, meamea na kidodiaiwa oubii neiio kiiro aiwaimo‐oituti wia ubauba na kidodiaiwa oubii neiio uba kidia kiwotoi ta’uwa aiwaimo‐oituti.

30Na ata mo himia gauwoha moro ododiai raihe; oubi moro ainiwotoidio naiba mo Abearo ainatomuai, wia mo kiwotoi wade’i nou naihehari mabu nouri mo himia niro na moro imoho biahai na’u mo nouro notoidiro nou niro na’i moro nou nimoho. 31Ina moro emapoiwa mo himiaido, mo himia keremapoi wade nou naiheha biahai. 32Ata nou airoa moido tau nemapoi wia mo umori nou himiaro kemapoi wadei moido nou naihehari. 33Rioo Ioaneido tau itiodoumo wia nouro naiheha na imapoiwa. 34Wia duburo kemapoi wadei moro irovidio biahai, wia nouri kiao wadei mo ainaro rioido ina nouri rio kiiro oitimoi. 35Nouvia karadia lamepari wia kimeivia lamepari, ina komo ta’u rio auwo geii nou himia pidawa emidioumo. 36Wia ata kemapoi wade auwo auwori moro ainiworoho Ioane kemapoi wade kekebuori. Nouri kidodiai na’i mo Abearo moido tau nemaairo moro idodiai, nouri kidodiai na’i moido tau nemapoiwa, mo Abearo notiodoiro nei naibaha imapoiwai. 37Wia Abearo, mo nou notiodoiro, nou moido wade tau nemapoi. Hiwio auwoha rioo nou himia wade irovidioumo biahai wia nou taiba aibori rioo eaurimo biahai. 38Wia nou himia wade rio turiwa nou riadumo rioo iworohoumo biahai, mabu dubu nouri nou tau otiodoiro rioo araromodioumo biahai. 39Tana titi wadei rioo taimapeioutimo mabu nouri rio naibaha riraromodumo rio himia kiiro karae karae na’i nowowari, wia nouri titi wadei neiio moido ainemapoiwatutiumo. 40Wia rio moido orohomo niro biahai, kiiro oweamoi. 41Moari na oubi aueudo moro omoviodoi raihe. 42Wia mo umori rio Iehova niro na’i rio turiwa iviamo biahai. 43Mo Abea painawa mo tau no’uro wia rioo mo oobuaimo biahai ina dubu ataro nou himia painawa aiwaurou’i, rioo nou aiwaimo oobuai. 44Teiri rio araromodiomoi rioo himia himia moari reremaatidumo, ata rioo omohomo biahai Iehovaudo ko’u moarii. 45Rioo araramomo aue moro rio uba kidia Abeaido iwapotatuti; na’u dubu nouri nou rio uba kidia airiwapotatuti, nouvia Moseri, rio himia kararomodio duburi. 46Ina rio Moseido orovidiomoi rioo moido batorovidioumo mabu nouri mo kemidio hiwio’i nouowa nou titi naibaha iati. 47Ina nou titi kiati wade’i rio irovidioumo biahai, teiri rio mo himia kiao wadenu irovidiomoira?

Currently Selected:

Ioane 5: KXW1941

Highlight

Copy