Luka 13
13
1Wia hiwio’i nouri nouowa kemidio oubi amida nouido naibaha irowaduutiwaumo, nouri Pilato, Galilaia oubi amida, nei sawi nei kimio nana ramu nouro tau imodabu. 2Wia Iesu imowameai, neido naiba iaowa: Rioo naiba ariraromodiodumo, Galilaia oubi nouri auwo ubari, mabu nouri uba nana naiba nei tau iviaumo, wia Galilaia oubi ata nei naiba biahai? 3Mai‐naro rioido, Oo, ina rioo rio imini imowa’imo biahai, rioo auwoha nou aibo aiwaimo oropoiioi. 4Nou aibo nouri 18 oubi, ina tutu moto ata Siloamawa nei ohudo naibaha omoa naibaha iwoto; rioo naibaha ariraromodiodumo nei tiaha ubari, wia Ierusalemawa kemidio oubi auwoha nei naiba biahai? 5Mai‐naro rioido, O’o, ina rio imini imowa’imo biahai, rioo auwoha nou aibo aiwaimo‐oropoiioi.
6Wia wade nouri oro‐aibo nouro naibaha iaowa, Na’u dubu suke nua nou himia vine batiwa naibaha otoi, wia nou naibaha o’u iopu nou ohuwa imohoi, ina nou owea biahai. 7Ina nouro, vine bati keauri dubuido, naibaha iaowa, Taauri, konobo neewa na’u nouri mo naibaha no’uro, iopu nimohoro nouri suke nua ohuwa, ina mo owea biahai; nou ta’ebo, tounai nouri hopu nouro aiapee? 8Wia nou naibaha omowameaiwa, nouido naiba iaowa, Auwo‐dubu e, noua moa nouri konobo ata’i noua, ina moro nou ainemauudodai wia hopu mea niwaidai: 9Ina nou iopu omohauwa nou meahari, ina nou iopu omohau tatowa, dooudo roro nou ta’ebo.
10Wia sunagowa na’u Sabati hiwiowa nouro naibaha imatomudiowa. 11Wia na’u o’bo nouowa emidio, konobo 18 nou pupuo biahai, nouri uba urio nou muri, ina nou ipi kema’i orohotuti, wia nou gamooiha taiba kotoa nou umo biahai. 12Ina Iesuro nou naibaha eauri, nouro nou nouido o’ui, naibaha otua, wia nouido naiba iaowa, O’bo e, ro temeteme nana mea tauroiti. 13Wia nou himia tu neewa nou tama ohuwa nouro naibaha itomai, ina nou ta’uwa hagohagoha nou gamooiha naibaha oiti wia Iehovaido nou naibaha emabitiwa. 14Wia sunago pai‐duburo, gunuuni naibaha iatiwa, mabu nouri, Iesuro temeteme meaha kowaii, Sabati hiwiowa, wia nouro oubido auwoha naibaha imowameai naiba iaowa: 6 hiwio airia nouowa, ina nou meaha oubi kiwaati kiwaati, mabu nouri, hiwio’i nouri rio ta’umo wia rio temeteme mea iwaimowa, wia Sabati hiwio nouri naiba biahai. 15Wia Pai‐duburo nouido naibaha omowameai naiba iaowa: Ro koromohuwodio dubu, taiba dubu rio auwoha, ina Sabati hiwiowa nou bulamakau e asina omopiwuti tatora wia kiho batiudo naibaha iwaboiia obo idioi? 16Wia nouri o’bo, nouvia Aberahamo beheri, ina Satanaro nou tau otohiti 18 konobowa, nouri nou meahara nouri kotohiti nanu imopiwutira Sabati hiwiowa? 17Ina nou ta’uwa nouri wade nou daro, nou korowaiematuti oubi auwoha nei hipo iwai wia oubi auwoha geii naibaha erema‐hebidiowaumo nou himia timaha kidodiai nana’i auwoha.
18Nou ta’uwa nou naiba iaowa, Iehova bububati tou aibori wia nananu tou aiboi moro ainidodiaidai? 19Nouvia na’u keke sinapi mate aibori, nouri dubui ataro naibaha emidai wia nou batimabuwa naibaha aro, ina nou noro wia nua auwo naibaha oiti wia pahagama toborowa nou keteri ohuwa naibaha emiwaumo. 20Ina nou ata ta’uwa naibaha iaowa, Iehova bububati tou aiboi moro ainidodiaidai? 21Nouvia dou kiaupai na’i nou aibori, nouri o’bo naibaha emidai wia neewa na’u auwo koimu flour, nouro piroha naibaha idia, ta’ui nouowa auwoha naibaha iaupaumo.
22Wia nou auwo oopowa wia keke oopowa naibaha orohotuti, oubido imatomudioi naiba Ierusalemaito orohoi. 23Wia dubu na’u nouido naiba iaowa, Pai‐dubu e, kiitouti oubi nei godo tatora? Wia nouro neido naiba iaowa. 24Kereha biri rioo taimahebaimo idomoi, nouri mainaro rioido, oubi godo aiwaimo‐imahebai idomoi ina idomo raihe. 25Nou ta’uwa moto abea o’iboawa wia biri tau omopai, ina rioo wegewa waimo‐otoi wia biri aiwaimo‐omopo’uti naiba waimo‐iaoi, Pai‐dubu e, imoido tanemaerairo, wia nouro aiwaimowameai naiba rioido aiwaroi, Mo umo biahai rio tobatiudo ro’umo. 26Ina rioo iaomoi naibaha waimo‐iai, Imoo ro mabuwa tau nihomo wia tau nidiomo, wia imo navewa roro tau nimatomudio. 27Wia nouro aiwaroi, Mo rioido ainaro, mo umo biahai rio tobatiudo ro’umo. Mo mabudo ta’umo rio ubauba kidia kidodiaiwa oubiri. 28Idebi irotutimoi wia niimo imotoobutimoi, neiio nouowa naibaha waimo‐emidioi, nou ta’uwa Aberahamora, Isakora, Iakobora wia peroveta oubi auwoha, Iehova bububatiwa rioo aiwaimo‐eauri, wia rio wegewa waimo‐iaivei. 29Neiio hiwio keheheatuti batiudo wia kahoiiatuti batiudo wia akabu hapudo wia auwo‐turi hapudo aiwaimo‐o’ui wia Iehova bububatiwa neiio aiwaimo‐emidioi. 30Wia dooudo oubi amida’i, doo nei opuitori, wia opuito oubi amida’i, doo nei dooudori.
31Hiwio nouri Parisea oubi amida naibaha o’umo nouido naiba iaowaumo; Ta’u ro, wia nou mabudo tameheai, mabu nouri Herodaro ro aiwapiai. 32Wia nou neido naiba iaowa: Rio ta’umo wia nouri kaukauido naibaha taroumo, Taauri uba urio’i moro ainai‐wahiiti wia temeteme oubi mo meaha ainaiwai hiwio nouri wia dudueido, wia hiwio neewa na’u nouowa mo tiaha meaha nairi oiti. 33Wia hiwio nouri wia dudueido wia dudueido ata mo korohoiha orohowa, mabu nouri nou mea biahai peroveta dubu Ierusalema wegeudo ohiaimoi. 34Ierusalema e, Ierusalema e, Rovia peroveta oubi airiwotodio, wia roro kotiodoi oubii rovia nei akabuito rimatorutidio. Hiwio godogodo ro mere’i idabuai mo auwo niroi; naiba kokoro nou himia mere tamu gorowa naibaha idabuai, ina rio niro biahai. 35Taaurimo, rio moto rio himiaido nou buru aibo tau oiti. Naiheha mo rioido ainaro, Rioo mo ina eaurimo raihe, hiwio’i nouowa nou wauro’ui ina rioo aiwaimo‐iaoi, Niainiai dubu nouri nou Iehova painawa airo’uro.
Currently Selected:
Luka 13: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
