Luka 12
12
1Wia nou ta’uwa oubi gema piipiiha naibaha idabuaiwaumo, nouri nei konoito aratuutiwaumo, nou kitomudio mereido opuito nouro wade aroi naibaha iai: Parisea dou kiaupai na’i rio tore taimaatimo, nouri nou kiromohuwodio nari. 2Nouri kopiraa nana auwoha pidaito aiwai‐mo‐iwoi; wia sisibo nana auwoha doo neiio aiwaimo‐oboduti. 3Mabu nouri nana rioo durii batiwa tau aroumo neiio pida batiwa aiwaimo‐orovidioi; wia nouri nana rioo ata oubi garewa tau aroumo neiio moto hoagiminiudo aiwaimo‐owaduuti. 4Wia mo mabu oubi, mo rioido ainiao, nouri goho kiwoto oubi, ina dooudo kidodiai nana ata nei umo biahai, rioo neido tore imaatimo aue. 5Moro rioido ainowaeviadai dubunu rio tore tamaatimo. Bodio orowotowa ina dooudo nouro pupuo ramu rio Gehenaito aivemoi, nouido tore tamaatidaimo, bowia mai‐naro rioido, nouido tore tamaatimo. 6Keke pahagama neewa, neiti na’u keke monito orowametoi tatora? ina na’u nou aibo Iehovaro dodooiti biahai. 7Wia rio opu hoobo’i nei auwoha tau iapo; nouri tore iatimo aue, rio korowame auwori, pahagama godogodo nei korowame kekebuori. 8Wia mo rioido ainiao: Nouri dubu ina oubi hohowa nouro mo obodoiwa, Oubiha‐merero nou aiwabodoi Iehova gururu‐mere nei hohowa. 9Ina nouri duburo mainamotoi oubi hohowa, moro nou ainamatioi Iehova gururu‐mere nei hohowa. 10Wia nouri duburo Oubiha‐mereido uba wade omohuwadio, nouvia nouido aiwai‐ipiti; ina nouri duburo ubauba wade Tana‐urioido airiao, nouvia ipiti raihe. 11Ina neiio rio sunagoito wia kiwotoi‐oubido wia pai‐oubido aiwaimo‐iwoi; komowameai wadei wia kiao wadei rioo opuito iraromomo aue. 12Mabu nouri ta’ui nouowa Tana‐urioro rio aiwai‐atomuai nouri kiao wade rioo kiaoiha aiwaimo iaoi.
13Wia na’u dubu oubi mabuwa nouido naiba iaowa; Auwo‐dubu e, taro mo namuido imeiti kirahoo na’i nou momu eremaaitoi. 14Wia Iesu nouido naiba iaowa: Dubu e, ro kiwotoi dubu wia keremaati dubu mo botiro nododiai? 15Wia nou neido naiba iaowa; Taaurimo mea hogoi kidia rioido o’u tore; mabu nouri ina dubu nou nana horohorori nou himia kiiro nouowa biahai. 16Wia wade oro‐aibo nou neido naibaha orowaduutiwa. Nou naiba iaowa; Na’u dubu nou himia batimabu iopu auwo niimo romohaudio. 17Wia nou himia iminiwa nou naibaha iraromodiowa naiba iaowa. Touna naiidai mo, mabu nouri mo iopu kidiamo bati hiae biahai? 18Ina nou naiba iaowa, Moro naiba naiba naidodiai. Mo himia iopu kidiamo moto’i moro ainai‐outidai, wia moto amida, auwo auwo aibo, moro ainai‐iditi, wia mo himia iopu auwoha, wia nana auwoha, moro nouowa ainai‐idiamoi. 19Wia mo himia urioido mai‐narodai, Urio e, rovia nana godogodo tau idiamo nana kidiamo batiwa, neivia romu kemidio tutui, konobo godori. Ro hera tamidio, kihora kidiora, geii taiti ro. 20Ina Iehova nouido naiba iaowa, Ro dawodawo mereri, duo nouri ro urio ro aueudo aiwahiodidioi wia boti duburo waira‐hooi nouri nana ro nou idiamo. 21Dubunu nou aibori, ina nou nana horohoro nou himia kidiamo batiwa naibaha idiamo, ina Iehovido nana godo nouro emamaati biahai.
22Wia nouro nou kitomudio mereido naibaha iaowa: Nouri mo rioido ainiao, Rio himia kiiro kiho nana, naiba rio himia goho hipura korowamiti nana, rioo pauwo iraromomo aue. 23Kiiro nou opuitori, kihona dooudori, wia goho nou opuitori, hipura dooudori. 24Tai‐aurimo Oagu pahagama. Nei mate iboi orohomo biahai wia kihona iwohaudiomo biahai, wia nana kidiamo batira, kihona motora neiio iworohomo biahai; ina Iehovaro neido kihona airimaatidio. Taiba auwori, pahagamara e riora? 25Rio boti mere umori, ina rio kiraromodioi kiraromodioi ina rio tutu tutu oitutimoira ata modobo aibo? 26Ina nouri keke nana rio umo biahai kidodiai, touna rio pauwo riraromodiodumo nana amida auwoha? 27Tai‐aurimo kahure nei noro kidia’i. Nei kiwaati biahai wia hipura nei idodiai biahai; wia mo rioido ainiao, Solomona nou himia tiaha moariwa, nou ta’uwa nou hipura nou tau orowamiteai nou sovio biahai na’u kopo nou aibo. 28Ina Iehova pi batiwa naibaha amiteai; nananu hiwio nouri nei batiwa aremidiodumo wia dudueido kupoito iheemoi; nouro rio auwo iwamiti tatora, rio kekeha kiraromodio oubiri? 29Nouri rio imohoutimo aue tou kihona waimo‐ihoi wia tou obo waimo‐idioi, ina rioo imini godogodoha iraromodiomo aue. 30Mabu nouri oubio batibati auwohawa, nouri nana auwoha naibaha imohoutitutiumo, wia rio Abea nou umori nana nouri rio nou niroi. 31Wia Iehova bububati rio opuito tamohoumo ina nana nouri auwoha rioido aiwai‐maati. 32Tore aatimo aue rio keke oubi sipuri, Iehova nou auwo niro nou bububati rioido emaai. 33Rio himia nana tarowamemo, nana tato oubido taimaatimo. Hao nou pamu oitimo raihe rio himiaido taidodiaimo; meamea nana rio himiaido taiviamo, nouri nana’i nei oropoiioumo raihe, batii nouowa piro oubi ko’u biahai wia kiwareauo gooa iwaimo raihe. 34Mabu nouri, batii nouowa rio nana auwoha airiadumo, rio himia imini nouowa naibaha aiwamidioi.
35Rio hipura taro’utimo. Tai‐aurimo rio lamepa taiadimo. 36Wia rio himia pai‐dubu komotoi oubi aibo taratidiaimo, o’bora dubura oititoi horiomoo batinu ina noudo aiwaraiwai, nouri nou ta’uwa nou airo’udai naiba airopooutidai, neiio nouido hagohagoha aiwaimo‐emaerai. 37Nouri komotoi oubi nei tiaha geiiri, ina pai‐dubu nou ko’u ta’ui nouowa nei naibaha ivia meaha kiauriwa. Naiheha, naiheha, mo rioido ainiao, Nouro nou himia hipura aiwarooi, wia nei emimowa dou ihomoi nouro aiwaroi, wia nouro aiwau‐ro’ui neido aiwai‐motoi. 38Ina duo gohowa e hiwio kahemai tariwai nouro naibaha aiwau‐ro’ui wia nouro nei nou aibo naibaha aiwai‐iviai, nouri komotoi oubii neivia tiaha geiiri. 39Wia umo taitimo nouri, Ina moto abea, piro dubu ko’u ta’ui, nouro naibaha umori, nourovia meaha waauri wia nou motoito odorowa nouro aiwa‐mopai. 40Nouri rio himia nana meaha taidodiaimo; mabu nouri Oubiha‐mere nou aiwau‐ro’ui nou ta’uwa rioo iraromomo raihe.
41Ina Pita nouido naiba iaowa; Pai‐dubu e, nouri oro‐aibo wade imoidora e oubi auwohaido ariao? 42Wia Pai‐duburo naiba iaowa, Ina botiri gamooiha wia imini mea opuito kiauri mere? Kiauri mere nouri nou himia pai‐dubu nou himia moto oubi nouro nou pai aiwaiwai, kihona neido imamaati hiwio auwoha. 43Nouri kiauri mere nou tiaha geiiri, nou pai‐dubu ko’u hiwio’i nouowa, ina nou kowaati meaha nouro naibaha emeauri. 44Naiheha mo rioido ainaro, Nouro nou pai aiwaiwai nou himia nana auwoha. 45Ata, ina nouri kiauri mere nou himia iminito naibaha aiwaroi, Mo pai‐dubu hagohagoha ko’u biahai; ina kowaati dububaiora buhebaiora nouro iwotoi naibaha iai, wia ihoimoi idiomoi wia karakara obo idiowa, koiioi aiwaweai; 46nouri kiauri mere pai‐dubu nou aiwau‐ro’ui, hiwio’i nouowa merero nou eauri biahai, ina nou ta’uwa nou umo biahai, wia nou goho turiwa nou himiaro aiwarahiai, wia kiraromodio tato oubi wiha nouro nouido aiwai‐mapoiwai. 47Wia nouri kiauri mere nou pai‐dubu niro na umori, ina nou meaha idodiai biahai, wia pai‐dubu niro na nouro idodiai biahai, nou godogodo kepia nana aiwaiviai. 48Wia dubu nou umo biahai, ina kepia wiha nana nou naibaha idodiai, nou godogodo epia raihe; mabu nouri, dubu nouri nana godogodo nouido tau imaati, godogodo nana nou aueudo aiwai‐atodoi; wia dubu nouri oubio nou mabuwa nana godogodo tau emeheaumo, nou aueudo nana godogodoha neiio aiwaimo‐iatodoi.
49Mo tau no’u kupo hopuwa iherei; ina doihabuo nou tau aradia mo nou niroi. 50Ata babatiso moro ainarahoo moido babatiso ainawai, mo auwo niro nou tau ododiai. 51Rio airararomodumo mo nou no’uro amea batibati auwohaido iwoi? Mo rioido ainaro oo, na’u kihi hiwiowa moro ainaiwoi. 52Ta’ui nouowa, 5 mere na’u motowa aiwaimo‐araubuai; neewa na’u neibi neewa aiwaibimo imabootidioi; wia neewao neiti neewa na’u aiwaido imabootidioi. 53Mere nou himia abearo emabootidioi, wia abea nou himia merero emabootidioi, naiba behe nou himia mamuro emabootidioi, wia mamu nou himia behero emabootidioi, naiba etera nou himia damuro emabootidioi, naiba damu nou himia eteraro emabootidoi.
54Wia nouro oubido naiba iaowa; Nouri hiwiowa bubu rio naibaha reauridumo, kahoiia batiudo airiororo, rio naibaha rarodumo, Wiha airo’uro; ina nou airo’udai. 55Wia nou hiwio hurama keke rio reauridumo, rioo naibaha rarodumo, Hiwio koko aiwaro’ui ina nou naibaha airo’udairo. 56Rio kiromohuwadio oubi; toboro hohora hopu hohora nei himia modobo’i rio umori; tounai doihabuo modobo rio umo biahai? 57Bowia, ina teiri rio umo biahai mea nana imapoiwamo tato? 58Ina nou ta’uwa ro bauurowaro dubumu, roro kiwotoi dubuido naibaha o’uro; hiwio nouri ro noumu navewa emidiotoiwa, noumu oititoi ro tamaihebai hagohagoha; ina noupa dubu nouri kiwotoi dubuido ro nouro aiwamaai, wia kiwotoi duburo durii moto keauri dubuido ro naibaha aiwamaai, wia durii motowa nouro ro aiwaibia. 59Naiheha mo roido ainaro, Roro noudo ohuo raihe, ta’ui nouowa keke moni auwoha ro naibaha emaaiwa.
Currently Selected:
Luka 12: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
