Luka 18

1Wia wade ata oro‐aibo nou neido naiba iaowa, nouri neiio hiwio auwoha Iehovaido kirodumea wadeito kiaoiha taiaomo ina daari imahebidioumo au’e. 2Nou naiba iaowa: Na’u kiwotoi‐dubu oopo atawa remidio, Iehovaido nou tore emaati biahai wia oubido nou niainiai imahebidio biahai. 3Wia na’u same o’bo oopo’i nouowa emidio, nouro nouido naibaha o’uro, naiba iaowa, Roro tameiiwotai mo korowaiematuti merenu. 4Wia hiwio amida nou niro biahai emeiiwotai; ina dooudo nou himiaido nou naibaha iaowa, Mo Iehovaido tore emaati biahai, wia oubido mo niainiai imahebidio biahai; 5Ina ata nouri same o’bo mo gooa nomowaidio, mabu nouri moro nou ainemeiiwotaidai, ina nou karaiwutii hiwio auwoha mo daariri. 6Ina Pai‐dubu naiba iaowa: Tarovidioumo hee‐hee kiwotoi dubunu taiba riao. 7Ina Iehovaro nou himia kimeibomatuti oubi imeiiwotatuti tatora, nouri oubi nei nouido wade airiaodiodumo hiwiora duora? Nei korowaiematuti oubi nouro neido niainiai arimahebidio ine? 8Mo rioido ainiao, Nouro nei hagohagoha aiwai‐meiiwotatuti. Ina ata, nou ta’uwa Oubiha‐mere aiwau‐ro’ui, oubi kiraromodio na’i nouro batibatiwa ariviatuti?

9Wia wade ata oro‐aibo, oubi amidaido nou naiba iaowa; neiio naiba riraromodiodumo, imo meahari, wia oubi atao nei airimeibeiuatutidumo. 10Dubu neewa Tana‐motoito naibaha oroviudo, kirodumeaito wade arotoi. Na’u nou Parisea duburi, ata nou gavana wiha keauri duburi. 11Nouri Parisea dubu naibaha otoa wia nou himiaido kirodumeaito wade naibaha iaowa, Iehova e, mo roido ainemabiti mabu nouri ata oubi mo aibo biahai, piro oubira, uba oubira, siwokori oubira, nei aibori, wia gavana wiha keauri dubunu nou aibori. 12Hiwio neewa, pura auwoha, mo iho tato nemidio, na’u goho 10 goho auwoha mo na’i, moro ainemaatidio. 13Wia gavana wiha keauri dubunu nou aueudo naibaha otoa, nou idomai toboroito iarovia raihe wia nou bodoro naibaha eremamado, naiba iaowa, Iehova e, moido niainiai tamahebidioro, mo uba mereri. 14Mo rioido ainiao, Dubu nouri nou himia motoito naibaha araiwai meaha oiti Iehova hohowa, wia dubu ata nou aibo biahai. Mabu nouri dubu nou himiaro pai aibo aiwaiti, nou hipo aiwawai; wia dubu nou muni aibo aiwaiti, doo nou pai aibo aiwawai.

15Ina neiio nei himia bamubamu nouido naibaha iworohowaumo nouri nouro tuito nei naibaha iatibo, ina nou ta’uwa kitomudio mereo naibaha eaurimo, neiio neido naibaha imadohiomaumo. 16Ina Iesuro nei naibaha itua nei nouido o’umoi, nou naiba iaowa: Keke mere mo’umo moido ina rioo kiadohomo moa, mabu nouri Iehova bububatiwa oubii nei aibori. 17Naiheha mo rioido ainiao, Nouri dubu nou Iehova bububati irovidio tatowa mere keke aibori, nouito odoro raihe.

18Wia na’u pai‐duburo nouido naibaha atodoiwa: Auwo‐dubu meaha, tounai niaiidai mo kiiro karae karae oweai? 19Ina Iesuro nouido naiba iaowa: Teiri nahoo mo meari? Oubi amida mea biahai, na’u Iehova nou himia gauwoha. 20Bubu auwoha rovia umori; Siwokori oworoho aue, oubi iwoto aue, piro moa, oubi amidaido wade kiworoho biahai, ro abeara mamura niainiai taimahebidiomama. 21Wia nou naiba iaowa: Nouri bubu auwoha movia ohiowa tau nirovidio. 22Ina nou ta’uwa Iesuro nouri wade naibaha irovidio, nou nouido naiba iaowa: Na’uiha na’i roro oworoho biahai. Ro himia nana’i auwoha tawamemo wia nana tato oubido taimaati; ina rovia meamea nana toborowa aiwaiviai, naibaha ta’uro, mo tanobodoro. 23Wia nou ta’uwa nouri wade nouro naibaha irovidio, nou auwo duriduri naibaha oiti mabu nouri nou nana horohorori. 24Ina nou ta’uwa Iesuro naibaha eauriwa nou auwo duriduri naibaha emahebidiowa, nou naiba iaowa: Nou tiaha pauwori nana horohoro oubi Iehova bububatito idoutimoi. 25Kamela naihiia pituuwa odorowa, nouri nou miboiha biahai; wia nana horohoro mere Iehova bububatito odorowa, nou auwo mibori. 26Ina nouri wade kirovidio oubio naibaha iaowaumo: Kiiro bodio oubio waimo‐oweai? 27Wia nou naiba iaowa: Nouri nana oubio umoito idodiaiwamo biahai; Iehova nou himia umoito idodiai. 28Ina Pitaro naibaha iaowa: Nana auwoha imoo tau nebeedeiumo wia ro dooudo norobododumo. 29Wia nou neido naiba iaowa: Naiheha mo rioido ainiao, Na’uiha duburo moto ebeedeiwa wia mamura, abeara wia niamamio wia o’boa wia mere ibeedeiwa, Iehova bububati kowaati nouido; 30dubu nouri, hiwionu nouowa, nana godogodo nouro aiwaiviai wia kiiro karae karae nouro aiwaiviai doo batii nouowa.

31Wia 12 kitomudio mere nouro nei nouido naibaha iama’uoti wia neido naibaha iaowa: Tarovidioumo, imo Ierusalemaito oroviomoi wia Oubiha‐mere nana auwoha, nouri nana peroveta oubio naiba iatitutiumo, neiio aiwaimo‐idodiaiwai. 32Nouri, nou douboi oubido neiio aiwaimo‐emaai, wia neiio nouido aiwaimo‐emesiodiowai wia gooa aiwaimo‐owai wia haugeito aiwaimo‐amoroi. 33Wia neiio nou aiwaimo‐epiawai wia neiio kirimi aiwaimo‐edeai; wia hiwio neewa na’uito nouro ina aiwa‐roitorai. 34Wia nouri nana auwoha nei umo biahai wia nouri wade nei iminito iviamo biahai ina nouri kiao wade auwoha nei umo biahai.

35Ina nou ta’uwa Ieriko tariwai nou naibaha o’uro, na’u idomai tato dubu, nave barawa naibaha emidiotuti, oubido naibaha irowarodiotuti. 36Wia kohodiowa oubii nouro nei wadera kono diamora irovidiowa, wia nei touna rododiaidumo nouro naibaha iatodoi. 37Wia nei nouido naibaha iaowaumo: Iesu, Nasareta duburi airo’uro. 38Ina nou viro gema naibaha iauwo’idio: Iesu, ro Davida mere, moido niainiai tanemahebidioro. 39Wia opuito ko’u oubio nouido naibaha emadohiomaumo: Ro mubaha taiti, ina nou auwo viro gema naibaha iauwo’idio, Davida mere e, moido niainiai tanemahebidioro. 40Wia Iesu naibaha otoa naibaha iaowa: Nou moido tawoumo; ina nou tarito ida’u nouro nouido naibaha atodoi; 41Touna niaiidai roido ro niroi? Nou naiba iaowa: Pai‐dubu e, mo niro idomai iravodai. 42Wia Iesuro nouido naiba iaowa: Ro idomai tairawodai; ro kiraromodio na’i ro meaha tau‐roiti. 43Wia nou ta’uwa hagohagoha nou idomaito meaha naibaha iauri ina nouro nou dooudo naibaha orobodowa, Iehovaido nou naibaha emabitiwa; ina oubi auwohao eauriwaumo neiio Iehovaido naibaha emabitiwaumo.

Currently Selected:

Luka 18: KXW1941

Highlight

Copy