Luka 17
17
1Ina nou himia kitomudio mereido nou naiba iaowa, Gooa nana’i korohoiha rorohodiomo; ere, dubu nouri, gooa nana rimetiodutiro. 2Nouido nou meahari ina na’u auwo akabu nou hokowa erereru wia nou auwo‐turito aivemoi, nou mea biahai nou goowa owai na’u keke mere nouri. 3Rio himia himia taaurimo mea. Ina ro niama roido gooa owaiwa, nou tamadohiomai. Ina nou imini imowaiwa, nou uba kidia roro kiraromo moa. 4Ina nouro ro gooa owaiwa 7 ta’ui na’u hiwiowa, wia 7 ta’ui na’u hiwiowa nou roido araiwai naiba iaowa, Mo imini tau nimowai; rovia nou ubauba kidia iraromo aue.
5Wia kitiodoi oubio Pai‐dubuido naibaha iaowaumo; Imo kiraromodio na’i auwo aibo taiwai ro. 6Wia Pai‐dubu naiba iaowa; Ina rio kiraromodio na’i sinapi mate aibo riaadumo, nouri nua gema rioo nouido naiba waimo‐iaoi, Ro hipi ramu taiiahiodidio wia auwo‐turiwa tarararo, ina nouvia rioido aiwa‐rovidioi. 7Wia dubu ata rio mabuwa, ina nou kowaati mere hopu naibaha ototowa e kihona bulamakauido naibaha imeme, doo ta’uwa, ina batimabudo nou o’uwa, nouro nouido awama’uoti, Ta’uro, tami ihoi? 8Noupa opuito nouro nouido aiwaroi, Mo himia kihona tanomododiai wia ro hipura tamiteai wia ro moido tanamotoi, ta’ui nouowa mo ihowa naiba idiowa, ina dooudo roro aiwai‐ihoi wia aiwai‐idioi. 9Niainiai wade nouri kowaati mereido nou aroira mabu nouri nou himia wade modoboito nou naiba idodiai? Mai‐nararomo nou naiba iao biahai. 10Nou aibori, ina modobo wadeito auwoha rio tau idodiaiwaumo, rioo naibaha taroumo, Imovia kiwaati oubiri, pai biahai. Imo himia kowaati nana, nei gauwoha, imo tau nidodiaumo.
11Wia hiwio’i nouowa nou Ierusalemaito naiba o’uwa, ina Samaria wia Galilaia nou naibaha iohodai. 12Wia nou ta’uwa na’u oopoito nou naibaha odoro, 10 oubi, lepera temeteme ramu, nouido omotoiwaumo, ina bati auudo nei naibaha otoaumo. 13Wia nei naibaha iauwoidiowaumo naiba iaowaumo: Iesu, Auwo‐dubu e, niainiai tanimahebidioro imoido. 14Ina nou ta’uwa nouro nei naibaha iauri, nou neido naiba iaowa: Ta’umo rio, auwo‐kohena oubido rio hoho rioo taiwaeviamo, ina nou ta’uwa nei naibaha o’uwaumo nei sovioiha oitiumo. 15Wia dubu na’u neimu, ina nou mea idaiti nou naibaha eauri, nouro naibaha araiwai wia auwo wadeito nou Iehovaido naibaha emabitiwa. 16Wia nou hohoito nou naibaha omoa Iesu kono mabuwa, wia niainiai wade nouido nouro naibaha iaowa. Wia dubui nouri Samaria duburi. 17Wia Iesu naibaha omowameaiwa naiba iaowa: 10 oubi mea oiti tatora wia 9 touowai? 18Ata karaiwai oubi, Iehovaido emabitimoi ivia biahai, na’u nouri douboi duburi. 19Ina nou nouido naiba iaowa, Tatoa, ro himia ko’u naveito ta’u. Ro himia kiraromodio na’i ro meaha tau oiti.
20Ina nou ta’uwa, Parisea oubi nouido naibaha atodoumo, Iehova bububatiwa tou hiwiowa wauro’ui. Nou neido naibaha omowameaiwa naiba iaowa; Iehova bububatio o’u raihe nou aibori rio niro iaurimoi. 21Wia dubu ataro aro raihe, Taaurimo nouri, taaurimo noura! mabu nouri Iehova bububatinu rio niro‐gorowari. 22Wia nou kitomudio mereido nou naibaha iaowa: Hiwio amida aiwaumo’ui ina na’u hiwio, Oubiha‐mere hiwio’i, rioo eaurimo niroi ina rioo eaurimo raihe. 23Wia neiio rioido aiwaimo‐iaoi, Taaurimo nouri, taaurimo noura; rio nei dooudo o’umo aue, wia nei dooudo orobodomo aue. 24Babasi na’u batiudo toboro goroudo naibaha imirisai wia ata batito naibaha imeivia, ina Oubiha‐mere nou aibo waai nou himia hiwiowa. 25Ina opuito, uba nana godogodo nouro kiviaiha aiwai‐riviai, wia nouri doihabuo oubinu neiio nou aiwaimo‐ahoiuti. 26Wia nouri nana amida Noe hiwio’i nouowa tau o’umo, nana amida nou aibo aiwaimo‐o’ui, Oubiha‐mere hiwio’i noua. 27Neiio iohidiotutiumo wia imediotutiumo wia upira dubura oitutitutiumo wia upi dubuido imaatidiotutiumo, hiwio’i nouowa Noe auwo pewa naibaha orovia, wia karuru naibaha o’uro, ina nei auwoha naibaha iwodaudio. 28Ina nou aibo nou naibaha o’uwa Loti hiwio’i nouowa. Neiio ihodiotutiumo wia imediotutiumo wia nana imemeitutiumo wia orowametutiumo wia imobotutiumo wia ididitutiumo. 29Ina nouri hiwio Loti Sodomaudo naibaha emeheai; hiwio nouri nou wiha naibaha emai, kupo wia enaena akabu kerekere ramu, wia nei auwoha naibaha iwoto. 30Hiwio naiba nou aiwau‐ro’ui, Oubiha‐merero kimowahuo ta’ui nouowa. 31Hiwio nouowa dubunu moto ohuwa emidioi, nou nana moto gorowari nou oruo tore nei imidai; wia dubunu batimabuwari nou araiwai tore. 32Loti o’bo rio dodooitimo aue. 33Dubunu nou himia kiiro aiwararomodioi, doo nou aiwaratoai; wia dubunu nou himia kiiro aiwatoai nourovia kiiro aiwaveai. 34Mo rioido ainaro, Duo nouri dubu neewa, na’u uwo dodoo ohuwa aiwairoumamai; na’u nou aiwamidai ina ata nou aiwabeede. 35O’bo neewa koni ihiamutiudo; na’u nou aiwamidai ina ata nou aiwabeede. 36Dubu neewa batimabuwa aiwaido‐emidioi; na’u nou aiwamidai ina ata nou aiwabeede. 37Wia neiio nouido naibaha omowameaiwaumo naiba iaowaumo: Pai‐dubu tou batiwai? Wia nou neido naiba iaowa: Goho tou batiwa waai, warie auwoha nouowa aiwaimo‐idabuai.
Currently Selected:
Luka 17: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
