Luka 8

1Ina dooudo Iesuro auwoauwo oopowa wia keke oopowa naibaha orohowa naiba itomudiotuti naiba Iehova bububati pai‐mea iwaeviatuti, nou 12 kitomudio mere noumuri. 2Wia upibaio amida, uba urio wia temeteme nana meaha kiwai upibaio’i, noumu naibaha o’umo. Maria Magadala nou aueudo 7 uba urio naibaha orowahuodidioumo, 3wia Ioana, Heroda opuito keauri mere, paina Susa, nou o’boari wia Susana wia upibaio amida godogodo nei nouido omotoiwaumo nei himia nana ramu.

4Ina nou ta’uwa oubi godogodo naibaha idabuaiwaumo wia oubi oopoudo auwoha nouido o’uwaumo, nouro neido oroaibo wade naibaha iaowa: 5Mate kibo dubu nou himia mate kiboido naibaha idao, ina nou idao naibaha ibowa, mate amida nave gohowa oromooutiwaumo wia nei konoito iatuutiumo, ina toboro pahagamao neiio naibaha ihowaumo. 6Mate amida akabu ohuwa oromooutiwaumo ina nou ta’uwa nei naibaha ihuodutiwaumo nei naibaha ipihamuti nouri nei obo bo’u tatori. 7Mate amida eperapera batiwa oromooutiwaumo wia eperapera neimu naibaha ihuodutiumo naibaha imakikitiumo. 8Mate amida hopu meawa oromooutiwaumo naibaha ihuodutiumo wia iopu naibaha imohaudiomo 100 ta’u aibo. Ina wade nouri nou tau aro nou naibaha iauwoidio: Dubu nou gareito irovidiowa nouro mirovidio.

9Wia nou kitomudio mere nouido atodoumo naiba iaowaumo, Oroaibo wadenu imini taibari? 10Wia nou naiba iaowa: Sisibo nana Iehova bubu‐batiudo rioido tau imatomudio; oubi amidaido oroaibo imatomudiomoi. Nei keiiri keiiri ina eaurimo raihe, nei korowairi korowairi ina nei umoitimo raihe. 11Nouri oroa nou nou aibori: Mate nou Iehova waderi. 12Nouri nave barawa kemidio oubii neivia kirovidio oubiri; ina Diaboloro naibaha eredea wia wade nei iminiudo naibaha iwodau, nou niro biahai nei iraromomoi wia itoutimoi. 13Nouri akabu ohuwa kotoi oubi neivia, ina neiio imetevidioumo, neiio geii ramu irovidioumo ata nei hipi tatori nei iminiwa, komo hiwiowa nei naibaha iraromodiowaumo wia kimatuhe hiwiowa nei naibaha iomoa. 14Nouri nana nei eperapera mabuwa oromooutiwaumo neivia oubiri, ina neiio tau idairovidioumo nei naibaha o’umo wia imini godogodo kiraromodio na’i wia nana horohoro wia koroiio nana doihabuo kiiro hiwio’i neido airarakasaraubiaidumo wia iopu meamea nei imohaudiomo biahai. 15Wia nana hopu meawa rotoidumo neivia oubiri wia nou ta’uwa nouri wade neiio naibaha irovidioumo, naiheha imini ramu wia mea imini ramu, nouri wade nei geiigeiiha iohiaumo wia iopu naibaha imohaudiomo, pupuo imini ramu.

16Ina dubu ataro lamepa tau adia, nouro kepurito owatimai biahai wia uwo bati goroudo nouro edea biahai, na’u lamepa kotoi batiwa nou naibaha edea motoito kiidouti oubio pida eaurimoi. 17Sisibo nana auwoha doo neiio aiwaimo‐iwaeviai, kopiraa nana auwoha doo neiio umo aiwaimo‐oiti wia pidaito aiwaimo‐iwoi. 18Nouri taiaurimo mea rioo nou aibo rirovidiodaidumo, mabu nouri dubu nou nana amida airia doo godoha nouido aiwamaati wia dubu nou nana tato doo nouri nana auwoha nou kiraromo nei nou himiari, nei noudo auwoha aiwaimo‐orowaihiiti.

19Nou ta’uwa nou mamura niamamiora nouido naibaha o’uwaumo, ina nei taiba ko’u tarito, nouri oubi godogodori. 20Wia amida oubi nouido naibaha iaowaumo: Ro mamura niamamiora kahitoudo romotoidumo, neiio ro eaurimo niroi. 21Wia nou naibaha imowameaiwa, neido naiba iaowa: Neira mo mamura niamamiora, nouri oubi Iehova wade neiio rirovidiodumo wia ridodiaidumo.

22Ina ata hiwiowa nou peito naibaha orovia nou himia kitomudio meremu wia nou neido naiba iaowa: Imo auwo‐turi ata hapuito tabuodaimo wia nei naibaha ahiiaumo. 23Ina nou ta’uwa pe hipura neiio naibaha ovioumo naibaha iwarariowa, nou uwo‐orouwa, ina auwo konobo gema naibaha o’uro nei auwo‐turiwa naibaha iohiai, padoro pe naibaha apee wia nei koroihi tariwai. 24Wia nei nouido naibaha o’umo naiba itoraumo naiba iaowaumo: Auwo‐dubu, Auwo‐dubu, imo ainoroihidaidumo. Ina nou naibaha o’ibua wia huramara obo heauwora nouro naibaha imadohiomaimama ina nei oboiri wia obo ta’u mea naibaha oitiro. 25Wia neido nou naiba iaowa: Rio kiraromodio na’i touowai? Nei tiaha tore imahebidiowaumo naiba aiemaeawaumo wia nei himia himia naibaha iaowaumo: Dubu nouri touna mereri? Nouri huramara obora nou neitido wade modoboito iaowa wia neitio nouido naibaha orowaudo.

26Wia Geresene batibatiwa, Galilaia hapuo atawa neiio naibaha eredeaumo. 27Ina nou ta’uwa nou hopuwa naibaha iraivei, dubu na’uro nou oopoudo omotoiro, nou uba urio ramu wia hiwio godogodo nou hipura oro’uti biahai wia moto atawa nou emidio biahai, na’u gabidi batiwa emidiotuti. 28Ina nouro Iesu naibaha eauri, nou hohowa nou naibaha omoa wia wade gema naibaha imakakai naiba iaowa: Mo touna niaiidai roido Iesu? Rovia Iehova, nouri Auwo‐urio‐abea, nou Mereri. Moro ainatodoi roido, Mo gooa owai aue. 29Mabu nouri Iesu uba urioido wade modoboito idaro nou dubu aueudo ohuodidio. Nouri godogodo ta’uwa nouro nou naibaha ohidiotuti wia oubio nou meaha eauritutiumo wia gurehero ivito gurehero tububuito naibaha omotohititutiumo wia nou komotohiti gurehero ivii nou naibaha imehebutituti wia ubauba urioro nou buru batito naibaha owodaudiotuti. 30Wia Iesuro nouido naibaha atodoi naiba iaowa: Ro paina botiri? Wia nou naiba iaowa, Legeona, mabu nouri uba urio godogodo nouido tau ido’utiumo. 31Wia Iesuido nei hobo atodoumo damo batito itiodoi nou neido wade aro biahai. 32Wia boomo godogodo akabu ohuwa naibaha ihowaumo wia uba urio’i nouido pupuito hobo atodoiwaumo, Boomoido nouri imo tanitiodoi nei niro goroito imo idoutimoi, wia Iesu nei iadohiomai biahai. 33Ina uba urioro dubu aueudo naibaha ihuodutiwaumo wia boomo niro goroito naibaha ido’utiwaumo wia boomo gema akabu katatai hioito, heauwo ramu, oroworuowaumo auwo turito wia nei tau iroruodioumo. 34Ina nou ta’uwa boomo kihona kimeauri oubi nouri kidodiai na’i naibaha eauriwaumo neiio naibaha odaumo naibaha o’umo wia oopowa wia batibatiwa nouri nana neiio naibaha iwaduutiwaumo. 35Ina nou ta’uwa neiio naibaha ihuomo eaurimoi nou touna idodiaidai wia Iesuido nei naibaha o’uwaumo wia uba urioo komowameheai dubu neiio naibaha eauriwaumo, nou Iesu kono mabuwa emidiowa hipura ramu wia imini mea owamidiowa wia nei tore emahebidiowaumo. 36Wia nouri na’i keauri oubio neido naibaha iwaduutiwaumo taiba uba urio ramu dubu nou meaha tau oiti. 37Ina nou ta’uwa Geresena bati hapuoudo kemidio oubi auwoha Iesuido hobo iaowaumo nou nei mabudo imeheai, nouri nei tiaha tore emahebidiowaumo wia nou peito naibaha orovia naibaha araiwai. 38Wia uba urioo komowameheai dubui nouido hobo atodoi nou noumu emidioi wia Iesuro nou naibaha omododiai naiba iaowa: 39Taraiwai ro himia motoito wia nouri nana auwori Iehova roido tau idodiai naibaha taiwaduuti. Wia nou himia naveito nou naibaha o’u wia batibati auwoha nou himia oopowa nou naibaha iwaduutiwa nouri auwo nana Iesuro nouido nou idodiai.

40Ina nou ta’uwa Iesu daraiwai, oubi gemao nou geii ramu naibaha oobuaiwaumo nouri neiio nouido aiomotoitutiumo. 41Wia na’u dubu, paina Iairo, naibaha o’uro. Nouvia sunago pai‐duburi, wia Iesu kono mabuwa nou naibaha oroboria naiba hobo atodoi nou nou motoito o’ui. 42Mabu nouri nou behe na’uri, ata biahai. Nou 12 konobo tariwai wia nou koihiai tariwai airorou. Ina nou ta’uwa nou idauwa oubi gema nouido naibaha orotatewaumo.

43Wia na’u o’bo nou himia sawi kihupo iworohotuti 12 konobori, nouri nou himia moni auwoha doketa oubido imamaatituti ina auwoha doketao nou mea owaimo biahai; 44nouro Iesu dooudo naibaha o’uwa wia nou himia hipura opudo naibaha ematibodoi ina nou ta’uwa hagohagoha nou himia sawi naibaha emahiai. 45Wia Iesu naiba iaowa: Mo botiro natibodoi? Ina nou ta’uwa oubi auwoha aratiowaumo, Pita wia noumu kemidio oubi naibaha iaowaumo; Pai‐dubu e, oubi gemanu roido rorotatedumo wia roroho’iutidumo, rovia ina airatodoi, Mo botiro natibodoi? 46Wia Iesu naiba iaowa; Mere ataro mo tau natibodoi, nouri mo umori pupuo na mo au’eudo tau rohuodidio. 47Ina nou ta’uwa o’bo umo naibaha oiti nou piroha biahai, nou tama kimuruo wia nou naibaha o’u wia nou hohowa nou naibaha omoa wia Iesuido naiba aro, oubi auwoha nei hohowa, nouri mabu nou nouido naibaha atibodoi wia taiba nou hagohagoha mea tau oiti. 48Wia nou nouido naibaha iaowa: Behera, geii taiti. Ro himia kiraromodio na’i ro mea taurowaidumo. Ta’uo mubaha.

49Ina nou ta’uwa Iesu naibaha iaowa, dubu, sunago pai‐dubu motoudo naibaha o’uwaro, nouido naiba iaowa; Ro himia behe tau roihiai. Teiri ro’uro Auwo‐dubu romu. 50Ina Iesu nouri wade ida’orovidiowaro, nouro nouido omowameai naiba iaowa; Tore moa. Na’uai tararomo ina nou meaha aiwaiti. 51Ina nou ta’uwa nou motoito naibaha odoro, oubi amida noumu o’umoi nouro naibaha iadohiomai, na’u neivia Pitara Iakobora Ioanera wia behe mamura abeara. 52Wia oubi auwoha behe idebi emetutiwaumo wia eamo gema idodiaiwawamo wia nou naiba iaowa; Idebi moa, nou oihiai biahai, nou uwo‐rorou. 53Wia neiio nouido aiomobuowaumo mabu nouri nou koihiairi nei umo naibaha oitiumo. 54Wia nouro nei hito iaho’iutiwa wia behe tuudo nou naiba ouviai nouido naibaha otua naiba iaowa: Behe keke, taibua. 55Wia nou himia urio ina araiwaiwa wia nou naibaha o’ibua hagohagoha; wia Iesu wade modoboito iaowa: Dou noui tamaatimo. 56Wia nou mamura abeara aiemaeawaudo wia nou neitido wade modoboito naibaha aro: Nouri kidodiai na’i oubi amidaido rieiti iaotoi aue.

Currently Selected:

Luka 8: KXW1941

Highlight

Copy