Luka 9

1Ina nou himia kitomudio mere nouro naibaha itua wia neido nou pupuo na wia wade pupuito naibaha imaai, uba urio iheemoi wia temeteme nana auwoha iwahii‐timoi. 2Wia nouro nei naibaha imododiai Iehova bububati wade totomuito iaomoi wia uba korou oubi mea iwaimoi. 3Nou neido naiba iaowa, Nana amida rio navewa iworohomo au’e. Bugura haora doura monira, rioo iworohomo aue, wia uduuduo neewa rioo iworohomo aue. 4Wia nouri moto’i rio nouito ido’utimowa, nouowa tamidioumo wia noudo taioruomo. 5Ina oubi amidao rio iobuaimo tatowa, nou ta’uwa nouri oopo’i rio imeheaimowa rio himia kono tuo‐tuo taimomidimo nei himia ubauba kidia iwapotaimoi. 6Nei naibaha o’umo wia oopo oopowa naibaha iohodiowaumo, pai‐mea totomoito iaomoi wia uba korou oubi batibatiwa meaha iwaimoi.

7Wia Heroda nou pai‐duburi, Iesu kidodiaiwa nana’i auwoha nouro naibaha orowai, wia nou imini godogodoha iraromodio mabu nouri oubi amida naiba iaowaumo: Ioane koihiaudo tau oroitorai. 8Wia oubi amida naiba iaowaumo: Elia tau omowaetairo wia amida naiba iaowaumo: Peroveta dubu na’u koihiaudo tau oroitorai. 9Wia Heroda naiba aro: Ioane opu moro maoaito tau nahiai wia boti dubu nouri noudo tiaha nana’i moro nou nirovidio. Wia nou auwo niroi nou eauri.

10Ina nou ta’uwa kitodoi oubi naibaha araiwaumo neiio nei himia kidodiaiwa nana’i auwoha Iesuido naibaha irowaduutiwaumo, wia nouro nei naibaha iwou wia buru batito, oopo paina Betesaido nou batii, nei piroha naibaha o’umo. 11Ina nou ta’uwa oubi gema umo naibaha oitiumo, neiio nou dooudo orobodowaumo wia nouro nei naibaha iaubuai wia Iehova bububati na’i neido naibaha iaowa wia nouri oubi nei temeteme ramu nouro meaha naibaha iwai. 12Ina hiwio kahemai tariwai, nouri 12 kitomudio mere nouido naibaha o’umo naiba iaowaumo: Ro oubi taiiaho’iouti nei oopo oopoito orohomoi, nouowa emidiomoi naiba kihona imemoi, mabu nouri imovia burubatiwa nemidiodumo. 13Wia nou neido naiba iaowa: Rio dou amida neido taimaatimo. Wia nei naiba iaowaumo: Ata dou imomu ia biahai, na’u 5 dou kopi wia na neewatoiha. Noupa imo o’umoira dou imeimoi oubinu neido. 14Mabu neivia tariwai 5,000 oubi. Wia nou kitomudio mereido nou naiba iaowa: Taro neido pohona ohuwa tanoba emiwamoi, ata tanoba 50 ata tanoba 50. 15Wia neiio naibaha idodiaumo nei auwoha emiwamoi. 16Ina 5 dou kopi nouro naibaha imidai wia na neewa. Nou toboroito naibaha emarovia naibaha emabitiwa naiba ihebutiwa wia kitomudio mereido naibaha imaatiwa, neiio oubi hohowa idiamomoi. 17Neiio naibaha ihowaumo wia niro naibaha iapeutiwaumo wia kiraho dou niaie 12 hao kiapeutiri neiio naiba iibiwaumo.

18Ina nou ta’uwa nou gauwoha emidiowa, kirodumeaito wade aroi, nou kitomudio mere noumu bade emidioumo. Nou neido naibaha iatodoi: Oubio mo botito nemahohodumo? 19Neiio naiba omowameaiwaumo naiba iaowaumo: Ioane Babatiso wia amida naiba iaowaumo, Elia wia amida naiba iaowaumo, tauo peroveta‐dubu na’u nou koihiaudo tau oroitorai. 20Nou neido naiba iaowa: Ina rioo mo botito nemahoodumo? Pitaro naibaha omowameaiwa naiba iaowa: Rovia Iehova Kerisori. 21Wia nou neido wade modoboito naiba iaowa: Nana nouri amida oubido iwaduutimo aue. 22Nou naiba iaowa: Oubiha‐mere godogodo heauwo nana nou kiviaiha wairi iviai. Mamusi mamusi wia auwo‐kohena‐oubi wia titi‐oubi neiio nou aiwaimo‐aho’iuti, nouvia aiwaimo‐epiai wia hiwio neewa na’u oboiri nou ina aiwa‐roitoai. 23Wia nouro nei auwohaido naiba iaowa: Ina dubu nou niro mo dooudo o’ui nou himia nana taimeheai ina nou himia satauro hiwio ata wia hiwio ata tameme ina mo naibaha tanabodoro. 24Dubu nou auwo niro nou himia kiiro oweai, doo nou aiwatoai; wia dubu nou moido kiiro atoaiwa, nourovia kiiro aiwa‐weai. 25Wiha nouri nou meahara? Dubu nou oopo oopo nana auwoha ida’idabutiwaro ina nou himia kiiro aiwatoai. 26Ina dubu nouri nou moido wia mo wadeido hipo aiwaimahebidioi, doo Oubiha‐merero nouido hipo wamahebidioi ina nou aiwau‐ro’ui nou himia moariwa wia nou Abea moariwa wia tana‐gururu‐mere moariwa. 27Wia mo rioido naiheha niao, Oubi amida nouowa airotoidumo, koihiai ta’u neiio oweamo biahai, opuito Iehova bububati neiio aiwaimo eauri.

28Nouri kiao wade oboiri ina hiwio 8 oropoiioumo nouro Pita wia Iakobo wia Ioane naibaha iwoubi wia akabu barito naibaha iobumo, kirodumeaito wade aroi. 29Wia nou kirodumeaito wade karo ta’ui nouowa, nou himia hoho tiahaito orowae‐viawa wia nou hipura auwo bohobohoiha naibaha oiti wia aierememirowa. 30Wia dubu neewa noumu iaowaudo. Neiti paina Mosera Eliara. 31Neiti moariwa imowaetaimama wia nou koihiai ta’uo Ierusalemawa nou aiwa‐dodiai neitio naibaha owaduutiwaudo. 32Ina Pita wia neiti noumu emidioudo neibi uwo tama mibo imahebidiowabumo, ina nou ta’uwa neibi naiheha iroibuabumo nou himia moari wia dubu neewa noumu otoiwaudo neibio naibaha iauriwabumo. 33Ina nou ta’uwa neitio nou emeheai naibaha iaiudo, Pita Iesuido naibaha iaowa: Auwo‐dubu e, nou meaha imeibi nouowa emidiobi ina nou meaha duo daimo neewa na’u imeibio nouowa idibi, na’u roido, na’u Moseido, na’u Eliaido; nouri nou umo biahai tounai rarodai. 34Ina nou naiba iaowa na’u bubu naibaha o’uwaro, neibi naibaha iwatimaibi, wia neibi tore imahebidiowabumo nou ta’uwa neibi bubu gorowa naibaha idobumo. 35Wia na’u wade bubudo naibaha ipiotai naiba iaowa: Nouri mo himia auwo niro Mereri, tairovidioumo nou. 36Ina wade nou oboiri, Iesu himia gauwoha omowaetai. Wia nouri na neibio iminiwa naibaha edeabumo wia ta’ui nouowa, neibio kiauri na’i auwoha ata oubido neibi iaobi biahai.

37Ina dudueido, nou ta’uwa nei akabudo idaioruomo, oubi gemao nouido omotoiwaumo. 38Wia na’u dubu oubi gema mabudo naibaha otua naiba iaowa: Auwo‐dubu e, mo roido ainatodoi; taauriro mo mere, nouri nou mo himia na’u mereri. 39Wia taauri, uba urioro nou airohidio wia hagohagoha nou airimakakaiwadio wia nouro nou naibaha remeedioutidio nouri nou hauge airimomoutidio wia nouro nou naibaha remeedioutidio ina nou tariwa emeheai raihe. 40Wia ro himia kitomudio mereido moro hobo niatodoi uba urio nou mabudo iahiitimoi ina nei umo biahai kidodiai. 41Wia Iesu naibaha omowameaiwa naiba iaowa: Rio irovidiotato wia tumutumu oubiri, mo riomu taiba tutuito nemidiodio; mo riomu taiba tutuito nemidiodio mubaha? Ro mere tawouro moido. 42Ina nou ida’u, uba urioro nou naibaha amehua, auwo nimoito naibaha eedioutiwa, wia Iesuro uba‐urio naibaha emadohiomai wia ohio mea naibaha oitiwa ina nou nou abeaido naibaha emaai. 43Wia Iehova pupuo na’i noudo neiio auwoha aiemaeawaumo.

Ina nou ta’uwa Iesu himia tiaha kidodiai na’i neiio aiemaeawaumo Iesu nou himia kitomudio mereido naibaha iaowa: 44Nouri wadei rio gareito meaha tarovidioumo, nouri Oubiha‐mere oubi tuito aiwai‐maai. 45Wia nouri kiao wade nei umo biahai, nou nei mabuwa piroha koari, nouri nei umoitimo biahai wia nouri kiao wade nei nouido atodoimo tore.

46Wia koromowame wade godogodo nei himia himia naibaha oromowamewaumo, auwo opuito botiro waiti. 47Wia nei iminiwa kiraromodio na’i Iesuro umo naibaha oiti wia keke mere nouro naibaha oviai wia nou hapuowa naibaha ahuu. 48Wia nou neido naiba iaowa: Dubu nou keke mere nouri mo painawa airoobuai nouro mo naubuai, wia dubu nou mo ainaobuai mo nouro notiodoiro nou naibaha roobuai, wia nouri dubu rio auwoha rio dooudori nouvia opuito waiti.

49Wia Ioane naibaha omowameai naiba iaowa: Auwo‐dubu e, na’u duburo ro painawa uba‐urio riwahiitiwa imo aineauriumo wia imoo nou hobo nemadohiomaumo nouri nou imomu orobodo biahai. 50Wia Iesu nouido naiba iaowa: Nou emadohiomaimo aue, mabu nouri dubu nou imo komobori biahai nouvia imomuri.

51Ina nou ta’uwa nou himia ohuito kioro hiwio’i naibaha o’uro, nou hoho Ierusalemaito o’ui, nouro pupuito iwaorai. 52Wia hiwaa oubi nou hohowa nouro naibaha itiodoi wia nei naibaha o’umo wia Samaria oopo na’u nei naibaha idoumo, nouido bati mea ododiaimoi. 53Wia oopo oubio nou oobuaimo biahai mabu nouri nou hoho Ierusalemaito o’ui naibaha owaorai. 54Ina nou ta’uwa nou kitomudio mere, Iakobora Ioanera, naibaha eauriwaudo neiti iaowaudo: Pai‐dubu e, ina ro nirora, imeitio modoboito naiba niaowaudo kupo toboroudo moruoro nei ipihamuti, naiba Elia nou ododiai. 55Wia nou naibaha imeteuti, neiti naiba iadohiomaimama naiba iaowa: Rieiti umo biahai taiba urio mabudo o’udo rieiti. 56Mabu nouri Oubiha‐mere oubi kiiro oropoiioi ko’u biahai na’u neido itouti no’uro.

57Ina nou ta’uwa nei navewa ida’uwaumo, na’u dubu nouido naibaha aro: Pai‐dubu, ro tou batito wairi o’ui moro ro dooudo ainarobodoi. 58Wia Iesu nouido naiba iaowa: Buruou pituu airiworohodumo wia pahagama toborowa toto airiworohodumo ina Oubiha‐mere nou opu aodia bati hia’e biahai. 59Wia ata dubuido nouro naiba iaowa: Mo tanabodoro; wia nou naiba aro; Pai‐dubu e, roro mo opuito tanotiodoi mo o’ui mo abea omoboi. 60Iesu nouido naiba iaowa: Tameheai koihiai oubi ata koihiai oubio umomobomo wia ta’uro, Iehova bububati pai taiwaduutiro. 61Wia dubu ata naiba iaowa: Mo ro dooudo ainarobodoi ata roro mo opuito tanotiodoi mo o’ui mo himia motowa kemidio oubii niainiai imohoiioi. 62Wia Iesu nouido naiba iaowa: Dubu nou batimabu hopu kikekuti na tuito naibaha ohidio, ina nou araiwaiwa nou mea biahai Iehova bububatiwa.

Currently Selected:

Luka 9: KXW1941

Highlight

Copy