Mataio 21

1Ina nei Ierusalemaito kodomai tariwai, wia Betepagewa, Oliveta akabu ohuwa naibaha o’umo, Iesu kitomudio mere neewa naibaha itiodoimama. 2Neitido nou naibaha iaowa: Rieti hohoito nouroa oopo’i noito ta’utoi, ina asina nou himia mere ramu otoiitoiwa rietio aiwaido‐eauri. Rieitio tamopiwoudo wia moido tauwaudo. 3Ina dubu ata rieitido wade ata arowa, tarotoiio: Pai‐dubu nou niroi; ina nouro airitiodoidaimamaro. 4Nana nouri auwoha naiba naiba idodiaiwa Peroveta kiao wade idodiaimoi; nou naiba iaowa:

5Rioo taroumo Siona beheido:

Taauri Pai‐dubu roido o’uwa muni aibo,

Wia asina ohuwa emidiowa wia orio asina,

Asina mere, nou ohuwa.

6Wia kitomudio mere neewa naibaha o’uwaudo wia Iesu wade modobo aibo neiti naibaha idodiaiwaudo. 7Wia asina wia orio asina, neiti naibaha iwoudo wia neiti himia hipura gimini ohuwa naibaha ipohowaudo wia Iesu hipura ohuwa naiba owomiudo. 8Wia oubi piipiiha nei himia hipura navewa naibaha ipohoutiwaumo wia amida nua keteri iahiowaumo wia navewa naibaha ipohoutiwaumo. 9Nouri opuito ko’u oubii wia dooudo ko’u oubii neiio naibaha iauwoidiowaumo, naiba iaowaumo; Hosana, Davida mereido, Niainiai nou dubui airo’u Pai‐dubu painawa, Hosana toboro ohuwa. 10Wia nou ta’uwa Ierusalemaito, nouro naibaha odorowa, oopo oubi auwoha neiio aiemaeawaumo naiba iaowaumo: Boti nouri? 11Wia oubi gema naibaha imowameaiwaumo: Nouri Iesu, peroveta duburi, nou Nasareta duburi, Galilaia hapuowa.

12Wia Iesu Iehova Tana‐motowa naiba odorowa wia nouro kime oubii wia korowami oubii naibaha imubia wia moni korowame oubi nei dodoo naibaha imeheewa wia badu korowame oubi nei kemi batii nouro naibaha imeheewa. 13Wia nou neido naiba iaowa: Titi nou iatiumo, Mo motoi kirodumeaito wade kiao moto ridododaidumo, ina rioo piro oubi moto aibo tau ododiaumo. 14Wia idomai tato oubi wia daiie oubi, nouido Tana‐motoito o’uwaumo wia nouro nei meaha iwaiwa. 15Ina auwokohena oubi wia titi‐kiati oubi, neiio nou himia timaha kidodiai nana naibaha iauriwaumo wia mere kekeo Tana‐motowa iauwo’idiowaumo, naiba iaowaumo: Hosana, Davida mere’i, ina neiio naibaha iauriwaumo, nei tiaha gunuuni imahebidiowaumo. 16Wia neiio nouido naiba iaowaumo: Roro irovidio tatora nei taiba rarodumo? Wia Iesu neido naiba iaowa, Io, ina rioo titi iatimo tatora, Keke mere wia bamubamu nei maataudo roro mea mea kemabiti wade airiworoho? 17Wia nouro nei naibaha imeheai, auwo oopoudo naibaha ohuo, Betaniaito naibaha o’uro; nouowa naibaha emidio.

18Wia hiwio kiheheaiwa auwo oopoito nou naibaha araiwairo ina nou dou niroro aai. 19Ina suke nua navewa kotoi, nouro naibaha eauri, nou nouido naibaha o’uro ina na ata nouro nouowa ivia biahai, na’u pahahari; wia nouro nouido naiba iaowa: Ro iopu amida imohaudioumo raihe doihabuo wia dooudo ta’ua nouowa; wia doo Suke nua naiba orokokoutiwaro. 20Ina kitomudio mereo naibaha eauriwaumo, neiio aiemaeawaumo naiba iaowaumo: Taaurimo, teiri orokokouti Suke nuanu hagohagoha! 21Iesuro naibaha imowameaiwa, neido naiba iaowa: Naiheha mo rioido ainiao, ina rio kiraromodio na’i airiworohodumo wia meaha iraromodiodumo, Suke nuaido kidodiai na’i rioo aiwaimo‐idodiai ina ata, nouri akabuito rioo aiwaimo‐aroi: Roito ta’iahiodidio naiba auwo‐turito ta’iariiai, doo nou aiwai‐idodiaiwai. 22Wia nouri nana auwoha rio kirodumeaito airiatorodumo, nana nouri rioo aiwaimo‐iviai ina rioo meaha iraromodiomowa.

23Ina Tana‐motoito nou tau odoro, auwokohena oubi wia mamusi mamusi nouido o’uwaumo, nouro kiatomuai ta’ui nouowa, wia nouido naiba iaowaumo: Nananu touna pupuito ridodiai, wia pupuonu roido botiro remaati? 24Iesuro naibaha imowameai, neido naiba iaowa: Moro na’u na’uha niatorodai, ina rioo moido taiaomo, mo rioido nou aibo narodai, taiba pupuito nana nouri mainidodiaidai. 25Ioane babatiso kidia, tobatiudo o’uro, toboroudora e oubi aueudora? Mo tanomowameaimo. Wia nei himia himia iaowaumo: Noupa imo ainiaodumo, toboroudo o’uro; nouro awai‐iatodoi; Tounai rio nouido irowaimo tato? 26Ina imoo naibaha niaodumo, Oubiudori; imoo oubi tore ainimaatidumo; nouri oubi auwoha iaowaumo, Ioane naiheha peroveta‐duburi. 27Wia nei Iesuido omowameaiwaumo naiba iaowaumo: Imo umo biahai; wia nouro neido naiba iaowa: Nouri rioido mo iao raihe taiba pupuito nouri nana mainidodiai. 28Wia rio taiba rararomodumo? Na’u dubu mere neewari, wia opuito mereido nou naibaha o’u naiba iaowa; mo mere hiwio nouri mo vine batito owaati, ta’u. 29Ina nou naibaha omowameai naiba iaowa, Mo o’u niro biahai; ata dooudo nou imini aimowai ina nou dooudo naibaha o’u. 30Wia abea mere ataido naibaha o’u na’u wade aibo naiba iaowa. Wia nou naibaha omowameai naiba iaowa: Auwodubu mai na’i ina nou o’u biahai. 31Boti mere neewa, neiti abea wade arododiaidudo? Nei nouido naiba aroumo: Opuito mere. Iesu neido naiba iaowa: Naiheha mo rioido ainiao; gavana wiha keauri oubi wia iwo upibaio neiio Iehova bububatito naibaha idoutiwaumo opuito, rio dooudori. 32Mabu nouri Ioane rioido naibaha o’u mea mea kidia navewa wia rioo nou orovidioumo tatori. Ata gavana wiha keauri oubi wia iwo upibaio neiio nouido aiorovidioumo wia rio, nou ta’uwa rioo dooudo tau eauriumo, rio himia imini imowa’imo biahai nouido orovidiomoi.

33Ata oroaibo wade tarovidioumo; Na’u moto abea, vine bati naibaha ibo wia ara naibaha owaieedioro wia vine kiateuti na nouowa naibaha ahe’erewa wia iauri moto naibaha ididi. Nouri nou naibaha owateairo ata oubio emeaurimoi, ina bati auwoito nou naibaha o’uro. 34Wia nou ta’uwa naiha oitiwa, nouro nou hiwaa oubi vine keauri oubido naibaha itiodoiro, vine iopu iwoumoi. 35Vine keauri oubi nou hiwaa oubi naibaha iohiwaumo wia na’u neiio naibaha iriatiwaumo wia ata neiio naibaha epiawaumo wia ata neiio nouido akabuito naibaha atourutiwaumo. 36Wia hiwio ata, hiwaa oubi amida godogodo, opuito aibo biahai, nouro naibaha itiodoiro wia neiio neido naiba naiba idodiaiwaumo. 37Wia dooudo nou himia mere nouro naibaha otiodoiwa; nou naiba iaowa; mo mereido neiio aiwaimo‐orovidioi. 38Wia nou ta’uwa vine keauri oubi mere naibaha eauriwaumo nei himia himia naibaha iaowaumo: Nouri opuito mereri, ta’umo ainepiadaidumo wia nou himia batii imoo ainaimo‐arohooi. 39Wia neiio nou naibaha ohiaiwaumo, vine batiudo naibaha amehuawaumo, naiba epiawaumo. 40Ina nou ta’uwa vine bati pai‐dubu aiwauro’ui, nouri vine keauri oubido nouro taiba waiia’i? 41Nei nouido naiba iaowaumo: Nouri ubauba oubi nouro aiwai‐wotoi wia nouri vine bati, vine kiauri oubi ataido nouro aiwaimaati, nouri oubi neiio iopu nouido aiwaimo‐emaati naiha ta’uwa.

42Iesuro neido naiba iaowa: Rio hiwio ata Tana‐bukawa iapomo tatora nouri wadenu?

Nouri akabu moto kididi oubio naibaha aiveumo,

Doihabuo nou opuito akaburi motonu nouowa;

Nouri Iehova kidodiai na’i

Wia nouvia kemaea na’i imo idomaiwa.

43Mabu nouri mo rioido ainiao: Iehova bububati rio hapuoudo aiwaitateai wia ata oubido aiwaimaati, nouri oubido nei bububati iopu naibaha imohaudiotutiumo. 44Dubu nouri akabu ohuwa nouro aiwamoai, nouro aiwahebiai wia dubu nouri, akabu nou ohuwa aiwamoai, tuo tuo aibo nouro nou aiwauhuti. 45Wia nou ta’uwa auwo‐kohena oubi wia Parisea oubi nou oroaibo wade neiio naibaha irovidiowaumo nei umo naibaha oitiumo nou neido kiaori. 46Ina neiio nou tuito ohitimo niroi, oubi gemaido nei tore iatiwaumo, mabu nouri oubio naibaha araromomo nou peroveta duburi.

Currently Selected:

Mataio 21: KXW1941

Highlight

Copy