Mataio 22
22
1Ina Iesuro naibaha imowameai, neido oroaibo wade naiba aro; nou naiba iaowa: 2Toboro‐bububati nou pai‐dubu aibori; nouro oboara dubura oititoi horiomoo nou himia mereido naibaha idodiaiwa. 3Wia nou hiwaa oubi nouro naibaha itiodoi, horiomoo karo oubii nei ituamoi, wia neiio o’u niro biahai. 4Ina ata hiwaa oubi nouro naibaha itiodoi naiba iaowa, Taroumo horiomoo karo oubi, mo horiomoo tau nododiai; mo bulamakau wia gade kiho na’i nei tau niwotodumo wia dou oboiri auwoha modobori: ta’umo horiomoo ihomoi. 5Ina nei aiowodaudioumo wia nei himia naveito naibaha orohowaumo, amida nei bati mabuito, amida paki batito. 6Wia dooudo oubio nou himia hiwaa oubi naibaha iohiaumo, wia nei gooa naibaha iwaiwaumo wia naiba iwotowaumo. 7Ina pai‐duburo wade naibaha orovidio, nouvia auwo heauwo naibaha oiti; wia nou korowoto oubi nouro naibaha itiodoi, wia nouri korowoto oubi neiio nei naibaha iwotowaumo wia nei himia auwo oopo mumutotiha naibaha aradia. 8Ina nou hiwaa oubido nou naiba iaowa: Kidabuai horiomoo nou tau ododiai wia horiomoo kimorou oubii nei mea biahari. 9Nouri ta’umo navewa wia nouri oubi rioo airiviadaidumo, kidabuai horiomooido rioo nei taiituamo. 10Wia nouri hiwaa oubi navewa naibaha o’uwaumo, wia oubi auwoha neiio naiba iviaumo, mea oubi wia uba oubi nei naibaha idabuaiwaumo, wia kidabuai horiomoowa kiama’uwo oubii, neiio bati tau iapeumo. 11Ina Pai‐dubu naibaha odorowa, kiama’uwo oubii iauri, dubu na’u nouro naibaha eauri kidabuai hipura amiteai biahai. 12Wia nouido nou naiba iaowa: Mo mere, tounai iaii rodororo ro noito, kidabuai hipura amiteai tato? Wia nou mubaha oitiwaro. 13Wia Pai‐dubu nou himia hiwaa mereido naiba iaowa: Nou tura konora tatohitimo wia nou tatateaimo wia durii bati wegeito naibaha tahoiutimo wia idebi irotutimoi wia niimo imotoobutimoi neiio nouowa naibaha waimo‐emidiotuti. 14Mabu nouri oubi godogodo tau itua wia oubi godo itateai biahai.
15Ina Parisea oubi nei himia himia iaowaumo taiba Iesu nou himia wadewa nei ohiaimoi. 16Wia nei kitomudio mere, Herodiana oubimu, neiio nouido naibaha itiodoumo wia nei naiba iaowaumo: Auwo dubu e, imo umori ro naiheha duburi; Iehova wade roro rimatomudio naihehari wia ro oubi ata tore iati biahai; ro niro biahai oubio meamea wade roido iaomoi. 17Nouri imoido taroro, Taiba riraromo ro, meara ubara imo moni Kaisaraido emaatimoi? 18Ina Iesu umori nei ubauba kidia’i, nou naiba iaowa: Rioo mo teiri nematuhutidumo, rio kiromohuwodio oubiri? 19Moni na’u tawoumo moido, moro meauri. Wia na’u shilling nei naibaha owoumo. 20Wia nou neido naiba iaowa: Boti hohori, boti titiri nouowa? 21Nei nouido naiba iaowaumo Kaisarari; ina nou neido naiba iaowa: Nouri Kaisara na’i Kaisaraido tamaatimo, Iehova na’i Iehovaido tamaatimo. 22Ina nouri wade nei orovidiowaumo nei auwo gemaha naiba emaeawaumo wia neiio nou naibaha emeheaiwaumo wia nei himia naveito naibaha o’uwaumo.
23Ina hiwio’i nouowa amida Sadukea oubi nouido naibaha o’umo, oubi nouri neiio airaromodiotutiumo, koroihi oubi nei oroitoutimo raihe, wia nei nouido naibaha atodoumo, 24nei naiba iaowaumo; Auwo dubu e, Mosero tau aro, ina dubu nou mere ahomai tato oihiaiwa, nou himia niamaro, namu same kemidaiha emidai wia mere naibaha iahomo nou himia namuido. 25Ina nouvia 7 niamamio’i imomu, wia opuito mere’i o’boamu naibaha idabuaumo ina nou naiba oihiai wia mere ahomai biahai; nouri nou o’boa nouro emeheai nou himia niamaido. 26Naiba ememetutiumo niama ataro dau ememidio ina auoihiai, ina niama ataro dau ememidio ina auoihiai, ina wapudo mere’i naibaha oihiai. 27Wia nei dooudo, o’bo’i naibaha oihiai. 28Ina koritorai ta’u o’uwa, botiro warahooi o’bonu, nouri 7 niamamioo nouri o’boa ememidiotutiumo? 29Wia Iesuro nei naibaha imowameai wia neido naiba iaowa: Noura heehee kiao’i, mabu nouri Tana‐buka wia Iehova pupuo’i rioo umo biahai. 30Ina koroihiudo koroiitouti hiwiowa oubi idabutimo biahai wia idabuai emaai raihe; neiio Iehova gururu oubi aibori toborowa. 31Wade nouri kiaori, koroihi oubi nei koroitorairi; nouri wade Iehova rioido tau aro, rioo titi iapomo tatora? Nou naiba iaowa: 32Movia Aberahamo Urio‐abeari wia Isako Urio‐abeari wia Iakobo Urio‐abeari. Iehova nou Urio‐abea biahai koihiai oubido, nou kiiro oubi Urio‐abeari. 33Ina oubi gema nouri wade naibaha orovidiowaumo, neiio nou kitomudio wadeito aiemaeawaumo.
34Wia nou ta’uwa Parisea oubi naibaha orovidiowaumo nou Sadukea oubi mubaha naiba iwai nei naibaha idabutiwaumo. 35Ina na’u dubu neimu emidio, nou bubu modobo kiapo duburi, wia na’u katoro wadeito nouido naibaha atodoi, nouido ematuhemoi; nou naiba iaowa: 36Auwo dubu e, tonai bubu auwori, bubuudo auwoha? 37Iesu nouido naiba iaowa: Nouri opuito wia auwo buburi; Ro himia Urio‐abea, Iehova, ro nou niro kemahebidioiha tamahebidio, ro himia giopudo auwoha, wia ro himia urioudo auwoha, wia ro himia iminiudo auwoha. 38Nouri opuihaito auwo buburi. 39Wia bubu ata naibari. Ro himia oopo oubii, ro nei niro kemahebidioiha taimahebidio ro himiaido aibo. 40Nouri bubu neewa, neito opuitori wia bubu amida auwoha wia peroveta wade auwoha nei neiti gorowari.
41Ina nou ta’uwa Parisea oubi naibaha idabuaumo, Iesuro na’u kiatodoi wadeito neido naibaha iatodoi: 42Nou neido naiba iaowa: Rioo taiba rararomodumo Keriso botiri? Nou boti mereri? Neiio nouido naiba iaowaumo: Davida mereri. 43Nou neido naiba iaowa: Touna Davida nou himia Urio pupuito nouido arahoo Pai‐dubu? Nou naiba iaowa:
44Auwo‐dubu mo himia Pai‐dubuido naibaha iaowa:
Ro mo tuiha hapuoudo tami,
Doo ta’uwa ro himia bauurowaro oubi ro himia kono iedea bati moro ainamododiai.
45Ina Davida nouido Pai‐duburo arahoo, taiba nou nou mereri? 46Wia dubu ataro nouido taiba komowameai nei umo biahai, wia hiwio’i auwoha nouowa, kiatodoi wade nouido iatodoi nei tore emaatiwaumo.
Currently Selected:
Mataio 22: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
