Mataio 23
23
1Ina Iesuro oubi gemaido wia nou kitomudio mereido naibaha orowaduutiwa. 2Nou naiba iaowa: Titi oubio wia Parisea oubio Mose kemi batiwa naibaha emiwaumo. 3Mabu nouri nana auwoha neiio kimododiaiwa wade rio irovidiomoi, nouri rioo tairovidioumo wia taidodiaiwaumo; ata nei kidodiai nana’i rioo idodiaimo aue, nouri nei airoromododiaiwadumo wia idodiaimo biahai. 4Mabu nouri, miboi kiaotidio nana neiio naibaha itohitiwaumo pauwo kiaotidioi, wia neiio oubi benaito iaotomoi; ata neiio, nei himia tu na’uito ivioumo biahai. 5Wia nei himia kidodiai nana auwoha, oubio iaurimoi nei naibaha idodiaidumo. Tana wade pepa neiio nei opuwa oroutiwaumo wia nei hipura opu neiio tarabu iwaimoi. 6Opuito batii horiomoowa wia opuito kemi bati sunagowa nei auwo niroi. 7Wia niainiai wade pake batiwa wia oubi kiao wade, Rabbi, Rabbi, nei auwo niroi. 8Ata rio oro’idutimo aue, Rabbi, mabu nouri na’u rio himia auwo duburi, Keriso nouri, wia rio auwoha nou niamamiori. 9Wia rio batibatiwa dubu ataro rio abea paina idodoumo aue, mabu nouri na’u ro Abeari, nouvia toborowa. 10Ina rio paina auwo‐dubu, rioo oroidutimo aue, mabu nouri na’u rio Auwo‐duburi, Keriso nouri. 11Wia nouri dubu nou riomu auwori, nouro rio hiwaa mere aiwaiwai. 12Wia nouri dubu nou himia auwo aiwaiti, doo nou hipo aiwaiti wia nouri dubu nou muni aibori doo nou pai aiwaiti.
13Ere rioido! Titi‐oubira, Parisea oubira kiromohuwodio oubi; toboro‐bububati rioo omopaimoi oubii nei hohowa. Nouri rio himiao ido’utimo biahai, ina nouri oubio idoumoi, rio kitiodoi biahai. 14Ere rioido! Titi‐oubira, Parisea oubira, kiromohuwadio oubi; same upibaio nana’i rioo gooa iwaimo wia tutu kirodumea wadeito rioo naiba iaowaumo, koromohuo aibori.
15Ere rioido! Titi‐oubira, Parisea oubira, kiromohuwodio oubi; auwo‐turiwa, batibatiwa rioo orohodiotutiumo, na’u mere nou imini rio kiraromodio na’i nou aibo idodiai; wia nou ta’uwa rioo nou naiba idodiaiwaumo, rioo nouido Gehena mere owaimowa rio himeaido neewotoi, nou aibo.
16Ere rioido! Rio idomai tato kiwaboiia oubiri; Rio niaba aroumo; Nouri dubu nou Tana‐moto painawa heauwo owateai wade aiwaroi nou hobo aibori, wia nouri dubu nou Tana‐moto moni painawa heauwo owateai wade aiwaroi, nourovia wiha aiwai‐memei. 17Rio dawadawa oubi wia idomai tato oubi, taiba auwori monira e Tana‐motora, nouri Tana‐moto nou moni tana iwai? 18Wia rio naiba iaowa: Ina dubu nou Tana‐dodoo painawa, heauwo owateai wade aiwaroi, nou hobo aibori wia dubu nou kimio na Tana‐dodoo ohuwa, nou painawa, heauwo owateai wade aiwaroi nouvia wiha aiwai‐memei. 19Rio dawadawa oubi wia idomai tato oubi, taiba auwori, kimio nara e Tana‐dodoora, nouri Tana‐dodoo nou kimio na tana owai? 20Nouri dubu nou heauwo owateai wade aiwaroi Tana‐dodoo painawa nouro heauwo owateai wadeito naibaha iao Tana‐dodoo wia Tana‐dodoo ohuwa nana, nei painawa auwoha. 21Wia nouri dubu nou heauwo owateai wadeito aiwaroi Tana‐moto painawa nou heauwo owateai wadeito naiba iao, Tana‐moto wia Tana‐moto kemidio urio’i, neiti painawa. 22Wia nouri dubu nou heauwo owateai wadeito aiwaroi, Toboro painawa; Iehova kemi bati wia Tana‐urio nouowami, neiti painawa nou heauwo owateai wadeito naiba iaowa.
23Ere rioido! Titi oubira, Parisea oubira, kiromohuwodio oubi; rio himia minitira, ainisira, kuminira, 10 goho auwoha na’u goho rioo Iehovaido emaaumo. Ata nouri auwoauwo bubu kemidio nana rio idodiaiwaumo biahai; kiwotoi wade wia niainiai na’i wia kiraromodio na’i, nana nou aibo rio idodiaiwaumo biahai. Nana nouri rio kidodiaiha idodiaimoi ina nana ata emeheai raihe. 24Rio idomai tato kiwaboiiotuti oubi; rioo ponoii wegewa rihauodutidumu wia kamela rioo naibaha rimoodidumo.
25Ere rioido! Titi oubi wia Parisea oubi, kiromohuwodio oubi. Koimora merekira rioo wegewa sovio riwaidumo wia nei turiwa neiio hogoi kidia ramu wia ubauba imini ramu naibaha riapeutidumo. 26Ro idomai tato Parisea dubu, opuito nouri nana koimo gorowa taiduutiro wia koimo wegewa nou sovio naiba aiwaiti.
27Ere rioido! Titi oubi wia Parisea oubi, kiromohuwodio oubi. Nouri rio bohoboho gabidi bati aibori. Wegewa nei tiaha soviori, turiwa koroihi oubi horo’i wia kipuhuti nana’i nei airiapeutidumo. 28Rio naibari; rio wegewa, oubio idomaito meaha rimeauridumo ata rio turiwa kiromohuwadio na’i wia ubauba nana’i rio airiapeutidumo.
29Ere rioido! Titi oubi wia Parisea oubi, kiromohuwodio oubi; nouri rio peroveta oubi gabidi bati naibaha ridididumo wia meamea oubi gabidi bati, rioo sovio riwaidumo. 30Wia rio naibaha riaodumo; Ina imo abeamio hiwio’i nouowa kemidiomo’i, imo peroveta oubi iwotomo biahai, abeamio aibo. 31Nouri riovia, rio himiaido kemapoi oubiri; riovia peroveta oubi kiwoto oubii nei mereri. 32Rio abeamio modobo naibaha taiapeutimo rio. 33Rio ede oubi, rio kewahauke aramio, teiri waimo‐odaui rio, Gehena ubauba wihanu noudo? 34Nouri ta’aurimo, peroveta oubi wia imini mea oubi wia titi oubi moro rioido ainaitiodoi; wia amida rioo aiwaimoiwotoi wia amida rioo satauro ohuwa aiwaimo‐itomoi wia amida rio sunagowa rioo aiwaimo‐iwotodioi wia oopo ata wia oopo ata, rioo neido gooa aiwaimo‐iwai. 35Mabu nouri, mea sawi hopuwa arahauodoi rioo wiha aiwaimo‐omowai; meamea dubu Abela nou himia sawi noudo wia Sakaraia, Barakaia mere, nou himia sawi noito, nouri dubu rioo Tana‐moto wia Tana‐moto dodoo neiti turiwa naibaha epiaumo. 36Naiheha mo rioido ainiao: Nouri nana auwoha rio aramioido aiwaimo‐o’ui.
37Ierusalema e Ierusalema e. Rorovia peroveta oubi riwoto wia roido kotiodoi oubi neido rorovia akubuti riatoruti; Taiba hiwio godo ro mere’i mo tarito o’umo niroi, kokora mamu nou bamubamu tamu gorowa naibaha ipiraa, nou aibo; ata rowia niro biahai. 38Taauri, ro moto roido buru aibo tau emeheai. 39Nouri mo rioido ainaro, hiwio ata rioo mo eaurimo raihe nouri hiwiowa rioo naibaha aiwaimo‐iaoi, Niainiai dubu nouri, dubu nou Iehova painawa airo’uro.
Currently Selected:
Mataio 23: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
