Mataio 26

1Ina nouri kiao wade auwoha Iesuro naibaha ipoiio nou kitomudio mereido nouro naibaha iaowa: 2Rio umori, hiwio neewa dooudo airia, kiohodio horiomoo airo’udai wia Oubiha‐mere sataurowa otomai piroha aiwahiai. 3Ina auwo‐kohena oubi wia titi‐oubi wia mamusi mamusi neiio naibaha idabuaiwaumo pai‐kohena dubu, Kiapa nou painari, nou himia paimotowa. 4Wia nei himia himia naiba iaowaumo taiba neiio Iesuido piroa ohiaimoi wia nouido epiamoi. 5Ata nei naiba iaowaumo: Horiomoo hiwiowa ododiaimo raihe, ina oubi eamo eamo iwaimo tore.

6Wia nou ta’uwa Iesu Betaniwa naibaha emidio, Simona, lepera dubu, motowa. 7Na’u upi nouido o’uro: nouro Alabata uro, nibo mea diomo ramu, owouro; diomo nouri moni godogodori wia nouro nou opu ohuwa naibaha ahauodoi nou ta’uwa nou naibaha emiro ihoi. 8Ina nou kitomudio mereo naibaha eauriumo, nei heawo naiba oitiumo, naibaha iaowaumo: Ro diomo gooa touna mabu warowai? 9Diomo nouri moni godoito batowamidaimo wia moni nouri, nana tato oubido batimaatimo. 10Ina Iesu naibaha orovidio nou neido naiba iaowa: O’bonu teiri remaodumo? Nou kidia mea tau rododiai moido. 11Mabu nouri, nana tato oubi riomu kemidiori hiwio auwoha: mo riomu tutu emidio biahai. 12Diomo nouri mo tamawa nouro naiba ahauodoiwa, nou naiba ododiai mo gabidito owou gabori. 13Naiheha mo rioido ainaro: Nouri bati auwoha wia nouri hapuo auwoha pai‐mea totomu aiwai‐iaotuti oopo oopo modobo, nouri o’bo kidodiai nananu nou aiwaimo‐owaduuti nou araromomoi.

14Nou ta’uwa Iuda Isakariota, na’u dubu 12 oubi aueudo, auwo kohena oubido naibaha o’uro. 15Wia nou neido naibaha iaowa: Taiba nana naumo emaai mo rioo, ina moro Iesu rioido ainaimaai. Ina nei nouido wade naibaha owateaumo, 30 bohoboho moni naimo emaai. 16Ina ta’u auwoha dooudo, nouro nave naibaha omohotuti, Iesu piroha emaai neido.

17Ina opuito hiwio bread iaupatuti tato horiomoo, kitomudio mere Iesuido naibaha o’umo naiba iaowaumo: Tobatiwa niro ro, imo dou idiamo bati ododiaimoi, ro kiohodio horiomoo ihomoi? 18Wia nou naiba iaowa: Oopoito ta’umo na’u dubuido wia nouido naiba taroumo: Auwo‐dubu naiba iaowa; Mo himia ta’u tariwai: kiohodio horiomoo mo wia mo meremu ro motowa ainaimo‐ihoi. 19Wia kitomudio oubio naibaha ododiaiwaumo Iesu karo aibo wia kiohodio horiomoo naibaha idiamowaumo. 20Wia kiatimai kiatimai tariwai Iesu naibaha emi, 12 kitomudio meremu. 21Ina nei naibaha ihoumo nou naiba iaowa: Naiheha mo rioido nou niao; na’u dubu rio aueudo nou mo piroha ainawateai. 22Wia nei giopu auwoha auwo miboiha naibaha oitiumo wia nei auwoha nouido atodoi iaiwaumo. Au dubu e, Mora e Mora? 23Wia nouro naibaha imowameaiwa naiba iaowa: Nouri dubu momu tu kepuri gorowa idobiawa, nouro mo piroha ainawateai. 24Oubiha‐mere nouri naveito naibaha o’uro, titi nou iatiwaumo, nou aibo; Ere, nouri dubu Oubiha‐mere piroha owahuo: nou meaha dubuido nouri ina nou oroto raihe. 25Ina Iuda nou piroha kemaai dubu omowameai, naiba iaowa: Au‐dubu e, Mora? Iesu nouido naiba iaowa: Ro tau aro. 26Neiio aiihowaumo; Iesuro Bread naiba emidaiwa naiba emabitiwa naiba ekekutiwa wia kitomudio oubido naiba imaatiwa. Nou naiba iaowa: Taimemo ihoi, nouri mo gohori. 27Wia nouro koimo naibaha emidai, naiba emabitiwa, neido naiba imaatiwa; nou naiba iaowa: Rio auwoha nou taiidioumo. 28Nouri mo sawiri godogodo oubido oruodoi uba uba kidia ipiitimoi. Nouri nou orio bubu ododiairo. 29Wia rioido mo ainiao: Vine iopu obo moro ina idio raihe doo hiwio’i nouowa orio wine mo Abea bububatiwa moro riomu ainaiidioi.

30Ina nei gido idabodowaumo wia dooudo naibaha ihuoumo, Olive akabuito naibaha o’umo.

31Ina Iesu neido naiba iaowa: Duo nouri rio imini auwoha ubaubaha riraromodiodaidumo moido, mabu nouri nou titi ina iatiumo naiba: Moro mamoe dabi dubu ainapiai wia mamoe aiwaimo‐aratuuti. 32Ina nou ta’uwa dooudo mo oritoraiwa, opuito mo Galilaiaito na’ui, rio mo dooudori. 33Pita naibaha omowameai nouido, naiba iaowa: Ina oubi auwoha nei imini ubaubaha riraromodiodaidumo roido, mo imini ubaubaha roido araromodio raihe. 34Iesu nouido naiba iaowa: Naiheha mo roido ainaro: Rovia, duo nouri kokora wade otua tatowa, roro neewa na’u ta’uwa mainamatioi. 35Pita nouido naiba iaowa: Noupa mo romu ainaihiai, moro ro ainematio raihe. Ina kitomudio oubi auwoha na’u aibo aroumo.

36Ina Iesu neimu naibaha o’u ata batito paina Getesemane, wia nou kitomudio mereido nou naiba iaowa: Nouowa tamimo mo noito no’u kirodumeaito wade aroi. 37Wia Pita wia Sebedaio mere neewa, nouro naibaha iwoubiro wia imini godogodoha nou naiba iraromodio wia nou giopu miboiha naibaha emahebidio. 38Ina nou neibido naiba iaowa: Mo urio imini godogodoha niraromodio, kohiai tariwai: nouowa tamibi, taiauribi momu. 39Wia nou kekeha naibaha iariiai wia hohoito naibaha omoa wia wade kirodumeaito nou naiba iaowa: Mo himia Abea e, ina ro umori, tamidai koimo nouri mo aueudo: ata mo himia niro na biahai, Ro himia niro nari. 40Wia nou kitomudio oubido nou naibaha o’uwaro wia nouro neibi uwo iroubiwa iviabi. Wia Pitaido nou naiba iaowa: E! na’u komu ta’u momu eauri, ro umo tatora? 41Taiaurimo, tatodoimo kirodumeaito, ematuhe odoro tore. Urio mea nana nirorimahebidio wia goho pupuoiha biahai. 42Ina nou ata naibaha araiwairo wia wade kirodumeaito naiba iaowa: Mo himia Abea e, Ina koimo nouri mo mabuwa emeheai aue opuito mo nou nidio, nou meaha ro nirowa idodiai. 43Wia nou idaraiwai neibi uwo irowa iviabi, nouri neibi uworo idiwutibi. 44Wia neibi nouro naibaha imeheaibi nou naibaha araiwairo wia wade kirodumeaito aroi wia dooudo wade ata’i aroi, naibaha araiwai. 45Nou ta’uwa nou kitomudio oubido nou naibaha araiwairo wia nou neido naiba aro: Rio uwo tamohimo doihabuo wia hera tamidioumo. Taaurimo ta’u airo’uro wia Oubiha‐mere, ubauba oubi tuito, piroha tau owateai. 46Tairo’ibuamo, ta’umo, taiaurimo, mo piroha kowateai dubu tariwai.

47Ina nouvia wade iaowa: Iuda, nou 12 kitomudio mere na’uri, naibaha o’uro oubi gema noumu o’uwaumo, korowoto garaara ramu wia bugu ramu, auwo‐kohena oubi wia mamusi mamusi nei mabudo. 48Wia Iesu piroha kowateai dubu neido wade imododiai, nou naiba iaowa: Nouri dubu moro nou nohomeaidai nouri dubui nouri; rioo nou pupuito tahiaimo. 49Wia nou gamooiha Iesuido naibaha o’uro, naiba iaowa: Auwo Dubu e, wia nou naibaha ohomeaiwa. 50Ina Iesu nouido naiba iaowa: Mo mabu dubu ro teiri ro‐uro naiba. Wia nou ta’uwa nei naibaha o’umo wia nei tu Iesuwa naibaha itomaumo naibaha ohiaumo. 51Wia na’u dubu Iesu oubimu emidio nou tu naibaha ototuro, korowoto garaara naibaha aihiodidio wia pai‐kohena hiwaa mere na’u naibaha irihati wia nou hepato naiba ahiai. 52Ina Iesu nouido naiba iaowa; Ro korowoto garaara nou himia daimowa taibia, mabu nouri oubio korowoto garaara airiohidiodaidumo nei korowoto garaaraito aiwaimo‐orowotodiotuti. 53Riovia iraromo tatora, ina mo mo Abeaido atodoi tatora wia doo hagohagoha 12 patu aimoro gururu oubimu, nouro moido aiwauro‐itiodoi? 54Ata teiri titi nouri idodiaumo nou naiba iatiwa, nana nou aibo aiwaumo’i. 55Ina Iesu oubi gema neido naiba iaowa: Rioo piro dubuido aro’umo, korowoto garaara ramu wia bugu ramu, moido ohiaimoi? Hiwio auwoha mo Tana‐motowa riomu nou nemidiodiotuti, wia nou nimatomudio‐tuti ata rioo mo nouowa ohiaimo biahai. 56Wia nouri nana auwoha naibaha o’uro, peroveta titi kiati wade idodiaimoi. Ina kitomudio oubio auwoha nou naibaha emeheaiwaumo naiba odaumo.

57Wia Iesu kohidio oubi neiio nou naiba owaboiiaumo Kaiapa, pai‐kohena dubu, nou motoito. Titi oubira, mamusi mamusira nei nouowa naibaha idabuaiwaumo. 58Wia Pita doo’ihaudo orobodowaro. Nou pai‐kohena motoito naibaha odorowa wia kowaati oubimu naibaha emiwa, koropoiio na’i eaurimoi. 59Wia auwo‐kohena oubira, wade kiao oubira auwoha kiromohuwodioito kiauri nana’i neiio Iesu nou ramu omohuwodiowaumo, nei niro Iesu epiamoi. 60Ina neiio mabu oweamo biahai. Ina kiromohuwadioito kiauri oubi godogodo’i naibaha o’uwaumo, neiio mabu oweamo biahai. Dooudo kiromohuwadioito keauri dubu neewa naibaha o’udo. 61Naiba iaowaudo: Dubu nouri naiba iaowa: Iehova Tana‐moto mo umori kehebuti wia hiwio neewa na’uito ina moro ainaiididi. 62Wia pai‐kohena dubu naibaha otoa nouido naiba iaowa: Roro imowameai tatora nouri kiauri oubi teiri riaowadumo roido. 63Wia Iesu mubaha naiba oito. Wia pai‐kohena dubu naibaha omowameaiwa, nouido naiba iaowa: Mo roido wade modoboito niao, kiiro Urio‐abea painawa: taro imoido ina rovia Kerisora, Iehova Mere. 64Wia Iesu nouido naiba iaowa: Ro tau aro wia mo rioido ainaro: Doo rio Oubiha‐mere aiwaimoeauri, pupuo na’i tuiaha hapuowa aiwamidiotuti wia toboro bubuwa aiwauro’ui. 65Ina pai‐kohena dubu nou himia hipura naibaha emakekuti, naiba iaowa: Tiaha uba wade nouro aiiaro; keauri oubi ata imo niro biahai. Taaurimo doihabuo nou tiaha ubauba wade rioo tau rorovidiodumo. 66Rio taiba rararomodumo? Nei auwoha naiba omowameaiwaumo naiba iaowaumo: Wiha nouri nou mo’ihiai. 67Ina nou hohowa neiio haugeito naibaha amorowaumo wia neiio aiomohoiutiwaumo wia amidao nou tuito atowaumo. 68Wia nei naibaha iaowaumo. Taro imoido ro Keriso, botiro ririhati?

69Wia Pita moto kahitoudo naibaha emi, komotoi batiwa, wia na’u behe nouido naibaha o’uro naiba iaowa: Iesuwia Galilaia duburi, ro noumu korohori. 70Wia nou naiba aratiuti, oubi auwoha nei hohowa; nou naiba iaowa: Ro karo wade’i mo umo biahai. 71Ina biri mabuito nou naibaha iariiai, ata behero nou naibaha eauri wia nouowa kemidio oubido nou naiba iaowa: Iesuwia Nazareta duburi, dubu nouri noumu orohotuti. 72Wia nou ina aratiutiwa, ubauba wade ramu, Mo umo biahai dubui. 73Wia tutu ta’u biahai amida kotoi oubi nouido naibaha o’uwaumo wia Pitaido naiba iaowaumo: Naiheha rori na’u mere neimu; rovia wadeito nouibomaidumo. 74Ina nou ubauba wade naibaha iaowa wia ubauba koko wade ramu nou naiba iaowa: Dubu nouri mo umo biahai. Wia nou ta’uwa gamooiiha kokoro wade naibaha otua. 75Ina Pita naibaha iraromodiowa Iesuro nouido kiao wadei: Kokora wade otua tatowa roro mo ainamatioi neewa na’uito. Wia nou odorowa wia auwo idebi naibaha orotowa.

Currently Selected:

Mataio 26: KXW1941

Highlight

Copy