Mataio 27

1Ina hiwioro idaiheheai, auwo‐kohena oubi auwoha wia mamusi mamusi nei himia himia naibaha oromododiaiwaumo Iesu epiamoi. 2Ina neiio Iesu datohitiumo, neiio nou naibaha owoumo wia gavanaido, nou painari Pontio Pilato, neiio nou naibaha owateaumo.

3Nou ta’uwa Iuda, nou piroha kowateai mere, ina nouro naibaha eauri Iesu dawotoi, nou himia imini naibaha imoworohowa wia 30 bohoboho moni nou naibaha iwaiwai auwo‐kohena oubido wia mamusi mamusido. 4Wia nou naiba iaowa: Mo ubauba kidia tau nidodiai, nouri mea mea sawi mo tau nematuhe. Wia nei naibaha iaowaumo: Teiri imoido; roro himia tareauri. 5Wia bohoboho moni Tana‐motowa nou naibaha irereruai wia nou naibaha o’uro wia nou himia hokowa naibaha orotoihiai. 6Wia auwo‐kohena oubi bohoboho moni naibaha imidaumo naiba iaowaumo: Nou mea biahai Tana‐moni idiamo motowa ibiaumo, mabu nouri nei sawi wiha nanari. 7Wia nei himia himia naibaha orowaduutiwaumo wia dooudo Potter, nou himia bati, nei naibaha owamidaumo, douboi oubi imobutimoi nouowa. 8Mabu nouri, hopu nouri paina idodowaumo nou ta’uwa wia doih abuo, Sawi Hopuri. 9Nou ta’uwa nouri wade Ieremaia, peroveta dubu, tau aro nou naiheha oiti: Nou naiba iaowa: 30 bohoboho moni nei naibaha emidaumo, moni nouri dubu wiha moni. Isaraela oubi amida, nouri dubu wiha, neiio naibaha emapoiwaumo. 10Wia Potter nou himia bati neiio naibaha owamidaumo naiba Iehova moido modoboito iao.

11Wia Iesu gavana hohowa naibaha otoa wia gavana nouido naiba atodoiwa naiba iaowa: Rovia Iudea oubi Pai‐dubura? Wia Iesu nouido naiba iaowa: Roro airaro. 12Ina nou ta’uwa auwo‐kohena oubi wia mamusi mamusi neiio nou naibaha owapotatutiwaumo, wade ata nouro imowameai biahai. 13Ina Pilato nouido naiba iaowa: Nouri nana godogodo, roro irovidio tatora, neiio ro nou rowapotatutidumo? 14Wia wade ata Iesu nouido omowameai biahai, nouri Pilatoro auwo niimo emaeawa. 15Wia nouri horiomoo hiwio’i gavana kidia nou aibori; nouri durii daimo dubu na’u, oubi nei niroi, nouro neido naibaha owateaiwa. 16Wia auwo dubu na’u, Baraba nou painari, nou ta’uwa neiio aioworohowaumo. 17Ina nouri, nou ta’uwa neiio naibaha idabuaiwaumo Pilato neido naiba iaowa: Boti niroi rio moro riodo ainimaaidai Barabara e Iesura, ata painari Keriso. 18Nouri nou umori neiio nou ida owateaumo, mabu nouri neiio nou oriha eauriwaumo. 19Ina nou ta’uwa kiwotoi kemi bati ohuwai nou naibaha emi, nou o’boa wade nouido naibaha otiodoiwa, nou naiba iaowa: Nana ata nouri mea dubuido roro idodiai aue, mabu nouri nana godogodo nou dubui mo hiwoito niraromodio hiwionu nouowa. 20Wia auwo‐kohena oubio, oubi piipiiha naiba imaduduowaumo neiio Baraba atodoimoi wia Iesu epiamoi. 21Gavana naibaha omowameai wia neido naiba iaowa: Bodieiti niroi rio mo rioido imaai? Wia nei naiba iaowaumo: Baraba. 22Pilato neido naiba iaowa: Ina mo touna niaiidai Iesuido, paina ata Kerisori. Nei auwoha nouido naiba iaowaumo: Sataurowa tatomaimo. 23Wia gavana naiba iaowa: Teiri, touna uba nana idodiai nouro? Ina nei auwo niimo naibaha imakakaiwaumo: Sataurowa tatomaimo. 24Ina Pilatoro naibaha iauri nou ata na idodiai raihe wia oubi gema auwo eamo naibaha owahoroumo: nou obo naibaha emidai wia nou himia tu neewa iduutimama, oubi gema nei hohowa, wia nou naiba iaowa: Nouri mea dubu sawi mo gooa owai raihe, rioo nou taaurimo. 25Wia oubi auwoha naibaha omowameaiwaumo naibaha iaowaumo: Nou sawi imo opuito wia imo mere opuito mo’uro. 26Wia nouro Baraba neido naibaha otiodoiwa ina Iesu nouro ida irihatiwa, naibaha owateairo sataurowa otomaimoi.

27Nou ta’uwa gavana korowoto oubi Iesu auwo daimoito naibaha owaboiiaumo wia auwoha korowoto oubi nou mabuwa neiio naibaha idabuaumo. 28Wia nou hipura neiio naibaha omopiwoumo wia kaikarawi hipura neiio nou naibaha owatimaumo. 29Ina neiio nou kiowa eperapera omowotumo wia neiio nou opuwa naibaha owoomo wia keke bugu nou tuiha tuwa naibaha owohaumo wia nou hohowa neiio naibaha oroboriatutiwaumo wia nouido emesiowaumo naiba iaowaumo: Iudea Pai dubu e, Miiro! 30Wia neiio nouido haugeito naibaha amorowaumo wia nouri keke bugu nei naibaha emidaumo wia nou opuwa naibaha aiidaumo. 31Ina neiio nou kemesio oboiri, kaikarawi hipura nou aueudo neiio naibaha omopiwoumo wia nou himia hipura naibaha owamitiaumo wia nou naibaha owaboiiaumo sataurowa owaimoi.

32Ina neiio naibaha orowohuowaumo, Kureni dubu na’u, Simona nou painari, neiio naibaha oweaumo wia neiio nouido wade modoboito iaowaumo Iesu satauro emaotai. 33Wia nou ta’uwa na’u batito, paina Golgotha, nei tau o’umo, nouri wade kowaevia, Opu hora bati, 34Neiio wine, karakara na ramu, nouido naibaha owohaumo, ina nouro idamahibai nourowia idio raihe. 35Wia neiio Iesu sataurowa naibaha owaiumo wia nou hipura neiio himia himia naibaha eremaatiumo neiio kimehere naibaha ododiaiwaumo; nouri kiao wade naiheha iwaimoi naiba peroveta dubu tau aro, nou naiba iaowa: Mo hipura neiio himia himia naibaha eremaatiumo ina mo uduuduo neiio kimahere naibaha ododiaumo. 36Wia nei naibaha emiwaumo wia nouowa neiio nou eauriwaumo. 37Wia nou kemapoi wade titito iatiumo opu ohudo neiio naiba owateaumo NOUVIA IESURI, IUDEA PAI‐DUBU. 38Ina piro dubu neewa, neiio noumu satauro atawa itomaimamaumo, ata Iesu tuiha hapuoudo ata pere hapuoudo. 39Wia nou kohodio oubio nouido ubauba wadeito emama’utiwaumo wia neiio nou aiema’urowaumo. 40Wia nei naiba iaowaumo: Ere! Ro Tana‐moto ka’iuti duburi wia hiwio neewa na’u ito aiwai‐ididi; ro himia taritorai; ina ro Iehova Merewa, satauroudo taruoro. 41Nou aibo auwo‐kohena oubi nouido naibaha ematiutiwaumo titi oubimu wia mamusi mamusi oubimu; nei naiba iaowaumo: 42Nouro amida oubiha kiitouti, nou himia oritorai raihe; ina nou Isaraela Pai‐duburi, satauroudo moruoro wia imoo nou ainaimoararomodioi. 43Nourowia Iehovaido araromo; Iehovaro nou doihabuo mitorai ina nou nou niroi, mabu nouri nou naiba iaotuti: Movia Iehova Mereri. 44Piro dubu neewa’i noumu sataurowa itomaumo, nouido naibaha emama’utiwaudo nouri wade nou aibo.

45Wia hiwio guriwa otoiwa, durii oopo oopowa naibaha imodoiia, doho tariwai. 46Wia doho tariwai eredeawa, Iesu wade gema naibaha imakakaiwa: Nou naiba iaowa, Eloi, Eloi, lama sabakatani, nouri naiba iaowa: Mo Urio‐abea, mo Urio‐abea. Roro mo teri nebeede ro? 47Amida kotoi oubi ina nouri wade nei aiorovidiowaumo nei naibaha iaowaumo: Dubu nouri Elia romorou. 48Wia hagohagoha na’u dubu naibaha imaioro sponge naibaha emidai, karakara winewa naibaha odobia, bugu bariwa naibaha edea nouido naibaha emaai nouro idioi. 49Ata oubi auwoha naibaha iaowaumo: Moa! Imoo meaurimo ina Elia nouido itorai aiwauro’ui. 50Wia Iesu ata wade gema naibaha imotua wia nou himia urio naibaha iahiodidio. 51Wia ta’auri! Tana‐moto hipuru pirihuo, turiwa naibaha arakekea, ohudo wia hopudo wia hopu naibaha imuruowa wia akabu naibaha apoiia. 52Wia gabidi aiaraerewaumo, wia meamea oubi godogodo uwo kiroouti oubi aibo iro’ibuiowaumo, nei naibaha oroiitoutiwaumo. 53Wia dooudo nou idaritorai nei gabidi batiudo ihuodutiwaumo wia Tana‐oopoito nei naibaha idoutiwaumo wia oubi godogodoido nei himiao naibaha orowaeviaumo. 54Ina gavana keke, wia noumu Iesu eauri kemidio oubii, ina neiio hopu mumuruo wia nouri kidodiai nana’i naibaha iauriwaumo nei tiaha tore naibaha imahebidowaumo naiba iaowaumo: Dubui nouri naiheha Iehova Mereri. 55Wia upibaio godogodoo auoudo omotoiwaumo Iesu eauriwaumo. Neiio Iesu dooudo orobodowaumo Galilaiaudo wia neiio nou naibaha omotoitutiumo. 56Neimu Maria Magadala, naiba Maria, Iakobora Iosera neiti mamu, naiba Sebedaio mere, nei mamu.

57Doho oitiwa nana horohoro dubu, nou paina Iosepa, Arimatea duburi, nou naibaha o’uro, nouvia Iesu kitomudio mere na’uri. 58Nou Pilatoido naibaha o’u wia Iesu goho’i pupuito atodoi ina Pilatoro wade modoboito naibaha iaowa, Iesu goho taiwohamo. 59Nou ta’uwa Ioseparo goho damidai nouro sovio tamatama hipuraito naibaha oomutiwaro. 60Wia nou himia orio gabidi motowa, nou Iesu goho naibaha edeawa, moto nouri nouro akabu u’u otoro wia auwo akabu nou naibaha owaieworo uui puruo naibaha omopai, ina nou naibaha araiwairo. 61Wia Maria Magadala nouowa emidio wia Maria ata, neiti gabidi moto mabuwa emidiowaudo.

62Ina hiwio ata, nana mea kidodiaiwa hiwio’i dooudo; auwo kohena oubi wia Parisea oubi, Pilato mabuwa naibaha idabuaiwaumo. 63Wia nei naiba iaowaumo: Auwo‐dubu e, imoo naibaha nararomodumo, nouri kiromohuwodio dubu, ina nou kiirori, nou naiba aro, Neewa na’u hiwio dooudo moro ina ainaroitorai. 64Mabu nouri, ro wade modoboito taro, gabidi uu biri nou pupuo otohitimoi hiwio neewa na’uito, noupa nou kitomudio oubi duowa o’umowa wia nou piroito emidaimo tore, wia oubiido naiba iaomoi koihiaiudo nou tau oritorai, ina dooudo uba nana nou auwo auwori, opuito nana aibo biahai. 65Pilato neido naiba iaowa: Riovia kiauri oubi ramuri, rio naveito ta’umo, pupuiha tatohitimo naiba rio himia umoitimoi. 66Ina nei naibaha o’umo wia uu puruo neiio pupuiha naibaha omopatutiwaumo wia akabu biri neiio naibaha otohitiwaumo wia keauri oubi naibaha idaohiomaumo.

Currently Selected:

Mataio 27: KXW1941

Highlight

Copy