Mataio 28

1Wia Iudaia Sabati hiwio ida oropoiiowa, Auwo pura hiwio kiheheai tariwai, Maria Magadala wia ata Maria naibaha o’udo gabidi moto oweatoi. 2Wia taauri! Auwo mumuruo hopu aiiiriti, nouri Iehova gururu mere toboroudo naibaha oruoro wia akabu, uu puruoudo, nouro naibaha owaewuti wia nou ohuwa naibaha emi. 3Nou hoho babasi aibori imirisowa wia nou hipura bohobohoihari, sovio auwori. 4Wia keauri oubi tama naibaha imurowaumo, nouri neiio nouido tiaha tore emaatiwaumo wia nei koroihi oubi aibo oitiumo. 5Wia gururu‐mere naibaha omowameai wia o’bo neewa’i neitido naiba aro: Rieiti tore moa, nouri mo umori Iesu sataurowa nou owaumo rieiti nou romohodudo. 6Nou nouowa biahai, nouri nou tau oroitorai naiba nou tau aro. Ta’udo, taiauritoi Pai‐dubu korou bati nouowa. 7Ina taraiwaitoi hagohagoha, nou kitomudio mereido naiba tarotoi, nou kohiaiudo tau oroitorai; wia taauritoi nou Galilaia batito opuito wao’ui. Rioo nouowa aiwaimo‐eauri. Tarovidiotoi! mo nou naro rieitido. 8Neiti gabidi motoudo hagohagoha naibaha araiwaudo, tore ramu wia auwo geii ramu, wia nou himia kitomudio mereido pai naibaha owaiwaudo, neitio naibaha imaiowaudo umo iwaitoi. 9Ina neiti kitomudio mereido naibaha o’uwaudo neido imowahuoi, Iesuro neiti imotoimama wia nou naiba iaowa: Niainiai rieiti! Wia neiti naiba o’udo, nou kono neewa neiti naiba iohidioudo, neitio nouido naiba oroboriawaudo. 10Ina Iesu neitido naibaha iaowa: Tore moa! Ta’utoi mo niamamioido, tarotoi’o, nei Galilaito ta’umo, neiio mo nouowa ainaimo‐eauri.

11Nou ta’uwa neiti naibaha o’udo, amida keauri oubi oopoito naibaha ido’utiwaumo wia nouri kidodiaiwa nana auwoha auwokohena oubido neiio naibaha iwaeviaumo. 12Ina nou ta’uwa neiio mamusi mamusi oubimu naibaha idabuaiwaumo wia nei himia himia kiao wade nou oboiri; moni godogodo korowoto oubido nei naibaha imaatiumo. 13Nei naiba iaowaumo: Naiba taiiaoumo; Nou kitomudio mere duowa naibaha o’uwaumo, ina imo uwo irowa neiio nou piroito emidaumo. 14Ina wade nouri gavana gareito naibaha orowaiwa, imoo nou wade ainaimo‐omowaduuti, rio meamea oitimoi. 15Nouri neiio moni naibaha imidaumo wia nouri komowahuodio wade nou aibo, nei naibaha idodiaiwaumo. Wia nouri kiao wade Iudea oubimu naibaha iaowaumo, hiwio auwoha wia doihabuo.

16Ina 11 kitomudio oubi Galilaito naibaha o’umo auwo akabuito, batii nouri Iesuro neido nou imapoiwa. 17Wia nou ta’uwa neiio nou eauriwaumo, nei nouido naibaha oroboriawaumo wia ata amidao neiio iraromodioumo biahai. 18Wia Iesu neido naibaha o’u, naiba aro: Nou naibaha iaowa: Pupuo nana auwoha moido tau nemaatiro toborowa wia hopuwa. 19Mabu nouri, ta’umo rio, wia batibati oubi auwoha taimatomudioumo, neido babatiso naibaha taiwaimo, Abea painawa, Mere painawa, Tana‐urio painawa. 20Nouri nana auwoha mo rioido wade modoboito nou naro, rioo neido taimatomudioumo idodiaimoi, wia taaurimo! movia riomuri hiwio auwoha ina batibati auwoha oropoiiowa, ta’ui nouowa. Amen.

Currently Selected:

Mataio 28: KXW1941

Highlight

Copy