Mareko 1

1Iesu Keriso, Iehova Mere nou himia pai‐mea airowahorodai. 2Naiba nou titi tau iati, Isaia peroveta dubu nou himia bukawa.

Taauri mo himia hiwaa mere ro hohowa mainotiodoi.

Nouro ro nave meaha aiwamododiai.

3Na’u dubu viro burubatiwa iauwoidio,

Pai‐dubu nave meaha tamododiaimo.

Nou himia nave gamooiha taidodiaumo.

4Ioane naibaha o’u oboito burubatiwa nouro babatiso niabaha iwaituti. Nouro babatiso kidia naibaha itomututi; nouri ubauba kidia kiipiti modobori, oubio imini neido naibaha imowaiumo. 5Iudea oubi auwoha, naiba Ierusalema oubi auwoha, nouido naibaha o’umo; wia nei auwoha noudo babatiso naibaha oitiumo, nei himia ubauba kidia naibaha obodutiumo. 6Ioane kamela muho hipura amiteai wia bae koko tamari nou gohowa naibaha orooi. Nou kihona gaii wia morobo. 7Nou totomu naiba iaowa: Dubu ata mo dooudo aiwauro’ui, mo mea biahai nou himia douboi kono ivi omopiwoi. 8Moro rioido oboito babatiso tau niwai, nouro rioido Tana urioito babatiso aiwaimowaidioi.

9Wia hiwio’i nouowa Iesu Nasaretaudo, Galilaia mabudo, naibaha o’uro wia nou babatiso naibaha oiti Ioane aueudo, Ioridanawa. 10Ina nou ta’uwa nou oboudo daidiai nouro toboro kara’eraiwa naibaha eauri, wia Tana‐urio, badu aibo, nou ohudo oruowaro. 11Wia na’u wade toboroudo naibaha aroro: Rovia mo auwo niro Mereri. Mo roido auwo geii nimahebidio.

12Ina nou ta’uwa Tana‐urioro nou burubatito naibaha emaduduomai. 13Wia nou burubatiwa naibaha emidiotuti hiwio 40 wia Satanaro nou naibaha ematuhutituti, wia nou heauwo kaukau turi gorowa emidiotuti; wia gururu oubio nou meaha eauritutimo.

14Ina Ioane durii daimowa naibaha ibiaumo, dooudo Iesu Galilaito naibaha o’u Iehova pai‐mea oubido itomututi. 15Nou naiba iaotuti. Hiwio’i tau ro’u ina Iehova bububati nou tariwai. Rio imini ubauba nanaudo taimowaimo wia pai‐mea tairaromomo.

16Ina nou auwo‐turi barawa naibaha o’uwaro, Simonara niamara Anederea, neiti nouro iaurimama. Neiti auwo‐turiwa kamahu eheeudo, nouri neiti na kirobo oubiri. 17Wia Iesu neitido naiba aro: Mo dooudo ta’udo wia oubi kiroboido moro rieiti ainiatidiaidaimama. 18Ina nou ta’uwa neiti kamahu naibaha ebeedeudo wia nou dooudo neiti naibaha orobodoudo. 19Ina nou kekebuo daiariiai, Iakobo, Sebedaia mere, wia Ioane nou niamari, nouro iaurimama neiti himia pewa iroiidiomama, neiti kamahu emaoutiudo. 20Ina nou ta’uwa nouro neiti niabaha ituamama; ina neiti himia abea Sebedaio, nou himia kowaati oubimu, neitio naibaha emeheaudo wia nou dooudo naibaha o’udo.

21Wia Kapenaumaito nei naibaha o’umo wia Sabati hiwiowa sunagoito nou naibaha odoro naibaha itomuwa. 22Wia nou himia kitomudio wadewa neiio auwo niimo emaeawaumo, nouri nouro neido wade umo‐dubu aibo iatomuaiwa, titi kiati oubi aibo biahai. 23Wia dubu na’u uba urio ramu nei sunagowa naibaha emidio wia nou naibaha imakakaiwadiowa: Roro imo tanibeedei. Touna niaidaidumo imo roido, Iesu? 24Rovia Nasareta duburi. Ro imo iwotoi aro’uro? Mo umori ro boti; rovia Iehova tana‐duburi. 25Wia Iesuro nou naibaha emadohiomai, naiba iaowa: Mubaha taiti: tahuodidio nou au’eudo. 26Ina nou ta’uwa uba‐urioro nou naibaha eedioutiwa, nou eamo gema naibaha imotua wia nou nou aueudo naibaha ohuodidio. 27Wia nei auwoha aiemaeawaumo wia nei himia himia naibaha aratorowaumo: Tounai nouri? Orio kitomudio wadera? Uba urioido nou wade modoboito riao umo‐dubu aibori, wia neiio nou aiorovidiowaumo. 28Ina nou ta’uwa nou paina naibaha oboowa oopo oopo modobo Galilaia kaee.

29Ina nei sunagoudo naibaha ihuomo, Simonara Anedereara motoito nei naibaha idoumo Ioanera Iakoboramu. 30Wia Simona o’bo mamu kaupi orouwa ina neiio nouido naibaha orowaduoumo. 31Wia nou o’uwa wia tuudo naibaha ohiai naiba ouviai ina nou ta’uwa kaupiro nou naibaha emeheai wia neido nou naibaha imiowa.

32Dohodohowa, hiwio kahoiiawa, uba kirouti oubi wia uba urio ramu oubi, neiio nouido naibaha iworohowaumo. 33Wia oopo oubi auwoha biri mabuwa naibaha idabuaiwaumo. 34Godogodo oubi uba kirouti, tiatiaha temeteme ramu, nouro meaha iwaiwa wia uba urio godogodo nouro naiba iahiitiwa. Uba urio nouro naibaha imadohiomatutiwa, wade iaomo tore, nouri nei nou umoitiumo.

35Duoduowa keke, hiwio meamea iheheai biahai, nou naibaha o’ibua, burubatito naibaha o’u, wia nouowa kirodumeaito wade naibaha arowa. 36Simona wia noumu kemidio oubii nei nou dooudo orobodowaumo. 37Ina neiio nou naibaha oweaumo nei naibaha iaowaumo: Oubi auwoha nei ro romohodumo. 38Nou neido naiba aro: Imo ta’imo tariwa oopo amidanu noito, nouri mo totomu nouowa narodai, mabu nouri mo nou gabo no’uro. 39Wia nou totomu naiba iaowa nei sunagoi nouowa, Galilaia oopo gemawa wia uba urio nouro naibaha iaho’iutiwa.

40Wia na’u lepera ramu dubu nouido o’uro naiba hobo atoro wia nouido popoito naibaha imohorai, nouido naiba atodoiwa: Ina ro nirowa, ro umori mo sovio anowaidai. 41Wia Iesu nouido niainiai emahebidiowa wia nou tu naibaha otuturo naiba atibodoi wia nouido naiba iaowa: Mo niro. Ro sovio taiti. 42Nou ta’uwa hagohagoha lepera temeteme noudo naibaha emeheai wia nou sovio naibaha oiti. 43Wia nou nouido wade pupuoito iaowa wia nou mabudo nou naibaha otiodoi. 44Nou nouido naiba iaowa: Taauri ro wade oubi amidaido iao aue. Ta’uo ro himia ko’u naveito, kohena‐dubuido ro hoho tawaevia. Tamaai niainiai nana, irio katoai wiha, naiba Mose wade modoboito nou iao, oubido modobo iwaeviai. 45Wia nou naibaha ohuo wia nouri nana nouro iwaduuti naibaha iai, oroa nouri, oopo gemawa, nou naibaha oboowa. Mabu nouri Iesuro oopo ata paeaha odoro raihe. Nou kahitowa naibaha emidiowa buru batiwa; oubio batibati auudo nouido naibaha orohotutiumo.

Currently Selected:

Mareko 1: KXW1941

Highlight

Copy