Mareko 13
13
1Nou ina naibaha ohuowa Tana‐motoudo, nou himia kitomudio mere na’u nouido naibaha iaowa; Auwo‐dubu e, Taiauri nouri tiaha akabui wia nouri tiaha motoi. 2Wia Iesuro nouido naiba iaowa: Roro ariauri nouri auwo auwo motoi? Doo na’u akabu ata akabu ohuwa ia raihe nei auwoha hopuito aiwaimo‐iherei.
3Ina nou ta’uwa nou naibaha emi Oliveta akabu ohuwa, Tana moto hohoito emabootidio; Pitara Iakobora wia Ioanera Anedereara nouido sisiboito naibaha atodoibumo. 4Taro imoido taiba ta’uwa waiiai na’i; tou modobo’i nana nouri nei tariwai ridodiaidaidumo. 5Wia Iesuro neido iaoi naibaha iai: Taaurimo meaha oubio rio imatuhe tore. 6Oubi godogodo aiwaimo o’ui mo painawa ina neiio aiwaimo‐iaoi: Mo Kerisori wia godogodo oubi neiio aiwaimo‐ematuhuti. 7Nou ta’uwa rioo irovidiomowa kihi wade wia kihi pai, rio tore iatimo aue, nana nouri ko’uiha wauro’ui ata nou koropoiio ta’u biahai. 8Na’u oubi ata oubimu aiwaimo‐orowotoi, na’u bububati ata bububati oubimu aiwaimo‐orowotoi; wia amida bati hopu mumuruoo aiwaimo‐iiti, wia due ta’u amida aiwaumo o’ui. Nouri nana nou mibo ta’uwa kowahoro nari.
9Rio himiaido taiaurimo: Neiio rio wade koromododiaiwa oubido aiwaimo‐imaai wia rioo kiwoto nana sunagowa aiwaimo‐iviai wia neiio rio opuito oubido wia pai oubido aiwaimo‐iworohotuti mo himia painawa, naiheha na neido imapoiwai. 10Opuito Paimea totomoito kiaoiha iaomoi, oubi auwohaido. 11Wia nou ta’uwa neiio rio aiwaimo‐iwoi, wia kiwotoi oubido aiwaimo‐emaai, rio himia kiao wade opuito pauwo araromomo aue, na’u nouri, rioido kimaati kiao wade rio naibaha taiiaomo; mabu nouri rioo iaomo biahai, Tana‐urio nou himiaro riao. 12Namuro nou niama aiwaimaai epiai; abearo nou himia mere aiwaimaai epiai; wia mere amida heauwo aiwaimoewararioi nei himia abeamiora mamiora iwotomoi. 13Oubi auwoha neiio rio oriha aiwaimo‐iauri mo himia painawa, ina nouri dubu nou giieiha ohidioi nou himia hiwio auwoha, nourovia kiiro aiwaveai.
14Nou ta’uwa rioo aiwaimo‐eauri tiaha gooa kowai nana otoiwa nou himia naiheha kotoi bati biahai, naiba Daniela peroveta duburi tau aro (kiapo dubu nou mo’umo koitiri) nou ta’uwa Iudaiawa kemidio oubii, akabu opuito tarovioumo. 15Ina dubu nou moto ohuwa emidiowa, oruo raihe, moto kupuoito nana imei. 16Wia dubu nou bati mabuwa emidowa, nou araiwai raihe nou himia uduuduo emidai. 17Niainiai bamu kiworoho oubii wia bamu kiaerudio oubii, hiwio’i nouowa. 18Tatodoimo rio nouri uba ta’u uuto ta’uwa ko’u biahai. 19Mabu nouri hiwio’i nouowa tiaha mibo nana aiwauroui, Nou ta’uwa Iehovaro nana auwoha nou idodiai nouowa, naiba uba nana o’u biahai, wia doo ta’uwa auwo uba nana nou aibo o’u raihe. 20Ina Iehovaro nouri hiwio’i komuha owai biahai oubi auwoha nei iiromo raihe: ata nouri hiwio’i nouro komuha tau ahiai nou himia kimeibomatuti oubido, nouri oubi nou himiaro nou iapo. 21Ina dubu ataro rioido arowa: Taauri Keriso nouri, taauri Keriso noura; rioo orovidioumo aue. 22Mabu nouri koromohuwodio Kerisoi wia koromohuwodio peroveta oubii aiwaumo’ui wia kimapoi nana wia tiaha nana neiio aiwaimo‐imapoi neiio kimeibomatuti oubi imatuhutimo niroi. 23Ata rioo tarovidioumo: taaurimo moro rioido opuito nou naro nouri nana auwoha.
24Hiwio’i nouowa, mibo ta’u dooudo, hiwio duriiro aiwamurai wia bara nou himia pida imeivitidio raihe. 25Wia huri toboroudo aiwaumo oromoouti wia toboro pupuo nana’i nei aiwaimo‐erederioi. 26Ina nou ta’uwa Oubiha‐mere neiio aiwaimo‐eauri, bubu ramu o’uwa, auwo pupuo nana ramu wia moari ramu. 27Wia hiwio nouri nou himia gururu oubi nouro aiwauro‐itiodoi, wia nou himia kimeibomatuti oubi nouro aiwaidabuai, hurama neewa neewa nei mabudo, auwowa hopu batiudo wia auwowa toboro batiudo.
28Wia oro‐aibo wade suke nua mabudo tarovidioumo rio; Nou ta’uwa ketere iwatatutiwa wia paha omobodiaiwawa, rio umori konobo tariwai. 29Ina nou aibo na’i nouri o’uwa rio eaurimowa, umo taitimo nou tariwai biri kahitowa. 30Naiheha mo rioido ainaro, nouri aramio nei oropoiioumo raihe, opuito nouri nana auwoha aiwaimooropoiioi. 31Toboro wia hopu aiwaimooropoiioi, mo himia kiao wade’i oropoiioumo raihe. 32Wia hiwio nouri wia ta’u nouri oubi umo biahai wia toborowa kemidio gururu oubi, nei umo biahai wia Mere nou umo biahai, Abea nou himia gauwoha nouvia umori. 33Rio tore taiatimo; taaurimo mea wia kirodumeaito wade taroumo, mabu nouri rio umo biahai tou hiwio wauro’ui nou. 34Oubiha‐mere nou na’u dubu aibori: nou bati auwoito naibaha o’u wia nou himia moto naibaha ebeede, wia nou himia kowaati oubido pupuoito imapoiwa, dubu auwoha nei himia kiwaati na ramuri, wia nouro keauri dubuido wade modoboito aro, meaha emeauri. 35Rio taaurimo meaha mabu nouri moto Abea karaiwai hiwio’i rio umo biahai, dohowa waro’ui, duo gohowa wauro’ui, kokoro wadewa wauro’ui, hiwio kiheheaiwa wauro’ui. 36Ina nou hagohagoha o’uwa, rio nouro uwowa ivia tore. 37Wia nouri wade mo rioido nou niao, oubi auwohaido mo naibaha niao: Taaurimo mea.
Currently Selected:
Mareko 13: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
