Mareko 14

1Ina hiwio neewa dooudo kiohodio horiomoo wia dou iaupatuti tato horiomoo neiti hiwio’i o’uwa: wia auwo‐kohena oubira, titi oubira nei himia himia naibaha iraromodiowaumo, taiba neiio Iesu piroha ohiaimoi wia epiamoi. 2Wia neiio naiba aroumo: Horiomoo hiwio’i nouowa moa; imoo oubi eamo iwaimo tore.

3Ina nou ta’uwa nou Betaniawa naibaha emidio, Simona lepera dubu motowa nou ihowa, na’u o’bo naibaha o’uro; nouro orimo orimo akabu uro nibo mea diomo ramu owouro, diomo nouri moni godogodori; Uro nouro naibaha epeeuti wia Iesu opu ohuwa naibaha ahauodoi. 4Wia oubi amida nouowa emidioumo nei himia niro gorowa gunuuni naibaha iatiwaumo. Nei naiba iaowaumo: O’bonu diomo’i gooa teiri rowai? 5Diomo nouri moni godogodaito batowamidaimo wia moni nouri nana tato oubido batimaati. Wia neiio nou naibaha emaowaumo. 6Wia Iesuro naibaha iaowa: Nou moa; rioo teiri remama’utiwadumo nou? Meaha kidodiai na’i nouro moido tau idodiai. 7Mabu nouri nana tato oubi hiwio auwoha riomu karaeaito remidiodumo ina rio niro mea nana neido idodiai rio umori kidodiai ata mo riomu hiwio auwoha emidio biahai. 8Nouri nana nou umori, nouro tau idodiai. Nouro opuito mo goho tau adiri, mo gabidi batiwa kedea ta’ui nouowa. 9Naiheha mo rioido ainaro. Batii nouowa, hapuo’i nouowa nouri paimea totomoito aiwaimo‐iaoi, oopo oopo auwoha nou himia kidodiai na’i aiwaimoiwaduuti, nou araromodiomoi.

10Wia Iuda Isakarioto na’u dubu 12 oubi aueudo, pai‐kohena oubido naibaha o’u, nouro neido Iesu owahuoi. 11Ina nou ta’uwa neiio idaorovidioumo nei tiaha geii emahebidiowaumo ina nei nouido wade naibaha owateaumo moni nouido emaai. Nouri nou nave omohawa, Iesu neido piroha imowahuo.

12Ina bread kiaupatuti tato horiomoo opuito hiwio’i nouowa kiohodio mamoe kepia hiwio’i, Iesu kitomudio mere nouido naibaha atodoumo: Tobatito naiidumo imo dou kidiamo bati mea ododiaimoi nouri ro kiohodio horiomoo’i ihomoi. 13Ina neewatoi kitomudio mere neewa, nouro naibaha itiodoimama wia neitido nou naibaha iaowa: Rieiti oopo’i noito ta’utoi wia na’u dubu rieitido o’uwa, obo ooro ramu; nou dooudo ta’utoi. 14Wia nouri moto nou odorowa rieitio moto pai‐dubuido naiba tarotoi. Auwo‐dubu naiba raroro; Touai mo moto nuumo, mo kiohodio horiomoo iho bati mo himia kitomudio meremu. 15Wia nouro rieitido airimapoiwadaimama tutu moto nuumo’i ohuwa; kiho dodoo ramuri wia kemiwa bati ramuri. Nouowa rieitio imoido meaha taidodiaitoi. 16Wia kitamudio mere neewa’i neiti naibaha o’udo wai oopoito naibaha ihuodidioudo. Neitio naibaha oweaudo Iesu karo aibori wia kiohodio horiomoo’i neitio meaha naibaha ododiaiwaudo.

17Kiatimai tariwai Iesu nou himia 12 kitomudio meremu naibaha o’umo. 18Ina nei naibaha emiwaumo ihoi, Iesu naiba iaowa: Naiheha mo rioido nou naro: na’u dubu momu ihotoiwa nouro mo piroha nowateaidai. 19Wia nei imini godogodoha iraromodiowaumo wia nei himia himia nouido naiba iaowaumo: Mora e mora? 20Wia nou neido naiba iaowa: Nouvia na’u mereri rio 12 mere aueudo, nouri dubu nou momu tu kepuri gorowa idobiowa. 21Oubiha‐mere naibaha o’uro, titi nou aibo tau iati, ere dubu nouri Oubiha‐mere nouro piroha owahuo ina dubu nouri nou oroto biahai nouri nou meaha nouido.

22Ina nei aiihowaumo nouro bread naibaha emidai naiba emabitiwa naiba ekekutiwa wia neido naibaha imaatiwa naiba iaowa: Taimemo ihoi, nouri mo gohori. 23Wia nouro koimo naibaha emidai ina nou naibaha emabitiwa nouro neido naibaha imaatiwa wia nei auwoha naibaha idiowaumo. 24Wia nou neido naiba iaowa: Nouri mo sawiri godo oubido kahauodutiri; nou orio buburi. 25Naiheha mo rioido ainaro: Vine iopu obo ata moro ina idio raihe, doo hiwio’i nouowa orio wine mo Abea bububatiwa moro ainai‐idioi.

26Ina nei gido dabodowaumo dooudo, nei naibaha ihuoumo Olive akabuito naibaha o’umo.

27Wia Iesu neido naiba iaowa: Duo nouri rio imini auwoha ubaubaha riraromodiodaidumo moido, nouri titi nou tau iati naiba: Moro mamoe dabi dubu ainapiai wia mamoe aiwaimo‐aratuuti. 28Ina nou ta’uwa dooudo mo oroitoraiwa, opuito mo Galilaiato na’ui, rio mo dooudori. 29Wia Pita nouido naiba iaowa: Noupa oubi auwoha roido nei imini ubaubaha riraromodiodaidumo, mo naiba biahai. 30Wia Iesu noudio naiba aro: Naiheha, mo roido ainaro, rovia hiwio nouri wia duo nouri, kokoro wade neewatoi ta’u otua tatowa, roro mo ainamatioi neewa na’u ta’uito. 31Ina nou pupuoito naiba iaowa: Ina mo romu ainaihiai moro ro ematio raihe; kitomudio mere auwoha na’u imini aibo iaowaumo.

32Wia na’u bati, nou paina Getesemane, noito nei naibaha o’umo wia nou himia kitomudio mereido nou naibaha iaowa: Nouowa tamimo ina mo wade kirodumeaito aroi aina’i. 33Nouro Pita wia Iakobo wia Ioane, naibaha iaubuaibi, noumu naibaha o’ubumo. Ina nou ta’uwa nou tiaha tore aati naibaha iai wia nou imini godogodoha iraromodiowa. 34Wia nou neido naiba iaowa; Mo mini tiaha mibo nemahebidio koihiai tariwai. Nouowa tamibi wia taauribi. 35Wia nou kekebuo naibaha iariiai wia hopuwa naibaha omoa wia wade kirodumeaito naiba iaowa: Ina nou pauwo biahai, nouri uba nana mo mabudo naibaha otateai. 36Nou naiba iaowa, Aba Abea. Nana auwoha rovia kidodiaiwa umori; koimo nouri mo mabudo tamidai. Ata mo nirowa biahai, Ro himia nirori. 37Wia nou naibaha o’u wia nouro neibi uwo irowa iviabi, wia Pitaido nou naiba iaowa: Simona, uwo aroro? Na’u komo ta’u momu eauri, ro umo tatora? 38Taaurimo mea; kirodumea wadeito taromo; kematuhe odoro tore. Naiheha, urio nou auwo niroi ata goho nou pupuo biahai. 39Ina nou naibaha iariiai wia kirodumea wadeito naiba iaowa opuito karo wade’i nou aibo. 40Wia nou ina naibaha araiwai, neibi ina uwo irowa iviabi mabu neibi idomai paha mibo imahebediowabumo, ina nei umo biahai taiba komowameai wade neiio nouido aromoi. 41Wia ata ta’u, neewa na’u ta’u, nou naibaha araiwutiwaro wia nou neido naiba iaowa: Rio uwo tamohimo wia rio hera tamidioumo: oboiri; ta’u tau rou; taiaurimo Oubiha‐mere uba oubi tuito tau imaai. 42Tatoamo, ta’imo, taaurimo, nouri mo piroha kowahuo dubu nou tariwai.

43Ina nouvia wade naiba iaowa: Iuda Isakariota, na’u mere 12 kitomudio mere na’uri, wia piipiiha oubi noumu nouido naibaha o’uwaumo; korowoto garaara ramu wia bugu ramu, auwo kohena oubira titi oubira wia mamusi mamusi nei mabudo, neiio naibaha o’uwaumo. 44Wia Iesu piroha kowahuo dubu neido na’u modobo naibaha imaai, nou naiba iaowa: Nouri dubu moro nou nohomeaidai, dubui nouri; rioo nou taihiaimo wia meaha tawaboiamo. 45Ina nou ta’uwa nou ida o’uro nou Iesuido gamooha o’u wia nou naiba iaowa: Rabbi e, wia nouro nou naibaha ohomeaiwa. 46Nei Iesuwa tu naibaha itomaumo naibaha ohiaumo. 47Wia na’u dubu tarihawa otoi nou himia korowoto garaara naibaha ahiodidio wia pai kohena dubu hiwaa mere nouro naibaha irihati wia nou hepato naibaha udea. 48Wia Iesuro neido naibaha imowameai wia nou neido naiba iaowa: Rio mo piro dubu aibo ohiai aro’umo, korowoto garaara ramu wia bugu ramu. 49Hiwio auwoha Tana‐motowa mo riomu nemidiotuti ina nou niatomuaituti wia rioo mo nouowa ohiaimo biahai; ata tana titi wade nouri kidodiaiha idodiaiwatuti. 50Wia nei auwoha nou naibaha emeheaumo naibaha odauwaumo.

51Wia na’u orio dubu nou dooudo orobodowa bohoboho hipura na’u, gohowa atimatidio, wia orio oubio nou naibaha ohiaumo. 52Wia nou bohoboho hipura naibaha emeheai wia nou nei aueudo turuuha naibaha odauwaro.

53Wia neiio Iesu pai kohena dubuido naibaha owabo’iaumo. Auwoha auwo kohena oubira, titi oubira wia mamusi mamusi, nei noumu naibaha idabuaiwaumo. 54Wia Pita dooihaudo orobodowaro moto turito auwo‐kohena dubu, nou himia auwo moto turi gorowa; wia kowaati oubimu nou naibaha emi, kupo mabuwa erememebidiowa. 55Wia auwo‐kohena oubi wia wade kiao oubi auwoha, neiio nana kiauri oubi naibaha imohowaumo Iesu epiamoi, ina neiio iviamo biahai. 56Nouri oubi godo koromohuoito keauri wade nouido iaowaumo ina nei keauri wade’i na’u modobo biahai. 57Ina oubi amida naibaha otoaumo wia nei nouido koromohuoito keauri wade naibaha iaowaumo, neiio naiba iaowaumo: 58Imoo nou tau norovidioumo, nou naiba kiaoi: Nouri tuito kididi Tana‐motonu moro ainai‐outi wia hiwio neewa na’uito moro Tana‐moto ata ainai‐ididi, tuito ododiai raihe. 59Ina ata nouri nei wade modoboiha biahai. 60Wia pai‐kohena dubu nei turiwa naibaha otoa, ina Iesu nouro naibaha atodoi, nou naiba iaowa: Roro imowameai tatora, teiri keauri na’i nouri, nei roido nou riaodumo? 61Wia nou mubaha naibaha oiti, ata wade nouro imowameai biahai ina ata ta’uwa auwo‐kohena dubu nouido naibaha atodoi: Rovia Kerisora Moari‐urio Merera? 62Wia Iesu naiba iaowa: Mo nouri, wia rioo Oubiha‐mere aiwaimo‐eauri pupuiha‐urio tuiha hapuowa emidiowa wia toboro bubu turiwa aiwauro o’uwai. 63Ina auwo‐kohena dubu nou himia hipura naibaha ikekea wia nou naiba iaowa: Teiri nimohowadumo keauri oubi amida? 64Rioo tau orovidioumo nouri ubauba kiao wade’i. Touna rararomodumo rio? Wia neiio nou auwoha emapoumo: Naiheha wiha nouri, nou mohiai. 65Wia amidao haugeto amoromoi naibaha ia’iumo, wia neiio nou hoho naibaha omuraumo wia neiio nou naibaha atowaumo wia nei nouido naiba iaowaumo: Totomoito taroro. Wia hiwaa oubio nou tuito naibaha atowaumo.

66Wia Pita nou kupo mabuwa emidiowa, tutu moto turiwa, wia auwo kohena dubu hiwaa behe na’u naibaha o’u: 67Ina nouro Pita naibaha owea kupo mabuwa kemidiowa, nouro nou aieauriwa wia nou naiba iaowa: Iesuwia Nasareta duburi ro noumu emidiotuti. 68Wia nou naiba aratioutiwa naiba iaowa: Ro kiao wade’i mo umo biahai wia moro emitevidio biahai; wia nou biri mabuito naibaha ohuo wia kokoro wade naibaha otua. 69Ina behe’i nouro naibaha eauri, wia tariwa kotoi oubi neido aroi naiba iaii: Dubu nouri Iesu mere na’uri. 70Wia nou ina naibaha aratioutiwa. Wia tutu ta’u biahai, tariwa kotoi oubi amida Pitaido neiio ina naiba iaowaumo: Naiheha rori, ro nei mere na’uri, rovia Galilaia duburi. 71Wia ubauba wade kokoiha nouro aroi naibaha iai, nou naiba iaowa: Rioo kahoo dubui nouri, mo umo biahai. 72Wia ata ta’u neewa, kokoro wade naibaha otua, wia Pita iminiwa naibaha iraromodiowa nouri kiao wade’i Iesuro nou aro: Kokoro wade otua tatowa neewa ta’uwa, ina roro mo ainamatioi neewa na’u ta’uito. Ina nouro iminiwa naibaha iraromodiowa nou idebi naibaha emai.

Currently Selected:

Mareko 14: KXW1941

Highlight

Copy