Mareko 15

1Ina nou ta’uwa hiwio idaiheheai, auwo kohena oubira, mamusi mamusira wia titi oubi wia wade kiao oubi, nei wade naibaha oromododiaiwaumo wia neiio Iesu naibaha otohiaumo naibaha owoumo ina Pilatoido naibaha owateaumo. 2Pilatoro Iesuido naibaha atodoiwa: Rovia Iudaia oubi Pai‐dubura? Wia Iesuro nouido naibaha omowameai naiba iaowa: Mo nouri. 3Wia auwo kohena oubi nei nouido nana godogodo ibodutiwaumo, ina nouro wade ata imowameai biahai. 4Wia Pilatoro Iesuido ina naibaha atodoi: Wade ata roro imowameai tatora? Taiauri nana godogodo neiio roido nou ribodutidumo. 5Wia Iesuro wade ata imowameai biahai, nouri Pilatoro aiemaeawa.

6Wia nouri horiomoo ta’uwa, Pilatoro durii daimo kemidio dubu na’u neido naibaha otiodoi, nouri dubu nei niroi. 7Wia dubu na’u, nou paina Baraba, durii daimowa emidiotuti kotohiairi, korobo oubii neimu, neiio oubi aiwotoumo korowotowa. 8Wia oubi piipiiha gavanaido naiba o’umo nouido naiba atodoumo auwoha ta’u kidodiaiwa na’i nou aibo, nouro idodiai. 9Pilatoro neido naibaha imowameai, naiba iaowa: Rio nirora moro Iudaia Pai‐dubu rioido otiodoira? 10Mabu nouri nou umori, auwo kohena oubi Iesu ida owateaumo, nouri neiio nou oriha eauriwaumo. 11Wia auwo kohena oubio piipiiha oubi, heauwo oitimoi naibaha iwaiwaumo nouri Pilatoro Baraba neido batimetiodoi. 12Wia Pilatoro neido naibaha imowameai ina iaowa: Ina touna niaiidai dubunu nouido, rioo nou rahoodumo, Iudaia oubi Pai‐dubunu? 13Ina nei nouido naibaha imakakaiwaumo: Sataurowa tatomaimo. 14Pilatoro neido naiba iaowa: Teiri touna ubauba nana idodiai nouro? Wia nei ina auwo niimo naibaha imakakaiwaumo: Sataurowa tatomaimo. 15Wia Pilato nou niro piipiiha oubii geii iwai, nouri nou neido Baraba naiba otiodoi ina Iesu nouro naibaha irihati, naiba owateai sataurowa otomaimoi.

16Wia korowoto oubi amidao nou naibaha owaboiiaumo tutu moto nuumo’i noito nou painari Peritoriuma, wia korowoto oubi auwoha nei naibaha oromorouwaumo. 17Wia neiio nou kaikarawi hipura naibaha owamitiaumo ina neiio nou eperapera kiowa omowatumo, wia neiio nou opu ohuwa naibaha aooaumo. 18Wia nei nouido wade iaoi naibaha iaiumo: Iudaia Pai‐dubu, Taiiro! 19Wia neiio nou opuwa buguito naibaha aiidaumo wia haugeito nou naibaha amorowaumo, ina popoito nei naibaha imohoratutiwaumo nouido naibaha oroboriatutiwaumo. 20Ina neiio nou kemesio’i oboiri, kaikarawi hipura neiio nou aueudo naibaha ibiodoumo; nou himia hipura naibaha owamiteaumo wia neiio nou naibaha owaboiiaumo, satauroito owateaimoi.

21Wia na’u Kurene dubu, paina Simona, Alesanara Rupusara neiti abea, nou buiudo ohuodidio. Neiio nouido wade modoboito iaowaumo: Iesu satauro emaotai. 22Wia na’u bati, paina Goligota, nouri wade kowaeviari, Opu horo bati, neiio Iesu noito owaboiiaumo. 23Wia wine, karakara na ramu idabuaumo, neiio nouido naibaha owahaumo idioi: ina nouro idio biahai. 24Wia neiio nou sataurowa naibaha otomaumo, ina nou hipura nei himia naibaha eremaatiwaumo ina neiio naibaha eremeherewaumo, taiba nana nei niro. 25Hiwio guriwa otoa biahai, neiio nou sataurowa naibaha otomaumo. 26Wia nou kemapoi wiha titii nou opu ohudo naibaha owateaumo; NOUVIA IUDAIA PAI‐DUBURI. 27Wia neiio piro dubu neewa noumu sataurowa naibaha itomaimamaumo ata Iesu tuiha hapuoudo ata pere hapuoudo. 28Wia tana buka wade nou naiheha o’uro, nou naiba iaowa: Ubauba oubimu nou tau odabuai. 29Wia nou kohodio oubii nou ubauba wadeito naibaha emama’utiwaumo. Neiio naibaha ema’urowaumo naiba iaowaumo, Ere, ro Tana‐moto hiwio neewa na’uito ka’iouti dubui wia hiwio neewa na’uito roro aiwai‐ididi. 30Rovia, ro himiaro, taroitorairo ina satauroudo taruoro. 31Nou aibo auwo kohena oubi nouido naibaha ematiutiwaumo nei himia himia naibaha iaowaumo titi oubimu: Nouro amida oubiha itoutituti ina nou himia oroitorai raihe, 32Keriso, Isaraela Pai‐dubu satauroudo moruoro, ina imo eaurimoi naiba iraromodiomoi. Wia noumu sataurowa kitomai dubu neewa’i nouido naibaha emamautiwaudo.

33Ina nou ta’uwa hiwio guriwa otoi, durii oopu oopu naibaha imodoiia doho tariwai. 34Wia doho tariwai Iesu wade gema naibaha imakakai, nou naiba iaowa: Eloi Eloi lama sabatani? Nouri wade kowaeriari, Mo Urio‐abea! Mo Urio‐abea! roro mo teiri kebeedeiri? 35Wia tariwa kotoi oubi amida’i ina neiio naibaha orovidioumo, nei naiba iaowaumo: Ta’aurimo nou Elia romorou. 36Wia na’u dubu naibaha imaioro wia sponge karakara wine ramu naibaha odobia wia bugu bariwa naibaha edea nouido naibaha owateai idioi. Nou naiba iaowa: Tamotoimo, taurimo, noupa Elia aro’udairo nouro oworuoi. 37Wia Iesu auwo wade gema naibaha imotua, naiba ohiai. 38Wia Tana‐moto pirihuo hipura, ohudo wia gorudo nou naibaha erekekea. 39Wia nou ta’uwa gavana keke Iesu hohoudo otoi, nou taiba oihiai nouro nou eauri, nou naiba iaowa: Naiheha, dubui nouri nou Iehova Mereri. 40Wia upibaio amida nouowa auwoudo otoiwaumo nou eaurimoi, nei amidari Maria Magadala wia Maria, keke Iakobo wia Iose neiti mamu, wia Salome. 41Nou ta’uwa Iesu Galilaiawa nou emidiotuti nei nou dooudo orobodoidiotutiumo wia neiio nou naibaha omotoitutiumo wia noumu Ierusalemaito ko’u ubibaio’i amida godogodo, neivia nouowa,

42Ina nou ta’uwa doho idaiti, hiwio nouri nana meaha kidodiai hiwio’i, Sabati hiwio dooudo nouri. 43Iosepa, Arimatea duburi, naibaha o’uro; nouvia mamusi na’uri, nana horohorori. Wia nouvia Iehova bububati omotoituti wia nou Pilatoido pupuito odorowa wia Iesu goho nouro atodoi. 44Wia Pilatoro nou aiemaeawa, Iesu hagohagoha koihiaii, wia keke gavana nouro naibaha otua, nouido naiba atodoi: Iesu tutu aibo awoihiai. 45Wia nou ta’uwa Pilatoro umo daoiti keke gavana mabudo, nouro Iesu goho Iosepaido naibaha owateai. 46Wia Iosepa bohoboho tamatamaiha hipura naibaha emidai wia Iesu goho satauroudo naibaha oworuo, ina tamatama hipuraito nou naibaha oomutiwa wia gabidi bati motowa, nou naibaha edea nouri gabidi bati moto nou uu aibori akabu otoro, wia na’u auwo akabu uu puruoudo nou owaewutiro. 47Ina Maria Magadala wia Maria Iose mamu neitio goho koa batii eaurioudo.

Currently Selected:

Mareko 15: KXW1941

Highlight

Copy