Luka 4

Uttehattehiya wa Yesu

Mateu 4.1-11; Marku 1.12-13

1Wahoolo, Yesu nacanre Nnepa Nttakattifu, ahoturuwa uYortani ni ahokusiya ni Nnepa ule, mpaka utakhwani. 2Ahokhala wonwo mahuku arupayini (40) ahottehattehiya ni Sotwani. Yaayo mahuku ayo khaalilye itthu ni wiimaleloni yahonvola itala. 3Vano Sotwani ahomwiirela coo: We wakhala wiira uMwana a Nluku, ulamulele nna nluku nna wiira nithatuwe nkatthe. 4Nanso Yesu ahaakhula eeraka: Ihantikhiya wiira: Kuhimwena ni nkatthe paahi phinkhalanawe ntthu ukumi.#4.4 Nlamulo 8.3

5Sotwani ahonweliha Yesu nipuro noorekama ni ahomoonihera umwene wothene wo nttuniyani. 6Vano Sotwani ahomwiirela coo: Kinawuvaha ulamuli n'uttitthima urinaya, kontha mi kihovahiya, ni mi kinanvaha ule nontthunaka. 7Phimaana wakilapelaka mi, citthu cothene cinhala ukhala cawaa. 8Vano Yesu ahomwaakhula eeraka: Ihantikhiya wiira: Mwaalapele Apwiya Nluku inyu, yaayo paahi phinphwanela urumeeliya.#4.8 Nlamulo 6.13

9Wahoolo ahonrweha uYerusalemu ni ahonweliha nipuro nootepa urekama no'nupa ittakattifu, ni ahomwiirela coo: Wakhala wiira we uMwana a Nluku utuphe va urwaaka vathi, 10kontha ihantikhiya wiira:

Nluku naahala waaruma ancelo awe

wiira yuusunke,

11ni wuuvarelela mmatatani mwaya,

wiira hata nluku nimoca nihuukakathule nnyaani mwaa.#4.11 Macipo 91.11,12

12Yesu ahaakhula eeraka: Ihohimyaciya wiira: Uhaattehattehe Apwiya Nluku aa.#4.12 Nlamulo 6.16

13Unamanlene uttehattehiya nwo, Sotwani ahonhiya ukati vakani.

Yesu naaturuwela uKalileya ni naapacera nteko awe

Mateu 4.12-17; Marku 1.14-15

14Vano ni ikuru co Nnepa Nttakattifu, Yesu ahoturuwela uKalileya, ni uttitthima wawe wahomwareela mittetthe cothene caanrukurenrye. 15Eetthuciha mmasinakokani ni atthu othene yaananttittimiha.

Yesu naahimyaca nuulumo na Nluku ni naakhottiya na aloko awe

Mateu 13.54-58; Marku 6.1-4

16Yesu ahorwaa uNasaree wonnuwenlyawe, nihuku no ntivela ahokela nsinakoka toko caalemalenlyawe, ni ahonwa wiira asome. 17Vano ahovahiya iliivuru ya nnapiyu Isaya. Uhula wawe iliivuru iyo, ahophwanya nipuro nantikhiye niiraka:

18Nnepa wa Apwiya uri mwa mi,

kontha Apwiya Nluku ahokitthapela

wiira kaalalyeere nhupi woorera atthu oohuva.

Kihoruminya wiira kahimyace

utaphuliya wa atthu ootthukiya

ni uvonihiya wa atthu oohoona,

ni woopoliya wa atthu oohuvihiya,#4.18 Isaya 61.1,2

19ni ulalya wiira uhophiya mwakha wo nnema na Apwiya.

20Natthyeelene iliivuru ile, ahonturusela nrumeyi o nsinakoka ni ahonkoma. Vano atthu othene yaariwo nsinakoka mmwe yaanammwehecesa venci. 21Vano aheerela coo: Ilelo cihotthariheleliya cowantikhiya toko ciiwilenyu.

22Vaavale atthu othene yaananttottopela ni yaanatikhinaca moolumacero awe omaana, yiiraka: Khanakhala ula mwana a Yusufu? 23Yesu ahaakhula eeraka: Weekhweli, nnaahala ukuulumela nna nikano nna mwiiraka: Tothoro, wiivonihe umwanene, ni upanke ciicammo mmwannyaa mu, cothene ciiwilehu wiira uhopanka uKafarnaumu.

24Ni ahopwaherera eeraka: Khweli kinawuhimeryani wiira, khaawo nnapiyu naakheleliya womaana ilapo iyarenlyawe. 25Khweli kinawuhimeryani wiira, ukati wa Eliya cahaawo minankhwele cinci uSirayeli, waatthukeliyaya irimu myakha miraru ni myeeri siita woohirupa ipula, ivolaka itala ilapo yothene; 26nanso khaariwo hata mmoca wa yaayo ankavihenre Eliya nari hikhanle paahi nankhwele mmoca o'Serepita yo'Sitoni. 27Ciicammo yahaawo anamakuttula enci uSirayeli ukati wa nnapiyu Eliseu, nanso khaariwo hata mmoca aavonihiye, nari hikhanle paahi Naama o'Siriya.

28Vano atthu othene o nsinakoka wiiwa waya ala moolumo ala yahoviruwaca. 29Yahonwaca n'umoomolaca nsittatti mmwe ni yahonwelihaca waculu mwaako, ule waari wakhiviru waatekiye isittatti vale, wiira yanvonyere vathi. 30Nanso Yesu ahokhuma wariyari waya ni ahorwaa.

Uvonihinya wa ntthu omacini uKafarnaumu

Marku 1.21-28

31Wahoolo ahorwaa uKafarnaumu, isittatti yo'Kalileya, ni aanasomiha mahuku o ntivela. 32Atthu othene yahotikinihinya mananna ceetthucihawe, kontha oolumaca ni ulamuli. 33Ahaawo nsinakoka mmwe nlopwana aarina ncini, vano ahokhuwa venci 34eeraka: Eekhuu! Iri isiyani we ni hi, Yesu o'Nasaree? Waaweenle unoomolaca? Mi kihoocuwela we, uNttakattifu a Nluku!

35Nanso Yesu aholamula eeraka: Umaale ni ukhume mwa ntthu ula! Vano ncini nne, nahomphatela ntthu ule vathi iriyari ya atthu othene ni nahokhuma woohinrakalihaca. 36Vaavale atthu othene yahotikinihinya ni yaaneerelana ayaayoru: Nuulumoni nna? Mpaka ni ikuru naalamula macini ni ayo anaakhuma! 37Phimaana uttitthima wawe nwo wahomwareela mapuro othene o yoole nttetthe ule.

Uvonihinya wa amaathi awe Peturu

Mateu 8.14-17; Marku 1.29-34

38Wahoolo Yesu ahokhuma nsinakoka mmwe ni ahokela mpaani mwa Simoni. Amaathi awe Simoni yaanwerennya venci ikopo ni Yesu aholepeliya wiira aavonihe. 39Uyo ahaattamerya ni ahomaaliha ikopo ile, ni iyo yahaahiya. Wowaakuvyaca wene yahonwa ni yahopacera waatafiti.

40Ukati waakelaya ncuwa, aanawiiheriya othene yaawerennya iretta cene, ni aanthatela matata wamuru wo khula nretta ni waavoniha. 41Ciicammo mwa atthu enci yaanakhuma macini, akhuwelaka yiiraka: We uMwana a Nluku! Nanso uyo aanawaamaaliha ni khaahiya wuulumaca, kontha yaanacuwela wiira yooyo phiri Kristu.

Yesu naalalya nhupi woorera

Marku 1.35-39

42Usa waya, ahokhuma n'urwaa ntakhwani. Vano atthu enci yaanamwaavya mpaka umphwanya nipuro naaryawe, ni yaanankhanyereriha wiira haahiye. 43Nanso ule ahaahimyacera eeraka: Ciicammo kinlamuliya ulalya nhupi woorera wo umwene wa Nluku isittatti cikhwawe, kontha yeeyo phiruminyaka.

44Paahi aanalalyaa nuulumo na Nluku mmasinakokani co'Yuteya.

Currently Selected:

Luka 4: NNI

Highlight

Copy