Jon 8
8
SOPENA 8.
1Iesu mosahe me na Vuti hira Oliv.
2Me na malaha pepe vuha motasumai me na pea hina lotu hira Ju, ra tajua vunuvunu tenumai mea; mosihe toho, mopisera.
3Ra tahauliuli me ra Varisi telavi na hajae tahaveiveileo mea; ihisa tejuria me na vuati hira,
4Teaso mea, Na hajae moveiveileo, telavia me na matana maso movea.
5Moses me na Leo Hauhaua movaraija, ra palea tejihira: maa oiaso na sava.
6Teaso palea, tetapusia, sura tepinisi na tatahi nie sura sava. Maa Iesu motitioho sivo, motave na tano hina havena palahi mosarohora.
7Ihisa tetuhatuha toho mojehijehi paha, moaso mera, Itea himiu mosaveioso mojihijihia majiha.
8Vahatea maa motitiohi sivo, motave na tano.
9Hire terohoe, telaho teatea, ra varie temajiha: Iesu tomotoho hasena valui na hajai me na vuati hina havena pea.
10Iesu mojehijehi paha, moaso mea, Ra tajua tahatatahi veae? Saite tajua moaso majaraha meho?
11Moaso, Saite tajua, Moli. Iesu moaso mea, Asaaso majaraha meho, oilaho, oitena taveioso.
12Natuha Iesu motalalaa me ra tajua, moaso, Inau ra rani hina ulu; isei molaho tahuu mosalaho me na pohitupu, maa molavi na rani hina mauri.
13Suria ra Varisi teaso mea, Oivetivetiho tapumu; semu vetiveti mosataharahu.
14Iesu moaso liliu mera, Avetivetiau tapuu, maa na seu vetiveti motaharahu: suria apinisi amaraha veae, alaho veae; maa amiu otosapinisi amaraha veae e veae ailaho.
15Otoilailahi palahi otorenia; ailailahi saite tajua.
16Maa va ailailahi, na seu ilailahi motaharahu; suria aisatoho haseu maa Inau me Tata tahasulau.
17Moulia me na Leo Hauhaua himiu, na vetiveti hi ra tajuarua mptaharahu.
18Inau motea isei movetiveti suriau, na Tata tahasulau movetiveti suriau.
19Natuha teaso mea. Tamamu veae? Iesu moaso liliu, Otosapinisiau e Tamau: va otopinisiau mine otopinisi Tamau mono.
20Ra leo naa Iesu moaso me na Vonana-Tuahisule ihisa mopise me na pea hina lotu hira Ju: saite tajua moauae; suria na rani hina isamalua tohoreji.
21Natuha Iesu motaaso mera, Alaho, moaso, Ototiroau pa, maa otomate pa me na pilamiu veivasoosoo; otosapinia numai veae alaho.
22Natuha ra Ju teaso, Motapuna veimeteia? suria moaso, Otosapinisa numai veae alaho.
23Moaso mera, Otomaraha neesivo, amaraha neesahe; ototanoho hina ulu naa, asatanoho hina ulu naa.
24Suria aaso me amiu, otomate me na pilamiu veiva-soosoo; suria va amiu otosarohoroho inau inie, otomate pa me na pilamiu veivasoosoo.
25Natuha teaso mea, Iniho isei? Iesu moaso mera, Sura sava ototuha na sanu alalaa toho me amiu?
26Ra sanu tari tetitoho alalaa pa suria, ailailahi suri amiu; maa inie tahasulau motaharahu; alalaa me na ulu ra sanu arohora mea.
27Tesapinisi molalaa mera suri na Tata.
28Natuha Iesu moaso mera, Otorahuraha na Matuna Tajua tau otopinisi inau inie, atapuu vei sanu tipa; maa pala Tamau mopiseau alalaa ra sanu naa.
29Na tahasulau movaluiau: Tata mosajuriau haseu: suria tuitui avera sanu momejeira.
30Ihisa moaso ra sanu naa ra tari terohoroho mea.
31Natuha Iesu moaso me ra Ju taharohoroho mea, Va otovei tuitui ra leo hiu, amiu ra uluo hiu taharahu.
32Otopinisi pa na taharahu, na taharahu monuni amiu pa.
33Teaso liliu mea, Hije ra tavu hi Epereham, mine tosatajua-varao-tipa; paleve oiaso oinunija?
34Iesu moaso liliu mera, Motaharahu, aaso me amiu, Isei moveioso, inie na tajua-varao-tipa hi na veioso.
35Na tajua-varao-tipa mosatoho me na pea tuitui, maa na Matuna tomotohoae.
36Va na Matuna monuni amiu, otomahoja taharahu.
37Apinisi amiu ra tavu hi Epereham; maa otomeje na veimeteau suria na leo hiu mosatoho me amiu.
38Avarai amiu ra sanu arenira me na pahoi Tamau; otovera sanu otorenira me na Tamamiu.
39Teaso liliu mea, Epereham na tamaja. Iesu moaso mera, Va amiu ra tavu hi Epereham, otovei ra sanu hi Epereham.
40Maa naano otomeje na veimeteau, na tajua isei movarai amiu na taharahu arohoe me Atua; Epereham mosavei na sanu palea.
41Otovei na varao hina tamamiu. Natuha teaso mea, Hije tosamatunamasau; motea na tamaja, Atua.
42Iesu moaso mera, Va Atua na tamamiu, otomejeau suria amalua me Atua, naanoi atoho nai; asasumai suriau, maa inau na pilana Varisula.
43Sura sava otosapinisi na leo hiu? Suria otosameje na roho na leo hiu.
44Amiu ra matuna tamamiu, na Tamate, otomeje na vei pa ra sanu tamamiu momejeira. Inie na tahaveimete na tajua me na majiha, mosavei na taharahu suria na taharahu mojoa mea. Ihisa molope, moaso na sipilana sanu; suria inie na tahalope, inie na tamana lope.
45Suria avarai amiu na taharahu, otosarohoroho meau.
46Isei himiu mppiseau aveioso? Va aaso taharahu, sura sava otosarohoroho meau?
47Ra matui Atua teroho na pisahi hi Atua; otosarohora suria oto-sa-matui Atua.
48Natuha ra Ju teaso liliu, teaso mea, Toaso taharahu iniho na tajua hi Sameria, na talume-oso tomotoho me na lolomu?
49Iesu moaso liliu, Na talume-oso mosatoho me na lolou; maa ahale Tamau, amiu otoetietiau.
50Asatiro na pilau hale; maa motea motiro na pilau hale, moilailahi.
51Motaharahu, aaso me amiu, Va te tajua mohijetoho na leo hiu, mosareni na mate.
52Natuha ra Ju teaso mea, Naanoi topinisi na talumeoso tomotoho me na lolomu. Epereham momate mine, ra provet mono; oiaso, Va te tajua mohijetoho na leo hiu, mosamate pa.
53Oisale jivi na tamaja Epereham isei momate mine? ra provet temate mine; oiaso iniho isei?
54Iesu moaso liliu, Va atapuu haleau, na seu hale mosanu tipa; Tamau mohale au; otoaso inie na Atua himiu:
55Maa otosapinisia mine, maa apinisia; va aaso asapinisia inau na tahalope paleamiu; maa apinisia, aivera sanu moaso.
56Tamamiu Epereham moejieji sura reni na rani hiu: morenia, moejieji.
57Natuha ra Ju teaso mea, Ra tauni himu tesahavulalima reji? Oireni Epereham?
58Iesu moaso mera, Motaharahu, aaso me amiu, Mine Epereham inau atoho.
59Natuha teauraha ra sule sura jihia: maa Iesu motapuna punia, molaho ture na pea hina lotu hira Ju.
Currently Selected:
Jon 8: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
