Jon 9
9
SOPENA 9.
1Ihisa Iesu molaho tusiae, moreni na tajua isei mopisi me na rani momalua majiha.
2Ra uluo hina tetuhae, teaso, Varese, isei moveioso, na tajua naa, tamana e tinana suria mopisi me na rani momalua majiha?
3Iesu moaso liliu, Na tajua naa mosaveioso e tamana e tinana: maa mopisi sura vei vavaha na varao hi Atua.
4Asivarao na varao hi na tahasulau ihisa morani; na pohi momalua ihisa saite tajua mopinisi na varao.
5Ihisa atoho me na ulu, inau na rani hina ulu.
6Ihisa moaso paletuha, moloto me na tano, moajaaja na loto, mojore na matana tajua tahapisi hina jave.
7Moaso mea, Oilaho, oilolosso me na nopu hi Siloam (me na loeja, Varisula) Suria molaho, mololosso, ihisa motaliliu morioriova.
8Suria ra tuana me ra tajua taharenia mopisi mine, teaso, Inie isei mosihe tasivo motuhatuha?
9Valura teaso, Io, inie; valura teaso mopalaia: maa moaso, Inau inie.
10Suria teaso mea, Oirioriova paleve?
11Moaso liliu, Na tajua na histna Iesu moajaaja na jave, mojore ra matau, moaso meau, Oilaho, oilolosso me na nopu hi Siloam: avanoae, alolosso, arioriova.
12Natuha teaso mea, Inie veae? Moaso, Asapinisi.
13Telavi na tajua tahapisi mine me ra Varisi.
14Inie na sapat me na rani Iesu moajaaja na jave, movea morioriova.
15Natuha ra Varisi mono tetatuhae morioriova paleve. Moaso mera, Mojuri na jave me ra matau, alolosso, arioriova.
16Suria valura Varisi teaso, Na tajua naa mosapile Atua, suria mosaninima na sapat. Valura teaso, Paleve na tahaoso movei na varao tahajia paletuha? Suria tetahavua na ninima.
17Teaso vahatea maa me na tajua tahapisi, Oiaso na sava suria, suria moveho oirioriova? Moaso, Inie na provet.
18Maa ra Ju tesarohoroho mopisi mine tau molavi na sena rioriova. Teore na tamana me tinana tajua isei molavi na sena rioriova.
19Tetuhararua, teaso, Inie na maturarua isei oraaso mopisi me na rani momalua majiha? paleve morioriova naanoi?
20Na tamana me tinana teraaso liliu mera, Arapinisi inie na matumamarua, arapinisi mopisi me na rani momalua majiha.
21Paleve morioriova me na havui arasapinisia: arasa-pinisi isei movea morioriova: ototuhae, motapuna aso pa.
22Na tamana me tinana teraaso ra leo naa suria teine ra Ju; suria ra Ju teaso mine va te tajua moveti inie na Kristo, terahutuhea me na pea hina lotu.
23Suria na tamana me tinana teraaso, Motajua matua, ototuhae.
24Vahatea maa teore na tajua isei mopisi mine, teaso mea, Oirahu na aso tahonai me Atua: topinisi na tajua naa inie na tahaoso.
25Moaso liliu, moaso, Va inie na tahaoso e mojoa, asapinisi: apinisi na sanu motea, mine apisi, naanoi arioriova.
26Vahatea maa teaso mea, Movei na sava meho? paleve moveho oirioriova?
27Moaso liliu mera, Avarai amiu mine, maa otosarohoau; sura sava otomeje na rohoe vahatea maa? Otomeje amiu ra uluo hina?
28Natuha teetietia, teaso, Iniho na uluo hina: maa hije ra uluo hi Moses.
29Topinisi Atua moaso me Moses: maa na tajua naa tosapinisi momaraha veae.
30Na tajua moaso liliu, moaso mera, Naano na sanu uloulo, otosapinisi momaraha veae maa moveau arioriova.
31Topinisi Atua mosaroho na tahaoso; maa va te tajua molotu me Atua, movera sanu momejeira, morohoe.
32Tau na ulu movaere tosaroho tetajua movei na tajua tahapisi me na rani momalua majiha, morioriova.
33Va na tajua naa mosapile Atua mosapinisa vei te sanu.
34Teaso liliu, teaso mea, Oimalua me na veivasoosoo me oipiseja? Terahutuhea.
35Iesu moroho terahutuhea; ihisa mopasuae, moaso mea, Oirohoroho me na Matui Atua?
36Moaso liliu, moaso, Inie isei, Moli, sura arohoroho mea?
37Iesu moaso mea, Oirenia mine, inie molalaa meho.
38Moaso, Moli, arohoroho. Molotu mea.
39Iesu moaso, Sura na ilailahi amalua me na ulu naa, sura ra tahapisi terioriova me ra tajua taharioriova tepisi.
40Valura Varisi isei tetoho valuia, teroho na leo naa, teaso mea, Hije ra tahapisi mono?
41Iesu moaso mera, Va otopisi otosaveivasoosoo; maa otoaso naanoi, Torioriova, suria semiu veioso toitoho.
Currently Selected:
Jon 9: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
