उत्पत्ति 13
13
अब्रामेरू कनान मुल्खे जो वापस एजनू
1तैखन अब्राम अपनि कौन्श, ते अपनि सारी जाईदात नेइतां, ते लूत भी साथी नेइतां, मिस्र छ़ेडतां कनानेरे दक्षिण मुल्खे मां अव। 2अब्राम बड़ो अमीर थियो, तैस कां बड़ा गब्बां गोरू ते बड़ू सोन्नू चाँदी थियूं। 3फिरी तै दक्षिण मुल्खे मरां च़लते-च़लते एक्की ठारारां होरि ठारी पुज़्ज़ो, ज़ैड़ी तैनी अपनो पेइलो तेम्बु खड़ो कियोरो थियो, ज़ै बेतेल ते आई नगरां केरे दरमियाने मांए। 4ई ठार तैस वेदी कांए, ज़ै तैनी पेइली बनेवरी थी, ते तैड़ी अब्रामे फिरी यहोवा कां प्राथना की।
अब्राम ते लूतेरू अलग भोनू
5लूते कां भी, ज़ै अब्रामे साथी च़लतो थियो, गब्बां, गोरू, ते टब्बरेरे मैन्हु#13:5 टब्बरेरे मैन्हु तेम्बु थिये। 6पन तैस मुल्खे मां तैन दूईयां केरे लेई तै ठार घट थी, ते तैना अकोट्ठे रेइ न थिये सकते, किजोकि तैन कां बड़ी जाईदात थी एल्हेरेलेइ तैना अकोट्ठे न रेइ बटे। 7एल्हेरेलेइ अब्राम ते लूतेरे गोरू गब्बां केरे गाल पुहालन मां लड़ाई भोइ। तैस वक्ते कनानी ते परिज्जी लोक, तैस मुल्खे मां रहते थिये।
8तैखन अब्राम लूते सेइं ज़ोने लगो, “मेरे ते तेरे दरमियाने मां, ते मेरे ते तेरे पुहालां केरे दरमियान लड़ाई न भोए; किजोकि अस लोक भियालम। 9कुन ई सारो मुल्ख तेरे सामने नईं? त तू मीं करां अलग भो, अगर तू बांए पासे गास त अवं देइने पासे गेइलो; ते अगर तू देइने पासे गालो त अवं बांए पासे गेइलो।” 10तैखन लूते एछ़्छ़ी उब्री केरतां, यरदन दरियाए करां बेइहीं सारी वादी लाही कि तै सब सेगोरीए। ज़ांतगर यहोवा परमेशरे सदोम ते गमोरा नाश न थियां कियोरां, तांतगर सोअरेरे बत्ती तगर तै वादी यहोवारे बागरी, ते मिस्र मुल्खेरी ज़ेरि फलदार थी। 11एन्च़रे लूत अपने लेई यरदनेरी सारी वादी च़ुनतां पूर्वेरे पासे च़लो, ते तैना एक्की होरि करां अलग भोइ जे। 12अब्राम त कनान मुल्खे मां राव, पन लूत तैस वैदरे नगरन मां राने लगो; ते अपनो तेम्बु सदोमेरे नेड़े खड़ो कियो। 13सदोमेरे लोक यहोवारी नज़री मां बड़े दुष्टी ते पापी थिये।
अब्रामेरू हेब्रोने जो गानू
14ज़ैखन लूत अब्रामे करां अलग भोइ जेव तैखन तैसेरां बाद यहोवा अब्रामे सेइं ज़ोवं, “एछ़्छ़ी उब्री केरतां ज़ैस ठारी पुड़ तू आस तैट्ठां उत्तर-दक्षिण, पूर्व-पश्चिम, च़ेवरे पासन नज़र दे। 15किजोकि ज़ेत्री धरती तीं लेइहोतीए, तै सब अवं तीं ते तेरे खानदाने जुगे-जुगेरे लेई देइलो। 16ते अवं तेरे खानदाने धेरतरे धूड़रे ज़र्रां केरे बराबर खूब बधेइलो, इड़ी तगर कि ज़ेन्च़रे कोई धेरतरे धूड़रे ज़र्रां केरि गिनती न केरि सके; तेन्च़रे तेरे खानदाने भी कोई गेनि न बटेलो। 17उठ, इस मुल्खेरे लम्बाई ते चौड़ाई मां च़ेलतां फिरतां हेर; किजोकि अवं तैस तींए देइलो।” 18इसेरे बाद अब्राम अपनो तेम्बु पुटतां, मम्रेरे बंज़ेरे बुट्टेरे मझ़ाटे ज़ै हेब्रोने मां थियो, गेइतां राने लगो, ते तैड़ी भी यहोवारी अक वेदी बनाई।
Currently Selected:
उत्पत्ति 13: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
