उत्पत्ति 21
21
इसहाकेरू ज़र्म
1यहोवा ज़ेरू ज़ोवरू थियूं तेरही सारा पुड़ नज़र की ते तैस सेइं अपने वचनेरे मुताबिक कियूं। 2सारा अब्राहमे सेइं दोज़ींती भोइतां तैस बुढे बारे मां तैस्से ठीक वक्ते पुड़ ज़ै परमेशरे तैस सेइं ज़ोवरो थियो, अक मट्ठू भोवं। 3अब्राहमे अपने मट्ठेरू नवं ज़ैन सारा सेइं पैदा भोवरू थियूं इसहाक#21:3 इसहाक मतलब तै हसते। रख्खू। 4ते ज़ैखन तैसेरू मट्ठू इसहाक अठ दिहाड़ां केरू भोवं, तैखन तैने परमेशरेरे हुक्मेरे मुताबिक तैसेरो खतनो कियो। 5ज़ैखन अब्राहमेरू मट्ठू इसहाक पैदा भोवं तैखन तैसेरी उमर 100 साल थी। 6ते सारा ज़ोवं, “परमेशरे मीं, बड़ी खुशी दित्ती; एल्हेरेलेइ सब शुन्ने बाले भी मीं सेइं साथी खुश भोल्हे।” 7ते फिरी तैसां इन भी ज़ोवं, “कुन कोई कधी अब्राहमे सेइं ज़ोई सकतो थियो, कि सारा मट्ठन दुद्ध पियाली? पन हेरा मीं सेइं तैसेरे बुढे बारे अक मट्ठू पैदा भोवं।” 8ते तैन मट्ठू बेडोवं, ते तैसेरू दुद्ध छुटावं जेवं; ते इसहाकेरे दुद्ध छुटानेरे दिहाड़े अब्राहमे बड्डी धाम दित्ती।
हाजिरा ते इश्माएलेरू कढू गानू
9तैखन सारा ज़ैन मिस्री हाजिरारू मट्ठू, ज़ैन अब्राहमे सेइं पैदा भोवरू थियूं, मज़ाक बनातू लवं। 10इस वजाई सेइं तैसां अब्राहमे सेइं ज़ोवं, “इस नौकरैनी मट्ठे सने कढ: किजोकि इस नौकरैनरू मट्ठू मेरे मट्ठे इसहाके सेइं साथी हिस्सेदार न भोल्हु।” 11ई गल अब्राहमे अपने मट्ठेरे वजाई सेइं बुरी लग्गी। 12तैखन परमेशरे अब्राहमे सेइं ज़ोवं, “तैस मट्ठे ते अपनि नौकरैनरे वजाई सेइं तीं बुरू न लग्गे; ज़ै गल सारा तीं सेइं ज़ोए, तैस मन्न, किजोकि ज़ैस जो तेरू खानदान ज़ोले तैन इसहाके सेइं च़लेलू। 13नौकरैनरे मट्ठे मरां भी अवं अक कौम पैदा केरेलो किजोकि तैन तेरू मट्ठूए।”
14होरसां अब्राहमे झ़ेझ़ां सुबेले उठतां रोट्टी ते पैनी सेइं भरोरी मसक भी हाजिरा दित्ती, ते तैसेरे कंधे पुड़ रख्खी, ते तैसेरू मट्ठू भी तैस देइतां भेज़ी। तै च़ली जेई, ते बेर्शेबारे जंगले मां भटकने लग्गी। 15ज़ैखन मसकरू पानी मुक्की जेवं, तैखन तैसां मट्ठू एक्की झ़ल्लोवें हैठ छ़ेडी दित्तू। 16ते एप्पु तैस करां थोड़े ज़ेरे दूर#21:16 थोड़े ज़ेरे दूर मतलब लगभग 100 मीटर दूर। गेइतां तैसेरे सामने एन सोचतां बिश्शी जेई, “मीं मट्ठेरू मरनू लेइहोरू न लोड़े।” तैखन तै जेई ते बच्चेरे सामने बिश्शी ते बच्चो अपनि आवाज़ उच्ची केरतां लेरां देने लगो।#21:16 ते बच्चो अपनि आवाज़ उच्ची केरतां लेरां देने लगो। इसेरो मतलब ई भी भोइ सकते हाजिरा जेई ते बच्चेरे सामने बिश्शी ते ऐंखरेईं सेइं लेरां देने लगी। 17परमेशरे तैस मट्ठेरी लेरां शुनी; ते तैसेरे दूते सुर्गे मरां हाजिरा कुजेइतां ज़ोवं, “हे हाजिरा, तीं कुन भोवरूए? न डर; किजोकि ज़ैड़ी तेरू मट्ठू आहे तैट्ठां तैसेरी आवाज़ परमेशरे शुनोरीए। 18उठ, अपने मट्ठे छ़ू ते अपने हथ्थे सेइं सम्भाल; किजोकि अवं तैसेरे ज़िरिये अक बड्डी कौम बनेइलो।” 19तैखन परमेशरे तैसेरी एछ़्छ़ी खोल्ली, ते तैस अक खुह लेइहोवं; तैखन तैसां गेइतां मसकी मां पानी भेरतां मट्ठे पियांव। 20ते परमेशर तैस मट्ठे सेइं साथी राव; ते ज़ैखन तैन बड्डू भोवं, तैखन सुनसान जगाई मां रहंते-रहंते तीर च़लानेबालू बेनि जेवं। 21तैन पारान नंव्वेरे सुनसान जगाई मां रहतू थियूं; ते तैसेरी अम्मा तैसेरेलेइ मिस्र मुल्खे मरां अक कौन्श मग्गाई।
अबीमेलेके सेइं साथी अब्राहमेरो करार
22तैन दिहाड़न मां एरू भोव कि अबीमेलेक अपने सेनापति पीकोले साथी नेइतां अब्राहमे सेइं ज़ोने लगो, “ज़ैन किछ तू केरतस तैस मां परमेशर तीं साथी रहते; 23एल्हेरेलेइ हुनी मीं सेइं इड़ी इस बारे मां परमेशरेरी कसम खा कि तू न त मीं सेइं धोखो केरेलो, ते न कधी मेरे खानदाने सेइं केरेलो, पन ज़ेरि महरबानी मीं तीं पुड़ कियोरीए, तेरही तू मीं पुड़ ते इस मुल्खे पुड़ भी, ज़ैस मां तू रहतस, केरेलो।” 24अब्राहमे ज़ोवं, “अवं कसम खेइलो।” 25ते अब्राहमे अबीमेलेके एक्की पैनेरे खुहेरे बारे मां ज़ै अबीमेलेकेरे नौकरेईं ज़बरदस्ती नियोरोए थियो, शिकायत की। 26तैखन अबीमेलेके ज़ोवं, “मीं नईं पतो कि केनी इन कम कियोरूए; ते तीं भी मीं सेइं नईं ज़ोवरू, ते न मीं अज़ करां पेइले इस बारे मां किछ शुनू।” 27तैखन अब्राहमे गोरू-गब्बां अबीमेलेके दित्तां; ते तैन दूइयेईं एप्पु मांमेइं करार कियो। 28अब्राहमे सत गेबड़ी अलग की। 29तैखन अबीमेलेके अब्राहमे पुछ़ू, “इन सत गेबड़ी केरो तेरो कुन मतलबे, ज़ैना तीं अलग कियोरिन?” 30तैने ज़ोवं, “तू इन सत गेबड़ी ज़ैना इस गल्लरी गवाही सेमझ़तां मेरे हथ्थे मरां ने कि मीं इन खुह बनेवरूए।” 31तैन दूइयेईं तैस ठारी एप्पु मांमेइं कसम खई, इस्से वजाई सेइं तैसेरू नवं बेर्शेबा#21:31 बेर्शेबा ज़ेसेरो मतलब कसम कियोरू खुह पेवं। 32ज़ैखन तैनेईं बेर्शेबा मां करार कियो, तैखन अबीमेलेक ते तैसेरो सेनापति पीकोल उठतां पलिश्ती लोकां केरे मुल्खे मां वापस जे। 33फिरी अब्राहमे बेर्शेबा मां झाऊ नंव्वेरो अक बुट लव, ते तैड़ी यहोवा कां प्राथना की ज़ै हमेशारो परमेशरे। 34अब्राहम पलिश्ती लोकां केरे मुल्खे मां बड़े दिहाड़न तगर परदेशी बेनतां राव।
Currently Selected:
उत्पत्ति 21: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
