लूका 10

सत्तर चेलयां रा भेज्या जाणा

1इन्हां गल्लां ते बाद प्रभु यीशु बहत्तर होर चेलयां जो चुणां कने तिस-तिस नगर कने जगहां पर जे तिने जाणे री योजना बणाई थी, ऊथी जाणे ते पैहले तिन्हां चेलयां जो दो-दो करीने अपणे अग्गे भेज्या। 2कने यीशु तिन्हौं जाणे ते पैहले तिन्हांने गलाया; “परमेशरा रे राज च ल्यौणे खातर मते लोक पक्की रिया फसला साई ये; पर तिन्हांजो परमेशरा ले ल्यौणे खातर जादा लोक नींये, इस खातर प्रभु परमेशर सै जे फसला रा मालिक आ, तिसने प्राथना करा भई खेतां च मते मजदूर भेज्जा। 3जावा; कने याद रखयों, भई हऊँ तुहांजो भेज्जी त कराँ पर माहणु तुहांरा इयां नुक्शान करी सक्कां ये तियां जे भेड़िये भेडां रा नुक्शान कराँ ये। 4तुहें जान्दे बगत अपणे सौगी न पैसे, न झोली लेयां; येत्थी तक भई जुत्तेयां री दुज्जी जोड़ी बी न लेयों। कने रस्ते च रुकीने किसी जो नमस्ते बी नीं करयां। 5जिस किसी बी घरा च तुहें जाओ, तां तिस घरा जो पैहले येढ़ि शीष देआं भई परमेशरा री शान्ति तिस घरा रे लोकां पर बणीरी रौ! 6जे तित्थी कोई शान्तीमय जीवन पसन्द करने औल़ा माहणु हुंगा, तां सै बरकत तिस्सो मिलणी; जे सै इस लायक निआं तां सै बरकत तुहांले वापस आई जाणी। 7तिस इ घरा च रौआ, कने जो किछ तिन्हांते मिलो, सैई खाओ पीओ, काँह्भई मजदूरा जो अपणी मजदूरी त मिलणी चाहिन्दी; रोज राति जो लग-लग घरें नीं रुकयों। 8कने ताहली जे कदीं तुहें किसी नगरा च दाखल ओ कने तिस नगरा रे लोक खुशिया ने तुहांरा आदर-खातर करो, तां तुहांरे सामणे जेढ़ा किछ खाणे जो परोसया जाओ, तिस्सो खाई लेआं। 9तिस नगरा रे बमाराँ जो चंगा करा, कने तिन्हाजो बोल्ला भई, हुण परमेशरा रा राज तुहांरे नेड़े आई पुज्जीरा। 10पर जे किसी नगरा रे लोक तुहांरा स्वागत नीं करो, तां तिस नगरा री सड़कां पर जाओ कने बोल्लो, 11तियां जे तुहें अहांरा तिरस्कार कित्या तियां इ अहें बी तुहांरा त्याग कराँ ये; अहें तुहांरे नगरा री तिसा धूड़ी जो सै जे अहांरे पैराँ च लगीरी, तुहांरे सामणे झाड़ी दें, पर भूलणा मत भई परमेशरा रा राज तुहांरे नेड़े आई पुज्जीरा! 12सच्ची गल्ल येई भई न्याय रे दिन सदोम जो तिस नगरा रे बराबर कठोर सजा नीं दित्ति जाणी।

अविश्वासी नगराँ जो फटकार

(मत्ती 11:20-24)

13“ओ खुराजीन शहर कने बैतसैदा नगरा रे लोको, तुहांजो भयानक सजा भुगतणे पौणी! काँह्भई सै चमत्कारा रे काम्म जे मैं तुहांरे नगराँ च कित्ते, जे मैं सै वेई चमत्कार सूर कने सैदा साई बुरे नगरा च कित्ते हुन्दे तां ऊथी रे दुष्ट लोक बोरियां ने बणीरे कपड़े पहनीने कने अपणे जिस्मा पर राख मल़ीने कधकयां अपणयां पापां रा दुख परगट करी लेया हुंदा। 14हाँ, न्याय रे दिन सूर कने सैदा नगराँ रे लोकां जो मिलणे औल़ी सजा ते तुहांजो मिलणे औल़ी सजा बौहत बुरी हूणी। 15अरे कफरनहूम नगर, तू क्या सोच्चां भई स्वर्गा च परमेशरा तेरा आदर करना? नां, तुज त थल्ले अधोलोका च पौणा।

16“सै जे कोई तुहांरी सुणां, सै मेरी बी सुणां, कने सै जे कोई तुहांरा इन्कार कराँ, सै मेरा बी इन्कार कराँ; कने सै जे कोई मेरा इन्कार कराँ, सै मेरे भेजणे औल़े रा इन्कार कराँ।”

सत्तर चेलयां रा बापस औणा

17जिस बगत यीशुये रे बहत्तर चेले अपणी सेवा री यात्रा ते मौज मनांदे हुये वापस आईगे, तां यीशुये ने बोलणे लगे “प्रभु, जिस बगत अहें तुहांरे नौआं रा इस्तेमाल कराँ ये, तां बुरीआत्मायें बी अहांरा कैहणां मन्नां इयां।”

18यीशुये तिन्हांने गलाया, “ठीक आ, मैं शैतान्ना जो स्वर्गा ते बिज्जल़ा साई पौंदे हुये देख्या रां था! 19देक्खा, मैं तुहांजो सर्पां कने बिच्छुआं पर चलीने बी सुरक्षित रैहणे रा, कने दुश्मणां#10:19 दुश्मणांयनि शैतान जो हराणे रा अधिकार देई दित्या; कने तुहांजो किसी बी चीज़ा ते कोई बी नुक्शान नीं हुई सकदा। 20फेरी बी इन्हां गल्लां ते खुश नीं हूणां भई बुरीआत्मां तुहांरे बशा ची आ; पर इस खातर खुश हूणा भई परमेशरे तुहांरे नौं स्वर्गा च लिखी लरे।”

यीशुये रा आनन्द मनाणा

(मत्ती 11:25-27; 13:16-17)

21तिस इ घड़ी सै पवित्र आत्मा रिया खुशिया च भरी ने बोलणे लगे, “पिता जी, स्वर्ग कने धरतिया रे मालक हऊँ तेरा धन्यवाद कराँ भई तुहें इन्हां लोकां ते ये असलीयत छुपाई ने रखी, सै जे अपणे आप जो चलाक कने बुद्धिमान समझां ये, कने सै जे बच्चयां साई ये तिन्हां पर ये गल्लां परगट कराँ ये। हाँ, पिता, काँह्भई तैं देख्या भई ये ठीक आ।”

22फेरी यीशुये अपणे चेलयां ने गलाया, “मेरे पिता सारा अधिकार मिन्जो देई दित्तिरा; कने कोई नीं जाणदा भई पुत्र कुण आ, सिर्फ पिता जाणां भई पिता कुण आ ये बी कोई नीं जाणदा; सिर्फ पुत्र जाणा भई पिता कुण आ, कने माहणु पिता परमेशरा जो तांई जाणी सक्कां ये ताहली जे पुत्र तिन्हां पर पिता जो परगट करना चाये।”

23ताहली जे सै कल्हे थे, तां सै अपणे चेलयां खां मुड़ीने चुपचाप गलाया, “तुहें जो किछ बी देख्या, तिस्सो देखणे औल़े होर लोक बी धन्या हुईगे। 24काँह्भई हऊँ तिज्जो दस्सां, भई मते सारेयां भविष्यवक्तयां कने राजयां बी इच्छा किति भई सै तिन्हां गल्लां जो देखो कने सुणो, तिन्हां गल्लां जो जे तुहें मिन्जो करदे हुये देख्या, कने मिन्जो बोलदे हुये सुणीरा, पर सै तिन्हां गल्लां जो नांत देक्खी सक्के नांई सुणी सक्के।”

दयालु सामरिये रा उदाहरण

25इक दिन ताहली जे यीशु लोकां जो सखाया राँ था, तां इक व्यवस्थापक उट्ठया; कने ये बोल्लीने तिसजो परखणे लगया, “गुरू जी, अनन्त जीवना रा बारस होणे रे खातर हऊँ क्या करूँ?” 26यीशुये तिस्सो जवाब दित्या, “मूसा री व्यवस्था क्या बोलां? तुहें तिस्सो किस तरिके ने समझां यें?” 27तिने माहणुये जवाब दित्या, “तू अपणे प्रभु परमेशरा ने अपणे सारे मन कने अपणे सारे प्राण कने अपणी सारी शक्ति कने अपणी सारी बुद्धिया समेत प्यार कर। कने अपणे पड़ेसियां ने अप्पूँ साई प्यार रख।” 28यीशुये तिसने गलाया, “तैं ठीक जवाब दित्या, येढ़ा इ कर तिसते जे तू अनन्त जीवन पाई सक्कां।” 29पर सै माहणु अप्पूँजो धर्मी बनाणे रिया इच्छा ते, यीशुये ते पुच्छां, “तां मेरा पड़ेसी कुण आ?” 30प्रभु यीशुये इक्की कहाणिया च तिसरा जवाब दित्या, “इक यहूदी माहणु यरूशलेम ते यरीहो नगरा जो जाई कराँ था। बाटा जान्दे हुये किछ डाकुयें तिस पर हमला करित्या, तिन्हें तिसरे कपड़े खलवाईते कने तिसरा सारा समान लुटील्या, तिस्सो मारया कुटया कने अधमुआ करीने वाटा रे कण्डे सट्टीने चलीगे। 31संजोगा ने इक यहूदी याजक तिस वाटे जाई कराँ था; पर जिस वगत तिने तिस माहणुये जो वाटा च पईरा देख्या, तां सै वाटा छड्डिने बिणा मदद करीने दुज्जिया वाटे चलिग्या। 32इक लेवी माहणु सै जे मन्दरा री सेवा च इक सहायक रा काम्म कराँ था; तिसा वाटे गया कने सै बी तिस माहणुये जो देखीने बिणा मदद कित्ते दुजिया वाटे चलिग्या। 33पर इक माहणु बी सै जे सामरिया प्रदेशा ते था तिसा वाटे गया कने जिस बगत तिने तिस जख्मी माहणुये जो देख्या, कने तिस्सो तिस पर दया आईगी। 34तिने सामरी माहणुये झुकीने, तिसरे जख्मां पर तेला कने दाखरस औल़ी दवाय मल़ी, कने पट्टियां बन्ही, फेरी तिने तिस्सो अपणे गधे पर बठालया, कने इक्की सराईं च लेईग्या, तित्थी तिने सारी रात जाग्गीने तिसरी सेवा किति। 35दुज्जे दिन तिने माहणुये सराँई रे मालका जो दो दिनार दित्ते, कने तिसने गलाया भई इस माहणुये री देखभाल रखयां, जे तिसरा खर्चा इसते जादा हुआं, तां अगली बार ताहली जे माह औणा ताहली बचीरे पैसयां जो देई जांगा।”

मार्था कने मरियमा रे घरें यीशु

36फेरी यीशुये व्यवस्था री शिक्षा देणे औल़े ते पुच्छया, “हुण तू तिन्हां तिन्नां माहणुआं चते किस जो तिस माहणुये रा पड़ेसी समझणा तिस माहणुये जो सै जे डाकुयें मारया-कुटया था?”

37तिने माहणुये जवाब दित्या, “सै माहणु तिने जे तिस पर दया किति, सैई तिसरा पड़ेसी हुआ।” यीशुये तिसने गलाया, “हाँ, तैं ठीक पछयाणया। हुण जा, कने तू बी येढ़ा इ कर।”

38ताहली जे यीशु कने तिसरे चेले यरूशलेम खौ जाई कराँ थे, तां सै इक्की गाँवां च गये, तित्थी मार्था नौआं री इक्की जनाने तिन्हाजो अपणे घरें औणे रा नियून्दा दित्या। 39तिसारी इक बैहण थी तिसारा नौं जे मरियम था, सै प्रभुरे चरणां च बैठीने तिन्हारे उपदेशा जो सुणयां कराँ थी। 40पर मार्था खाणा त्यार करने रे कई कम्मां च बौहत व्यस्त थी। सै प्रभु ले आई कने बोल़णे लगी, “प्रभु क्या ये ठीक आ भई मेरी बैहण येत्थी तुहांले बैठीरी रौ, कने सारा काम्म हऊँ कल्ही करूँ? क्या तुहांजो इसा गल्ला री फिक्र नीं? तिसाजो बोल्ला भई आईने मेरी सहायता कर।”

41पर प्रभु यीशुये तिसाजो जबाब दित्या, “मार्था! मार्था! तू बौहत सारियां गल्लां खातर फिक्र कराँ इ! कने घबराईं। 42पर इक गल्ल इ सै जे जरूरी, कने मरियमे तिस्सो चुणया सै जे सव्वीं ते अव्वल आ; सै तिसाते खोया नीं जाणा।”

Currently Selected:

लूका 10: KFSNT

Highlight

Copy