लूका 9

बारा चेलयां रा सेवा करने खातर भेज्या जाणा

(मत्ती 10:5-15; मरकुस 6:7-13)

1फेरी यीशुये अपणे बारा चेलयां जो सद्दीने कट्ठा कित्या कने तिन्हांजो सारी बुरीआत्मां कने बमारियां जो दूर करने री सामर्थ कने अधिकार दित्या, 2कने तिन्हौं परमेशरा रे राज्जा रा प्रचार करने कने बमार माहणुआं जो तिन्हांरियां बमारियां ते चंगा करने खातर भेज्या। 3तिने तिन्हांजो गलाया, “सफरा खातर कोई बी चीज़ सौगी लेईने नीं चलना, नां सोठी, नां झोल़ा, नां रोटी, नां पैसा धेल्ला कने न त पैहनीरे कपड़यां ते इलावा इक कपड़ा बी सौगी नीं नेणा। 4जिस किसी घरा च तुहें जांगे तित्थी तुहें रुकयों, कने बिदा लेणे तक तित्थी ठैहरेयों। 5जिस गाँवां रे लोक तुहांरा स्वागत नीं करो, तां तिसा जगह ते निकल़दे बगत अपणे पैराँ री धूड़ झाड़ी लेणी, तिसते जे तिन्हारे खलाफ गवाही हुई जाओ।” 6फेरी सै चेले निकल़ीने गाँवां-गाँवां च जाईने खुशखबरी सुणांदे हुये हर जगह बमाराँ जो चंगा करदे रैये।

राजा हेरोदेस री परेशानी

(मत्ती 14:1-12; मरकुस 6:15-29)

7यीशुये रे कित्तिरे चमत्काराँ री खबर ताहली जे राजा हेरोदेस अन्तिपास ले पुज्जी, फेरी सै डरिग्या कने उलझनां च पैईया, काँह्भई किछ लोक बोलीराँ थे, येत बपतिस्मा देणे औल़ा यूहन्ना सै जे मूईरेयां चते जिऊंदा हुईरा, 8कने कितणेयां ये बोल्या भई एलिय्याह भविष्यवक्ता दिस्या, कने होरीं लोकें गलाया भई पुराणे जमाने रे भविष्यवक्तां चते कोई जिऊंदा हुईग्या। 9हेरोदेस राजे गलाया, “मैंई त यूहन्ने रा सिर बढाईरा, तां फेरी ये माहणु कुण आ तिसरे बारे च जे हऊँ येढ़ि हैरान करने औल़ियां गल्लां सुणीराँ?” कने सै यीशुये जो देखणे रा मौका टोलदा रैया।

पांज्ज हजार माहणुआं जो रोटी ख्वाणा

10फेरी प्रेरिते मुड़ीने आईने, जो किछ तिन्हें कित्या था तिसजो दस्सीत्या, कने सै तिन्हांजो अलग करीने चुपचाप बैतसैदा नगरा जो लेईग्या। 11पर लोकां री भीड़ ये जाणीगी भई सै कितो जाई कराँ, कने भीड़ तिसरे पिच्छे चलीपी। कने सै खुशी-खुशी तिन्हांने मिलया, कने तिन्हांने परमेशरा रे राज्जा री गल्लां करने लगया कने सै जे ठीक हूणा चाँह थे तिन्हाजो ठीक कित्या।

12ताहली जे दिन घरने लगया तां सै बारा प्रेरित तिसले आये कने बोलणे लगे, “इसा भीड़ा जो येत्था ते भेजी दे तिसते जे यो नेड़े री बस्तियां च कने गाँवां च जाईने किछ अपणे खातर खाणे जो खरीदी लो, काँह्भई अहें येथि सुनसान जगह पर ये।”

13यीशुये तिन्हांने गलाया, “तुहें इ इन्हांजो खाणे जो देआ।” तिन्हें गलाया, “अहांले सिर्फ पांज्ज रोटियां कने दो मच्छियां ईं। इन्हां सबनीं रा गुजारा तां हुई सक्कां जे अहें जाईने इसा भीड़ा खातर रोटियां खरीदी ने ले आईगे?” 14काँह्भई तिसा भीड़ा च तकरीवन पांज्ज हजार मर्द थे। यीशुये अपणे चेलयां ने गलाया, “तिन्हांजो पंजाह-पंजाह माहणुआं री बैंठ लाईने बैठणे खातर बोल्ला।” 15चेलयां तियां इ कित्या, कने सारे लोक धरतिया पर बैठीगे। 16यीशुये तिन्हां पांज्ज रोटियां कने दो मच्छियां जो लेआ। कने तिने स्वर्गा खौ देखीने परमेशरा रा धन्यवाद कित्या कने तिस खाणे पर बरकत मंगी। फेरी यीशु रोटियां दो-दो टुकड़े करीने अपणयां चेलयां गे लोकां च बंडणे खातर देन्दा गया। 17सारयां रज्जीने रोटी खाद्दि कने बाद बिच तिन्हे बचीरे टुकड़यां री बारा टोकरियां भरी ने चक्कियां!

पतरसा रा यीशुये जो मसीह स्वीकार करना

18इक दिन यीशु भीड़ा जो छड्डिने सुनसान जगह च प्राथना करने गये कने तिन्हां सौगी तिन्हारे चेले बी थे, तां यीशुये तिन्हाते पुच्छया, “लोक मिन्जो क्या बोलां ये?”

19तिन्हे जबाब दित्या, “किछ लोक बोलां ये भई बपतिस्मा देणे औल़ा यूहन्ना भीं ते जिऊंदा हुईग्या, कने कोई-कोई एलिय्याह बोल्लां यें, कने किछ लोक येढ़ा बोल्लां यें भई पुराणे भविष्यवाणी करने औल़यां चते कोई इक जिऊंदा हुईग्या।”

20यीशुये तिन्हाते दोबारा पुच्छया, “पर तुहें मिन्जो क्या समझां ये भई हऊँ कुण आ?” पतरसे जबाब दित्या, “तुहें परमेशरा रे भेजीरे मसीह ये!” 21फेरी यीशुये चेलयां जो हुक्म दित्त्या भई इस बारे च किसी ने देखां बोलदे।

अपणिया मौती रे बारे च यीशुये री भविष्यवाणी

22फेरी यीशुये गलाया, “काँह्भई माहणुये रे पुत्रा रे खातर ये जरूरी आ भई सै मता दुख सओ, कने बजुर्गां, मुखियायाजकां कने शास्त्रियां हऊँ घटिया समझीने मारी देणा, पर तिज्जे दिन मांज भीं ते ज्यून्दे हुई जाणा।”

23फेरी तिने सारयां लोकां जो गलाया, “सै जे कोई मेरा चेला बणना चाओ, सै खुद अपणा इन्कार करो कने हर रोज दुख सैहणे कने मरने रे खातर बी त्यार रौ, सै मेरा चेला बणो। 24जे तुहें अपणा प्राण बचाणा चांहन्गे तां तुहां सै गवाई देणा, पर जे तुहें मेरे खातर अपणा प्राण गवांगे तां तिस इ सै बचाणा। 25जे लोक इस संसारा जो जित्ति लो कने अपणा‍ प्राण गवाई दो, तां तिस्सो क्या फैदा? 26जो कोई मेरते या मेरियां गल्लां ते शर्मांगा; माहणुये रे पुत्रा बी यनि मांह, ताहली जे अपणी, कने अपणे पिता री, कने पवित्र स्वर्गदूतां री महिमा सौगी औणा, तां तिसते शर्माणा। 27कने हऊँ तुहांजो विश्वास दिलां भई येत्थी खढ़ी रयां चते किछ माहणु येढ़े भई तालुआं तक जे सै परमेशरा जो राज करदा हुआ देक्खी नीं लेन्दे तदुआं तक तिन्हाजो मौत नीं औणी।”

प्रभु यीशुये रा दिव्य रुप

(मत्ती 17:1-8; मरकुस 9:2-8)

28इन्हां गल्लां ते कोई अट्ठां दिनां बाद यीशु, पतरस, याकूब कने यूहन्ना जो लेईने प्राथना करने खातर पहाड़ा पर गये। 29ताहली जे यीशु प्राथना करी राईं था, तां तिसरे चेहरे रा रुप बदलिग्या कने तिसरे कपड़े सफेद हुईने चमकणे लगे। 30फेरी दो माहणु मूसा कने एलिय्याह ऊथी परगट हुये कने यीशुये ने गलाणे लगे। 31सै तेजोमय दिस्या कराँ थे कने परमेशरा री इच्छा पूरी करने खातर यरूशलेम च यीशुये रे मरने री गल्लां करी कराँ थे। 32पतरस कने तिसरे साथियां जो निन्द आईराँ थी कने सै सैई बी गईरे थे कने तां जे सै जागे तां तिन्हे यीशुये ते निकल़णे औल़ा तेज देख्या कने दुईं माहणुआं जो तिस सौगी खढ़िरा देख्या। 33जिस बगत मूसा कने एलिय्याह जाणे लगे तां पतरस नां जाणदे हुये ये क्या बोलीराँ, “गुरू जी, ये खरा हुआ भई अहें येत्थी थे! अहां येत्थी तिन्न तम्बू बनाणे, इक तेरे खातर, इक मूसा खातर कने इक एलिय्याह रे खातर।”

34पर ताहली जे सै येढ़ा बोल्ली इ कराँ था तां इक बद्दल़ आई ने तिन्हां पर छाईया; कने तियां जे सै तिने बद्दल़े घेरीले, तां सै डरिये। 35तिस बगत तिस बदला चते इक अवाज़ आई कने तिन्हाने गलाणे लगी, “ये मेरा बड़ा प्यारा पुत्र आ कने मैं इसजो चुणीरा, इसरी सुणां।” 36ये अकाशवाणी हुणे ते बाद यीशु कल्हा दिखया; कने तिसरे चेले चुप रै, कने तिन्हे तेढ़ा जे ऊथी देख्या, तिसरी कोई बी गल्ल तिन्हे किसी जो नीं दस्सी।

बुरीआत्मा रे सताईरे मुण्डुये जो चंगा करना

(मत्ती 17:14-18; मरकुस 9:14-27)

37दुज्जे दिन ताहली जे सै पहाड़ा ते उतरी ने आये तां मतयां लोकां री भीड़ तिसने मिलणे जो आई। 38तिसा भीड़ा चते इक माहणु जोरा ने रड़ाया, “गुरूजी, हऊँ तेरते विनती कराँ भई मेरे मुण्डुये पर दया कर, काँह्भई सै मेरा इक्को-इक इ बच्चा। 39कने देख इक बुरीआत्मा तिस्सो बार-बार पकड़ां इ, कने तिसरिया वजह ने सै इकलगत रड़ाणे लगी जां, सै बुरीआत्मां तिस्सो इस तरिके ने मड़ेकां इ भई तिसरे मुँआं ते झगूड़ निकल़णे लगां, कने तिस्सो मरोड़ीने नाश करना चाईं। 40मैं तेरे चेलयां ते तिस बुरीआत्मा जो नकाल़णे खातर विनती किति पर सै येढ़ा नीं करी पाये।”

41यीशुये जवाब दित्या, “अविश्वासी कने अड़ीमूर लोको मैं तुहांरे खातर इतणा किछ कित्या पर तुहें विश्वास नीं करदे? हऊँ कदुआं तक तुहां सौगी रैंहगा, अपणे पुत्रा जो येत्थी ल्यावा।”

42सै मुण्डु हल्तियें आई इ कराँ था भई तिने बुरे आत्मे तिस्सो पकड़ीने धरतिया पर पटकाया कने तिस्सो बुरे हाल्लें मरोड़ने लगया, पर यीशुये बुरीआत्मा जो थिड़क्या कने मुण्डुये जो ठीक करीने तिस्सो तिसरे पिता ले साम्भीत्या। 43फेरी सारे लोक परमेशरा रिया बड्डिया सामर्था रे कम्मा ते हैरान हुये। यीशु सै जे किछ करया राँ था तिसजो देखीने सारे लोक ताहली जे हैरान हुई कराँ थे तिस बगत यीशुये अपणे चेलयां जो गलाया,

अपणिया मौती रे बारे यीशुये री दुज्जी भविष्यवाणी

44“तुहें इन्हां गल्लां जो ध्याना ने सुणयों, काँह्भई माहणुये रा पुत्र यनि हऊँ अधिकारियां रे हत्था च पकड़वाया जणे औल़ा।” 45पर चेले इसा गल्ला जो नीं समझी पाये थे भई सै अपणिया मौती रे बारे च गलाईरां था, कने येई गल्लां तिन्हांते छिपीरी रैईयां भई सै तिन्हांजो जाणी नीं पाओ, कने सै सब जणे इसा गल्ला रे बारे च यीशुये ते पुछणे ते डराँ थे।

परमेशरा रे राज्जा च सबनीं ते महान कुण आ

46फेरी चेलयां च ये बैहस हुणे लगी भई अहां चते महान कुण आ। 47यीशु तिन्हांरे मनां री गल्लां जो जाणी लेआं, इस खातर तिने इक बच्चे जो लेआई ने अपणे सौगी खड़ा कित्या। 48फेरी तिन्हांने बोल्या, “सै जे कोई मेरे नौआं ते इस बच्चे जो ग्रहण कराँ, सै मिन्जो ग्रहण कराँ; कने सै जे कोई मिन्जो ग्रहण कराँ, सै मेरे भेजणे औल़े जो ग्रहण कराँ, काँह्भई ये सै आ सै जे तुहां च सबनी ते छोट्टा, सैई महान आ।”

49यूहन्ने यीशुये ने गलाया, “स्वामी, अहें इक्की माहणुये जो तेरे नौआं ते बुरीआत्मा जो निकाल़दे देख्या, कने अहें तिस्सो मना कित्या, काँह्भई सै अहां चेलयां चते नीं था।” 50पर यीशुये गलाया, “तिस्सो मना मत करा; काँह्भई सै जे तुहांरे बरोधा च नींये, सै तुहांरिया तरफा जो ये।”

सामरियां रिया बजह ने यीशुये रा बरोध

51जियां जे यीशुये रे स्वर्ग वापस जाणे रा बगत नेड़े औंदा गया, तिस बगत तिन्हे यरूशलेम जाणे रा फैसला कित्या। 52तिने जाणे ते पैहले सामरियां रे गाँवां च किछ सनेहा देणे औल़यां जो भेज्या भई तिन्हारे खातर ठैहरने कने खाणे-पीणे रा इन्तजाम करा। 53पर तिस गाँवां रे लोकें तिन्हाजो वापस भेजित्या काँह्भई तिन्हे लोकें जाणील्या भई यीशु ऊत्थी ते अग्गे यरूशलेम री तरफ जाणे औल़ा इस खातर तिन्हे ऊत्थी यीशुये रा स्वागत नीं कित्या। 54येढ़ा देखीने तिसरे चेलयां याकूब कने यूहन्ने गलाया, “प्रभु जी, क्या अहें हुक्म देईये भई अम्बरा ते आग्ग बर्हो कने ये लोक जल़ीने भस्म हुई जाओ?” 55पर यीशुये तिन्हारी तरफ मुड़ीनें तिन्हाजो थिड़क्या कने गलाया, “तुहें नीं जाणदे भई तुहें केढ़ी आत्मा रे। 56माहणुये रा पुत्र लोकां रे प्राणां जो नाश करने नीं आईरा पर तिन्हांरा छुटकारा करने आईरा।” फेरी ऊत्थी ते सै किसी होर गाँवां जो चलीगे।

प्रभु यीशुये रा चेला बणने री कीमत

(मत्ती 6:19-22)

57ताहली जे सै कने तिसरे चेले बाटे चलीरे थे, तां किन्हिये तिसजो गलाया, “तित्थी जे किति तू जांगा, माह तेरे पिच्छे जाणा।”

58यीशुये तिसने बोल्या, “गिदड़ियां जो रैहणे खातर दूहड़ कने हवा च उडणे औल़यां पंछियां जो रैहणे खातर आलणे हुआं ये, पर माहणुये रे पुत्रा जो आराम करने जो बी जगह नीं।”

59तिन्हे दुज्जे माहणुये ने गलाया, “मेरा चेला बणीने मेरे पिच्छे औ।” तिने बोल्या, “हे प्रभु, इसते पैहले भई हऊँ तेरे सौगी चलूँ मिन्जो जाईने अपणे पिता रा अंतिम संस्कार करने दे।”

60यीशुये तिसने गलाया, “सै लोक जे आत्मिकता च मूईरयां साई ये तिन्हौं अपणयां लोकां रे मरने रा इन्तजार करने दे, पर तू जाईने परमेशरा रे राज्जा रा प्रचार कर।”

61इक्की होर माहणुये गलाया, “हाँ प्रभु, हऊँ तेरे सौगी चलने जो त्यार आ, पर पैहले मिन्जो अपणे परिवार औल़यां ते विदाई लेणे दे।”

62यीशुये तिसने गलाया, “सै जे कोई माहणु हल़ बाहन्दे बगत पिच्छे देक्खां सै परमेशरा रे राज्जा लायक निआं।”

Currently Selected:

लूका 9: KFSNT

Highlight

Copy