मरकुस 9

1फेरी यीशुये अपणयां चेलेयां जो गलाया, “हऊँ तुहांजो सच बोलां भई तुहां चते किछ लोक सै जे येत्थी खढ़िरे, तदुआं तक नीं मरना, तदुआं तक जे परमेशरा जो सामर्था सौगी राज करदे हुए नीं देक्खी लो।”

यीशुये रा रुप बदलना

(मत्ती 17:1-13; लूका 9:28-36)

2छेआं दिनां ते बाद यीशुये, पतरस, याकूब, याकूब रे छोट्टे भाई यूहन्ने जो सौगी लया, कने तिन्हांजो ऊच्चे पहाड़ा पर लईग्या; तित्थी जे सै कल्हे थे। तित्थी तिन्हारे सामणे परमेशरे यीशुये रा रुप बदलील्या। 3येत्थी तक भई तिसरे कपड़ेयां रा रुप बी लग था। सै चमकदार कने बड़े सफेद हुईगै। तिन्हां रिया सफेदिया री इसा धरतिया पर कोई बराबरी नीं थी। 4फेरी ये दो भविष्यवक्ते मूसा कने एलिय्याह सै जे बौहत पैहले थे तिन्हांजो यीशुये सौगी गल्लां करदे दिक्खे।

5इस पर पतरसे यीशुये जो गलाया, “गुरू जी, अहांरा येत्थी रैहणा ठीक आ : इस खातर अहां तिन्न तम्बू बनाणे; इक तेरे खातर, इक मूसा खातर, इक एलिय्याह खातर।” 6काँह्भई सै नीं जाणदा था भई क्या जवाब देओ, इस खातर भई सै कने दुज्जे दो चेले बौहत डरी गरे थे। 7फेरी इक्की बद्दल़े तिन्हांजो ढकीत्या, कने परमेशरे बद्दल़ा चते बोल्या, “ये मेरा प्यारा पुत्र आ, इस खातर तुहें इसरी सुणा।” 8मूसा कने एलिय्याह चलीगरे थे, कने तिन्हें सिर्फ यीशुये जो तिन्हां सौगी देख्या।

9ताहली जे यीशु कने तिसरे तिन्न चेले पहाड़ा परा ते उतरया रां थे, तां यीशुये तिन्हांजो ये हुक्म दित्या भई किसी जो बी तदुआं तक ये नीं दस्यों भई तुहें क्या देख्या, तदुआं तक जे माहणुये रा पुत्र यनि हऊँ मूईरेयां चते जिऊंदा हुईने नीं आई जाऊँ। 10फेरी चेलयां इसा गल्ला जो याद रखया; पर तिन्हें इस बारे च गलाणा शुरु कित्या, भई “मूईरयां चते जी उठणे रा क्या मतलब आ?”

11फेरी चेलयां यीशुये ते ये पुच्छया, “शास्त्री काँह बोलां ये भई एलिय्याह भविष्यवक्ते जो मसीह ते पैहले औणा चाहिन्दा?” 12-13यीशुये जवाब दित्या, “ये सच्च आ, भई परमेशरे एलिय्याह जो पैहले भेजणे रा वायदा कित्तिरा, ताकि लोक मेरे औणे रे वगत त्यार रैहन्गे। पर हऊँ तुहांजो बोलां भई एलिय्याह त आई चुक्कीरा, कने लोकें तिसने जो किछ करना चाहया सै करी चुक्कीरे, तियां जे पवित्रशास्त्रा च तिसरे बारे च लिखिरा। पर माहणुये रे पुत्रा यनि मेरे बारे च काँह येढ़ा लिखिरा भई मिन्जो बौहत दुख सैहणे पौणा, कने लोकां मेरा त्याग करना?”

बुरीआत्मा रे सताईरे मुण्डुये जो चंगा करना

(मत्ती 17:14-21; लूका 9:37-43)

14ताहली जे यीशु कने तिसरे तिन्न चेले दुज्यां चेलेयां ले वापस आये, तां देख्या भई तिन्हांरे चऊँ पासयां मती भीड़ लगीरी कने किछ शास्त्री तिन्हांने बैहस करया रायें। 15तियां जे सारयां लोकें यीशुये जो देख्या, तां सै बौहत हैरान हुणे लगे, कने तिस खौ दौड़ीने तिस्सो मत्था टेकणा कित्या। 16यीशुये तिन्हांते पुच्छया, “तुहें इन्हांने क्या बैहस करया रायें?” 17भीड़ा चते इक्की तिस्सो जवाब दित्या, “गुरू, हऊँ अपणे पुत्रा जो तेरले ल्याया, तिसच जे इक बुरीआत्मा इ सै तिस्सो गल्ल नीं करने देन्दी। 18ताहली जे ये बुरीआत्मा तिस पर हमला कराँ ईं, तिस्सो जमीन्ना पर पटकी देईं : तिसरे मुँआं ते झगूड़ औआं, कने सै अपणे दांद पीहां, कने अकड़ी जां कने हिलदा नींआ। मैं तेरयां चेलयां जो बुरी आत्मा जो बाहर कड्डणे रे खातर बोल्या, पर सै नीं कड्डी सक्के।” 19ये सुणीने यीशुये तिन्हांजो जवाब देईने गलाया, “इस जुगा रे अविश्वासी लोको, हऊँ कितणे वगता तक तुहां सौगी रैहन्गा? कने कदुआं तक तुहांरी सैहन्गा? तिस मुण्डुये जो मेरले ल्यावा।” 20इस खातर सै मुण्डुये जो यीशुये ले ली आये, कने तंजे बुरीआत्मे यीशुये जो देख्या, तां तिसे इकदम मुण्डुये जो मरोड़या; कने मुण्डु धरतिया पर पैईग्या, कने मुँआं ते झगूड़ नकाल़णे कने मरेलणे लगया।

21यीशुये मुण्डुये रे पिता ते पुच्छया, “इसरी ये दशा कदुआं ते हुया रांई?” तिने गलाया, “बचपना ते। 22कई बार बुरीआत्मे इस्सो अग्गी च कने पाणिये च सट्टीने मारने री कोशिश कित्ती; पर जे तुहें किछ करी सक्को, तां अहां परा तरस खाईने अहांरी सहायता कर।” 23यीशुये तिस्सो गलाया, “ये नीं बोलणा जे तुहें करी सक्कां ये, काँह्भई परमेशरा पर विश्वास करने औल़यां खातर सै सब किछ करी सक्कां।” 24मुण्डुये रा पिता इकदम चिल्लाया, “हे प्रभु, हऊँ विश्वास कराँ भई तुहें मेरी सहायता करी सक्कां ये, पर हऊँ विश्वासा च इतणा मजबूत नींआ, इस खातर मेरी सहायता कर ताकि हऊँ विश्वासा च मजबूत हुईजो।” 25तंजे यीशुये देख्या भई होर बी लोक अहांजो देखणे खातर कट्ठे हुया रायें, तां तिने बुरीआत्मा जो येढ़ा बोलीने झिड़कया, “गूँगा कने बैहरा करने औल़ी आत्मा, हऊँ तिज्जो हुक्म देआं, इस चाते निकल़ी जा, कने इसच भीं ते कदीं बी देखां जांदी।” 26तां बुरी आत्मा चिल्लाया कने तिस्सो बौहत मरोड़ीने, निकल़ीगी; कने मुण्डु मूईरेयां साई दिख्या, येत्थी तकौ भई बौहत लोक बोलणे लगे भई ये मरीगरा। 27पर यीशुये मुण्डुये रा हात्थ पकड़ीने खड़ा कित्या, कने सै ठीक हुईग्या। 28बाद बिच ताहली जे यीशु अपणे चेलेयां सौगी घरा च कल्हा था, तां तिन्हें तिसते पुच्छया, “अहें बुरीआत्मा जो काँह नीं कड्डी सक्के?” 29फेरी यीशुये जवाब दित्या, “तुहें इस तरिके रियां बुरियां आत्मां जो सिर्फ प्राथना रेई जरिये निकाल़ी सक्कां ये।”

अपणिया मौती रे बारे यीशुये री दुज्जी भविष्यवाणी

(मत्ती 17:22,23; लूका 9:43-45)

30फेरी यीशु कने तिसरे चेले तिस इलाके जो छड्डिने चले, कने गलील प्रदेशा चियें हुईने जायां राँ थे। यीशु नीं चाहन्दा था भई किसी जो बी इसा गल्ला रा पता लगो भई हऊँ किति आ, 31काँह्भई सै अपणयां चेलयां सौगी जादा वगत बिताणा कने तिन्हांजो सखाणा चाँह था। यीशुये तिन्हांजो बोल्या, “माहणुये रे पुत्रा यनि मिन्जो माहणुआं रे हात्था च पकड़वाया जाणा, कने तिन्हां मिन्जो मारी देणा; कने मांह मरने ते बाद तिज्जे दिन जी उठणा।” 32पर सै गल्ल तिन्हां रिया समझा नीं आई, कने सै तिसते पुछणे ते डराँ थे।

सब्बीं ते बड्डा कुण आ?

(मत्ती 18:1-5; लूका 9:46-48)

33फेरी यीशु कने तिसरे चेले कफरनहूम च अपणे घरें गए; ताहली जे सै घरा रे अन्दर थे यीशुये तिन्हाते पुच्छया, “तुहें रस्ते च क्या बैहस करयां राँ थे?” 34पर सै चुप रै, काँह्भई रस्ते च तिन्हें अप्पूँ चियें ये बैहस कित्ती थी भई अहां चते महान कुण हूणा, ताहली जे यीशु राजा हूणा। 35यीशु बैट्ठीग्या कने बारा चेलयां जो अप्पूँ ले कट्ठा हुणे रे खातर सद्दया कने तिन्हाजो गलाया, “जे कोई महान बणना चाँह, तां सै सब्बींते छोट्टा कने सब्बीं रा सेवक बणो।” 36फेरी यीशुये इक बच्चे जो तिन्हांरे सामणे खड़ा हुणे जो बोल्या, तिने बच्चे जो गल़े लाईल्या कने चेलेयां जो बोल्या, 37“सै जे कोई माह्णु मेरिया वजह ते इस साई इक बच्चे पर दया करां, सै सच्चीजो मेरा आदर कराँ। जे कोई माह्णु मेरा आदर करां, तां सै हकीकत च परमेशरा रा आदर करां तिने जे मिन्जो भेज्जिरा।”

सै जे बरोधा च निआं, सै सौगी आ

(लूका 9:49-50)

38फेरी यूहन्ने तिसने बोल्या, “गुरू, अहें इक्की माहणुये जो तेरे नौंवां ते बुरीआत्मां जो निकाल़दे देख्या कने अहें तिस्सो मना करने लगे, काँह्भई सै अहां साई चेलयां चते नीं था।” 39यीशुये गलाया, “तिस्सो मता रोकदे; काँह्भई येढ़ा कोई निआं सै जे मेरे नौंवां ते सामर्था रे काम्म करो कने फेरी मिन्जो बुरा बोल्ली सक्को, 40सै जे अहांरा दुश्मण निआं, सै अहांरा मित्र आ। 41हऊँ तुहांने सच्च बोलां, मसीह रे पिछे चलने रिया वजह ते, जे कोई तुहांरी थोड़ी जेई मदद बी करो तियां जे पाणी प्याणा, तां तिन्हांजो परमेशरा जरूर ईनाम देणा।”

ठोकरा री बजह बणना

(मत्ती 18:6-9; लूका 17:1,2)

42यीशुये ये बी बोल्या “सै जे कोई माह पर विश्वास करने औल़यां चते इक्की जो बी पाप करने पर मजबूर करो, भले इ सै इक बच्चे साई कोई हो, ये तिसरे खातर बेहतर हूणा भई इक बजनी पत्थर तिसरे गल़े ने बन्हया जाओ कने तिस्सो डुबणे रे खातर समुद्रा च सट्टि दित्या जाओ, ये तिसरे खातर भयानक सजा हुई सक्का इ पर परमेशरा तिसजो इसते बी भयानक सजा देणी। 43पाप करने रिया हरेक वजह जो दूर करा! इसजो पूरे तरिके ने अस्वीकार करा तियां जे भई तुहें इक हात्थ बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो हात्थ हो कने तुहें नरका च जाओ, तां सै बुरा। 44तिसा जगह पर, सारयां जो खाणे औल़े कीड़े कदीं नीं मरदे कने आग्ग कदीं नीं बुझदी। 45-46पाप करने रिया हरेक वजह जो दूर करा! इसजो पूरे तरिके ने अस्वीकार करा तियां जे भई तुहें इक पैर बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो पैर हो कने तुहें नरका च जाओ, तां सै बुरा। 47पाप करने रिया हरेक वजह जो दूर करा! इसजो पूरे तरिके ने अस्वीकार करा। काणा हुईने तेरा स्वर्गा जो जाणा बौहत अच्छा, बजाये इसरे भई तेरियां दो आक्खीं हुन्दे हुये तिज्जो नरका रिया तिसा अग्गी च पाया जाओ सै जे कदीं मनी बुझणी। 48तित्थी मूईरे शरीरा जो खाणे औल़े कीड़े कने सै आग्ग कदीं नीं बुझदी। 49काँह्भई हर इक माहणु अग्गी च परखीने शुद्ध कित्या जाणा, तियां जे बलिदान्ना जो लूण पाईने शुद्ध कित्या जां। 50लूण खाणे च पाईने खाणे जो स्वादिष्ट बणां, पर जे लूणा रा स्वाद बिगड़ी जाओ, तां तिस्सो तुहें भीं ते इस्तेमाल लायक नीं बणाई सकदे; इक्की दूये सौगी तियां इ शांन्तिया ने रौआ तियां जे लूण खाणे च पाणे ते बाद मिली जां।”

Currently Selected:

मरकुस 9: KFSNT

Highlight

Copy