KUMA 3
3
Kwĩtwa kwa Mose
1Na ĩndĩ Mose eethĩwa akĩĩthya ndĩthya ya mbũi na malondu ya Yethilo mũthoni wake, mũthembi wa Mitiani: na atongoesya ĩla ndĩthya avĩtĩlya weũnĩ, na avika kĩĩma kya Ngai o Olevu. #1 Asu 19.8. 2Na mũlaĩka wa Yeova amumĩlĩla ũlĩlĩnzĩnĩ wa mwaki ũla wakanĩte kakuthunĩ katĩ: na oona, na, sisya, kakuthu nĩkakanĩte mwaki, na kakuthu katyavĩsaa. #Meko 7.30–35; Isa 63.9. 3Na Mose asya, Nĩngwathũka yu none ũndũ ũũ ũnene, na kĩla kĩũtuma kakuthu katavya. 4Na yĩla Yeova wonie kana nĩwathũka ũtee one, Ngai amwĩta kuma kakuthunĩ katĩ, na amwĩa, Mose, Mose. Nake eetĩka, Ninyioo. #Kũt 33.16. 5Na amwĩa, Ndũkathengeee vaa: umya iatũ syaku maũũnĩ maku, nũndũ vau ũũngeme nĩ vandũ vatheu. #Yos 5.15; Mũta 5.1. 6Na ĩngĩ amwĩa, Nyie ninyie Ngai wa ĩthe waku, Ngai wa Avalaamu, na Ngai wa Isaka, na Ngai wa Yakovo. Na Mose avitha ũthyũ wake; nũndũ akĩa kũmũsisya Ngai. #Mwa 28.13; 1 Asu 18.36; 19.13; Mko 12.26. 7Na Yeova amwĩa, Nĩ w’o, nĩnonete thĩna wa andũ makwa ala me Misili, na ngew’a ũkayo woo kwondũ wa aũngamĩi moo; nũndũ nĩnĩsĩ mathĩna moo; #Kuma 2.23,24; 5.13,14; Nee 9.9. 8nakwa nĩtheete nĩmavonokye mokonĩ ma Amisili, na kũmaumya nthĩ ĩsu nĩmatwae nthĩ nzeo na nene, nthĩ yusũĩte ĩia na ũkĩ wa nzũkĩ; o kũndũ kwa Mũkanaani, na Mũititi, na Mũamoli, na Mũvelisi, na Mũivi, na Mũyevusi. #Mwa 11.5,7; 15.18–21; 18.21; Kuma 12.51; Kũt 8.7–9; 26.9. 9Na yu sisya, kĩĩo kya ana ma Isilaeli nĩkĩvikĩte kwakwa: na ĩngĩ nĩnonete mathĩna ũndũ Amisili mamathĩnasya. #Kuma 1.11–14,22; 2.23. 10Ũkĩla ĩndĩ yu, na nĩngũũtũma kwa Valao, nĩ kana wumye andũ makwa, ana ma Isilaeli, Misili. #Sav 105.26. 11Na Mose amwĩa Ngai, Nyie nĩ ũũ, nĩende kwa Valao, na nĩ kana nyie numye ana ma Isilaeli Misili? #Kuma 6.12; 1 Asu 3.7,8; Yel 1.6. 12Na amwĩa, Vate ndĩi ngeethĩwa vamwe naku; na ũndũ ũũ ũkeethĩwa kĩmanyĩthya kwaku kana nĩngũtũmĩte: waumya andũ Misili, mũkathũkũma Ngai kĩĩmanĩ kĩĩ. #Kuma 4.12,15; 19.1–25; Kũt 31.8; Yos 1.5.
13Na Mose amwĩa Ngai, Sisya, yĩla nĩendea ana ma Isilaeli, na ngĩmea, Ngai wa aaĩthe menyu nũndũmĩte kũla mũi namo makangũlya, Syĩtwa yake nata? Ngamea ata? #Mwa 32.29. 14Na Ngai amwĩa Mose, NINYIE ŨLA NINYIE: na amwĩa, Ũũ nĩw’o wĩtavya ana ma Isilaeli, NINYIE nĩwe ũndũmĩte kũla mũĩ. #Kuma 6.3; Sav 68.4; Yoa 8.58; Aevl 13.8; Ũvu 1.4; 4.8. 15Na ĩngĩ Ngai amwĩa Mose, Ũũ nĩw’o wĩtavya ana ma Isilaeli, Yeova, Ngai wa aaĩthe menyu, Ngai wa Avalaamu, na Ngai wa Isaka, na Ngai wa Yakovo, nũndũmĩte kũla mũĩ: yĩu nĩyo syĩtwa yakwa kũvika tene na tene, nayo nĩ ya kũndilikana kũvika nzyawa syonthe. #Kuma 3.6; Sav 135.13; Osea 12.5. 16Enda, ũkomban’ye atumĩa ma Isilaeli, ũmee atĩĩ, Yeova, Ngai wa aaĩthe menyu, Ngai wa Avalaamu, na wa Isaka, na wa Yakovo, nĩwanumĩlĩle, akĩmbĩa, Nĩ w’o, nĩnamũkĩie na noona ũla mweekĩwe Misili: #Mwa 50.24; Kuma 2.25; 4.31; Lk 1.68. 17nakwa nĩneenete atĩĩ, Ngamumya monyamaonĩ ma Misili na kũmũvikya nthĩ ya Mũkanaani, na Mũititi, na Mũamoli, na Mũvelisi, na Mũivi, na Mũyevusi, o nthĩ yusũĩte ĩia na ũkĩ wa nzũkĩ. #Kuma 3.8. 18Na makeethukĩĩsya wasya waku: naku we na atumĩa ma Isilaeli mũkathi kwa mũsumbĩ wa Misili, na mũkĩmwĩa, Yeova, Ngai wa Aevelania, nĩwakomanie naitũ: na yu nĩtũũkwĩsũva, tũnenge ũtheĩ wa kũthi weũnĩ kyalo kya mĩthenya ĩtatũ, tũmũthembee Yeova Ngai waitũ. #Kuma 4.31; 5.1; Mot 23.3,4,15,16. 19Nakwa nĩnĩsĩ kana mũsumbĩ wa Misili ndakamũlekya mũthi, aiee, o na kwa kw’oko kwĩ vinya. #Kuma 6.1. 20Na ngatambũũkya kw’oko kwakwa, na ngĩkũna Misili na syama syakwa syonthe ila ngeka katĩ wayo: na ĩtina wa ũu akamũlekya mũthi. #Kuma 4.21; 12.31; Kũt 6.22; Nee 9.10; Yel 32.20; Meko 7.36. 21Na ngamendethya andũ aa kũla kwĩ Amisili: na kũkeethĩwa, mũkĩthi, mũtikaenda mwĩ athei: #Kuma 11.3; 12.36. 22ĩndĩ kĩla mũndũ mũka akakũlya mũtũi wake, na ũla wĩkalaa ũeni nyũmbanĩ yake, mĩio ya wanake ya vetha, na mĩio ya wanake ya thaavu, na ngũa: na mũkasyĩkĩa ana menyu, na eĩtu menyu; na mũkatavĩa Amisili. #Mwa 15.14; Kuma 11.2; 12.35; 33.6; Esek 39.10.
Currently Selected:
KUMA 3: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
