KUMA 9
9
Ũthĩn’yo indonĩ
1Nĩvo ĩndĩ Yeova wamwĩie Mose, Lika kwa Valao, ũmwĩe, Ũũ nĩw’o Yeova, Ngai wa Aevelania, ũnũkwasya, Lekya andũ makwa mathi, manthũkũme. #Kuma 8.1. 2Nũndũ ethĩwa nũkũlea kũmalekya mathi, na kũmekalangya, 3sisya, kw’oko kwa Yeova kwĩ ĩũlũ wa ĩndo syaku ila syĩ isesinĩ, ĩũlũ wa mbalasi, na mang’oi, na ngamĩle, na ndĩthya sya ng’ombe, na ndĩthya sya mbũi na malondu: kũkeethĩwa mũimũ mũthũku mũno. #Kuma 7.4; 1 Sam 6.3,5; Meko 13.11. 4Na Yeova akavathũkan’ya katĩ wa indo sya Isilaeli na indo sya Misili: na kũikakw’a ĩmwe ya syonthe ĩla sya ana ma Isilaeli. #Kuma 8.22. 5Na Yeova atw’a kyathĩ, akyasya, Ũnĩ nĩw’o Yeova wĩĩka ũndũ ũsu nthĩ ĩno. 6Na ũnĩ ũsu Yeova eeka ũndũ ũsu, na indo syonthe sya Misili syakw’a: ĩndĩ indonĩ sya ana ma Isilaelĩ kũtyaakw’a o na ĩmwe. #Kuma 9.19. 7Na Valao atũmana, na eethĩa kũtyaĩ o na ĩmwe ngw’ũ ya indo sya Aisilaeli. Ĩndĩ ngoo ya Valao yaĩ nyũmũ, na ndaalekya andũ mathi. #Kuma 7.14.
Ũthĩn’yo wa kwimba mĩimũ
8Na Yeova amea Mose na Aluni, Utai mũu ikonĩ mbĩ syusĩe, na Mose naũlũkye kwelekela ĩtunĩ Valao ene. 9Na ũkatw’ĩka kĩtoo kĩvinyu nthĩ yonthe ya Misili, na kwĩthĩwa mĩimũ mimbu ĩkĩvũthũkanga ĩũlũ wa andũ na ĩũlũ wa nyamũ, nthĩ yonthe ya Misili. #Kũt 28.27; 2 Asu 20.7; Yovu 2.7; Ũvu 16.2. 10Na mauta mũu ikonĩ, na maũngama mbee wa Valao; na Mose aũlũkya kwelekela ĩtunĩ; na watw’ĩka mĩimũ mimbu ĩkĩvũthũkanga ĩũlũ wa andũ na ĩũlũ wa nyamũ. 11Na ala eki ma syama matyaatonya kũũngama mbee wa Mose nũndũ wa mĩimũ; nĩkwĩthĩwa eki ma syama maĩ na mĩlimũ ĩsu, o na Amisili onthe. #Kuma 7.11; 2 Tim 3.9. 12Na Yeova oomya ngoo ya Valao, na ndaamethukĩĩsya; o tondũ Yeova ũtavĩtye Mose. #Kuma 4.21.
Ũthĩn’yo wa mbua ya mavia
13Na Yeova amwĩa Mose, Ũkĩla kĩoko tene, ũũngame mbee wa Valao, na ũimwĩa, Ũũ nĩw’o Yeova, Ngai wa Aevelania, ũnũkwasya, Lekya andũ makwa mathi, manthũkũme. #Kuma 8.20. 14Nũndũ ĩvinda yĩĩ ngaetee ngoo yaku mothĩn’yo makwa onthe, we na athũkũmi maku, na andũ maku; nĩ kana ũmanye kana vati ũngĩ ũtilyĩ takwa nthĩ yonthe. #Kuma 8.10; 2 Sam 7.22; Sav 71.19; 86.8; Yel 10.6,7. 15Nũndũ yu nĩĩthĩwa ndambũũkĩtye kw’oko kwakwa, ngũkũne we na andũ maku na mũimũ, na ũivetwa kuma nthĩ: 16ĩndĩ nĩ w’o, kwondũ wa ũndũ ũũ nĩngũũngamĩtye, nĩkwon’ye vinya wakwa, na nĩ kana syĩtwa yakwa yĩtavanw’e nthĩ yonthe. #Nee 9.10; Nth 16.4; Alo 9.17. 17O na yu, we, wĩneneveasya andũ makwa, ndũkamalekye mathi? 18Sisya, ũnĩ ta yu ngausya mbua mbai mũno ya mavia, mũthemba ũla ũtaaoneka Misili kuma mũthenya ũla yambĩlĩlw’e o na kũvika yu. 19Yu ĩndĩ tũmana, ũkalaate indo syaku na syonthe ila wĩ nasyo kĩsesinĩ syĩnũkw’e; nũndũ kĩla mũndũ na nyamũ ĩla ĩkakitw’a kĩsesinĩ, ĩte mbĩnũkye, mbua ĩsu ya mavia ĩkasyuĩa, na ikakw’a. 20Ũla wakĩie ndeto ya Yeova athũkũminĩ ma Valao atuma athũkũmĩ make na indo syake ikũka ilike nyũmbanĩ: 21nake ũla ũtaaona ndeto ya Yeova ta kĩndũ atia athũkũmi make na indo syake kĩsesinĩ.
22Na Yeova amwĩa Mose, Tambũũkya kw’oko kwaku keelekela ĩtunĩ, kue, mbua ya mavia nthĩ yonthe ya Misili, mũndũnĩ, na nyamũnĩ, na nyũnyinĩ syonthe sya mũũndanĩ, nathĩ yonthe ya Misili. #Kuma 10.12; 14.21. 23Na Mose atambũũkya ndata yake kwelekela ĩtunĩ: na Yeova aete ĩtundumo na mbua ya mavia, na mwaki watheea wavika nthĩ; na Yeova ausya mbua ya mavia nthĩ ya Misili. #Yos 10.11; Sav 18.13; 78.47; Isa 30.30; Esek 38.22; Ũvu 8.7. 24Na kwondũ wa ũu kweethĩwa mbua ya mavia, na mwaki ũvulene na ĩla mbua ya mavia, mbai mũno, mũthemba ũla ũtaaoneka nthĩ yonthe ya Misili kuma yĩla yambĩlĩlye kũtũwa nĩ andũ. 25Na mbua ĩsu ya mavia yakũna syonthe ila syaĩ kĩsesinĩ, andũ o na nyamũ, nthĩ yonthe ya Misili; na mbua ĩsu ya mavia yakũna nyũnyi syonthe sya mũũndani, na yatũlanga kĩla mũtĩ wa kĩsesinĩ. #Sav 105.33. 26No nthĩ ya Ngoseni ĩ yoka, ĩla yatwĩe ana ma Isilaeli, ĩtaĩ mbua ya mavia. #Kuma 8.22.
27Na Valao atũmana, na eeta Mose na Aluni, na amea, Nĩnĩvĩtĩtye ĩvinda yĩĩ: Yeova nĩ mwene ũlũngalu, nakwa nyie na andũ makwa twĩ athe. #Kuma 10.16; 2 Mav 12.6; Sav 129.4; Nda 9.14. 28Mwĩsũvei Yeova; nũndũ itundumo ii nene mũno na mbua ya mavia nĩsyĩanĩe; nakwa ngamũlekya mũthi, na mũtiendeea na kwĩkala kũũ. #Kuma 8.8. 29Na Mose amwĩa, O yĩla nĩuma ndũanĩ, ngookĩlĩlya Yeova moko makwa; na itundumo ikathela, o na kũtikethĩwa mbua ya mavia ĩngĩ; nĩ kana ũmanye atĩ nthĩ nĩ ya Yeova. #1 Asu 8.22,38; Sav 24.1; 143.6; Isa 1.15; 1 Ako 10.26. 30Ĩndĩ ũndũ waku na athũkũmi maku, nĩnĩsĩ kana o na yu mũtikakĩa Yeova Ngai. #Isa 26.10. 31Na katane na mbaale syakũnwa: nũndũ mbaale syaĩ na iia, na katane kaĩ kalaũku. 32Ĩndĩ nganũ na kusemethu ityaakũnwa: nũndũ ityaameete. 33Na Mose auma ndũanĩ kwa Valao, na atambũũkĩsya Yeova moko make: na itundumo na mbua ya mavia syatĩa, na mbua ndĩaaua ĩũlũ wa nthĩ. 34Na yĩla Valao wonie atĩ mbua na mbua ya mavia na itundumo nitĩĩte, aendeea kũvĩtya, na oomya ngoo yake, we na athũkũmi make. #Kuma 8.15. 35Na ngoo ya Valao yoomĩthw’a, na ndaalekya ana ma Isilaeli mathi; o tondũ Yeova ũneenete na kanyw’a wa Mose. #Kuma 7.13.
Currently Selected:
KUMA 9: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
