MWAMBĨLĨLYO 44
44
Kĩkombe ĩkunianĩ
1Na amwĩaĩa mũsyaĩĩsya wa nyũmba yake, akĩmwĩa, Usũsya makunia ma andũ lĩu, o ũndũ matonya ũkua, noyĩkĩa mbesa sya kĩla mũndũ kanyw’anĩ wa ĩkunia yake. #Mwa 42.25. 2Na kĩkombe kyakwa, kĩla kĩkombe kya vetha, ĩkĩa kanyw’anĩ wa ĩkunia ya ĩlumaita, o na mbesa syake sya lĩu. Nake eeka kwĩanana na ndeto ĩla Yosevu waneenete. 3Na kĩoko kũikya, ala andũ maekwa mathi, mo na mang’oi moo. 4Nao meethĩwa mauma ndũanĩ, o na matanaendeea mũno, Yosevu amwĩa mũsyaĩĩsya wa nyũmba yake, Ũkĩla, atĩĩa andũ asu; na wamawĩla, makũlye, Mwatũnga ũthũku vandũ va ũseo nĩkĩ? 5Kyu tikyo kĩla mwĩaĩi wakwa ũnyusaa nakyo, o na tikyo wathanaa nakyo? Nĩmwĩkie naĩ mweeka ũu. 6Na amawĩla amatavya ndeto isu. 7Nao mamwĩa, Mwĩaĩi wakwa eneena ndeto ta isu nĩkĩ? Kwĩthĩwe kũasa na athũkũmi maku kwĩka ũndũ ta ũsu. 8Sisya, mbesa, ila tweethĩie makanyw’anĩ ma makunia maitũ, nĩtwatũngie kwaku kuma nthĩ ya Kanaani: twĩũya ata ĩndĩ vetha kana thaavu kuma nyũmbanĩ ya mwĩaĩi waku? #Mwa 43.21. 9O na wĩva wa athũkũmi maku ũla ũkwoneka e nakyo, nakw’e, o naitũ tũkeethĩwa twĩ ngombo sya mwĩaĩi wakwa. #Mwa 31.32. 10Nake asya, Yu nĩkwĩthĩwe o kwĩanana na ndeto syenyu: we ũla ũnũkwoneka e nakyo akeethĩwa ngombo yakwa; nenyu mũkeethĩwa mũte na ĩvĩtyo. 11Na ĩndĩ meekalaata, na maũa kĩla mũndũ ĩkunia yake nthĩ, mathasya kĩla mũndũ ĩkunia yake. 12Nake amantha, ambĩlĩlya kwa ũla mũkũũ, o na kũminĩa kwa ũla mũnini: na kĩla kĩkombe kyooneka ĩkunianĩ ya Mbenyamini. 13Na ĩndĩ matembũa ngũa syoo, na maĩkya kĩla mũndũ ĩng’oi yake mũio, na masyoka ndũanĩ. #Mwa 37.29,34.
14Na Yuta na ana‐a‐ĩthe mavika nyũmbanĩ ya Yosevu; nake aĩ o vo: nao mavalũka nthĩ mbee wake. #Mwa 42.6. 15Na Yosevu amea, Ũndũ ũũ nata mwĩkie? Mũyĩsĩ kana mũndũ takwa nũtonya kwathana ki? 16Na Yuta akũlya, Tũmwĩe mwĩaĩi wakwa ata? Tũneene ata? O na twĩtw’ĩe ũlũngalu ata? Ngai nĩwonete ũthũku wa athũkũmi maku: sisya, twĩ ngombo sya mwĩaĩi wakwa, ithyĩ, ona ũsu nake ũla kĩkombe kyonekie kw’okonĩ kwake. #Mwa 37.18; 44.9; Mot 32.23. 17Nake asũngĩa, Kwĩthĩwe kũasa nakwa kwĩka ũndũ ta ũsu: mũndũ ũla kĩkombe kyonekie kw’okonĩ kwake, ũsu akeethĩwa ngombo yakwa; ĩndĩ inyw’ĩ ambatai na mũuo kwa ĩthe wenyu.
Yuta ayĩsũvanĩa Mbenyamini
18Na nĩvo ĩndĩ Yuta wamũthengeeie, na amwĩa, Ame, mwĩaĩi wakwa, nĩngũkwĩsũva, eka mũthũkũmi waku aneene ndeto ĩmwe matũnĩ ma mwĩaĩi wakwa, na ũthatũ waku ndũkakanĩe mũthũkũmi waku; nũndũ we wĩ o ta Valao. #Mwa 41.40. 19Mwĩaĩi wakwa akũlilye athũkũmi make, akyasya, Mwi na au, kana mwana‐a‐au? 20Naitũ twamwĩa mwĩaĩi wakwa, Twĩ na asa, mũtumĩa mũkũũ, na mwana wa ũkũũ wake, mũnini; na mwana‐a‐inyia wake nĩ mũkw’ũ, nake atiele e weka wa inyia wake; na ĩthe wake nũmwendete. 21Naku watavisye ithyĩ athũkũmi maku, Mwĩmũtheesya kwakwa nĩmwone na metho. #Mwa 42.15,20. 22Na twamwĩa mwĩaĩi wakwa, Kĩmwana kĩitonya kũtia ĩthe: nũndũ ethĩwa kĩkatia ĩthe, ĩthe akakw’a. 23Naku wamatavya athũkũmi maku, Ate o ĩlumaita yenyu kũtheea vamwe nenyu, mũikambona ũthyũ ĩngĩ. #Mwa 43.3,5. 24Na kweethĩwa twambata kwa nau mũthũkũmi waku, twamũtavya ndeto sya mwĩaĩi wakwa. 25Na asa waitũ asya, Syokai, mũkatũthooee lĩu mũnini. #Mwa 43.2. 26Na twasũngĩa, Tũitonya kũtheea: ethĩwa ĩlumaita yĩ vamwe naitũ, nĩvo tũũtheea; nũndũ tũitonya kwona ũthyũ wa ũla mũndũ, ate o ĩlumaita yĩ vamwe naitũ. 27Na mũthũkũmi waku, asa wakwa, atwĩa, Nĩmwĩsĩ kana mũka wakwa nĩwanzyaĩe ana elĩ: #Mwa 46.19. 28na ũmwe wauma kwakwa, na nasya, Nĩ w’o atilangĩtwe ilungu; o na kuma ĩvinda yĩu ndyaamwona: #Mwa 37.33. 29na ethĩwa ũsu nake mũkamumya kwakwa, na ũthũku ũkamũkwata, mũkatheesya mbuĩ syakwa Seoli na woo. #Mwa 42.36,38. 30Na yu ĩndĩ navika kwa mũthũkũmi waku, ĩthe wakwa, na kĩmwana kĩte vamwe naitũ; nĩkwĩthĩwa thayũ wake nĩwovanĩte na thayũ wa kĩmwana; 31kũkeethĩwa, oona kana kĩmwana kĩti vamwe naitũ, akakw’a: na athũkũmi maku makatheesya mbuĩ sya mũthũkũmi waku, asa waitũ, Seoli na woo. 32Nũndũ mũthũkũmi waku nĩwetwie mũĩkĩĩwa kwa ĩthe wakwa kwondũ wa kĩmwana, ngĩmwĩa, Ethĩwa ndimũete kwaku, nĩvo nĩĩthĩwa nĩvĩtanĩsye nau tene na tene. #Mwa 43.9. 33Na yu ĩndĩ, nĩngũkwĩsũva, eka mũthũkũmi waku ekale ngombo kwa mwĩaĩi wakwa vandũ va kĩmwana; na eka kĩmwana kyambate vamwe na ana‐a‐ĩthe makyo. 34Nũndũ ngatonya ata kwambata kwa ĩthe wakwa, ethĩwa kĩmwana kĩti vamwe nakwa? Ndikese kwona ũthũku ũla wĩmũkwata asa wakwa.
Currently Selected:
MWAMBĨLĨLYO 44: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
