MWAMBĨLĨLYO 48
48
Yakovo aiathima Evalaimu na Manase
1Na kweethĩwa ĩtina wa maũndũ asu, mũndũ ũmwe amwĩa Yosevu, Sisya, au nĩ mũwau: nake aenda na ana make elĩ, Manase na Evalaimu. 2Na ũmwe atavya Yakovo, na asya, Sisya, mwana waku Yosevu nũnũũkũkĩa: na Isilaeli eevandĩĩa, ekala ĩũlũ wa ũkomo. 3Na Yakovo amwĩa Yosevu, Ngai Mwene Vinya W’onthe anumĩlĩle Lusu nthĩ ya Kanaani, na angathima, #Mwa 28.13,19. 4na ambĩa, Sisya, ngakwongela, na ngakwingĩvya, na ngakũtw’ĩkĩthya nguthu ya mbaĩ, na nthĩ ĩno nganenga ũsyao waku ĩtina waku yĩthĩwe ng’ũndũ tene na tene. #Mwa 35.11,12. 5Na yu ĩndĩ ana maku elĩ, ala wasyaĩwe nthĩ ya Misili ndanoka kwaku Misili, nĩ makwa; Evalaimu na Manase, makeethĩwa makwa, o ta Leuveni na Simeoni. #Mwa 46.20; Yos 14.4. 6Na ũsyao waku, ũla ũkasyaa ĩtina wa aa, ũkeethĩwa waku; makeetawa kũatĩĩa syĩtwa ya ana‐a‐ĩthe moo ũtiĩwanĩ woo. 7Nakwa, yĩla naumĩte Vatani, nakw’ĩĩwe nĩ Lakeli nzĩanĩ nthĩ ya Kanaani, yĩla vatiele o mũendo nĩvike Evilathi: na namũthikie vo nzĩanĩ ya Evilathi (nĩyo Mbethi‐leemu). #Mwa 35.16–19.
8Na Isilaeli oona ana ma Yosevu, na akũlya, Aa naaũ? 9Na Yosevu amwĩa ĩthe, Aa nĩ ana makwa, ala Ngai wanengee kũũ. Na amwĩa, Nĩngũkwĩsũva, maete vaa nĩĩ, nakwa nĩngũmaathima. #Mwa 33.5. 10Na ĩndĩ metho ma Isilaeli maĩ mbindu nũndũ wa kũkũa, ũndũ ũtatonya kwona. Na amathengeesya kwake, na amamumunya, na amevĩtĩĩsya. 11Na Isilaeli amwĩa Yosevu, Ndyaatalĩlya kwona ũthyũ waku: na, sisya, Ngai nũnengete kwona ũsyao waku naw’o. #Mwa 45.26. 12Na Yosevu amaumya katĩ wa mau make; na eekunamya ũthyũ wake welekele nthĩ. 13Na Yosevu amatwaa me elĩ, Evalaimu kw’okonĩ kwake kwa aũme elekele kw’oko kwa aka kwa Isilaeli, na Manase kw’okonĩ kwake kwa aka elekele kw’oko kwa aũme kwa Isilaeli, amathengeesya vala ũĩ. 14Na Isilaeli atambũũkya kw’oko kwake kwa aũme, ailĩĩla mũtwenĩ wa Evalaimu, ũla waĩ mũnini, na kw’oko kwake kwa aka ailĩĩla mũtwenĩ wa Manase, aivĩtan’ya moko make kwa kũmanya; nũndũ Manase aĩ ĩkithathi. 15Na amũathima Yosevu, na asya, Ngai ũla aasa makwa Avalaamu na Isaka maendaa mbee wake, Ngai ũla wandĩthisye thayũ wakwa w’onthe kũvika mũnthĩ ũũ, #Mwa 17.1; 24.40. 16mũlaĩka ũla wambovoisye kuma ũthũkunĩ w’onthe, aathime imwana; na syĩtwa yakwa yĩtanĩaw’e nasyo, na syĩtwa ya aasa makwa Avalaamu na Isaka; nao nĩmeane methĩwe nguthu katĩ wa nthĩ. #2 Sam 4.9; Isa 63.9. 17Na Yosevu oona kana ĩthe wake ailĩĩla kw’oko kwake kwa aũme mũtwenĩ wa Evalaimu, ndaendeew’a: na ookĩlya kw’oko kwa ĩthe, nĩ kana akumye mũtwenĩ wa Evalaimu, ailĩĩle mũtwenĩ wa Manase. #Mwa 48.14. 18Na Yosevu amwĩa ĩthe, Ti w’o, nau; nũndũ ũũ nĩwe ĩkithathi; ilĩĩla kw’oko kwaku kwa aũme mũtwenĩ wake. 19Na ĩthe alea, na amwĩa, Nĩnĩsĩ, mwana wakwa, nĩnĩsĩ; nake we akatw’ĩka mbaĩ, nake we akeethĩwa mũnene: ĩndĩ nĩ w’o mũinae akeethĩwa mũnene kwĩ we, na ũsyao wake ũkatw’ĩka mbaĩ mbingĩ mũno. #Mot 2.19,21; Kũt 33.17. 20Na mũthenya ũsu amaathima, akyasya, Kwaku nthĩnĩ waku Isilaeli makaathimaa, makyasya, Ngai namũtw’ĩkĩthye ta Evalaimu na ta Manase: na amwia Evalaimu mbee wa Manase. #Lu 4.11,12. 21Na Isilaeli amwĩa Yosevu, Sisya, nĩngũkw’a: ĩndĩ Ngai akeethĩwa vamwe nenyu, na akamũtũnga ĩngĩ nthĩ ya aaĩthe menyu. #Mwa 46.4. 22Nakwa nĩnakũnenga kĩlungu kĩmwe mbee wa ana‐a‐au, kĩla naumisye kw’okonĩ kwa Mũamoli na ũvyũ wakwa na ũta wakwa. #Yos 24.32.
Currently Selected:
MWAMBĨLĨLYO 48: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
