MATHAYO 26
26
Kũsaman’ya kũmũaa Yesũ
(MALIKO 14.1–2; Luka 22.1–2; YOANA 11.45–53)
1 #
Mt 7.28; 11.1; 13.53; 19.1. Na kweethĩwa, Yesũ amina ndeto isu syonthe, amea amanyĩw’a make, 2#Mt 20.18.Nĩmwĩsĩ kana ĩtina wa mĩthenya ĩlĩ kũkeethĩwa vasaka, na Mwana wa mũndũ akanenganwe nĩ kana ambwe ngelan’yonĩ. 3Nĩvo athembi anene, na atumĩa ma andũ, mombanĩte nza ya nyũmba ya mũthembi mũnene wetawa Kaiava: 4nao masaman’ya nĩ kana mamũkwate Yesũ na ũseleke, na kũmũaa. 5Ĩndĩ masya, Ti ĩvinda ya mboka, kũikese kũkĩla kĩtuu andũnĩ.
Yesũ akyĩtĩkĩw’a mauta Vethania
(MALIKO 14.3–9; YOANA 12.1–8)
6Na yĩla Yesũ waĩ Vethania, nyũmbanĩ ya Simoni ũla ũwaĩte mangũ, 7mũndũ mũka athi vala ũĩ e na sũva wa mauta, me vata mũnene mũno, nake amwĩtĩkĩsya mũtwenĩ wake, ailyĩ lĩunĩ. 8Ĩndĩ amanyĩw’a moona ũu, maĩ na ũthatu, makyasya, Wanango ũũ nĩ wa kĩ? 9Nũndũ mauta aa meĩ matonya kũtewa mbesa mbingĩ, ikanengwa ngya. 10#Lk 11.7.Ĩndĩ Yesũ eew’a ũu amea, Nĩkĩ mũũthĩn’ya mũndũ mũka? Nũndũ ambĩka wĩa mũseo. 11#Kũt 15.11.Nĩkwĩthĩwa ngya mwĩ nasyo mavinda onthe; ĩndĩ nyie mũi nakwa mavinda onthe. 12Nũndũ akĩmbĩtĩkĩsya mauta aa mwĩĩnĩ wakwa, eeka ũu kũnzeũvya ũndũ wa kũthikwa kwakwa. 13Nĩ w’o nĩngũmwĩa, O kũla kũkatavanw’a ũvoo ũũ mũseo nthĩ yonthe, ũndũ ũũ naw’o weekwa nĩ mũndũ mũka ũũ ũkawetwa wĩthĩwe wa kũmũlilikana we.
Yesũ aivũnyanĩwa nĩ Yutasi
(MALIKO 14.10–11; Luka 22.3–6)
14Na ĩvinda yĩu ũmwe wa ala ĩkũmi na elĩ, ũla wetawa Yutasi Isikalioti, athi kwa athembi anene, 15#Yoa 11.57; Nzek 11.12.na amakũlya, Mwĩenda kũnenga kyaũ, nakwa ngamũnengane kwenyu? Na mamũthimĩa ilungu mĩongo ĩtatũ sya vetha. 16#1 Tim 6.9,10.Na kuma ĩvinda yĩu amantha mwanya wa kũmũnengane kwoo.
Mboka ya vasaka ya mũminũkĩlyo
(MALIKO 14.12–26; Luka 22.7–23; YOANA 13.21–30; 1 AKOLINTHO 11.23–25)
17 #
Kuma 12.18–20. Na mũthenya wa mbee wa kĩmũtũ kĩte ĩlawa, amanyĩw’a mooka vala ve Yesũ, makyasya, Wĩenda tũkaũseũvĩsye va, ũye vasaka? 18#Mt 21.3.Na asya, Endai ndũanĩ kwa mũndũ mũna, mũkamwĩe, Mũmanyĩsya asya, Ĩvinda yakwa nĩyĩthengeee; ngaya vasaka nyũmbanĩ kwaku vamwe na amanyĩw’a makwa. 19Na amanyĩw’a meeka ũndũ Yesũ wameaĩe; na maseũvya vasaka.
20Na ĩndĩ kwavika wĩoo, ailyĩ lĩunĩ vamwe na ala ĩkũmi na elĩ; 21na makĩya, asya, Nĩ w’o nĩngũmwĩa, kana ũmwe wenyu akambũnyanĩa. 22Nao meew’a woo mũno, na mambĩlĩlya kũmũkũlya ũmwe na ũmwe, Mwĩaĩi, ninyie? 23Na asũngĩa, asya, Ũla wekĩanĩa kw’oko ĩsaaninĩ vamwe nakwa, nĩwe wĩmbũnyanĩa. 24Mwana wa mũndũ ethi o ũndũ waandĩkĩwe: ĩndĩ woo nĩ wa mũndũ ũsu ũla wĩmũvũnyanĩa Mwana wa mũndũ! Wĩthĩwa wĩ ũseo kwa mũndũ ũsu kethĩwa ndaasyawa. 25Na Yutasi, ũla wĩmũvũnyanĩa, asũngĩa na asya, Lavai, ninyie? Amwĩa, We nĩwaneena.
26 #
Mt 14.19; 1 Ako 11.23–25. Na makĩya, Yesũ oosa kĩmũtũ, akĩathima, na akĩtilanga; na anenga amanyĩw’a, na asya, Osai, mũye; kĩĩ nĩkyo mwĩĩ wakwa. 27Na oosa kĩkombe, na atũnga mũvea, na amanenga, akyasya, Nyw’ai inyw’onthe; 28#Yel 31.31; Nzek 9.11.nũndũ ĩno nĩyo nthakame yakwa ya ũtianĩo, ĩla ĩĩtĩkwa kwondũ wa aingĩ kwa ũekeo wa naĩ. 29Ĩndĩ nĩngũmwĩa, Kuma yu ndikanyw’a ya ũsyao ũũ wa mũsavivũ, mũvaka mũthenya ũla ngamĩnyw’a yĩ nzaũ vamwe nenyu ũsumbĩnĩ wa Asa wakwa.
30 #
Lk 22.39; Yoa 18.1. Na mamina kwina, maumaala nza mathi kĩĩmanĩ kya Mĩthata.
Yesũ akyathana kũlulutĩka kwa amanyĩw’a
(MALIKO 14.27–31; Luka 22.31–34; YOANA 13.36–38)
31 #
Nzek 13.7; Yoa 16.32. Nĩvo Yesũ wameie, Ũtukũ ũũ inyw’onthe nĩmũũlulutĩkw’a nũndũ wakwa: nũndũ nĩkũandĩkĩtwe, Ngakũna mũĩthi, na malondu ma ĩĩthya makanyaĩĩkw’a kũũ na kũũ. 32#Mt 28.7.Ĩndĩ ĩtina wa kũthayũũkw’a kwakwa, ngaenda mbee wenyu kũvika Kalilii. 33Ĩndĩ Vetelo asũngĩa, amwĩa, Ethĩwa onthe makalulutĩkw’a nũndũ waku, nyie ndilulutĩkw’a nongi. 34#Yoa 13.38.Yesũ amwĩa, Nĩ w’o nĩngũkwĩa, kana ũtukũ ũũ mbee wa nzamba ĩtanasya, ũkangaĩa katatũ. 35#Mt 26.56.Vetelo amwĩa, O na ethĩwa no mũvaka nĩkw’e naku, ndikakũkaĩa. Na amanyĩw’a onthe masya o ta ũu.
Yesũ e Ngesemanii
(MALIKO 14.32–42; Luka 22.39–46)
36Na ĩndĩ Yesũ athi nao kũvika vandũ vetawa Ngesemanii, na amea amanyĩw’a make, Ĩkalai vaa, ĩvinda yĩla ngũthi vaya kũvoya. 37#Aevl 5.7.Na athi e na Vetelo na ana elĩ ma Sevetii, na ambĩlĩlya kũmaka na kũũũya mũno. 38#Sav 43.5; Yoa 12.27.Nĩvo ĩndĩ wameie, Ngoo yakwa nĩkũũũya mũno, o na kũvika kĩkw’ũ: ĩkalai vaa, mũsyaĩĩsye vamwe nakwa. 39#Yoa 18.11; Aevl 5.8.Nake aendanga mbee vanini, na avalũka na ũthyũ wake, na avoya, akyasya, Asa wakwa, ethĩwa ũũ nũtonyeka, kĩkombe kĩĩ nĩkĩnthonoke: ĩndĩ ti ũndũ ngwenda nyie, ĩndĩ ũndũ ũkwenda we. 40Na athi vala ve amanyĩw’a make, na amethĩa makomete, na amwĩa Vetelo, Nĩkĩ, mũinatonya kũsyaĩĩsya vamwe nakwa o na saa ũmwe? 41#Aevl 2.14; 4.15.Syaĩĩsyai na voyai, nĩ kana mũikalike ũtatwanĩ: veva nĩw’o ũkwenda, ĩndĩ mwĩĩ ndwĩ na vinya. 42Na ĩngĩ athi ĩvinda ya kelĩ, na avoya, akyasya, Asa wakwa, ethĩwa kĩkombe kĩĩ kĩitonya kũnthonoka ndanyw’ĩte, kwenda kwaku kwĩkwe. 43Na athi ĩngĩ na amethĩa makomete, nũndũ metho moo maĩ na too. 44#2 Ako 12.8.Na amatia ĩngĩ, na athi, na avoya ya katatũ, aiasya o ĩla ndeto. 45Na ĩndĩ athi vala ve ala amanyĩw’a, na amea, Komai yu, mũthũmũe: sisyai, saa nũthengeee, na Mwana wa mũndũ nũnũũnenganwe mokonĩ ma andũ athe. 46#Yoa 14.31.Ũkĩlai, tũthi: sisyai, nũthengeee ũla ũnũũmbũnyanĩa.
Kũkwatwa kwa Yesũ
(MALIKO 14.43–50; Luka 22.47–53; YOANA 18.2–11)
47Na akĩneena, sisya, Yutasi, ũmwe wa ala ĩkũmi na elĩ, ooka, na vamwe nake nguthu nene yĩ na mbyũ na mathimbũ, yumĩte kwa athembi anene na atumĩa ma andũ. 48Na ũla ũmũvũnyanĩe amanengete wonan’yo, akyasya, O ũla nĩmũmumunya nĩwe ũsu: mũkwatei. 49Na oyu ooka vala ve Yesũ, asya, Nũvoo, Lavai; na amũmumunya. 50Na Yesũ amwĩa, Mũnyanyawa, ĩka ũndũ wakũete. Na ĩndĩ mooka matambũũkya moko, mamũkwata Yesũ. 51Na sisya, ũmwe wa ala maĩ vamwe na Yesũ atambũũkya kw’oko kwake, akũa ũvyũ wake, na amĩtema ngombo ya mũthembi mũnene, amĩtila kũtũ. 52#Mwa 9.6; Ũvu 13.10.Na ĩndĩ Yesũ amwĩa, Tũngĩa ũvyũ waku vandũ vaw’o: nũndũ onthe ala makwataa ũvyũ makaanangwa na ũvyũ. 53#Yoe 2.11.Kana wĩasya nditonya kũmwĩsũva Asa wakwa, nake aindetee oyu nguthu sya alaĩka mbee wa ĩkũmi na ilĩ? 54Ĩndĩ maandĩko ma atĩ nĩ mũvaka ũũ wĩthĩwe, makeanĩw’a ata? 55Saa ũsu Yesũ amĩtavya nguthu, Nĩmwaumĩla tondũ mũvutani wumĩlĩlawa mwĩ na mbyũ na mathimbũ nĩ kana mũngwate? Kĩla mũthenya nekalaa ĩkalũnĩ ngĩmanyĩsya, na mũtyaangwata. 56#Mt 26.31.Ĩndĩ ũũ w’onthe ũtw’ikĩte, nĩ kana maandĩko ma athani meanĩw’e. Nĩvo ĩndĩ amanyĩw’a onthe mamũtiie, makĩa.
Kũsilĩthw’a kwa Yesũ mbee wa mũthembi mũnene
(MALIKO 14.53–65; Luka 22.54–55,63–71; YOANA 18.12–14,19–24)
57Na ala mamũkwatie Yesũ mamũtwaa kwa Kaiava mũthembi mũnene, vala aandĩki na atumĩa moombanĩte. 58Ĩndĩ Vetelo amũatĩĩa e kũasa, kũvika nza kwa mũthembi mũnene, na avota nthĩnĩ, na ekala nthĩ vamwe na makanga, one mũminũkĩlyo. 59Na ĩndĩ athembi anene na nzama yonthe mamũmanthĩa Yesũ ũkũsĩ wa ũvũngũ, nĩ kana mamũae; 60na maiaawona, o na kau kwaumĩlile ngũsĩ nyingĩ sya ũvũngũ. Ĩndĩ ĩtina kwooka ilĩ, 61#Yoa 2.19–21.na syasya, Mũndũ ũũ aisye, Nyie nĩndonya kwananga ĩkalũ ya Ngai, na ngĩyaka na matukũ atatũ. 62Na mũthembi mũnene aũngama, na amwĩa, Ndũsũngĩa ũndũ? Aa makũkũsĩĩa ata? 63#Mt 27.12.Ĩndĩ Yesũ avindya. Na ũla mũthembi mũnene amwĩa, Nĩngũkwĩavĩthya kwa Ngai ũla wĩ thayũ, ũtũtavye kana nue Klĩsto, Mwana wa Ngai. 64#Sav 110.1; Mt 16.27; 24.30; Nda 7.13.Yesũ amwĩa, We nĩwaneena: ĩndĩ nĩngũmwĩa, Kuma yu mũkamwona Mwana wa mũndũ ailyĩ ngalĩ ya kw’oko kwa aũme kwa Vinya, na akyũka e ĩũlũ wa mathweo ma ĩtu. 65#Mt 9.3; Yoa 10.33.Na yu mũthembi mũnene atembũa ngũa syake, akyasya, Nĩwaumana: twĩ na vata ũngĩ mwaũ wa ngũsĩ? Sisyai, yu nĩmweew’a kũumana kwake: 66#Yoa 19.7; Ali 24.16.mwĩona ata? Masũngĩa, masya, Aĩlwe nĩ kĩkw’ũ. 67#Isa 50.6.Na ĩndĩ mamũtw’ĩla mata ũthyũ, na mamũlumangya na ngundi: na amwe mamũmandũla, 68makyasya, Twathanĩe, we Klĩsto, nũũ ũla wakũkũna?
Vetelo aimũkaĩa Yesũ
(MALIKO 14.66–72; Luka 22.56–62; YOANA 18.15–18,25–27)
69Na Vetelo ailyĩ nza ku ũtee: na mwĩĩtu mũthũkũmi ooka vala ũĩ, akyasya, We naku ũnaĩ vamwe na Yesũ Mũkalilii. 70Ĩndĩ akaĩa mbee wa onthe, akyasya, Ndyĩsĩ ũndũ ũkwasya. 71Nake aumaala valasyanĩ, mwĩĩtu ũngĩ amwona, na amea ala maĩ vo, Mũndũ ũũ nake anaĩ vamwe na Yesũ wa Nasaleti. 72Na akaĩa ĩngĩ na wĩvĩto, Ndimwĩsĩ mũndũ ũsu. 73Na ĩtina vandũ vanini, ala maũngeme vakuvĩ, mathi na mamwĩa Vetelo, Nĩ w’o we wĩ ũmwe woo; nũndũ kĩthyomo kyaku nĩkĩũkumbũla. 74Na ĩndĩ ambĩlĩlya kũumana na kwĩvĩta, akyasya, Nyie ndimwĩsĩ mũndũ ũsu. Na oyu nzamba yasya. 75#Mt 26.34.Na Vetelo alilikana ndeto ĩla ĩnaneeniwe nĩ Yesũ, Nzamba ĩtanamba kwasya, ũkangaĩa katatũ. Nake aumaala, na aĩa kĩĩo kĩ woo.
Currently Selected:
MATHAYO 26: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
