Kũt 1
1
Ndeto Sya Mbee
1Ii nĩsyo ndeto ila Mwose waneenie na andũ onthe ma Ĩsilaeli me weũnĩ ũla wĩ ngalĩko ya wumĩlonĩ wa syũa ya Ũsĩ wa Yolotani. Ĩvindanĩ yĩu maĩ Mwandanĩ wa Yolotani vakuvĩ na ndũa ya Suvu ĩla yĩ katĩ wa ndũa ya Valani ngalĩkonĩ ĩmwe, na ndũa sya Toveli, Lavani, Aaselothi na Ndi-saavu ila syĩ ngalĩkonĩ ĩla ĩngĩ. 2(Kuma Kĩĩmanĩ kya Sinaĩ kũthi kũvika ndũanĩ ya Katesi-mbalinea, mũndũ esĩlĩte nzĩa ĩla yĩsĩlĩte Kĩĩmanĩ kya Seili, nĩ mũendo wa mĩthenya ĩkũmi na ũmwe.) 3Mũthenyanĩ wa mbee wa mwei wa ĩkũmi na ũmwe wa mwaka wa mĩongo ĩna ĩtina wa andũ ma Ĩsilaeli kuma Misili, Mwose nĩwatavisye andũ ma Ĩsilaeli maũndũ onthe ala Mwĩai Ngai wamwĩaĩe amatavye. 4#Mot 21.21-35 Mwose eekie ũu ĩtina wa Mwĩai Ngai#1.4 Mwĩai Ngai: Kana Mwose kũsinda Mũsumbĩ Sioni wa Aamoli ũla wasumbĩkĩte e ndũanĩ ya Esivoni, na Mũsumbĩ Oku wa nthĩ ya Mbasani ũla wasumbĩkĩte e ndũanĩ ya Asitalothi, na ya Etilei. 5Mwose aeleisye andũ ma Ĩsilaeli mĩao ya Mwĩai Ngai ĩvindanĩ yĩla maĩ nthĩ ya Moavi ngalĩko ya wumĩlonĩ wa syũa ya Ũsĩ wa Yolotani.
Nĩwameie atĩĩ, 6“Yĩla twaĩ Kĩĩmanĩ kya Sinaĩ, Mwĩai Ngai, Ngai waitũ nĩwaneenie naitũ atwĩa, ‘Ĩvinda yĩla mwĩkalĩte vaa kĩĩmanĩ nĩ yĩanu. 7Ambũai maeema na mũyambĩĩa kyalo mwelekele nthĩ yĩ iĩma ya Aamoli. O ta ũu endai isionĩ sya mbaĩ ila ingĩ ithyũlũlũkĩte nthĩ ĩsu, ila nĩ Mwanda wa Yolotani, nthĩ yĩ iĩma, nthĩ ndindimalu, ngalĩko ya ĩtheo ĩla yĩtawa Nengevu, na kĩsionĩ kĩla kĩ ũtee wa Ũkanga wa Menditelenia. Endai nthĩ ya Akanaani na mũivĩtũka mũthi iĩmanĩ sya Levanoni kũthi kũvika Ũsĩnĩ mũnene wa Euvalati. 8Nĩnĩmũnengete nthĩ ĩsu na kwoou endai mũkalike na kũtũa vo. Ĩsu nĩyo nthĩ ĩla nathie kũnenga aaũmae menyu Avalaamu, Isaka na Yakovo, na nzyawa syoo.’
Mwose Ainyuva Asili
(Kuma 18.13-27)
9“Ĩvindanĩ yĩla twaĩ Kĩĩmanĩ kya Sinaĩ, nĩnaneenie nenyu namwĩa atĩĩ, ‘Wĩa wa kũmũtongoesya nĩ mwingĩ mũno kwakwa, na ndiũtonya nĩ nyioka. 10Mwĩai Ngai, Ngai wenyu nũtumĩte mwĩthĩwa mwĩ aingĩ ta ndata sya ĩtunĩ. 11Mwĩai Ngai, Ngai wa aaũmae menyu, nĩatume mwingĩva kũndũ ngili mbee wa ũndũ mwĩana na aimũathima o tondũ wamwathie! 12Ĩndĩ ndonya ata nĩ nyioka kũkua mũio wa kũmũsilany'a? 13Nyuvai kuma kĩla mbaĩnĩ ya andũ ma Ĩsilaeli andũ oĩ, me na ũmanyi, na manengetwe ndaĩa nĩ andũ, nakwa nĩngũmanenga wĩa wa kũmũtongoesya. 14Nĩmweetĩkĩlile kana ũsu nĩ ũndũ mũseo wa kwĩka.’ 15Kwoou nĩnoosie atongoi asu mwanyuvie kuma mbaĩnĩ syenyu; andũ oĩ, na manengetwe ndaĩa nĩ andũ na namanenga wĩa wa kũmũtongoesya. Amwe moo matongoesye andũ ngili, angĩ andũ ĩana, angĩ andũ mĩongo ĩtano, na angĩ andũ ĩkũmi. O ta ũu nĩnanyuvie anene angĩ kuma mbaĩnĩ syenyu syonthe.
16“Ĩvindanĩ yĩu nĩneeaĩie asili asu namea atĩĩ, ‘Ĩthukĩĩasyei makoani ala andũ ma Ĩsilaeli mamũetee, na mũimaumĩsya sila wa katĩ. O ta ũu umasyai sila wa katĩ yĩla mũũsilany'a mũndũ wa Ĩsilaeli na mũeni ũla ũtwĩe katĩ wenyu. 17Mũikendeeasye mũndũ o na wĩva yĩla mũũtw'a sila; ĩthukĩĩasyei andũ ala anini na andũ ala anene ũndũ ũmwe. Mũikakĩe mũndũ o na wĩva, nĩkwĩthĩwa ũtw'ĩo ũla mũũnengane wumĩte kwa Ngai. Ethĩwa ve makoani mũtatonya kũtw'a ndeteaei, nakwa nganenganae ũtw'ĩo.’ 18Ĩvindanĩ o yĩu nĩnamwĩaĩie maũndũ onthe ala mwaĩlĩte kwĩka.
Mwose Aitũma Andũ kwa Kĩmbithĩ kuma Katesi-mbalinea
(Mot 13.1-33)
19“Nĩvo ĩndĩ o tondũ Mwĩai Ngai, Ngai waitũ watwĩaĩe twambĩĩie kyalo kuma Kĩĩmanĩ kya Sinaĩ, na twathi twelekele nthĩ yĩ iĩma ya Aamoli twĩsĩlĩte weũnĩ mũnene na wĩ w'ĩa mũno ũla mwoonie, na twathi kũvika Katesi-mbalinea. 20Nĩnamwĩie atĩĩ, ‘Yu nĩmwavika nthĩ yĩ iĩma ya Aamoli, ĩla Mwĩai Ngai, Ngai waitũ ũtũnengete. 21Mwĩai Ngai, Ngai wenyu nũmũnengete nthĩ ĩsu. Ambatai mũmyose na kũtũa vo o tondũ Mwĩai Ngai, Ngai wa aaũmae menyu wamwĩie. Mũikakĩe o na mũikakw'e ngoo.’
22“Ĩndĩ inyw'onthe nĩmwookie kũla nĩĩ na mwaneena mwambĩa atĩĩ, ‘Nĩtũtũmei andũ mathi mbee waitũ kwa kĩmbithĩ makamanye ũndũ andũ ma nthĩ ya Kanaani matũaa, nĩ kana masyoka matũtavye nzĩa ĩla nzeo ya kũatĩĩa tũendete kũu, na ũndũ ndũa ila syĩ kũu iilyĩ.’
23“Nĩnoonie ũndũ ũsu wĩ mũseo, na kwoou nanyuva andũ ĩkũmi na elĩ, ũmwe kuma kĩla mbaĩnĩ. 24Nĩmambĩĩie kyalo mambata nthĩ yĩ iĩma kũthi kũvika Mwandanĩ wa Esikoli na mamanya kwa kĩmbithĩ ũndũ nthĩ ĩsu ĩilyĩ. 25Nĩmatũeteie matunda ala meethĩie kũu, na matwĩa kana nthĩ ĩsu Mwĩai Ngai ũkũtũnenga nĩ nou mũno.
26 #
Kũt 9.23; Aevl 3.16 “Ĩndĩ nĩmwaleile kwĩanĩsya mwĩao wa Mwĩai Ngai, Ngai waitũ, yĩla mwaleile kũlika nthĩ ĩsu. 27Nĩmwanyungunyĩisye ene kwa ene mwĩ maeemanĩ menyu mũyasya atĩĩ, ‘Mwĩai Ngai nũtũmenete, na nĩkyo kyatumie atumya nthĩ ya Misili nĩ kana atũnengane kwa Aamoli matũae. 28Yu twĩthi va? Andũ ala tũnatũmie nĩmatumĩte tũkwatwa nĩ w'ĩa mwingĩ mũno. Masyoka matwĩie andũ ala matwĩe kũu me vinya, na nĩ aasa kwĩ ithyĩ, na mekalaa ndũanĩ mbiĩĩe na ngũta ndũlu ikavika matunĩ. Ũu wĩ o vo nĩmonie ala andũ anene mũno, ala nĩ nzyawa sya Anaki!’
29“Ĩndĩ nĩnamwĩie atĩĩ, ‘Mũikakĩe andũ asu. 30Mwĩai Ngai, Ngai wenyu nũkũmũtongoesya na kũmũkitĩa, o tondũ mwoonie eeka mwĩ nthĩ ya Misili, 31#Meko 13.18 na mwĩ weũnĩ. Nĩmwoonie ũndũ wamũetie mwĩ ũsũvĩonĩ kũka kũvika kũũ, o tondũ mwana ũsũvĩawa nĩ ĩthe.’ 32#Aevl 3.19 Ĩndĩ o na kau nĩnamũtavisye maũndũ asu onthe, mũyaaĩkĩĩa Mwĩai Ngai, Ngai wenyu 33ũla wamũtongoeisye kyalonĩ kyenyu e nthĩnĩ wa kĩtuĩ kya mwaki ũtukũ, na mũthenya e nthĩnĩ wa kĩtuĩ kya mũumbĩ. Eekie ũu nĩ kana amũmanthĩe kũndũ mwambe maeema, na aimwony'a nzĩa ĩla mwaĩlĩte kũatĩĩa.
Mwĩai Ngai Aikany'a Andũ ma Ĩsilaeli
(Mot 14.20-45)
34 #
Aevl 3.18
“Mwĩai Ngai nĩweewie kũnyungunyĩsya kwenyu na athata, na kwoou nĩweevĩtie asya atĩĩ, 35‘Vai ũmwe wenyu kuma nzyawanĩ ĩno ya andũ avuku ũkekala thayũ nginya ese kũlika nthĩ ĩsu nou ĩla neevĩtie kũnenga aaũmae menyu. 36No Kalevu mwana wa Yevune ũkalika nthĩ ĩsu, nũndũ nĩwĩkalĩte e mũĩkĩĩku kwakwa, na ngamũnenga vamwe na nzyawa syake nthĩ ĩsu waendie kũmanya ũndũ ĩilyĩ.’ 37Nĩmwatumie Mwĩai Ngai anthatĩa na asya atĩĩ, ‘O naku we Mwose ndũkalika nthĩ ĩsu. 38Ĩndĩ mũtetheesya waku Yosua mwana wa Nuni akalika nthĩ ĩsu. Mwĩkĩe vinya, nũndũ nĩwe wĩtongoesya andũ ma Ĩsilaeli makalike na kũtũa nthĩ ĩsu ya Kanaani yĩthĩwe ũtiĩwa woo.’
39“Nĩvo ĩndĩ Mwĩai Ngai waneenie naitũ ithyonthe atwĩa, ‘Syana syenyu, ila nĩ nini ũkethĩa iitonya kũmanya ũseo na ũthũku ikalika nthĩ ya Kanaani. Nganenga syana isu mwaasya kana ikakwatwa itw'ĩkĩthw'e ngombo nĩ amaitha menyu nthĩ ĩsu itũe vo. 40Ĩndĩ inyw'ĩ vĩndũkai na mũisyoka weũnĩ mwĩsĩlĩte nzĩanĩ ĩla yelekele Ũkanganĩ Mũtune.’
41“Nĩvo ĩndĩ mwasũngĩie mwasya atĩĩ, ‘Nĩtũmũvĩtĩsye Mwĩai Ngai. Nĩtũkwambata tũkokite o tondũ Mwĩai Ngai, Ngai waitũ watwĩaĩie.’ Kwoou kĩla ũmwe wenyu nĩwoosie mĩio yake ya kaũ aisũanĩa kana kwambata nthĩ yĩ iĩma nĩ ũndũ wĩ laisi.
42“Ĩndĩ Mwĩai Ngai nĩwambĩie atĩĩ, ‘Makany'e ũmee maikambate na kũkita, nĩkwĩthĩwa ndiĩthĩwa vamwe namo, na amaitha moo nĩmeũmasinda.’ 43Nĩnamũtavisye ũndũ Mwĩai Ngai wambĩie, ĩndĩ nĩmwaleile kwĩthukĩĩsya. Nĩmwamũng'endeie, na nũndũ wa ngathĩĩo syenyu mwambata nthĩ yĩ iĩma. 44Nĩvo Aamoli ala matwĩe nthĩ ĩsu mookie mokite nenyu, na mamũsembethya o tondũ kĩthuĩ kya nzũkĩ kĩsembethasya andũ. Mamũsembethisye nginya nthĩ yĩ iĩma ya Etomu na mamũsindĩa ndũanĩ ya Olima. 45Mwasyoka nĩmwaĩie mũimwĩkaĩla Mwĩai Ngai amũtetheesye, ĩndĩ ndaamwĩthukĩĩsya kana kwĩw'a kĩĩo kyenyu. 46Kwoou nĩmwekalile Katesi ĩvinda ĩasa.
Currently Selected:
Kũt 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011