Kũt 6
6
Mwĩao ũla Mũnene
1“Ĩno nĩyo mĩao, motw'ĩo na myamũlo ĩla Mwĩai Ngai, Ngai wenyu wambĩaĩe nĩmũmanyĩsye nĩ kana mũmĩatĩĩae yĩla mwĩ nthĩ ĩla mũkilĩlye kũinga Ũsĩ wa Yolotani mũlike na kũmĩmesya. 2Ĩvindanĩ yonthe yĩla mwĩ thayũ, inyw'ĩ na nzyawa syenyu no nginya mũnenge Mwĩai Ngai, Ngai wenyu ndaĩa. O ta ũu no nginya mũatĩĩe motw'ĩo na mĩao yake yonthe ĩla ngũmũnenga nĩ kana mwĩkale thayũ ĩvinda ĩasa mwĩ nthĩ ĩsu. 3Kwoou ĩndĩ inyw'ĩ andũ ma Ĩsilaeli, ĩthukĩĩsyei mĩao ĩsu na mũimĩatĩĩa! Mweeka ũu mũkaendeea nesa na kũtw'ĩka mbaĩ nene ya andũ. Mũkatũa nthĩ ĩsu nthwii na nou o tondũ Mwĩai Ngai, Ngai wa aaũmae maitũ wathanie.
4 #
Mk 12.29
“Inyw'ĩ andũ ma Ĩsilaeli ĩthukĩĩsyei! Mwĩai Ngai, Ngai waitũ nĩwe Mwĩai Ngai e weka. 5#Mat 22.37; Mk 12.30; Lk 10.27 Mwendei Mwĩai Ngai, Ngai wenyu na ngoo yenyu yonthe, na thayũ wenyu w'onthe na vinya wenyu w'onthe. 6#Kũt 11.18-20 Mĩao ĩno ngũmũnenga ũmũnthĩ mĩkalyei ngoonĩ syenyu. 7Mĩmanyĩasyei syana syenyu. Imanyĩasyei yĩla mwĩ mĩsyĩnĩ yenyu na yĩla mwĩ nzĩanĩ mũendete, yĩla mũthũmũĩte na yĩla mũũtethya wĩa. 8Oveeai mĩao ĩsu mokonĩ menyu na mothyũnĩ menyu nĩ kana yĩthĩwe ũlilikany'o kwenyu. 9Mĩandĩkei mbwaũnĩ ila syĩ ndeenĩ sya mĩomo ya nyũmba syenyu na sya mĩvĩa yenyu.
Andũ Maikanw'a Maikatw'ĩke Mbaa Matũ
10 #
Mwa 12.7; 26.3; 28.13 “O tondũ Mwĩai Ngai, Ngai wenyu wathie aaũmae menyu Avalaamu, Isaka na Yakovo, nũkũmũnenga nthĩ yĩna ndũa nene na nzeo ila inyw'ĩ mũtaaka. 11Nyũmba sya ndũa isu ĩkeethĩawa syusũĩte syĩndũ nzeo mũtaasyĩkĩa vo. O ta ũu nthĩ ĩsu ĩkeethĩwa na ithima mũtaaĩnza na mĩũnda ya mĩsavivũ na ya mĩthata mũtaavanda. Mwĩai Ngai amina kũmũtwaa nthĩ ĩsu, na kũkwata kyonthe kĩla mũkwenda kũya, 12ĩsũvĩei mũikese kũlwa nĩwe ũla wamumisye nthĩ ya Misili, kũla mwekalaa mwĩ ngombo. 13#Mat 4.10; Lk 4.8 Nengai Mwĩai Ngai, Ngai wenyu ndaĩa, mũthaithaei e weka na mũyĩvĩtaa na ĩsyĩtwa yake yĩ yoka. 14Mũikathaithe ngai ingĩ, ngai sya andũ ala mũtũanĩe namo. 15Mwathaitha ngai ingĩ, nĩmũũthatya Mwĩai Ngai, na woo wake ũimwakanĩa na kũmũmina vyũ, nũndũ Mwĩai Ngai, Ngai wenyu ũla ũtũaa katĩ nenyu ndetĩkĩla kũthaithanĩw'a na ngai ingĩ.
16 #
Kuma 17.1-7; Mat 4.7; Lk 4.12 “Mũikaatate Mwĩai Ngai, Ngai wenyu o tondũ mweekie yĩla mwaĩ kũya Masa. 17Kwatai na kĩthing'ĩĩsyo mĩao, mokũsĩ na motw'ĩo ma Mwĩai Ngai, Ngai wenyu, ala ũmũnengete. 18Ĩkai maũndũ ala Mwĩai Ngai wonaa me malũngalu na maseo, nenyu nĩmũkũendeea nesa. Mũkalika na kũmesya nthĩ nzeo ĩla Mwĩai Ngai wathie aaũmae menyu, 19na mũkalũngya amaitha menyu onthe o tondũ wathanie.
20“Ĩvindanĩ yũkĩte syana syenyu syamũkũlya atĩĩ, ‘Nĩkĩ Mwĩai Ngai, Ngai waitũ watũnengie mokũsĩ, motw'ĩo na myamũlo ĩno yonthe?’ 21Mwĩisũngĩa mũsyĩe atĩĩ, ‘Ithyĩ twaĩ ngombo sya mũsumbĩ wa nthĩ ya Misili, ĩndĩ Mwĩai Ngai atũtangĩĩa na vinya wake mũnene. 22Ithyĩ nĩtwoonie na metho maitũ Mwĩai Ngai ayĩka syama na maũndũ ma kũseng'ya, maũndũ manene na ma kũtelemya kũla kwĩ andũ ma Misili, mũsumbĩ woo, na anini make onthe. 23Ĩndĩ Mwĩai Ngai nĩwatumisye nthĩ ĩsu ya Misili nĩ kana atũete na kũtũnenga nthĩ ĩla wathie aaũmae maitũ kwa kwĩvĩta kana akatũnenga. 24Mwĩai Ngai, Ngai waitũ atwĩaĩe tũatĩĩae motw'ĩo asu onthe na kũmũnenga ndaĩa. Tweeka ũu akatũsũvĩaa na aituma tũendeea nesa. 25Mwĩai Ngai, Ngai waitũ akatũtala kwĩthĩwa twĩ ũlũngalu tweethĩwa twĩ aĩkĩĩku kũatĩĩa maũndũ onthe ala ũtwĩaĩĩte.’
Currently Selected:
Kũt 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011