Kũt 5
5
Mĩao Ĩkũmi
(Kuma 20.1-17)
1Mwose nĩweetie andũ onthe ma Ĩsilaeli mombanĩe vamwe na amea atĩĩ, “Inyw'ĩ andũ ma Ĩsilaeli, ĩthukĩĩsyei motw'ĩo na myamũlo ĩla nyie ngũmũtavya ũmũnthĩ. Ĩmanyĩsyei na mũiatĩĩa na kĩthito motw'ĩo na myamũlo ĩsu. 2Mwĩai Ngai, Ngai waitũ nĩwaseũvisye ũtianĩo naitũ Kĩĩmanĩ kya Sinaĩ. 3Ndaaseũvya ũtianĩo ũsu na aaũmae maitũ me oka, ĩndĩ aseũvisye ũtianĩo ũsu naitũ ithyĩ ala twĩ thayũ ũmũnthĩ. 4Vau kĩĩmanĩ Mwĩai Ngai nĩwaneenie nenyu mũmwene e mwakinĩ nthĩnĩ. 5Ĩvindanĩ yĩu nyie naũngamĩte katĩ wenyu na Mwĩai Ngai nĩ kana nĩmũtavye ũndũ ũkwasya, nũndũ nĩmwakĩaa ũla mwaki na mũyaĩ mũtonya kwambata kĩĩmanĩ. Mwĩai Ngai nĩwaneenie asya atĩĩ:
6“ ‘Ninyie Mwĩai Ngai, Ngai waku ũla wakumisye nthĩ ya Misili kũla wekalaa wĩ ngombo.
7“ ‘Ndũkethĩwe na ngai ingĩ ate o nyie.
8 #
Ali 26.1; Kũt 4.15-18; 27.15 “ ‘Ndũkeseũvĩsye mwene mũvw'anano wa kwasũvya, kana mũvw'ano wa kĩndũ o na kĩva kĩ ĩũlũ ĩtunĩ, kĩ kũũ nthĩ, kana kĩ kĩw'ũnĩ ungu wa nthĩ. 9#Kuma 34.6-7; Mot 14.18; Kũt 7.9-10 Ndũkathaithe mũvw'anano o na wĩva kana kũũthũkũma, nũndũ ninyie Mwĩai Ngai, Ngai waku na ndyĩtĩkĩla kũthaithanĩw'a na ngai ĩngĩ. Nĩnganasya ala matambendete na nzyawa syoo, o na kũthi kũvika nzyawa ya katatũ na ya kana. 10Ĩndĩ ala mambendete na mekaa ũndũ mĩao yakwa ĩkwasya, nĩnĩmonasya wendo kũthi kũvika nzyawa ngili mbingĩ.
11 #
Ali 19.12
“ ‘Ndũkawete ĩsyĩtwa yakwa mana nũndũ nyie Mwĩai Ngai ndikalea kũkany'a mũndũ ũla ũwetaa ĩsyĩtwa yakwa mana.
12 #
Kuma 16.23-30; 31.12-14 “ ‘Lilikana mũthenya wa Savato ũwĩkalye wĩ mũtheu, o tondũ nyie Mwĩai Ngai, Ngai waku nakwĩaĩie. 13#Kuma 23.12; 31.15; 34.21; 35.2; Ali 23.3 Wĩna mĩthenya thanthatũ ya kũtethya wĩa waku, 14ĩndĩ mũthenya wa mũonza nĩ mũthenya wa kũthũmũa ũvathĩtwe kwondũ wakwa nyie Mwĩai Ngai. Mũthenyanĩ ũsu, ndũkatethye wĩa o na ũmwe, we mwene, mwana waku, mwĩĩtu waku, mũthũkũmi waku wa mũndũ-ũme kana wa mũndũ mũka, ng'ombe yaku, ĩng'oi yaku, kana indo syaku o na syĩva, kana mũeni ũla wĩ kwaku. Athũkũmi maku no nginya mathũmũe o ũndũ we ũthũmũĩte. 15Ndũkolwe kana we waĩ ngombo nthĩ ya Misili nakwa nyie Mwĩai Ngai, Ngai waku nakumya nthĩ ĩsu na vinya na ũtonyi wakwa mũnene. Kĩu nĩkyo kĩtumi nyie Mwĩai Ngai, Ngai waku, nakwĩaĩe ũlilikanae mũthenya wa Savato.
16 #
Kũt 27.16; Mat 15.4; 19.19; Mk 7.10; 10.19; Lk 18.20; Aev 6.2,3 “ ‘Nenga ĩthe waku na inyia waku ndaĩa, ũndũ nyie Mwĩai Ngai, Ngai waku nĩkwĩaĩĩte, nĩ kana wĩkale thayũ ĩvinda ĩasa na kwona ũseo wĩ nthĩ ĩla nyie ngũũnenga.
17 #
Mwa 9.6; Ali 24.17; Mat 5.21; 19.18; Mk 10.19; Lk 18.20; Alo 13.9; Yak 2.11 “ ‘Ndũkoae mũndũ.
18 #
Ali 20.10; Mat 5.27; 19.18; Mk 10.19; Lk 18.20; Alo 13.9; Yak 2.11 “ ‘Ndũkalaalae.
19 #
Ali 19.11; Mat 19.18; Mk 10.19; Lk 18.20; Alo 13.9 “ ‘Ndũkoye.
20 #
Kuma 23.1; Mat 19.18; Mk 10.19; Lk 18.20 “ ‘Ndũkanengane ũkũsĩ wa ũvũngũ ĩũlũ wa mũtũi waku.
21 #
Alo 7.7; 13.9 “ ‘Ndũkew'ĩe kĩveti kya mũtũi waku ĩtomo; o na ndũkew'ĩe mũsyĩ wake ĩtomo, mũũnda wake, mũthũkũmi wake wa mũndũ-ũme kana wa mũndũ mũka, ng'ombe yake, ĩng'oi yake, kana kĩndũ o na kĩva kya mũtũi waku.’
22 #
Aevl 12.18-19
“Ĩsu nĩyo mĩao ĩla Mwĩai Ngai wamũnengie inyw'onthe yĩla mwoombanĩte kĩĩmanĩ. Mwĩai Ngai amũnengie mĩao ĩsu yĩla waneenie na wasya mũnene kuma mwakinĩ, mũumbĩnĩ na kĩvindunĩ kĩkamu, na ndaaongela ĩngĩ. Ĩtina wa ũu Mwĩai Ngai nĩwaandĩkie mĩao ĩsu masengeanĩ elĩ ma mavia na anenga masengea asu.
Andũ Maikwatwa nĩ w'ĩa
(Kuma 20.18-21)
23“Ĩvindanĩ yĩla kĩĩma kyonthe kyakanĩte mwaki na mweew'a wasya kuma kĩvindunĩ, atongoi menyu onthe na atumĩa ma mbaĩ syenyu nĩmookie vala nĩĩ 24na mambĩa atĩĩ, ‘Mwĩai Ngai, Ngai waitũ nũtwonisye ũnene wake na ũkumyo wake na tweew'a wasya wake aineena naitũ kuma mwakinĩ! Ũmũnthĩ nĩtwamanya kana no vatonyeke mũndũ akalea kũkw'a o na vala Ngai nĩwaneena nake. 25Yu ĩndĩ, tũtonya kũeka tũkw'e ata? Mwaki ũũ mũnene nũũtũvĩvya tũthele na nĩtũũkw'a tweew'a ĩngĩ wasya wa Mwĩai Ngai, Ngai waitũ. 26Ve mũndũ waaĩkala thayũ ĩtina wa kwĩw'a Ngai ũla wĩ thayũ aineena kuma mwakinĩ o tondũ ithyĩ twĩw'ĩte? 27We Mwose, enda ũthengee na ũyĩthukĩĩsya maũndũ onthe ala Mwai Ngai, Ngai waitũ ũkwasya. Ĩtina wa ũu syoka na ũitũtavya ũndũ wakwĩa, naitũ nĩtũkwĩthukĩĩsya na kwĩanĩsya.’
28“Mwĩai Ngai nĩweewie yĩla mwaneenaa nakwa na ambĩa atĩĩ, ‘Nĩneew'a ũndũ andũ asu makwĩa. Maũndũ onthe ala maneena nĩ maseo. 29Nenda kethĩwa andũ asu nĩmaendeea kwĩthĩwa na kĩkĩo ta kĩu kũla nĩĩ na kũatĩĩa mĩao yakwa yonthe kĩla ĩvinda, mo na nzyawa syoo methĩwa me vaseo ĩvindanĩ yonthe yĩla yũkĩte. 30Enda ũkamee nĩmasyoke maeemanĩ moo. 31Ĩndĩ we Mwose, ĩkalany'a nakwa vaa, na nĩngũũnenga mĩao, motw'ĩo na myamũlo ĩla ũũmamanyĩsya nĩ kana mamĩatĩĩae me nthĩ ĩla ngũmanenga mamesye.’
32“Kwoou inyw'ĩ andũ ma Ĩsilaeli, ĩkai na kĩthito maũndũ onthe ala Mwĩai Ngai, Ngai wenyu ũmwĩaĩĩte. Mũikalee kwĩanĩsya o na ũmwe wa mĩao yake. 33Ĩanĩsyai mĩao ĩsu yonthe nĩ kana maũndũ menyu onthe maendee nesa, na o ta ũu nĩ kana mũendee kwĩkala nthĩ ĩla mũendete kũlika mũmesye.
Currently Selected:
Kũt 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011