Kũt 9
9
Andũ ma Ĩsilaeli Makasinda nũndũ wa Mumo wa Ngai
(Kuma 32.1-35)
1“Ĩthukĩĩsyei inyw'ĩ andũ ma Ĩsilaeli! Yu mũkilĩlye kũinga Ũsĩ wa Yolotani na kũlika mũmesye nthĩ ya andũ ma mbaĩ nene na syĩ ũtonyi mbee wenyu. Ndũa sya mbaĩ isu nĩ nene na ngũta syasyo nĩ ndũlu ikavika matunĩ. 2Andũ ala matũaa ndũanĩ isu nĩ anene na aasa; nĩ ala andũ metawa Aanaki na nĩmũmesĩ na nĩmwĩw'ĩte andũ mayasya kana vai mũndũ ũtonya kũmokita. 3Inyw'ĩ ene yu nĩmũkwĩyonea kana Mwĩai Ngai, Ngai wenyu nũkũmũtongoesya ailyĩ mwaki ũla ũvĩvasya kĩla kĩndũ. Nũkũsinda andũ ma nthĩ ĩsu mũendee kũlika nĩ kana mwĩthĩwe mũtonya kũmalũngya na kũmamina mĩtũkĩ o tondũ wamwathie.
4“Mwĩai Ngai, Ngai wenyu amina kũmalũngya kwondũ wenyu mũikasye kana amũetie mũke kũmesya nthĩ ĩsu nũndũ mwĩ andũ aseo. Aiee, Mwĩai Ngai elũngya andũ asu maume mbee wenyu nũndũ wa mothũku moo. 5Mwĩai Ngai ndeũtuma mwosa nthĩ ya andũ asu nũndũ mwĩ aseo na nĩmwĩkaa ũla ũseo. Emalũngya nũndũ wa mothũku moo na nũndũ eenda kwĩanĩsya ũtianĩo ũla waseũvisye na aaũmae menyu; Avalaamu, Isaka na Yakovo. 6Ĩthĩwai mwĩsĩ kana kwa w'o, Mwĩai Ngai ndeũmũnenga nthĩ ĩno nzeo nũndũ mwĩ aseo. Aiee, inyw'ĩ mwĩ andũ me ngoo mbũmũ.
Andũ ma Ĩsilaeli Maiseũvya Kasaũ ka Thaavu
7“Mũikolwe nĩ ũndũ mwatumie Mwĩai Ngai, Ngai wenyu athata yĩla mwaĩ weũnĩ. Kuma mũthenya ũla mwaumie nthĩ ya Misili, nginya mũthenya ũla mwavikie vaa mwĩthĩĩtwe mũimũng'endea Mwĩai Ngai. 8O na yĩla mwaĩ Kĩĩmanĩ kya Sinaĩ nĩmwatumie Mwĩai Ngai athata; athatie weethĩa o na eenda kũmũmina. 9#Kuma 24.18 Nĩnambatie kĩĩmanĩ ĩũlũ nganengwe masengea ma mavia ala maandĩkĩtwe ũtianĩo ũla Mwĩai Ngai waseũvĩtye nenyu. Nekalile kĩĩmanĩ ĩũlũ vandũ va mĩthenya mĩongo ĩna, ũtukũ na mũthenya, ndeũya kana kũnyw'a kĩw'ũ. 10Mwĩai Ngai nĩwanengie masengea elĩ ma mavia, maandĩkĩtwe kwa kũtemeleelwa na kyaa kyake. Masengea asu maandĩkĩtwe ĩla mĩao ĩkũmi Mwĩai Ngai wamũnengie e ũla mwakinĩ, mũthenyanĩ ũla mwoombanĩte vau kĩĩmanĩ. 11Ĩtina wa mĩthenya ĩsu mĩongo ĩna, ũtukũ na mũthenya, Mwĩai Ngai nĩwanengie masengea elĩ ma mavia ala maandĩkĩtwe ũla ũtianĩo.
12“Nĩvo ĩndĩ Mwĩai Ngai waneenie nakwa ambĩa atĩĩ, ‘Theea mĩtũkĩ nũndũ andũ maku ala waumisye nthĩ ya Misili nĩmevukĩtye. Nĩmatiĩte nzĩa ĩla nameaĩĩte maatĩĩae na makeseũvĩsya ngai ya mũvw'anano.’
13“O ta ũu Mwĩai Ngai nĩwambĩie atĩĩ, ‘Nĩnonete kana andũ aa me ngoo mbũmũ. 14Ndũkatate kũnziĩĩa; ndeka nĩmamine wĩthĩe o na vai mũndũ ũkamalilikana ĩngĩ. Nĩvo ĩndĩ nĩkũtw'ĩkĩthya ĩthe wa mbaĩ nene ya andũ na yĩ ũtonyi mbee woo.’
15“Kwoou nĩnavĩndũkie natheea kuma kĩĩmanĩ kĩu kyakanĩte mwaki, nĩkuĩte ala masengea elĩ ma mavia vala ũtianĩo waandĩkĩtwe. 16Yĩla nasyaisye nĩnoonie kana nĩmũmũvĩtĩsye Mwĩai Ngai, Ngai wenyu kwa kwĩseũvĩsya ngai ya mũvw'anano yĩna wũmbo wa kasalũ. Nĩmwatiĩte kwa mĩtũkĩ nzĩa ĩla Mwĩai Ngai wamwĩaĩĩte mũatĩĩae. 17Vau mbee wenyu nĩnakimanisye nthĩ ala masengea elĩ ma mavia nakwete na matilĩkanga ilungu. 18Nĩvo ĩndĩ nakomie nthĩ na ĩvu nĩ mbee wa Mwĩai Ngai vandũ va mĩthenya mĩongo ĩna, ũtukũ na mũthenya, o tondũ neekĩte vau mbeenĩ. Ĩvindanĩ yĩu ndyaaya lĩu kana kũnyw'a kĩw'ũ, nũndũ wa naĩ ĩla mweekĩte kwa kwĩka ũndũ mũthũku mbee wa Mwĩai Ngai, na kwoou mwatuma athata. 19#Aevl 12.21 Nĩnakwatiwe nĩ w'ĩa nũndũ wa ũthatu mũnene ũla Mwĩai Ngai waĩ naw'o, nũndũ aĩ na woo ũtonya kũtuma amũmina; ĩndĩ Mwĩai Ngai nĩwambĩthukĩĩisye o ta ĩvinda yĩla yĩngĩ. 20O ta ũu Mwĩai Ngai nĩwathatiw'e mũno nĩ Alũni weethĩa akilĩlye kũmũaa na kwoou ĩvindanĩ yĩu nĩnavoyeie Alũni o nake. 21Nĩnoosie kĩndũ kĩu kĩthũku mwaseũvĩtye, nakyo nĩ kala kasalũ na nakekya mwakinĩ. Nĩvo ĩndĩ nakatilangile ilungu, nakathia katw'ĩka mũtutu na nekya mũtutu ũsu kalũsĩnĩ kala katheete kuma kĩĩmanĩ.
22 #
Mot 11.3,34; Kuma 17.7 “O ta ũu yĩla mwaĩ Tavela, Masa na Kivilothi-ataava nĩmwathatisye Mwĩai Ngai. 23#Mot 13.17; Kũt 1.21,26; Aevl 3.16 Yĩla Mwĩai Ngai wamũtũmie mume Katesi-mbalinea na amwĩaĩa mũthi mũkalike na kũmesya nthĩ ĩla wendaa kũmũnenga nĩmwamũng'endeie; mũyaamwĩkwatya, o na mũyaamwĩw'a. 24Kuma yĩla nyie namũmanyie, nĩmwĩthĩĩtwe mũimũng'endea Mwĩai Ngai.
25“Nakomie nthĩ na ĩvu mbee wa Mwĩai Ngai vandũ va mĩthenya ĩsu mĩongo ĩna, ũtukũ na mũthenya, nĩkwĩthĩwa Mwĩai Ngai nĩwaĩtye kana nũkũmũmina. 26Nĩnavoyie Mwĩai Ngai nasya atĩĩ, ‘Ame Mwĩai Ngai Mũsumbĩ, ndũkatate kũmina andũ maku mwene, andũ ala woovoisye na wamaumya nthĩ ya Misili na ũtonyi na vinya waku mũnene. 27Lilikana athũkũmi maku Avalaamu, Isaka na Yakovo na ndũkasisye wũmũ wa ngoo, mothũku na naĩ sya andũ aa. 28Walea kwĩka ũu, andũ ma nthĩ ya Misili nĩmekwasya kana nĩwaemiwe nĩ kũtwaa andũ maku makalike nthĩ ĩla wamathie kana ũkamanenga. Makasya kana waumisye andũ maku nthĩ ya Misili ũmatwae weũnĩ na kũmoaĩa vo nũndũ nĩwamamenete. 29Kwa w'o andũ aa nĩ ala wanyuvie methĩwe maku mwene, na wamaumya nthĩ ya Misili na ũtonyi na vinya waku mũnene.’
Currently Selected:
Kũt 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011