Kũt 8
8
Nthĩ Nzeo ĩla Yĩtw'ĩka Ng'ũndũ ya Andũ ma Ĩsilaeli
1“Ĩthĩwai na kĩthito kwĩanĩsya mĩao yonthe ĩla ngũmũnenga ũmũnthĩ, nĩ kana mũendee kwĩkala thayũ na kwongeleka, na mũilika mũmesye nthĩ ĩla Mwĩai Ngai wathie aaũmae menyu. 2Lilikanai ũndũ Mwĩai Ngai, Ngai wenyu wamũtongoeisye kyalonĩ kĩu kĩasa mwĩsĩlĩte weũnĩ vandũ va myaka mĩongo ĩna. Nĩwamũeteie maũndũ me vinya amũnyivye na aimũtata, nĩ kana amanye kĩla kyaĩ ngoonĩ syenyu, na kana nĩmweeyũmbanĩtye kwĩanĩsya mĩao yake. 3#Mat 4.4; Lk 4.4 Nĩwamũnyivisye na atuma mũkwatwa nĩ nzaa, na ĩndĩ amũnenga ũla lĩu wĩtawa mana mũye. Vai ũmwe wenyu kana aaũmae menyu waĩ aaya lĩu ũsu. Eekie ũu nĩ kana amũmanyĩthye kana mũndũ ndatũaw'a thayũ nĩ lĩu w'oka, ĩndĩ nĩ vamwe na kĩla ndeto ĩneeneetwe nĩ Mwĩai Ngai. 4Ĩvindanĩ yĩu ya myaka mĩongo ĩna, ngũa syenyu iyaatembũkanga o na maũũ menyu mayaaimba. 5Manyai kana Mwĩai Ngai, Ngai wenyu amũkanasya o ũndũ mũndũ ũkanasya mwana wake. 6Kwoou ĩndĩ ĩkai ũndũ mĩao ya Mwĩai Ngai ĩkwasya, na mũyĩkaa maũndũ ala mamwendeeasya na kwĩthĩwa mwĩ na kĩkĩo kyake. 7Mwĩai Ngai, Ngai wenyu nũkũmũtwaa nthĩ nthwii na nou. Nthĩ ĩsu yĩ tũlũsĩ twĩ kĩw'ũ, nthongo na ithima ivĩtĩlĩtye kĩw'ũ kyasyo myandanĩ na iĩmanĩ. 8Nthĩ ĩsu yĩ nganũ, mũthemba ũngĩ wa nganũ yĩtawa mbaale, yĩ nzavivũ, mĩkũyũ, makũngũmanga, mĩtĩ ya mĩthata na ũkĩ wa nzũkĩ. 9Mwĩ nthĩ ĩsu mũkaĩsaa lĩu mũkavũna, na mũikanyivĩwa nĩ kĩndũ. Mavia ma nthĩ ĩsu methĩawa na kyũma na nĩmũtonya kwĩnza kyũma kya langi mũtune kuma iĩmanĩ syayo. 10Mwamina kũya na kũvũna, tũngĩai Mwĩai Ngai, Ngai wenyu mũvea nũndũ wa nthĩ ĩsu nzeo ũmũnengete.
Ũkany'o ĩũlũ wa Kũlwa nĩ Mwĩai Ngai
11 #
Osea 13.5-6
“Ĩsũvĩei mũikese kũlwa nĩ Mwĩai Ngai, Ngai wenyu kwa kũlea kũatĩĩa mĩao, myamũlo na motw'ĩo make ala ngũmũnenga ũmũnthĩ. 12Mwamina kũkwata lĩu ũmwĩanĩe na kwaka nyũmba nzeo sya kwĩkalaa, 13na o ta ũu ng'ombe syenyu, mbũi na malondu, silĩva wenyu na thaavu o vamwe na syĩndũ ila ingĩ syenyu syaingĩva, 14mũikambĩĩe kwĩkathĩĩa na kũlwa nĩ Mwĩai Ngai, Ngai wenyu ũla wamumisye nthĩ ya Misili kũla mwekalaa mwĩ ngombo. 15Nĩwamũtongoeisye kwĩsĩla ũla weũnĩ mũnene waĩ na w'ĩa na nzoka syĩ sumu, na o ta ũu waĩ na ing'auĩ. Mwĩ nthĩ ĩsu nyũmũ na ĩtaĩ kĩw'ũ, Mwĩai Ngai nĩwatumie kĩw'ũ kyuma ĩvianĩ kwondũ wenyu. 16Yĩla mwaĩ weũnĩ nĩwamũnengie lĩu wĩtawa mana mũye, ũla aaũmae menyu mataaya. Amwĩkie ũu nĩ kana mwĩthĩwe na wĩnyivyo na aimũtata nĩ kana ĩtina wa ũu amũathime kwa kũmũnenga syĩndũ nzeo. 17Kwoou ĩndĩ mũyaĩlĩte kũsũanĩa kana ninyw'ĩ mũtumĩte mwĩthĩwa mwĩ athwii kwa ũtonyi na vinya wenyu ene. 18Lilikanai kana Mwĩai Ngai, Ngai wenyu nĩwe ũmũnengae ũtonyi wa kũkwata ũthwii. Ekaa ũu nĩ kana alũlũmĩĩlye ũtianĩo ũla waseũvisye na aaũmae menyu. 19Mwoolwa nĩ Mwĩai Ngai, Ngai wenyu, na kũatĩĩa ngai ingĩ na kũithũkũma o vamwe na kũithaitha, nyie ũmũnthĩ nĩngũkũsĩĩa kana kwa w'o mũkaminwa. 20Mwalea kwĩka ũndũ Mwĩai Ngai ũkwasya, mũkaminwa o ũndũ ũendee kũmina mbaĩ ila ingĩ syume mbee wenyu.
Currently Selected:
Kũt 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011