Kuma 12

Mboka ya Vasaka

1 # Ali 23.5; Mot 9.1-5; 28.16; Kũt 16.1-2 Mwĩai Ngai nĩwaneenie na Mwose na Alũni me o kũu Misili amea atĩĩ, 2“Ũũ nĩw'o wĩĩthĩawa mwei wenyu wa mbee wa mwaka. 3Tavya andũ onthe ma Ĩsilaeli ũmee kana mũthenyanĩ wa ĩkũmi wa mwei ũũ, kĩla mũndũ nĩeosa katena ka ĩlondu kana ka mbũi kwondũ wa andũ ma mũsyĩ wake. 4Ethĩwa andũ ma mũsyĩ wa mũndũ maiya katena kamwe makamina, makwatane mĩsyĩ maĩsanĩe kwĩanana na ũndũ andũ meana na ũndũ mũndũ ũmwe ũtonya kũya. 5Katena kau kethĩwe kate kĩema, kaũme ka mwaka ũmwe, ka mbũi kana ka ĩlondu. 6Sũvĩai tũtena tũu nginya matukũ ĩkũmi na ana ma mwei yĩla andũ onthe ma Ĩsilaeli metũthĩnza ĩa mawĩoo. 7Nĩvo ĩndĩ meosa ĩmwe ya nthakame yatw'o mamĩvake mbwaũnĩ ila syĩ ndeenĩ sya mĩomo na ũla ũngĩ wĩ ĩũlũ wa mũomo wa nyũmba ĩla makekala maiya nyama isu. 8Ũtukũ ũsu, nyama isu ikavĩvw'a na kũĩsanĩw'a na nyũnyi syĩ wũũ na mĩkate ĩuĩtwe ĩtembĩkĩe mbota. 9Mũikaye nyama isu syĩ mbĩthĩ kana syĩ ntheũkye. Ĩndĩ syĩthĩwe syĩ mbĩvye syonthe; mũtwe, mathaio, na nyama sya nda. 10Mũikaeke nyama o na ĩmwe ĩtiale kũvika kĩoko, na ethĩwa ĩkatiala mwĩmĩvĩvya ĩthele vyũ. 11Mwĩĩthĩwa mũilyĩ ũũ mũiya nyama isu: Mwĩkĩĩte ngũa ta andũ meyũmbanĩtye kũthi, mwĩkĩĩte iatũ, na kĩla mũndũ ayĩthĩwa akwete ndata yake. Mwĩya nyama isu na mĩtũkĩ. Ĩno nĩ Mboka ya Vasaka ya Mwĩai Ngai.

12“Ũtukũ ũsu ngesĩla kĩla vandũ nthĩ ya Misili na kũaa mũndũ-ũme ũla wa mbee kũsyawa mĩsyĩnĩ ya andũ ma Misili, na o ta ũu kĩla nyamũ yoo nũme ĩsyaĩtwe mbee. Mũthenya ũsu ngasilĩla ngai syonthe sya andũ ma Misili. Nyie ninyie Mwĩai Ngai. 13Ĩla nthakame ĩvakĩtwe kũu mĩomonĩ ĩkeethĩwa ĩyonany'a nyũmba ila mũĩ. Noona nthakame ĩsu, ngavĩtaa ndekũlika nyũmbanĩ syenyu na ngĩlea kũmũetee ũsilĩlo wa kũmũmina ĩvinda yĩu nĩĩthĩwa ngĩkany'a andũ ma Misili. 14#Kuma 23.15; 34.18; Ali 23.6-8; Mot 28.17-25; Kũt 16.3-8Mũthenya ũsu mũkatanĩaa mboka ya kĩ-ũthaithi ya kũmũlilikany'a maũndũ ala nyie Mwĩai Ngai nĩkĩte. Tanĩaai mboka ĩsu ĩvindanĩ yonthe yĩla yũkĩte.”

Mboka ya Mĩkate ĩte Mbota

15Mwĩai Ngai nĩwaendeeie kũneena na andũ ma Ĩsilaeli aimea atĩĩ, “Vandũ va ĩvinda ya mĩthenya mũonza, mũkeethĩawa na mboka ya mĩkate ĩte mbota. Mũthenya wa mbee wa mboka ĩsu mũkavetangaa mbota ĩla yĩ nyũmbanĩ syenyu. Nĩkwĩthĩwa mũndũ o na wĩva ũla wĩya mũkate wĩ mbota mĩthenyanĩ ĩsu mũonza, akaeka kwĩthĩwa ũmwe wa andũ ma Ĩsilaeli. 16Mũthenyanĩ wa mbee, na wa mũonza mũkoombanaa vamwe na kũnthaitha. Mũikatethye wĩa o na ũmwe mĩthenyanĩ ĩsu, ĩndĩ mũndũ nũtonya kũua lĩu. 17Mũkeethĩawa na Mboka ya Mĩkate ĩte Mbota nũndũ mũthenyanĩ ũsu nĩw'o naumisye andũ ma Ĩsilaeli nthĩ ya Misili kwĩanana na mbaĩ syoo. Kwoou mũkalilikanaa mũthenya ũsu ta ũndũ ũtw'ĩtwe wĩkawe ĩvindanĩ yonthe yĩla yũkĩte. 18Kĩla mweinĩ wa mbee, matukũ ĩkũmi na ana kwambĩĩa masaa ma mawĩoo, mũkaĩsaa mĩkate ĩte mbota nginya matukũ mĩongo ĩlĩ na yĩmwe ma mwei ũsu masaa ma ĩa mawĩoo. 19Vandũ va ĩvinda ya mĩthenya mũonza, mũyaĩlĩte kwĩthĩwa na mbota nyũmbanĩ syenyu. Na mũndũ ũla wĩya kĩndũ kĩ mbota ĩvindanĩ yĩu, akaeka kũtalwa ta ũmwe wa andũ ma Ĩsilaeli, o na ethĩwa nĩ mũeni kana nĩ wa mbaĩ ĩsu. 20Mũikaaye kĩndũ o na kĩmwe kĩkĩĩtwe mbota. Kũndũ kw'onthe kũla mwĩĩthĩwa mũtwĩe, mũikaaye mĩkate yĩkĩĩtwe mbota.”

Mboka ya mbee ya Vasaka

21Mwose nĩweetie atongoi onthe ma andũ ma Ĩsilaeli na amea atĩĩ, “Kĩla ũmwe wenyu nĩanyuve katena ka mbũi kana ka ĩlondu na kũkoaa nĩ kana kĩla mũsyĩ ũtanĩe Mboka ya Vasaka. 22Kĩla ũmwe wenyu nĩose matũ ma mũtĩ wĩtawa ĩsovo na kũmainda nthakamenĩ ya katena kau ĩla yĩkĩĩtwe mbakũlinĩ na kũmĩvaka ila mbwaũnĩ syĩ ndeenĩ sya mũomo o vamwe na ũla ũngĩ wa ĩũlũ. Vai mũndũ o na ũmwe waĩlĩte kumaala nginya ũnĩ ũsu kwakya, 23#Aevl 11.28 nĩkwĩthĩwa Mwĩai Ngai akesĩla kĩla vandũ oae syana sya aũme ila isyaĩtwe mbee mĩsyĩnĩ ya andũ ma Misili. Ĩndĩ yĩla wĩona ĩla nthakame ndeĩtĩkĩlya Mũlaĩka ũla ũetae kĩkw'ũ alike nyũmbanĩ syenyu na kũmũaa. 24Inyw'ĩ na nzyawa syenyu mũkeekaa ũndũ ũũ ũtw'ĩtwe wĩkawe tene na tene. 25Yĩla mwĩlika nthĩ ĩla mwathĩtwe nĩ Mwĩai Ngai, mwĩendeeaa kwĩthĩwa na mboka ĩsu. 26Syana syenyu syamũkũlya, ‘Mboka ĩno yonanasya ũndũ mwaũ?’ 27Mwĩisũngĩa mũsyĩe, ‘Ĩno nĩ nthembo ya Vasaka tũthembeaa Mwĩai Ngai, nũndũ nĩwesĩlile ĩũlũ wa nyũmba sya andũ ma Ĩsilaeli yĩla maĩ Misili na ooaa andũ ma Misili, ĩndĩ ithyĩ atũeka twĩ thayũ.’ ”

Andũ ma Ĩsilaeli nĩmakumanie mathaitha. 28Nĩvo ĩndĩ maendie na meeka kwĩanana na ũndũ Mwĩai Ngai weeaĩie Mwose na Alũni.

Kũawa Kwa Makithathi

29 # Kuma 4.22-23 Ũtukũ katĩ Mwĩai Ngai nĩwooaie mũndũ-ũme ũla wasyaĩtwe mbee mĩsyĩnĩ ya andũ ma Misili, kwambĩĩa mwana wa mũsumbĩ ũla waaĩlĩte kũtiĩĩwa ũsumbĩ, kũvika mwana wa ngombo ĩla wĩa wayo nĩ kũthia. O ta ũu nĩwooaie kĩla nyamũ nũme ya indo ĩla yasyaĩtwe mbee. 30Ũtukũ ũsu mũsumbĩ, anini make, na andũ onthe ma Misili nĩmaamũkie. Kwaĩ na kĩĩo kĩnene kĩla vandũ nthĩ ĩsu ya Misili, nũndũ vai mũsyĩ o na ũmwe ũtaĩ na mũndũ mũkw'ũ. 31Mũsumbĩ nĩwatũmanie Mwose na Alũni ũtukũ o ũsu na amea atĩĩ, “Ũkĩlai mũthi, mume katĩ wa andũ makwa, inyw'ĩ, na andũ onthe ma Ĩsilaeli! Endai mũkathaithe Mwĩai Ngai o tondũ mũkũlĩtye. 32Osai mbũi, malondu, na ng'ombe syenyu o tondũ mũkũlĩtye; endai na mũimboyea ũathimo.”

33Andũ ma Misili nĩmeeie andũ ma Ĩsilaeli nĩmekalaate maume nthĩ ĩsu nũndũ maasyaa atĩĩ, “Nĩtũũkw'a ithyonthe tũthele mwalea kũthi,” 34Nĩmoosie mũtu woo wa nganũ ũla maindĩte ũtemwĩkĩe mbota mawĩkĩa syĩndũnĩ syoo sya kũindĩa mũtu. Nĩmailingile na ngũa syoo na maikua na ituo. 35#Kuma 3.21-22 Andũ ma Ĩsilaeli nĩmeekie kwĩanana na ũndũ Mwose wamatavĩtye; nĩmeetisye andũ ma Misili syĩndũ sya wanake sya thaavu na sya silĩva na ngũa. 36Mwĩai Ngai nĩwatumie andũ ma Misili manenga andũ ma Ĩsilaeli ndaĩa nginya mamanenga kĩla mametĩtye. Kwa nzĩa ĩsu andũ ma Ĩsilaeli nĩmakuie ũthwii wa andũ ma Misili.

Andũ Ma Ĩsilaeli Mayuma Misili

37Andũ ma Ĩsilaeli nĩmambĩĩie kyalo kuma vandũ vetawa Lamesesi melekele vangĩ vetawa Sukothi; maĩ ta andũ ngili maana thanthatũ maendete na maũũ, vate ũtalo wa aka na syana. 38Vaĩ andũ angĩ aingĩ mataĩ ma Ĩsilaeli maendanisye namo me na mbũi, malondu na ng'ombe mbingĩ. 39Nĩmauie tũmĩkate tũte mbota twa ũla mũtu maindĩte na makakua kuma Misili. Mũtu ũsu ndwaĩ mwĩkĩe mbota nũndũ nĩmakalaatilwe maume Misili, na kwoou malea kwĩthĩwa na ĩvinda ya kũseũvya lĩu.

40 # Mwa 15.13; Aka 3.17 Ĩvinda yĩla andũ ma Ĩsilaeli mekalile nthĩ ya Misili yaĩ myaka maana ana na mĩongo ĩtatũ. 41Mũthenya ũla myaka ĩsu maana ana na mĩongo ĩtatũ yathelile oou, andũ onthe ma mbaĩ ya Mwĩai Ngai nĩmaumie nthĩ ya Misili. 42Ũtukũ ũsu Mwĩai Ngai nĩwasyaĩĩisye atia oona kana andũ asu nĩmauma nthĩ ya Misili. Kwoou ũtukũ wa mũthenya ũsu andũ ma Ĩsilaeli na nzyawa syoo mekalaa masalukĩtye nĩ kana mamũnenge Mwĩai Ngai ndaĩa.

Mĩao ĩũlũ wa Vasaka

43Mwĩai Ngai nĩweeie Mwose na Alũni atĩĩ, “Ĩĩ nĩyo mĩao ĩũlũ wa Vasaka: Vai mũndũ ũngĩ waĩlĩte kũya Mboka ya Vasaka ateo andũ ma Ĩsilaeli me oka. 44Ngombo ya mũndũ-ũme ĩla ũthooete nĩtonya kũya mboka ĩsu ĩtina wa kũmyaĩka. 45Vai mũndũ ũkwĩkala kwenyu ta mũeni, kana mũthũkũmi mũandĩke waĩlĩte kũya mboka ĩsu. 46#Mot 9.12; Yoa 19.36 Mboka ĩsu ĩkaĩĩawa nyũmba nthĩnĩ vala ĩseũvĩw'e; ndyaĩlĩte kumaalw'a nza. Vai ĩvĩndĩ o na yĩmwe ya nyamũ ĩla ĩkũĩwa yaĩlĩte kũtũlwa. 47Andũ onthe ma Ĩsilaeli no nginya matanĩe mboka ĩsu, 48ĩndĩ mũndũ ũla ũte mwaĩke ndakatate kũmĩya. Ethĩwa mũndũ ũte wa Ĩsilaeli atũaa katĩ wenyu, na nũkwenda kũya mboka ĩsu anenge Mwĩai Ngai ndaĩa, no nginya mwambe kwaĩka aũme onthe ma mũsyĩ wake. Mũndũ ũsu akeethĩwa ta ũmwe wa andũ ma Ĩsilaeli na nũtonya kũya mboka ĩsu ya Vasaka. 49Mĩao ĩsu ĩkaatĩĩawa nĩ andũ ma Ĩsilaeli, na mũndũ mũeni ũla ũtwĩe katĩ wenyu.” 50Andũ onthe ma Ĩsilaeli nĩmeekie kwĩanana na ũndũ Mwĩai Ngai weeaĩie Mwose na Alũni. 51Mũthenya o ũsu Mwĩai Ngai nĩwaumisye andũ onthe ma Ĩsilaeli nthĩ ya Misili kwĩanana na mbaĩ syoo.

Currently Selected:

Kuma 12: KAMBA

Highlight

Compare

Copy