Kuma 13

Kũvathwa kwa Makithathi Methĩwe ma Mwĩai

1Mwĩai Ngai nĩweeie Mwose atĩĩ, 2#Mot 3.13; Lk 2.23 “Mbathĩe makithathi onthe ma aũme na kuma indonĩ, nũndũ makithathi onthe nĩ makwa.”

Mboka ya Mũkate ũte Mbota

3Mwose nĩweeie andũ atĩĩ, “Lilikanaai mũthenya ũũ ũla mwaumie Misili, vala mwekalaa mwĩ ngombo. Mũthenya ũũ nĩw'o Mwĩai Ngai wamumisye nthĩ ĩsu kwa ũtonyi wake mũnene. Mũikaye mũkate mwĩkĩe mbota. 4Nĩmũkuma nthĩ ya Misili mũthenyanĩ ũũ wa mwei wa mbee naw'o nĩ mwei wa Avivu. 5Mwĩai Ngai nĩwathie aaũmae menyu kana akamũnenga nthĩ ya andũ metawa Akanaani, Aititi, Aamoli, Aivi, na Ayevusi. Yĩla wĩmũtwaa amũlikye nthĩ ĩsu nthwii na nou, no nginya nenyu mwĩthĩawe na mboka ĩno mweinĩ wa mbee wa kĩla mwaka. 6Vandũ va mĩthenya mũonza mũkaĩsaa mĩkate ĩte mĩkĩe mbota, na mũthenyanĩ ũsu wa mũonza mũyĩthĩwa na mboka ya kũnenga Mwĩai Ngai ndaĩa. 7Mũkaĩsaa mĩkate ĩte mĩkĩe mbota vandũ va mĩthenya ĩsu mũonza. Vai kĩndũ kĩkĩe mbota kyaĩlĩte kwĩthĩwa katĩ wenyu, kana mbota o na ĩmwe kwoneka kũla mwĩkalaa. 8Mboka ĩsu yambĩĩa mwĩtavya syana syenyu mũsyĩe mwĩĩka ũu nũndũ wa maũndũ ala Mwĩai Ngai wamwĩkie yĩla mwaumie Misili. 9Kwĩthĩwa na mboka ĩsu kũkeethĩawa ũlilikany'o na ta wonany'o wa kĩndũ kyoveewe kw'oko kana kyũmbĩĩwe itulyanĩ syenyu. Ĩkamũlilikanasya kũendeeaa kũneena na kwĩmanyĩsya mĩao ya Mwĩai Ngai, nũndũ nĩwamumisye nthĩ ya Misili na ũtonyi wake mũnene. 10Kwoou mũkeethĩawa na mboka ĩno ĩvinda yĩla yĩnyuvĩtwe kĩla mwaka.

Makithathi ma Andũ na ma Indo

11“Mwĩai Ngai akamũtwaa amũlikye nthĩ ya Akanaani, ĩla weevĩtie kũmũnenga inyw'ĩ na aaũmae menyu. Yĩla wĩmũnenga nthĩ ĩsu, 12#Kuma 34.19-20; Lk 2.23 no nginya mwĩmũvathĩa makithathi onthe ma aũme. O ta ũu makithathi onthe maũme ma indo syenyu nĩ ma Mwĩai Ngai, 13ĩndĩ no nginya mwovosye ĩng'oi ya mbee ĩũme kwa kũnengane katena ka ĩlondu vandũ vayo. Ethĩwa mũikwenda kũyovosya yĩtũlaei ngingo. O ta ũu no nginya mwovosye kana ka mbee ka kavĩsĩ. 14Ĩvindanĩ yũkĩte mwana waku akũkũlya kĩla ũndũ ũũ wonanasya wĩmũsũngĩa ũmwĩe atĩĩ, ‘Kwa ũtonyi mũnene Mwĩai Ngai nĩwatumisye Misili kũla twekalaa twĩ ngombo. 15Yĩla mũsumbĩ wa Misili woomisye ngoo na alea kũtũlekya tũthi, Mwĩai Ngai nĩwooaie makithathi onthe maũme; ma andũ na ma indo. Kĩu nĩkyo kĩtumaa tũthembea Mwĩai Ngai kĩla ĩkithathi ĩũme ya indo, ĩndĩ tũyovosya syana sitũ nũme ila syasyawa mbee. 16Ũndũ ũsu ũkeethĩawa ũlilikany'o, na ta wonany'o wa kĩndũ kyoveewe kana kĩkĩĩtwe itulyanĩ syenyu. Ũkamũlilikanasya kana Mwĩai Ngai nĩwamumisye Misili kwa ũtonyi wake mũnene.’ ”

Kĩtuĩ kya Mũumbĩ na Kĩtuĩ kya Mwaki

17Yĩla mũsumbĩ wa Misili walekilye andũ ma Ĩsilaeli mathi, Ngai ndaamatongoesya akamesĩlya nzĩanĩ ĩla yĩsĩlĩte katĩ wa nthĩ ya Avilisiti, o na kau nĩyo yaĩ nguvĩ, nũndũ Ngai aisye, “Ndikwenda andũ ma Ĩsilaeli maalyũla mosũanĩo moo na kũsyoka nthĩ ya Misili, yĩla meũmanya kana no nginya mokite.” 18Ĩndĩ Ngai nĩwamatongoeisye meelingĩla kwĩsĩla weũnĩ, kwelekela Ũkanganĩ Mũtune. Andũ asu ma Ĩsilaeli nĩmaumie nthĩ ya Misili meyũmbanĩtye kũkita.

19 # Mwa 50.25; Yos 24.32 Mwose nĩwakuie mavĩndĩ ma Yosevu kwĩanana na ũndũ Yosevu weeĩte andũ ma Ĩsilaeli mevĩte kana makeeka. Yosevu ameie atĩĩ, “Yĩla Ngai wĩũka kũmumya Misili, no nginya mwĩkua mavĩndĩ makwa mũmaumye kũũ.”

20Andũ ma Ĩsilaeli nĩmaumie Sukothi, na mamba maeema mekala vandũ vetawa Ethamu, ũtee wa weũ. 21Mwĩai Ngai nĩwaendaa mbee woo mũthenya e nthĩnĩ wa kĩtuĩ kya mũumbĩ akamatongoeasya nzĩanĩ. Ĩvindanĩ ya ũtukũ nayo ayĩthĩwa e nthĩnĩ wa kĩtuĩ kya mwaki amamulĩkĩle nĩ kana maendae ũtukũ na mũthenya. 22Kĩtuĩ kĩu kya mũumbĩ ĩvinda yonthe kyeethĩawa mbee wa andũ asu mũthenya, na kĩla kya mwaki kĩyĩthĩwa mbee woo ũtukũ.

Currently Selected:

Kuma 13: KAMBA

Highlight

Compare

Copy