Kuma 14

Andũ ma Ĩsilaeli Mayĩinga Ũkanga Mũtune

1Mwĩai Ngai nĩweeie Mwose atĩĩ, 2“Tavya andũ ma Ĩsilaeli masyoke na ĩtina, na mayamba maeema vakuvĩ na Vi-ailothi, katĩ wa Mikitoli na Ũkanga Mũtune. Make maeema ũtee wa ũkanga ũsu, ngalĩkonĩ ĩla ĩthimanĩte na Mbaali-nzevoni. 3Mũsumbĩ nũkũsũanĩa kana andũ ma Ĩsilaeli mekĩta kũtũũa nthĩ ĩsu me avũavũanu na nĩmasiĩĩwe kũthi nĩ weũ. 4Ngoomĩthya ngoo ya mũsumbĩ na aimũatĩĩa, ĩndĩ ũsindi wakwa ĩũlũ wa mũsumbĩ na asikalĩ make ũkatuma nĩnengwa ndaĩa. Nĩvo ĩndĩ andũ ma Misili makamanya kana ninyie Mwĩai Ngai.” Andũ ma Ĩsilaeli nĩmeekie kwĩanana na ũndũ meeiwe.

5Yĩla mũsumbĩ wa Misili wataviw'e kana andũ ma Ĩsilaeli nĩmevithie mathi, we na anini make nĩmavĩndũie mosũanĩo moo ĩũlũ wa andũ asu na makũlya atĩĩ, “Ũũ nĩ ũndũ mwaũ twĩkie, kũlekya andũ ma Ĩsilaeli mathi maeke kũtũthũkũma?” 6Kwoou mũsumbĩ nĩwoosie ĩkasya yake ya kaũ na asikalĩ make. 7O ta ũu, nĩwoosie makasya ma kaũ ala maseo maana thanthatũ na ala angĩ onthe ma nthĩ ya Misili; asu onthe maũngamĩwe nĩ anini make. 8Mwĩai Ngai nĩwoomĩthisye ngoo ya Valao mũsumbĩ wa Misili, na kwoou aatĩĩa andũ ma Ĩsilaeli ala maendee na kuma Misili me na ũsindi mũnene.#14.8 me na ũsindi mũnene: Kana me ungu wa ũsũvĩo wa Mwĩai Ngai. 9Asikalĩ ma Misili me na mbalasi, makasya ma kaũ, na ndeleva syoo nĩmamaatĩĩie na mamakwatĩa vala mambĩte maeema ũtee wa Ũkanga Mũtune vakuvĩ na Vi-ailothi, kũthimana na Mbaali-nzevoni. 10Yĩla andũ ma Ĩsilaeli moonie mũsumbĩ na asikalĩ make mokĩte kũla maĩ, nĩmakwatiwe nĩ w'ĩa na mamwĩkaĩla Mwĩai Ngai amatethye. 11Nĩmakũlilye Mwose atĩĩ, “No kwaĩ mbũa itonya kũthikwa andũ Misili? Watũetae kũũ weũnĩ tũke kũkw'ĩĩa kw'o? Kwa sisya ũndũ ũtwĩkĩte kũtumya Misili! 12Tũyaakũtavya we yĩla twaĩ Misili tũkakwĩa, ‘Ekana naitũ; eka tũthũkũme andũ ma Misili?’ Nĩ kavaa kũmathũkũma kwĩ kũkw'ĩĩa kũũ weũnĩ!”

13Mwose nĩwamasũngĩie amea atĩĩ, “Ekai kũkĩa! Ũngamai na ũlũmu na nĩmũkwona ũndũ Mwĩai Ngai ũkwĩka amũtangĩĩe ũmũnthĩ; andũ ma Misili aya mũkwona ũmũnthĩ mũikamona ĩngĩ. 14Mwĩai Ngai nũkũmũkitĩa, kwoou vai vata wenyu wa kwĩka ũndũ.”

15Mwĩai Ngai nĩwamũkũlilye Mwose atĩĩ, “Nĩkĩ ũũmbĩkaĩla ngũtetheesye? Tavya andũ ma Ĩsilaeli maendee na mbee. 16Ũkĩlya ndata yaku na ũitambũũkya kw'oko kwaku ĩũlũ wa ũkanga kĩw'ũ kĩaanĩke nĩ kana andũ ma Ĩsilaeli mesĩle nthĩ nyũmũ ũkanganĩ. 17Nĩngũmĩthya ngoo sya andũ ma Misili nĩ kana malike nthĩnĩ mamaatĩĩe. Nakwa nĩngũkwata ũkumyo ĩũlũ wa mũsumbĩ, asikalĩ make, makasya make ma kaũ na asikalĩ make ala malĩsĩte mbalasinĩ. 18Andũ ma Misili nĩmeũmanya kana ninyie Mwĩai Ngai namina kũkwata ũkumyo ĩũlũ wa mũsumbĩ, makasya make ma kaũ, na asikalĩ make ala malĩsĩte mbalasinĩ.”

19Mũlaĩka wa Ngai ũla waendaa e mbee wa nguthu ya andũ ma Ĩsilaeli nĩwaumie vau asyoka ĩtina woo. O ta ũu kĩla kĩtuĩ kya mũumbĩ o nakyo nĩkyaumie mbee woo, 20na kyooka katĩ wa andũ ma Misili na andũ ma Ĩsilaeli. Mũumbĩ ũsu nĩwaetie kĩvindu kwa andũ ma Misili ĩndĩ waete kyeni kwa andũ ma Ĩsilaeli, kwoou vai kĩmwe kya ikundi isu ilĩ sya asikalĩ kyaathengeea kĩla kĩngĩ ũtukũ w'onthe.

21Mwose nĩwookĩlilye kw'oko kwake ĩũlũ wa ũkanga na Mwĩai Ngai aluuta kĩw'ũ kya ũkanga na kĩseve kya kwananga kĩ vinya kuma wumĩlonĩ wa syũa. Kĩseve kĩu nĩkyauutanie ũtukũ ũsu w'onthe na ũkanga ũsu watw'ĩka nthĩ nyũmũ. Kĩw'ũ nĩkyaanĩkie 22#1Ako 10.1-2; Aevl 11.29 na andũ ma Ĩsilaeli mesĩla ũkanganĩ nthĩ nyũmũ, kĩw'ũ kyakĩte ũkũta ngalĩko syelĩ. 23Andũ ma Misili nĩmamaatĩĩie na malika nginya ũkanganĩ katĩ me na mbalasi syonthe sya mũsumbĩ, makasya make ma kaũ, na asikalĩ make ala malĩsĩte mbalasinĩ. 24Kũkilĩlyĩ kũkya, Mwĩai Ngai nĩwasyaisye kuma kĩla kĩtuĩnĩ kya mwaki na kĩla kĩngĩ kya mũumbĩ oona ala asikalĩ ma Misili na atuma makwatwa nĩ w'ĩa mwingĩ. 25Nĩwatumie ndĩa sya makasya moo ma kaũ ikũkanga#14.25 ikũkanga: Maandĩko amwe ma Ndeto ya Ngai maĩtye ikwama weethĩa methi na vinya mũno. Nĩvo ĩndĩ andũ ma Misili maisye atĩĩ, “Tũthi tume vala ve andũ ma Ĩsilaeli! Mwĩai Ngai nũendee na kũmokitĩa kũla tũi ithyĩ andũ ma Misili.”

26Mwĩai Ngai nĩweeie Mwose atĩĩ, “Tambũũkya kw'oko kwaku ĩũlũ wa ũkanga nĩ kana kĩw'ũ kĩsyokeanĩe na kũvw'ĩka andũ ma Misili, makasya moo ma kaũ, na asikalĩ moo ala malĩsĩte mbalasinĩ.” 27Kwoou Mwose nĩwatambũũkisye kw'oko kwake ĩũlũ wa ũkanga, na kũikya kĩw'ũ kyasyokeanĩa ũndũ kyeethĩawa kĩilyĩ tene. Andũ ma Misili nĩmatatie kũkĩa maume kĩw'ũnĩ kĩu, ĩndĩ Mwĩai Ngai nĩwamavw'ĩkie na kĩw'ũ vau ũkanganĩ nthĩnĩ. 28Kĩw'ũ nĩkyasyokeanĩie kyavw'ĩka makasya asu ma kaũ, andũ ala malĩsĩte mbalasinĩ, na asikalĩ onthe ma mũsumbĩ ala maĩ manamaatĩĩa andũ ma Ĩsilaeli ũkanganĩ katĩ. Vai ũmwe woo waavĩta. 29Ĩndĩ andũ ma Ĩsilaeli nĩmesĩle nthĩ nyũmũ ũkanganĩ katĩ, kĩw'ũ kyakĩte ũkũta ngalĩko syelĩ.

30Mũthenya ũsu Mwĩai Ngai nĩwatangĩĩie andũ ma Ĩsilaeli kuma ũtonyinĩ wa andũ ma Misili. Andũ ma Ĩsilaeli nĩmoonie andũ ma Misili mavalũkangĩte ũtee wa ũkanga me akw'ũ. 31Yĩla andũ ma Ĩsilaeli moonie ũtonyi mũnene ũla Mwĩai Ngai woonanisye kũla kwĩ andũ ma Misili, nĩmamũnengie Mwĩai Ngai ndaĩa, na mamũĩkĩĩa we na mũthũkũmi wake Mwose.

Currently Selected:

Kuma 14: KAMBA

Highlight

Compare

Copy