Kuma 15

Wathi wa Mwose

1 # Ũvu 15.3 Mwose na andũ ma Ĩsilaeli nĩmamwinĩie Mwĩai Ngai wathi ũũ:

“Nĩngũmwinĩa Mwĩai Ngai,

nũndũ nĩwasinda ũkumyonĩ wake mũnene,

nĩwavw'ĩka mbalasi na ala mailĩsĩte ũkanganĩ.

2 # Sav 118.14; Ĩsa 12.2 Mwĩai Ngai nĩwe ũmbũkitĩaa;

nĩwe wandangĩĩa.

Nĩwe Ngai wakwa, nakwa nĩngũmũtaĩa,

nĩ Ngai wa ĩthe wakwa, na nĩngwina ĩũlũ wa ũnene wake.

3Mwĩai Ngai nĩ ngũmbaũ ya kaũ;

etawa Mwĩai Ngai.

4“Nĩwainda makasya ma kaũ ma mũsumbĩ wa Misili,

na asikalĩ make ũkanganĩ;

anini make ala aseo vyũ

nĩmaindiwe Ũkanganĩ Mũtune makw'ĩĩa vo.

5Nĩmavw'ĩkwa nĩ kĩw'ũ kingĩ kya ũkanga;

malika ta ĩvia na ku nthĩ ũkanganĩ.

6“Kw'oko kwaku kwa aũme, we Mwĩai Ngai,

kwĩ vinya mũnene;

nĩkũminaa amaitha makathela vyũ.

7Kwondũ wa ũnene waku wa mwanya,

nũsindaa amaitha maku;

ũthatu waku nĩwakanaa ũkamavĩvya ta nyeki mbũmũ.

8Nĩwaveveeie ũkanga na kĩw'ũ kyeeyũmbĩanĩa,

kĩw'ũ kingĩ kyeethĩwa ta ũkũta,

kĩw'ũ kya vala valiku vyũ ũkanganĩ nĩkyakamie kyooma.

9Mũmaitha asya atĩĩ, ‘Nĩngũmaatĩĩa na nĩngũmakwata;

nĩngũaany'a ũthwii woo na kwosa kĩla ngwenda;

nĩngũkũa ũvyũ wakwa na kũmamina na kw'oko kwakwa.’

10Ĩndĩ nĩwaveveeie ũkanga na mĩthũmũ yaku,

naw'o wamavw'ĩka;

nĩmalikile ta kyũma na ku kĩw'ũnĩ kĩu kingĩ kya ũkanga.

11“Nũũ katĩ wa ngai ila ingĩ ũilyĩ taku we Mwĩai Ngai.

Nũũ ũilyĩ taku, ũtheu waku nĩ wa kũseng'ya,

ũkumyo waku nĩ wa kũkĩwa, na wĩkaa maũndũ ma kũseng'ya?

12Nĩwatambũũkisye kw'oko kwaku kwa aũme,

na nthĩ yamelya amaitha maitũ.

13Kwa wendo waku mwingĩ,

nũũtongoesya andũ ala watangĩĩa;

kwa vinya waku nũũmatongoesya malike

wĩkalonĩ waku mũtheu.

14Andũ ĩũlũ wa nthĩ makeew'a na kũkwatwa nĩ w'ĩa;

w'ĩa mwingĩ ũkakwata Avilisiti.

15Atongoi ma nthĩ ya Etomu nĩmakwatĩtwe nĩ w'ĩa;

andũ me ũtonyi ma nthĩ ya Moavi nĩmeũthĩlĩw'a nĩ w'ĩa;

andũ ma Kanaani nĩmakw'ĩte ngoo vyũ.

16W'ĩa mwingĩ na kũtelema kũnene kũkamakwata;

makoona vinya waku, we Mwĩai Ngai.

Makaũngama matetonya me na w'ĩa mwingĩ,

nginya andũ maku mambe kũvĩtũka;

andũ maku ala woovoisye kuma ũkombonĩ.

17Ũkamatwaa na kũmanenga ũtũo kĩĩmanĩ kyaku mwene;

vala nĩvo we Mwĩai Ngai ũnyuvĩte vethĩwe ũtũo waku,

Ĩkalũnĩ yĩla we mwene wakĩte.

18We Mwĩai Ngai ũkasumbĩka tene na tene!”

Wathi wa Miliamu

19Yĩla mbalasi sya mũsumbĩ, makasya make ma kaũ na ala malĩsĩte mbalasinĩ, malikile ũkanganĩ, Mwĩai Ngai nĩwatũngĩanĩie kĩw'ũ kyaw'o kyamavw'ĩka; ĩndĩ andũ ma Ĩsilaeli mesĩlile nthĩ nyũmũ ũkanganĩ ũsu katĩ.

20Mũndũ mũka mwathani weetawa Miliamu, nake nĩ mwĩĩtu-a-inyia wa Alũni, nĩwoosie ndambulĩnĩ na aka ala angĩ mamũatĩĩa makũnĩte ndambulĩnĩ masũngĩte. 21Miliamu nĩwamainĩie wathi ũũ:

“Mwinĩei Mwĩai Ngai,

nũndũ nĩwasinda ũkumyonĩ wake mũnene;

nĩwainda mbalasi na ala mailĩsĩte ũkanganĩ.”

Kĩw'ũ kĩ wũũ kya Vandũ Vetawa Mala

22Nĩvo ĩndĩ Mwose watongoeisye andũ ma Ĩsilaeli kuma Ũkanganĩ Mũtune mathi mavika weũnĩ wa Suli. Vandũ va mĩthenya ĩtatũ nĩmaendie mesĩlĩte weũnĩ ũsu, ĩndĩ vai vandũ maaona kĩw'ũ. 23Nĩmavikie vandũ vetawa Mala, ĩndĩ kĩw'ũ kĩla meethĩie vau kyaĩ wũũ ũkethĩa maitonya ũkĩnyw'a. Kĩu nĩkyo kĩtumi vandũ vau vetawa Mala.#15.23 Mala Ũalyũlo wa ĩsyĩtwa yĩĩ kĩthyomonĩ kya Kĩevelania nĩ wũũ 24Andũ nĩmanyungunyĩisye kũla kwĩ Mwose na mamũkũlya atĩĩ, “Twĩnyw'a kyaũ?” 25Mwose nĩweekaĩlile Mwĩai Ngai, nake amwony'a kĩlungu kya mũtĩ. Mwose nĩwakyosie akĩkya kĩw'ũnĩ kĩu nakyo kyeethĩwa kĩ kĩseo kwa kũnyuwa.

Vau Mwĩai Ngai nĩwamanengie motw'ĩo na myamũlo ya ũndũ maĩlĩte kwĩkalaa, na vau amatata ũndũnĩ ũsu. 26Nĩwameie atĩĩ, “Ethĩwa mũkambĩw'aa vyũ kwa kwĩka maũndũ ala maĩlu kwakwa na kwĩka ũndũ mĩao yakwa ĩkwasya na kwĩanĩsya motw'ĩo makwa, ndikamũsilĩla kwa kũmũetee mowau ala naeteie andũ ma Misili. Ninyie Mwĩai Ngai ũla ũmũvoasya.”

27Nĩvo ĩndĩ andũ ma Ĩsilaeli maendie mavika Elimu, vandũ vaĩ ithima ĩkũmi na ilĩ sya kĩw'ũ, na mĩtĩ ya mĩkĩndũ mĩongo mũonza; nĩmambie maeema ũtee wa ithima isu.

Currently Selected:

Kuma 15: KAMBA

Highlight

Compare

Copy